No Entrega!

“Laga nos no entregá den hacimentu di loke ta excelente, pasobra n’e debido tempu nos lo cosechá si nos no cansa.”—GALATIONAN 6:9.

1, 2. (a) Den ki maneranan un leon ta yag? (b) Riba ken e Diabel ta specialmente interesá pa dirigí su atake?

UN LEON ta yag den vários manera. Tin biaha e ta atacá su víctima di sorpresa na posnan natural of cantu di camindanan hopi usá. Pero tin biaha, segun e buki Portraits in the Wild, un leon “ta simplemente probechá di un situacion—por ehempel, ora e topa un yu di zebra na soño.”

² Nos “adversario, e Diabel,” apostel Pedro ta splica, “ta cana rond manera un leon gruñando, buscando un hende pa devorá.” (1 Pedro 5:8) Sabiendo cu e tempu cu a ked’é ta corticu, Satanas ta eherciendo mas presion cu nunca riba hende pa stroba nan di sirbi Jehova. Sin embargo, e “leon gruñando” aki ta specialmente interesá pa dirigí su atake riba Jehova su sirbidornan. (Revelacion 12:12, 17) Su métodonan di yag ta similar cu esnan di su ekivalente den e mundu di animal. Con asina?

3, 4. (a) Ki métodonan Satanas ta usa pa atacá Jehova su sirbidornan? (b) Debí cu esaki ta un “tempu crítico, duru pa trata cuné,” ki preguntanan ta surgi?

³ Tin biaha Satanas ta purba un trampa—persecucion of oposicion dirigí pa kibra nos integridad pa asina nos stop di sirbi Jehova. (2 Timoteo 3:12) Pero, mescos cu e leon, na otro ocasion e Diabel simplemente ta probechá di un situacion. E ta warda te ora nos bira desanimá of cansá, i e ora ei e ta purba probechá di nos estado mental deprimí pa pone nos entregá. Nos no mag bira un víctima fácil!

⁴ Sin embargo, nos ta bibando den e periodo di mas difícil den henter historia humano. Den e ‘tempu crítico aki, duru pa trata cuné,’ hopi di nos por sinti nos desanimá of deprimí na cierto ocasion. (2 Timoteo 3:1) Con, anto, nos por evitá di cansa asina tantu cu nos ta bira un víctima fácil p’e Diabel? Sí, con nos por haci caso dje conseho inspirá di apostel Pablo: “Laga nos no entregá den hacimentu di loke ta excelente, pasobra n’e debido tempu nos lo cosechá si nos no cansa”?—Galationan 6:9.

Ora Otronan Ta Desapuntá Nos

5. Kico a pone David cansa, pero kico e no a haci?

⁵ Den tempunan bíblico, asta e sirbidornan di Jehova di mas fiel kisas a sinti nan deprimí. “Mi a cansa cu mi suspiramentu,” e salmista David a skirbi. “Henter anochi mi ta haci mi cama landa; cu mi lágrimanan mi ta haci mi propio canapé pasa over. Di iritacion mi wowo a bira débil.” Pakico David a sinti asina? “Pa causa di tur esnan cu ta mustra hostilidad pa cu mi,” el a splica. E accionnan ofensivo di otronan a causa David asina tantu dolor di curason cu su lágrimanan a core cuater-cuater. Tog, David no a alehá for di Jehova debí na loke hende a haci cuné.—Salmo 6:6-9.

6. (a) Con nos por ser afectá dor dje palabranan of accionnan di otronan? (b) Con algun ta haci nan mes un víctima fácil p’e Diabel?

⁶ Di igual manera, e palabranan of accionnan di otronan por pone nos cansa cu hopi dolor di curason. “Ta existí esun cu ta papia sin pensa manera cu hincá di un spada,” Proverbionan 12:18 ta bisa. Ora esun cu ta papia sin pensa ta un ruman cristian, e ‘herida dje hincá’ por ta profundo. E tendencia humano por ta di sintí bo ofendí, tal bes wardando rencor. Esaki ta specialmente e caso si nos sinti cu nos a ser tratá severamente of inhustamente. Nos por haña cu ta difícil pa papia cu e ofensor; nos por asta evit’é deliberadamente. Deprimí cu rencor, algun a entregá i a stop di bini reunionnan cristian. Lamentablemente, dje manera ei nan ta “laga lugá p’e Diabel” probechá di nan como víctima fácil.—Efesionan 4:27.

