Galad Ta Manda Misionero “te na e Parti Mas Lehano dje Tera”

ACTUALMENTE e Scol Bíblico di Galad di Watchtower tin mas cu mitar siglo caba ta manda misioneronan den estranheria. Dia 11 di september 1999, e di 107 klas di Galad a gradua. E klas a consistí di 48 alumno for di 11 pais, i nan a haña asignacion pa bai sirbi den 24 pais diferente. Nan lo djoin miles di otro misionero, cu a hunga un papel importante den cumpli cu Jesus su último palabranan promé cu el a bai shelu. El a predicí cu su disipelnan lo “ta testigonan di [dje] . . . te na e parti mas lehano dje tera.”—Echonan 1:8.

E programa di graduacion cu a cuminsá n’e Centro Educativo di Watchtower na Patterson, New York, tabata un ocasion espléndido den un ambiente bunita. E graduadonan tabata masha contentu cu nan famianan, amigunan cerá i invitadonan tabata presente den e auditorio. E asistencia total, incluso esnan cu a scucha i wak via coneccionnan di audio i television, tabata 4.992 persona.

Sirbi Jehova i Bo Próhimo Fielmente

“Ken Ta n’e Banda di Jehova?” Esei tabata e tema dje palabranan di apertura di Carey Barber, miembro dje Cuerpo Gobernante i presidente dje programa di graduacion. El a splica cu esaki tabata e cuestion cu e israelitanan den tempu di Moises a enfrentá. El a recordá e graduadonan i e auditorio cu hopi israelita a perde nan bida den desierto pasobra nan no a keda lealmente n’e banda di Jehova. Despues cu nan a bira víctima di idolatria, nan “a sinta pa come i bebe. Despues nan a lanta pa dibertí.” (Exodo 32:1-29) Jesus a spierta cristiannan p’e mésun peliger: “Presta atencion na boso mes pa boso curason nunca bira cargá debí na comementu di mas i bebementu di mas i ansiedadnan di bida, i di ripiente e dia ei ta riba boso instantáneamente.”—Lucas 21:34-36.

E siguiente orador, Gene Smalley, dje Departamento di Redaccion, a puntra e graduadonan: “Boso Lo Resultá Manera un ‘Paregórico’?” El a splica cu n’e idioma ingles nan a duna e palabra griego pa·re·go·rí·a e nificacion di un mescla di remedi cu ta pasa dolor. Sin embargo, na Colosensenan 4:11, apostel Pablo a usa e palabra griego expresivo aki pa describí su colaboradónan. E Traduccion di Mundu Nobo ta traducí e palabra aki como “un yudansa fortalecedor.”

E misioneronan cu tabata bai gradua por ser paregórico moderno den un manera masha práctico, esta, dor di bira un yudansa fortalecedor humilde p’e rumannan local i dor di reflehá un spiritu cooperativo i amoroso den asociacion cu nan compañeronan misionero.

Daniel Sydlik, miembro dje Cuerpo Gobernante, a papia despues riba e tema “Con pa Biba Segun e Regla di Oro.” El a splica cu e excelente principio cu Jesus a declará na Mateo 7:12, esta, cu “tur loke boso kier pa hende haci na boso, boso tambe di igual manera tin cu haci na nan,” ta encerá haci cos positivo pa otro hende, no djis keda sin haci nan daño.

Pa logra éxito den esaki ta rekerí tres cos: un wowo cu ta mira, un curason cu ta sinti i un man cu ta yuda. Resumiendo el a bisa: “Si nos sinti e deseo pa yuda, nos mester yuda mes ora. Nos mester haci extra esfuerso pa haci loke nos lo kier pa otronan haci pa nos.” Esaki ta e caso foral cerca misioneronan cu ta bai otro pais pa yuda hende practicá cristianismo berdadero.

Instructornan Ta Duna Recordatorionan Caluroso

Instructor di Galad Karl Adams a animá e misioneronan cu tabata gradua pa: “Sigui Crece.” Den cua aspectonan? Promé, den conocimentu i den e abilidad pa us’é bon. Na Galad, e alumnonan a siña con pa investigá i haña sa antecedencia i marco di circunstancia di relatonan bíblico. Nan a haña animacion pa considerá con cada relato mester afectá nan bida. El a urgi nan pa sigui haci esaki.

