Spera cu Pacenshi

E WARDADÓ di carné cu cada biaha tabata grita “Lobo!” ora no tabatin ningun lobo, a ripará cu mas despues hende no a haci caso mas di su gritu pa yudansa. Di igual manera awe, hopi hende ta ignorá e binidero dia di Jehova debí cu nan a tende un cantidad di spiertamentu cu a resultá di ta alarma falsu. E gran enemigu di Dios, Satanas e Diabel, e ‘angel falsu di lus’ ei, ta probechá dje echo cu asina tantu hende no ta dicerní cua spiertamentu ta berdadero anto haci caso di dje.—2 Corintionan 11:14.

Un spiritu di satisfaccion propio lo ta peligroso asta pa esnan cu a sirbi Jehova pa basta tempu. Pakico? Considerá e spiertamentu cu apostel Pedro a duna den e promé siglo.

Pensa Cla

Pedro su di dos carta inspirá tabata un recordatorio p’e cristiannan di promé siglo, i pa nos tambe. El a skirbi: “Stimánan, esaki awor ta e di dos carta cu mi ta skirbi boso, den cua, mescos cu den e promé, mi ta stimulá boso facultad di pensa cla, mediante un recordatorio.” (2 Pedro 3:1) Kico ta e base di Pedro su preocupacion? Pedro ta resaltá e presencia di mofadónan kende nan mofa ta debilitá e sentido di urgencia necesario pa cu e tempu den cua Dios su sirbidónan ta biba. Awor ta e tempu pa tene cuidou pa hacidónan di mofa no perhudicá nan. Pues Pedro ta urgi su lectornan pa “corda e dichonan papiá previamente dor dje profetanan santu.” (2 Pedro 3:2; Echonan 3:22, 23) Kico e profetanan a bisa?

Na hopi ocasion Dios su sirbidónan fiel a hala atencion n’e manera cu huicionan divino a trece un fin na maldad. Pedro ta recordá su lectornan dje Diluvio di tempu di Noe cu Dios a usa como un medio pa intervení ora e tera tabata yen di maldad. E Diluvio torencial ei eficasmente a caba cu e mundu dje tempu ei. Pero Dios a conserbá Noe i su famia den un arca huntu cu criaturanan bibiente cu a representá “tur clase di carni.” Leyendanan universal ta demostrá cu e relato di Bijbel ta berdad.a—Génesis 6:19; 2 Pedro 3:5, 6.

Pedro ta yama e intervencion divino ei ‘un echo cu ta scapa e atencion’ di algun hende. Anto despues mofadónan dje tempu ei a convencé algun otro hende pa keda trankil pasobra no tin ningun peliger. Sin embargo, nunca nos mester perde for di bista loke Jehova a haci caba. Pedro ta bisa nos: “Pa e mésun palabra shelu i tera cu ta di awor ta ser wardá pa candela i ta ser reservá p’e dia di huicio i di destruccion di hende malbado.” (2 Pedro 3:7) Sí, intervencion divino lo sosodé atrobe.

Dios No Ta Lento

Miles di aña a pasa caba. Pakico Dios a warda asina tantu pa resolvé e problemanan di humanidad? Atrobe, Pedro ta enfocá riba un otro echo. E ta bisa: “No laga esun echo aki scapa boso atencion, stimánan, cu un dia pa Jehova ta manera mil aña i mil aña ta manera un dia.” (2 Pedro 3:8) Jehova su punto di bista di tempu ta diferente for di esun di nos. P’e Dios eterno, e periodo for dje creacion di Adam te cu awor no ta yega ni un siman. Pero sea cual sea nos punto di bista pa cu tempu, cada mil aña i cada dia cu pasa ta trece nos mas cerca dje realisacion di Jehova su propósito.

“Para wak un wea ta pone cu e nunca ta herebé” ta un dicho cu ta implicá cu djis spera riba un suceso ta parce di pospon’é di sosodé. Sin embargo, Pedro ta recomendá ‘pa spera i tene mashá presente e presencia dje dia di Jehova.’ (2 Pedro 3:12) Con nos por desaroyá un actitud mental cu ta tene nos alerto p’e echo cu intervencion divino ta inminente?

Accion Ta Bisa Mas cu Palabra

Pedro ta enfocá atencion riba echo i accionnan. E ta referí na “actonan santu di conducta” i tambe “echonan di debocion piadoso.” (2 Pedro 3:11) Kico esakinan ta enbolbé?

Un berdadero sirbidó di Dios ta actua den un manera cu ta agradá Dios. E fe di un adoradó berdadero asina ta ser reflehá den su conducta. Esaki ta distinguié for di esnan cu ta djis bisa cu nan ta kere den Dios i den su promesanan. Tal bes bo a ripará cu e ministerio público di Testigonan di Jehova ta haci nan hende diferente. Nan ta bishitá bo cas pa hala atencion n’e promesanan di Dios describí den Bijbel. Pero tambe nan ta duna testimonio di nan speransa i creencianan unda cu nan topa hende.

