Capítulo 3

Amigo falso dje Bijbel

Den e capítulo aki, nos lo considera e motibo principal di pakico tanto hende di país no cristian ta nenga di acepta e Bijbel como e Palabra di Dios. Históricamente, cristiandad a fingi kerimento den e Bijbel i di ser wardador di dje. Pero organizacion religioso di cristiandad a métenan den algun horror di mas spantoso di pasado, desde tempo di crusada i matanza di 1.500 aña pasá te ne holocausto di nos tempo. Conducta di cristiandad ta un bon motibo pa rechaza e Bijbel? Realmente cristiandad a resultá di ser un amigo falso di Bijbel. En berdad, ora cristiandad a nace den siglo 4 EC, e lucha dje Bijbel pa existi no a caba di ningun manera.

1, 2. (Inclui introduccion.) (a) Pakico hopi hende ta nenga di acepta e Bijbel como e Palabra di Dios? (b) Cua bon trabao nan a haci durante siglo un i dos, pero kico peligroso tabata desaroya?

CERCA e fin dje promé siglo, skirbimento di tur buki di Bijbel tabata completo. Dje tempo ei padilanti, hende cristian a hiba delantera den copiamento i plamamento dje Bijbel completo. Ne mesun tempo, nan a keda ocupá traduciendo e Bijbel na casi tur idioma común dje tempo ei. Sin embargo, mientras cu e congregacion cristian a keda ocupá cu tal trabao admirable, algo tabata formando cu a resulta di ser mashá peligroso pe existencia dje Bijbel.

² E Bijbel mes a profetiza di tal suceso. Na un cierto ocasion Jesús a conta e comparacion di un homber cu a sembra su cunucu cu simía di trigo di bon calidad. Pero, durante cu “hende tabata drumí,” un enemigo a sembra simía cu a produci mal yerba. E dos clase di simía a nace, i pa un tempo e mal yerba a sconde e trigo for di bista. Cu su comparacion, Jesús a mustra cu e fruta di su trabao tabata cristian berdadero pero cu despues di su morto, cristian falso a drenta den e congregacion. Cu tempo tabata dificultoso pa distingi cristian berdadero for di cristian falso.—Mateo 13:24-30, 36-43.

3. Segun apóstol Pedro, ki efecto “cristian” manera mal yerba ta tene riba kerimento den e Bijbel?

³ Apóstol Pedro a duna spiertamento claro tocante efecto di tal “cristian” semehante di mal yerba riba e manera cu hende lo considera cristianismo i e Bijbel. El a bisa: “També lo tin maestro falso den boso. Eseinan mes lo introduci silenciosamente secta destructivo i lo nenga asta e doño cu a cúmpranan, treciendo riba nan mes destruccion rápido. Además, hopi lo sigi nan acto di conducta inmoral, i pa causa di eseinan hende lo zundra e camina dje berdad.”—2 Pedro 2:1, 2.

4. Di ki manera profecía di Jesús i di Pedro tabata cumplí asta durante e promé siglo?

⁴ Asta durante e promé siglo, profecía di Jesús i di Pedro tabata cumplí. Homber ambicioso a infiltra den e congregacion cristian i a sembra desunion. (2 Timoteo 2:16-18; 2 Pedro 2:21, 22; 3 Juan 9, 10) Durante e sigiente dos siglo, filosofía griego a corrumpi e pureza di berdad bíblico, i hopi hende a haci error di acepta doctrina pagano como e berdad bíblico.

5. Constantino a inaugura cua cambio den e campo di religion na principio di siglo 4?

⁵ Den siglo cuater, emperador romano Constantino a adopta “cristianismo” como e religion oficial dje imperio romano. Pero e “cristianismo” cu el a conoce tabata mashá distinto dje religion cu Jesús a predica. Ne tempo ei caba, “mal yerba” tabata florece, net manera Jesús a profetiza. No obstante, nos por keda sigur cu durante tur e tempo ei tabatin algun hende cu a representa e berdadero cristianismo i a haci esfuerzo pa sigi e Bijbel como e Palabra inspirá di Dios.—Mateo 28:19, 20.