“Di dos, sigui crece den amor. Amor ta algu cu ora bo aliment’é, e ta crece. Si bo neglish’é, e por muri,” ruman Adams a bisa. (Filipensenan 1:9) Awor, como misionero, nan lo mester crece den amor bou di circunstancianan diferente. I di tres: “Sigui crece den e bondad inmerecí i conocimentu di nos Señor i Salbador Jesucristo.” (2 Pedro 3:18) E orador a bisa: “Esaki ta e bondad maraviyoso cu Jehova a mustra mediante su Yu. Segun nos aprecio pa e bondad inmerecí ei ta crece, nos ta haña mas goso den haci Dios su boluntad i den cumpli cu e asignacion cu el a duna nos.”

Un otro instructor di Galad, Mark Noumair, a papia riba e tema: “Aceptá Situacionnan Desafiante cu Amor, i Lo Bo Por Soportá.” El a spierta: “Siña aceptá situacionnan desafiante den e bida di misionero cu amor i lo bo por soport’é. Jehova ta disipliná solamente esnan cu e ta stima. Asta si bo haña cu cierto conseho no ta na su lugá, esta, cu e ta un pikimentu di pieu of inhustu, amor pa Jehova i bo relacion cuné lo yuda bo soport’é.”

Ruman Noumair a señalá cu e trabou di misionero ta encerá diferente responsabilidad. “Pero responsabilidad sin amor, lo no duna bo contentamentu. Sin amor, bo responsabilidadnan di cas manera, cushiná, haci compras, laba fruta i herebé awa, lo bira mashá laf. Bo tin cu para ketu i puntra bo mes: ‘Di con mi ta cumpli cu e responsabilidadnan aki?’ Anto, si bo contestá bo mes: ‘Mi esfuersonan ta contribuí n’e salú i felicidad di mi compañeronan misionero,’ anto lo e no ta difícil pa soportá.” Den un resúmen el a bisa: “Ora ta trata di aceptá disiplina, cumpli cu boso comision di misionero of trata cu malcomprendimentu, si bo soport’é cu amor, esei lo permití bo perseverá den bo asignacion. ‘Amor no ta faya nunca.’”—1 Corintionan 13:8.

Despues, instructor di Galad Wallace Liverance a dirigí presentacion di cantidad di experencia placentero cu e alumnonan a disfrutá di dje trahando cu e congregacionnan local. Ademas di a bai di cas pa cas, nan a usa nan entrenamentu di misionero pa busca hende na paradanan di truck, labanderia, stacion di trein i otro localidadnan.

Misioneronan Experenciá Ta Duna Confiansa

Ora misioneronan ta bai un pais stranhero, tin motibu pa ta demasiado preocupá? Nan por enfrentá e desafionan di un asignacion den estranheria cu éxito? Ora e rumannan aki caba di yega, kico e oficinanan di sucursal ta haci pa yuda nan logra éxito? Pa contestá e preguntanan aki i otronan, Steven Lett, dje Departamento di Sirbishi, i David Splane, dje Departamento di Redaccion, a entrevistá rumannan cu n’e ocasion ei tabata asistí n’e scol pa miembronan di sucursal n’e Centro Educativo di Watchtower. E rumannan cu nan a entrevistá ta sirbi den comité di sucursal na Spaña, Hong Kong, Liberia, Benin, Madagascar, Brazil, i Hapon.

E sirbidónan experenciá aki di Jehova, di cua hopi tin décadanan ta traha como misionero, a fortalecé confiansa dje alumnonan cu tabata gradua i tambe di nan mayor i famianan cu tabata presente. Basá riba nan propio experencia of esun di nan compañeronan misionero, nan a mustra cu bo por trata bo problema i preocupacionnan cu éxito. Kisas nan ta haña nan cu un problema grandi, “pero tin solucion p’e, i Sociedad ta yuda nos,” Raimo Kuokkanen, un misionero na Madagascar, a remarcá. Östen Gustavsson, kende ta sirbi actualmente na Brazil, a bisa: “No ta nos mes a scoge nos asignacion, nos a hañ’é. P’esei, nos a dicidí pa haci nos best pa keda den nos asignacion.” James Linton, kende ta sirbi na Hapon, a bisa cu loke a yud’é tabata “e presencia di rumannan cu ya caba a yega di sirbi den un asignacion di misionero.” Sirbishi di misionero ta un manera felis i satisfaciente pa sirbi Jehova i cuida su carnénan.

Evitá e Plaga Cu Ta Caba cu Spiritualidad

Theodore Jaracz, miembro dje Cuerpo Gobernante, kende e mes a gradua den e di shete klas di Galad na 1946, a duna e discurso di conclusion. E tema tabata: “E Desafio di Keda Bibu Spiritualmente.” Despues di a reconocé na principio cu tin atrocidadnan teribel ta sosodé den vários parti di mundu, el a señalá cu eigenlijk humanidad ta experenciando calamidadnan pió cu eseinan.