7. (a) Con nos por evitá di apoyá Satanas su intriga ora otronan ta desapuntá nos of ta ofendé nos? (b) Pakico nos no mester warda rencor?

⁷ Con nos por evitá di apoyá Satanas su intriga ora otronan ta desapuntá nos of ofendé nos? Nos mester trata pa no warda rencor. En bes di esei, tuma e iniciativa pa haci pas of resolvé asuntunan mas lihé posibel. (Efesionan 4:26) Colosensenan 3:13 ta urgi nos: “Sigui . . . pordoná otro libremente si un hende tin un causa pa keho contra un otro.” Pordon ta specialmente apropiado ora esun cu a causa ofensa ta admití su eror i ta berdaderamente repentí. (Compará cu Salmo 32:3-5 i Proverbionan 28:13.) No obstante, ta bon pa nos tene na mente cu pordoná no ta nificá cu nos ta minimisá of pasa por haltu dje malechonan cu otronan a cometé. Pordoná ta enbolbé deshací di rencor. Rencor ta un carga pisá pa hiba. E por ocupá nos pensamentunan, hortando nos di felicidad. E por asta afectá nos salú. Na contraste, pordon, caminda esei ta apropiado, ta obra pa nos propio beneficio. Laga nos, mescos cu David, nunca entregá i alehá for di Jehova pa motibu di loke otro hende a bisa of a haci cu nos!

Ora Nos Ta Cometé Falta

8. (a) Pakico algun ta sinti nan specialmente culpabel tin biaha? (b) Ki peliger tin den haña nos mes asina absorbá den sintimentu di culpa cu nos ta perde tur speransa?

⁸ “Nos tur ta trompecá hopi biaha,” Santiago 3:2 ta bisa. Ora esei sosodé, ta solamente natural pa nos sinti nos mes culpabel. (Salmo 38:3-8) Sintimentu di culpa por ta specialmente fuerte si nos ta luchando cu un debilidad di carni i de bes en cuando ta cai bek atras.a Un cristian cu a enfrentá un bataya asina a splica: “Mi no tabata kier a sigui biba, sin sa si mi a cometé e picá impordonabel of no. Mi a sinti cu mihó mi no haci esfuerso mes den Jehova su sirbishi pasobra probablemente ta demasiado lat pa mi tog.” Ora nos bira asina absorbá den sintimentu di culpa cu nos ta perde tur speransa, nos ta duna e Diabel un chens cu nos—i e por probechá di dje masha lihé! (2 Corintionan 2:5-7, 11) Loke ta necesario kisas ta un punto di bista mas balansá di culpa.

9. Pakico nos mester tin confiansa den Dios su misericordia?

⁹ Ora nos peca ta apropiado pa sinti un midí di culpa. Sin embargo, tin biaha, sintimentu di culpa ta persistí pasobra un cristian ta sinti cu e nunca por ta digno di Dios su misericordia. Tog, Bijbel calurosamente ta sigurá nos: “Si nos confesá nos picánan, e ta fiel i hustu p’e pordoná nos nos picánan i haci nos limpi di tur inhusticia.” (1 Juan 1:9) Tin cualkier motibu válido pa kere cu Dios lo no haci esei den nos caso? Corda, den su Palabra, Jehova ta bisa cu e ta “cla pa pordoná.” (Salmo 86:5; 130:3, 4) Siendo cu e no por gaña, lo e haci manera su Palabra ta primintí, basta nos acerk’é cu un curason repentí.—Tito 1:2.

10. Ki consuelo conmovedor un edicion di pasado dje Toren di Vigilancia a publicá tocante luchamentu contra un debilidad di carni?