Un Testigo cu ta tene su mes ocupá declarando su fe na otronan ta reforsá i ta fortalecé su creencianan. Expresion ta profundisá impresion i na mésun tempu ta trece goso i contentamentu interno. Ora nos ta anunciá e bon nobo dje Reino di Dios, nos ta agradando Jehova tambe. Nos sa cu e ‘no ta inhustu p’e lubidá nos trabou i e amor cu nos a mustra pa cu su nomber,’ manera Pedro su compañero, apostel Pablo, ta declará.—Hebreonan 6:10; Romanonan 10:9, 10.

Kico ta e resultado di ta profundamente interesá den plama e bon nobo di Reino durante e último dianan dje mal sistema di cosnan aki? Cientos di miles di hende di curason onrado ta siñando con pa drenta den un relacion íntimo cu Jehova, pa beneficiá di su bondad inmerecí i haña berdadero felicidad den e prospecto di bida eterno den un paradijs terenal.

Conocimentu di Antemano

Aunke nos sa for di Bijbel cu Jehova Dios lo intervení na su debido tempu, nos tin cu haci caso di un spiertamentu mas cu Pedro ta duna: “Teniendo e conocimentu aki di antemano, keda vigilante pa boso no ser hibá cu nan via eror di hende desafiadó di ley i cai for di boso mes firmesa.”—2 Pedro 3:17.

Sigur-sigur Jehova tabata sa di antemano cu algun cu ta falta fe firme lo por a bira desanimá dor dje aparente tardansa di intervencion divino. E tabata sa tambe cu e influencia di hende malbado lo por a corumpí su berdadero sirbidónan of, por lo ménos, debilitá nan creencia di cu e santificacion dje nomber di Dios ta cerca. Lo ta ki trágico pa cai for di firmesa den e dianan final aki!

Awor no ta tempu pa carga duda of pa ta insigur tocante kico Jehova lo haci. (Hebreonan 12:1) Mas bien, awor ta e tempu pa crece den aprecio pa loke Jehova su pacenshi a trece—e prospecto di salbacion pa miyones di hende cu ta bira parti dje multitud grandi internacional i cu ta spera cu anhelo di sobrebibí e binidero tribulacion grandi. (Revelacion 7:9, 14) Pedro ta exhortá: “Sigui crece den e bondad inmerecí i conocimentu di nos Señor i Salbador Jesucristo. Na dje sea e gloria tantu awor i te n’e dia di eternidad.”—2 Pedro 3:18.

“Mantené Boso den e Amor di Dios”

Kedando ocupá den predicá e Reino i asistí regularmente na reunionnan cristian pa adoracion i studio dje Palabra di Dios ta duna nos proteccion. Asina, nos lo no tin tempu pa bira demasiado preocupá tocante e condicionnan deteriorando den e mal sistema djawe. Temor i ansiedad no mester prevalecé den bida di cristiannan berdadero. (1 Corintionan 15:58) Mas ocupá nos ta den sirbi Jehova, mas lihé tempu ta pasa.

Hudas, kende tabata contemporáneo di Pedro i mitar ruman di Jesus, ta exhortá nos: “Boso, stimánan, dor di edificá boso mes riba boso santísimo fe, i haciendo oracion cu spiritu santu, mantené boso den e amor di Dios, miéntras cu boso ta spera e misericordia di nos Señor Jesucristo cu bida eterno na bista.” (Hudas 20, 21) Ripará e importancia di un actitud positivo cu perseverá den oracion ta fomentá. (1 Tesalonicensenan 5:17) Anto Hudas ta agregá: “Sigui mustra misericordia na algun cu tin duda; salba nan dor di ranca nan for di e candela. Pero sigui mustra misericordia na otronan, haciendo esei cu temor, miéntras cu boso ta odia asta e bistí interior cu a ser manchá pa e carni.” (Hudas 22, 23) Ta ki vital pa un fortalecé otro durante e tempu difícil aki! I ki importante ta pa no cai den tentacion, usando e “dia di salbacion” extendé aki como un excuus pa “libertinahe,” cu awor ta asina prevalente den e mundu moralmente corupto djawe.—Hudas 4; 2 Corintionan 6:1, 2.

Dor di haci caso dje conseho amoroso di Pedro, Pablo i Hudas i dor di keda ocupá i activo den e sirbishi di Dios, bo por spera cu pacenshi riba e intervencion di Jehova. Pero lo bo haci esei?

No vacilá pa tuma contacto cu e Testigonan den bo localidad pa yudá bo fortalecé bo fe den e Creador su promesa di bida eterno. Siña kico ta e rekisitonan pa cualificá pa participá den e trabou mundial di duna testimonio aki cu nunca mas lo ser ripití i cu lo concluí n’e tribulacion grandi cu ta acercando. (Marco 13:10) E ora ei lo bo tin e prospecto di biba den e mundu nobo di husticia cu Jehova ta primintí. (2 Pedro 3:13) Tuma su recordatorionan na pechu! Spera cu pacenshi! Keda ocupá!

[Nota]

[Rekonosementu pa Potrèt na página 5]

Lobo: Animals/Jim Harter/Dover Publications, Inc.; hóben wardadó di carné: Children: A Pictorial Archive from Nineteenth-Century Sources/Grafton/Dover Publications, Inc.

Siña awor tocante Dios su promesa di Paradijs