Refiriendo na Salmo 91, ruman Jaracz a identificá e “pest” i “destruccion” cu a haci miles di hende rond di nos malu i a mata nan spiritualmente. E Diabel i su sistema malbado a usa propaganda manera pest, basá riba intelectualismo i materialismo, pa debilitá i mata spiritualmente. Pero Jehova ta sigurá nos cu e plaga aki lo no afectá ‘niun hende cu ta biba den e lugá secreto dje Haltísimo.’—Salmo 91:1-7.

Segun ruman Jaracz, “e desafio ta pa keda saludabel den fe, pa keda den e lugá di siguridad. Nos no por ta manera e mofadónan ‘cu no tin spiritualidad.’ I esaki ta un problema awe. E ta un problema cu nos tur den e organisacion ta enfrentá. Boso tambe por topa cuné den boso asignacion di misionero.” (Hudas 18, 19) Pero e misioneronan cu tabata gradua a tende cu nan por logra éxito den mantené nan spiritualidad den nan asignacionnan. A urgi nan pa considerá por ehempel, con nos rumannan ta perseverá na Rusia, na Asia i paisnan na Africa—apesar di prohibicion, oposicion intenso, mofa, propaganda ateista i acusacionnan falsu. I, den hopi caso, nan tabatin tambe problema cu salú como resultado di conflictonan étnico i scarcedad di productonan di promé necesidad.

Ora tin un bahada di spiritualidad, “mester busca e causa dje problema i traha riba dje, siguiendo conseho for dje Palabra di Dios.” E ruman a duna ehempelnan bíblico. Hosué a haña animacion pa lesa su copia dje Ley na bos abou tur dia. (Hosué 1:8) Ora nan a haña e buki di Ley den e dianan di Hosías, Jehova a bendicioná e echo cu nan a aplicá su instruccionnan fielmente. (2 Reynan 23:2, 3) Timoteo tabata conocé e Santu Scritura for di infancia. (2 Timoteo 3:14, 15) E bereanonan tabata mas cu simplemente bon tendedó; Pablo a considerá nan hende di ‘disposicion noble’ pasobra nan a examiná e Scritura diariamente. (Echonan 17:10, 11) I Jesucristo ta e ehempel principal di un persona cu tabata conocé i usa e Palabra di Dios.—Mateo 4:1-11.

Na conclusion, ruman Jaracz a amonestá e misioneronan nobo calurosamente: “Awor boso ta prepará pa cumpli cu boso asignacion di misionero. I literalmente boso ta bai den estranheria, esta, na diferente partinan di tera. Si nos trata cu e desafio pa keda spiritualmente bibu, nos lo no laga nada distraí nos for di loke nos a determiná pa cumpli cuné. Boso ta bai predicá cu celo, inspirá otronan pa imitá boso fe, i nos lo haci oracion huntu cu boso pa Jehova rebibá e personanan cu boso ta siña, mescos cu el a haci cu nos. Asina anto, hopi hende ta bai scapa for dje calamidad spiritual cu ta causando destruccion rond mundu. Nan lo djoin nos na cantidadnan cu mas i mas ta aumentá, den haci Jehova su boluntad. I Jehova bendicioná boso pa boso logra esei.”

Despues cu e presidente a lesa e saludonan for di vários pais rond mundu, tabata tempu pa entregá diploma n’e graduadonan. Despues a sigui lesamentu di un carta caluroso di aprecio cu e alumnonan a componé. Esta gradicidu nan tabata na Jehova i su organisacion p’e entrenamentu special cu nan a ricibí i pa nan respectivo asignacionnan como misionero cu ta bai “te na e parti mas lehano dje tera”!—Echonan 1:8.

[Kuadro na página 29]

Estadísticanan dje Klas

Cantidad di pais representá: 11

Cantidad di pais na cua a asigná nan: 24

Cantidad di alumno: 48

Cantidad di pareha casá: 24

Edad promedio: 34

Promedio di aña den e berdad: 17

Promedio di aña den e ministerio di tempu completo: 12

[Plachi na página 26]

E di 107 Klas di Graduadonan dje Scol Bíblico di Galad di Watchtower

Den e lista aki bou, e rijnan ta numerá di dilanti bai patras, i e nombernan ta bai di robes pa derechi den cada rij.

 1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.