¹⁰ Kico bo mester haci si bo ta luchando cu un debilidad i ta haña un recaida? No entregá! Un recaida no necesariamente ta cancelá e progreso cu bo a haci caba. E edicion [na ingles] di 15 di februari, 1954, dje revista aki a ofrecé e consuelo conmovedor aki: “Nos [por] haña nos mes ta trompecá i ta cai hopi biaha riba algun mal custumber cu a penetrá mas profundamente den nos patronchi anterior di bida cu nos a realisá. . . . No desesperá. No concluí cu bo a cometé e picá impordonabel. Esei ta exactamente e manera cu Satanas kier pa bo razoná. E echo cu bo ta sintí bo afligí i fadá cu bo mes ta un prueba riba su mes cu bo no a bai muchu leu. Nunca cansa di acudí na Dios humildemente i sinceramente, buscando su pordon i purificacion i yudansa. Acerk’é mescos cu un yu ta acercá su tata ora e ta den problema, sin importá cuantu biaha pa motibu dje mésun debilidad, i Jehova misericordiosamente lo duná bo e yudansa debí na su bondad inmerecí i, si bo ta sincero, lo e duná bo e realisacion di un concenshi hací limpi.”

Ora Nos Ta Sinti cu Nos No Ta Haciendo Suficiente

11. (a) Con nos mester sinti tocante participacion den e trabou di predicacion di Reino? (b) Ki sintimentunan tocante participacion den e ministerio algun cristian ta lucha cuné?

¹¹ E trabou di predicacion di Reino ta hunga un papel importante den e bida di un cristian, i participando den dje ta trece goso. (Salmo 40:8) Sin embargo, algun cristian ta sinti nan masha culpabel di no por haci mas den e ministerio. Tal sintimentu di culpa por asta caba cu nos goso i pone nos entregá, imaginando cu Jehova ta pensa cu nos nunca ta haci suficiente. Considerá e sintimentunan cu algun persona ta lucha cuné.

“Bo sa cuantu tempu bo ta perde ora bo ta pober?” un ruman muher cristian a skirbi, kende huntu cu su esposo ta lantando tres yu. “Mi mester ta mas ‘zuinig’ posibel. Esaki ta nificá pasa tempu buscando den lugánan cu ta bende artículo di segunda mano, baratiyonan, of asta cosiendo paña. Tambe mi ta dedicá un of dos ora tur siman trahando riba cuponnan cu ta duna descuento—corta nan, surti nan i cambia nan. Tin biaha mi ta sinti mi mes masha culpabel haciendo e cosnan aki, pensando cu mi mester ta dedicando e tempu ei den sirbishi di veld.”

“Mi a pensa cu mi realmente no tabata stima Jehova suficiente,” un ruman muher cu cuater yu i un esposo incrédulo a splica. “Pues mi a lucha pa mi sirbi Jehova. Mi a haci realmente hopi esfuerso, pero mi nunca a sinti cu esei tabata suficiente. Wak, mi no tabatin ningun sintimentu di dignidad, pues mi no por a imaginá con Jehova hamas por a aceptá mi sirbishi na dje.”

Un cristian kende a haña ta necesario pa bandoná e sirbishi di tempu completo a bisa: “Mi no por a soportá e idea cu mi tabata fayando cu mi compromiso pa sirbi Jehova pa tempu completo. Bo no por imaginá con decepcioná mi tabata! Mi ta yora awor ora mi corda esaki.”

12. Pakico algun cristian ta sinti nan hopi culpabel di no por haci mas den e ministerio?

¹² Ta solamente natural pa kier sirbi Jehova mas plenamente posibel. (Salmo 86:12) Pakico, anto, algun ta sinti nan mes hopi culpabel di no por haci mas? Pa algun, esei ta parce di ta relacioná cu un sintimentu general cu nan no ta bal nada, tal bes resultando for di experencianan desagradabel den bida. Den otro casonan, sintimentu inapropiado di culpa por resultá for di un punto di bista irealístico di loke Jehova ta spera di nos. “Mi a sinti cu aménos cu bo traha te ora bo no por mas, probablemente bo no ta haciendo suficiente,” un ruman muher cristian a admití. Como resultado, el a fiha normanan demasiado haltu pa su mes—i a sinti su mes e ora ei asta mas culpabel ora e no por a alcansá nan.

