E Punto di Bista Bíblico

E Tera Lo Caba na Candela?

CARBONISA den un holocausto nuclear, kimá dor di un solo cu ta expandiendo, of pegá na candela dor di un dios rabiá—e manera por diferenciá, pero hopi hende ta convencí cu planeta Tera, e hogar di humanidad, lo yega na su fin den un fiernu di candela cu lo caba cu tur cos, un apocalípsis cataclísmico.

Algun hende ta cita textonan di Bijbel cu ta indicá cu Dios lo manda un candela grandi i destructivo pa castigá hende pa nan transgresionnan contra e tera. Otronan ta ripití e opinion di Paul Davies, un profesor n’e Universidad di Adelaide, Australia, kende ta skirbi tocante loke e ta considerá ta e tera su fin inevitabel den un destruccion dor di candela. Den su buki The Last Three Minutes (E Ultimo Tres Minuutnan) e ta duna e teoria: “Segun cu solo sigui hincha cada bes mas i mas, lo e cubri . . . Tera completamente cu su enboltura di candela. Nos planeta lo ser reducí na un pida carbon.” Kico ta e berdad tocante e destino dje tera? Con nos mester comprendé textonan di Bijbel cu ta parce di predicí un destruccion dor di candela?

Dios Ta Interesá?

Na Jeremías 10:10-12, nos ta ser informá: “Jehova ta en berdad Dios. . . . E ta e Hacidor dje tera mediante su poder, Esun cu a establecé e tera productivo firmemente mediante su sabiduria, i Esun cu mediante su comprendimentu a extendé e shelu.” Dios a traha e tera i a establec’é firmemente. Pues, cu sabiduria, amor i comprendimentu el a prepará e tera cuidadosamente pa permanecé indefinidamente como un bunita hogar pa humanidad.

Tocante Dios su creacion di hende, Bijbel ta informá: “Machu i hembra el a crea nan. Ademas, Dios a bendicioná nan i Dios a bisa nan: ‘Sea fructífero i bira hopi i yena e tera i domin’é.’” (Génesis 1:27, 28) Ora el a completá su obra di creacion, e por a declará inekibocablemente cu “e tabata hopi bon.” (Génesis 1:31) E tabata kier pa el a keda asina ei. Mescos cu algun futuro mayor ta diseñá i ta muebla un kamber pa e baby cu nan ta spera, Dios a planta un bunita hofi i a pone e homber Adam einan pa cultiv’é i cuid’é.—Génesis 2:15.

Adam a bandoná perfeccion i su deber pa cuida e tera. Pero acaso e Creador a bandoná Su propósito? Isaías 45:18 ta implicá cu no: “Esaki ta loke Jehova a bisa, e Creador di shelu, . . . e Formador dje tera . . . , Esun cu a establec’é firmemente, cu no a cre’é simplemente pornada, cu a form’é asta pa ser habitá.” (Mira tambe Isaías 55:10, 11.) Aunke hende a neglishá su deber di cuida e tera, Dios a sigui ehecutá su contract cu e tera i bida riba dje. E Ley duná na e antiguo nacion di Israel a percurá pa “un sabat di descanso completo pa e tera” cada séptimo aña. El a incluí leynan bondadoso cu a duna un midí di proteccion na animalnan. (Levítico 25:4; Exodo 23:4, 5; Deuteronomio 22:1, 2, 6, 7, 10; 25:4; Lucas 14:5) Esakinan ta djis un par di ehempel den Bijbel cu ta mustra claramente cu Dios ta interesá masha hopi den humanidad i den tur loke el a duna na hende pa nan cuida.

“E Tera Anterior”

Awor bon, con nos ta armonisá textonan bíblico, cu ta parce di ta na conflicto cu otro? Un texto asina ta 2 Pedro 3:7, cu, segun E Testament Nobo, ta bisa: “E cielunan y téra, qu ta existi awó, pa medio dje mes Palaba ta worde wardá como un tesoro y reserbá pa caba na candéla den e dia di huicio, y di perdicion dje hendenan, qu ta biba sin Dios.” Un otro ta Revelacion 21:1, cu ta bisa: “Mi a mira un shelu nobo i un tera nobo; pasobra e shelu anterior i e tera anterior a pasa forbij.”