13. Kico Jehova ta spera di nos?

¹³ Kico Jehova ta spera di nos? Senciyamente bisá, Jehova ta spera pa nos sirbié cu henter nos alma, haciendo loke nos circunstancianan ta permití. (Colosensenan 3:23) Sin embargo, por tin un diferencia grandi entre loke nos kier haci i loke nos realísticamente por haci. Nos por ta limitá dor di factornan manera edad, salú, resistencia físico of responsabilidad di famia. No obstante, ora nos ta haci tur loke nos por, nos por tin e confiansa cu nos sirbishi na Jehova ta di henter alma—no mas ni ménos cu esun di un persona kende su salú i circunstancianan ta permitié participá den e ministerio di tempu completo.—Mateo 13:18-23.

14. Kico bo por haci si bo mester di yudansa pa determiná loke realísticamente bo por spera di bo mes?

¹⁴ Con, anto, bo por determiná loke bo realísticamente por spera di bo mes? Kisas lo bo tin gana di papia riba e asuntu cu un amigu cristian di confiansa i maduro, tal bes un anciano of un ruman muher cu experencia, kende conocé bo abilidadnan, bo limitacionnan i bo responsabilidadnan di famia. (Proverbionan 15:22) Corda cu den bista di Dios bo balor como persona no ta ser midí dor di cuantu bo ta haci den e ministerio di veld. Tur sirbidor di Jehova ta precioso p’e. (Ageo 2:7; Malakías 3:16, 17) Loke bo ta haci den e trabou di predicacion por ta mas of ménos cu loke otronan ta haci, pero tanten cu e ta representá lo mihó cu bo por duna, Jehova ta contentu, i bo no tin nodi sintí bo culpabel.—Galationan 6:4.

Ora Hopi Ta Ser Exigí di Nos

15. Den ki maneranan hopi ta ser exigí di ancianonan di congregacion?

¹⁵ Jesus a bisa, “Tur cu ser duná hopi, hopi lo ser exigí di dje.” (Lucas 12:48) Siguramente ‘hopi ta ser exigí’ di esnan cu ta sirbi como anciano di congregacion. Mescos cu Pablo nan ta gasta nan mes na fabor dje congregacion. (2 Corintionan 12:15) Nan tin cu prepará discurso, haci bishita di pastoreo, atendé casonan hudicial—tur sin neglishá nan mes famia. (1 Timoteo 3:4, 5) Algun anciano ta ocupá tambe yudando den construccion di Salonnan di Reino, sirbiendo den Comiténan di Enlace di Hospital, i trahando como boluntario na asamblea i congresonan. Con e hombernan trahador i dedicá aki por evitá di cansa bou dje peso dje responsabilidadnan aki?

16. (a) Ki solucion práctico Jetro a ofrecé Moises? (b) Ki cualidad lo permití un anciano compartí responsabilidadnan apropiado cu otronan?

¹⁶ Ora Moises, un homber modesto i humilde, tabata cansando su mes atendiendo problemanan di otro hende, su suegro, Jetro, a ofrecé un solucion práctico: compartí algun responsabilidad cu otro hombernan cualificá. (Exodo 18:17-26; Númeronan 12:3) “Sabiduria ta cu esnan modesto,” Proverbionan 11:2 ta bisa. Ser modesto ta nificá reconocé i aceptá bo limitacionnan. Un homber modesto no ta keda sin delegá trabou na otronan, ni no ta teme cu di un manera of otro e ta perde dominio dor di compartí responsabilidadnan cu otro hombernan cualificá.b (Númeronan 11:16, 17, 26-29) En bes di esei, e ta ansioso pa yuda nan progresá.—1 Timoteo 4:15.

17. (a) Con miembronan dje congregacion por suavisá e carga di ancianonan? (b) Ki sacrificionan e esposanan di ancianonan ta haci, i con nos por mustra nan cu nos ta apreciá e sacrificionan aki?