Si nos tin cu tuma e palabranan di Pedro literalmente i e planeta Tera tin cu ser destruí dor di un berdadero candela, e ora ei e shelu literal—e streanan i otro cuerponan celestial—tambe tin cu ser destruí dor di candela. Sin embargo, e splicacion aki ta na conflicto cu e garantia hañá den textonan manera Mateo 6:10: “Laga bo boluntad sosodé, mescos cu den shelu, tambe riba tera,” i Salmo 37:29: “E hustunan mes lo poseé e tera, i nan lo biba pa semper riba dje.” Ademas, ki efecto candela lo tin riba solo i streanan cu ya caba ta intensamente cayente i cu ta producí explosionnan nuclear continuamente?

Na otro un banda, hopi biaha Bijbel ta usa e término “tera” den un sentido figurativo. Por ehempel, Génesis 11:1 ta bisa: “Awor tur e tera a sigui ta di un solo idioma.” Aki e palabra “tera” ta referí na humanidad en general, esta n’e sociedad humano. (Mira tambe 1 Reynan 2:1, 2; 1 Crónicanan 16:31.) E contexto di 2 Pedro 3:5, 6 ta implicá e mésun uso figurativo di “tera.” E ta referí na e tempu di Noe ora un sociedad humano malbado a ser destruí den e Diluvio, pero Noe i e miembronan di su cas como tambe e globo mes a ser preservá. (Génesis 9:11) Dje mes manera, na 2 Pedro 3:7, e ta bisa cu esnan cu lo ser destruí ta “hendenan, qu ta biba sin Dios.” E splicacion aki ta cuadra cu e resto di Bijbel. E sociedad malbado designá pa destruccion ta tambe “e tera anterior” cu Revelacion 21:1, citá anteriormente, ta referí na dje.

Sí, mescos cu un tata terenal amoroso lo haci tur loke ta posibel pa haci sigur cu su cas lo no ricibí daño, asina Jehova Dios ta intensamente interesá den su creacion. El a yega di saca un pueblo inmoral i malbado for dje Vaye di Jordan fértil i a duna e cuidadornan nobo dje tera, kendenan tabata den un pacto cuné, e siguransa cu si nan warda su statutonan, ‘e tera lo no saca nan afó pa e echo cu nan a contamin’é dje mes manera cu siguramente lo el a saca e nacionnan afó cu tabata promé cu nan.’—Levítico 18:24-28.

“Un Tera Nobo”

Awe, un sociedad cu ta sexualmente corumpí, violentamente brutu i políticamente corupto a contaminá e tera. Solamente Dios por rescat’é. I esei mes ta loke e ta bai haci. Na Revelacion 11:18, e ta primintí di “causa e ruina di esnan cu ta ruinando e tera.” E tera restorá i renobá lo ser poblá cu hende cu ta teme Dios i ta stima nan próhimo sinceramente. (Hebreonan 2:5; compará cu Lucas 10:25-28.) E cambionan cu ta tuma lugá bou di Dios su Reino celestial lo ta asina profundo cu Bijbel ta papia di “un tera nobo”—un sociedad humano nobo.

Ora nos lesa textonan manera Salmo 37:29 i nos comprendé e declaracion cu Cristo a haci na Mateo 6:10, nos ta keda convencí cu ni forsanan natural descontrolá ni hende cu tur su poder destructivo lo pone un fin na nos planeta. Nan lo no stroba Dios di cumpli cu su propósito. (Salmo 119:90; Isaías 40:15, 26) Hendenan fiel lo biba riba tera meimei di condicionnan di bunitesa ilimitá i goso sin fin. Esei ta e berdad tocante e destino dje tera, pasobra esaki ta i semper tabata e propósito dje amoroso Creador di humanidad.—Génesis 2:7-9, 15; Revelacion 21:1-5.