¹⁷ Miembronan di congregacion por haci hopi pa suavisá e carga dje ancianonan. Comprendiendo cu ancianonan tin nan propio famia pa percurá p’e, otronan lo no exigí irazonablemente hopi tempu i atencion di ancianonan. Ni nan lo no falta aprecio p’e sacrificionan di buena gana cu e esposanan dje ancianonan ta haci segun cu nan ta compartí inegoistamente nan esposonan cu e congregacion. Un mama di tres yu kende su esposo ta sirbi como anciano a splica: “Un cos cu mi nunca ta keha tocante dje ta e peso adicional cu mi ta carga di buena gana den cas pa mi esposo por sirbi como anciano. Mi sa cu Jehova su bendicion riba nos famia ta ricu pa motibu di mi casá su sirbishi, i mi no ta envidiá loke e ta duna. Sin embargo, realísticamente, hopi biaha mi tin cu haci mas trabou den curá i duna mas disiplina na nos yunan cu normal pa motibu cu mi casá ta ocupá.” Lamentablemente, e ruman muher aki a haña cu algun, en bes di apreciá su carga adicional, tabata duna comentarionan sin heful, manera, “Pakico bo no ta trahando pionero?” (Proverbionan 12:18) Ta cuantu mas mihó pa encomendá otronan pa loke nan ta haciendo en bes di criticá nan pa loke nan no por haci!—Proverbionan 16:24; 25:11.

Debí cu e Fin No A Yega Ainda

18, 19. (a) Pakico esaki no ta tempu pa stop di core den e careda pa bida eterno? (b) Ki conseho oportuno apostel Pablo a duna n’e cristiannan den Jerusalem?

¹⁸ Ora un coredor sa cu e ta cerca e fin di un careda largu, e no ta entregá. Su curpa por ta n’e límite di su awante—agotá, kimá i deshidratá—pero asina cerca e final no ta tempu pa stop di core. Di igual manera, como cristiannan nos ta den un careda p’e premio di bida, i nos ta masha cerca dje liña final. Awor no ta tempu pa nos stop di core!—Compará cu 1 Corintionan 9:24; Filipensenan 2:16; 3:13, 14.

¹⁹ Cristiannan den e promé siglo a enfrentá un situacion similar. Rond di 61 E.C., apostel Pablo a skirbi n’e cristiannan den Jerusalem. Tempu tabata cabando—e “generacion” malbado, e sistema di cosnan hudiu apóstata, tabata cerca di “pasa forbij.” Specialmente e cristiannan den Jerusalem tabatin cu ser alerto i fiel; nan lo tabatin cu hui for dje stad ora nan a mir’é ser rondoná dor di ehércitonan den campamentu. (Lucas 21:20-24, 32) E conseho inspirá di Pablo, anto, tabata oportuno: ‘No cansa i desmayá den boso alma.’ (Hebreonan 12:3) Aki apostel Pablo a usa dos verbo gráfico: “cansa” (kaʹmno) i “desmayá” (e·klyʹo·mai). Segun un escolástico bíblico, e palabranan griego aki a ser “usá dor di Aristóteles pa coredornan cu ta laga bai i cai den otro despues cu nan a pasa e liña final. E lectornan [di Pablo su carta] tabata den e careda ainda. Nan no mester entregá prematuramente. Nan no mester permití nan mes desmayá i cai den otro pa motibu di cansancio. Un biaha mas, nan mester perseverá ora nan confrontá dificultad.”

20. Pakico Pablo su conseho ta oportuno pa nos awe?

²⁰ Ki oportuno Pablo su conseho ta pa nos awe! Confrontá cu mas i mas presion, por tin biaha cu nos ta sinti nos manera un coredor agotá kende su pianan ta cerca di sak den otro. Pero siendo asina cerca dje liña final, nos no mester entregá! (2 Crónicanan 29:11) Esei ta net loke nos Adversario, e “leon gruñando,” lo kier pa nos haci. Afortunadamente, Jehova a haci percuracionnan cu ta duna “poder na esun cansá.” (Isaías 40:29) Kico e percuracionnan aki ta i con nos por saca probecho for di nan lo ser considerá den e siguiente artículo.

[Notanan]

Kico Ta Bo Contesta?

◻ Con nos por evitá di entregá ora otronan ta desapuntá nos of ta ofendé nos?

◻ Ki punto di bista balansá di sintimentu di culpa lo prevení nos di entregá?

◻ Kico Jehova ta spera di nos?

◻ Con modestia por yuda ancianonan di congregacion evitá di cansa?

◻ Pakico Pablo su conseho na Hebreonan 12:3 ta oportuno pa nos awe?