Oposicion na traduccion di Bijbel

6. Na ki tempo cristiandad a cuminza forma, i cua tabata un manera cu religion di cristiandad tabata distinto di cristianismo bíblico?

⁶ Tabata den tempo di Constantino cu cristiandad cu nos ta conoce awe a cuminza forma. Dje tempo ei padilanti, e forma degenerá di cristianismo cu a saca raíz no tabata simplemente un organizacion religioso so. El a bira e religion nacional i lider di dje a hunga un papel importante den campo político. Cu tempo, e iglesia apóstata a usa su poder político den oposicion completo cu cristianismo bíblico, introduciendo un otro amenaza peligroso pe Bijbel. Di ki manera?

7, 8. Na ki tempo e papa a expresá oposicion na traduccion di Bijbel, i pakico el a haci esei?

⁷ Ora hende no a papia latín mas como nan idioma diario, traduccion nobo di Bijbel tabata necesario. Pero e Iglesia católico no tabata na fabor di esei mas. Na aña 1079, Vratislav, cu despues a bira rey di Bohemia, a pidi permiso di papa Gregorio VII pa traduci e Bijbel na idioma di su pueblo. E papa a contesta cu No. El a bisa: “Ta keda claro pa hende cu hopi bez ta reflexiona riba dje cu no ta sin motibo cu Dios Todopoderoso kier pe scritura santo keda secreto den cierto lugar, pasobra si e ta keda plenamente bisto na tur hende, kizás nan lo menosprecié i falta respet pe; of hende cu poco educacion lo haya mal comprendimento di dje, locual lo hiba na error.”¹

⁸ E papa tabata kier pe Bijbel keda den lenga latino cu pueblo no por a leza. Contenido di dje tabatin cu keda “secreto,” i no traducí na idioma di pueblo.a E Vulgata latino di Herónimo, traducí na siglo 5 afin cu tur hende por leza e Bijbel, awor a ser usá pa tene e Bijbel secreto.

9, 10. (a) Con oposicion católico romano na traduccion di Bijbel a desaroya? (b) Oposicion dje Iglesia ne Bijbel tabatin cua propósito?

⁹ Cu pasamento di siglo, e Iglesia a tuma un posicion mas fuerte contra e Bijbel den idioma di pueblo. Na aña 1199 papa Inocencio III a skirbi un carta asina fuerte pe arzobispo di Metz, Alemania, cu e arzobispo a kima tur Bijbel cu e por a haya na idioma alemán.³ Na 1229 e sinodo di Tolosa, Francia, a decreta cu “parokiano” no por tene den nan poder ningun buki di Bijbel na nan idioma.⁴ Na 1233 un sinodo provincial di Tarragona, Spaña, a manda pueblo entregá tur buki di “Testament Bieu of Nobo” pa ser kimá.⁵ Den 1407 e sinodo di clero cu arzobispo Thomas Arundel di Oxford, Inglaterra, a reuni, a prohibi expresamente e traduccion di Bijbel na inglés of na cualkier otro lenga moderno.⁶ Na 1431, també na Inglaterra, obispo Stafford di Wells a prohibi traduccion di Bijbel na inglés i di tene tal traduccion den nan poder.⁷

¹⁰ Tal autoridad religioso no tabata purba di destrui e Bijbel. Nan tabata purba di scondé, pe keda den un idioma cu poco hende so por a leza. Asina, nan a spera di evita loke nan a yama herehía pero loke realmente tabata igual cu un desafío na nan autoridad. Si nan a logra, e Bijbel por a bira simplemente un obheto di curiosidad intelectual, cu poco influencia, of ningun, riba bida di pueblo.

Defensor di Bijbel

11. Kico tabata e resultado ora Julián Hernández a hiba Bijbel spañol clandestinamente na Spaña?

¹¹ No obstante, hopi hende sincero, felizmente, a nenga di obedece tal decreto. Pero, tal nengamento tabata peligroso. Hende individual a sufri terriblemente pe “crimen” di ser doño di Bijbel. Por ehempel, considera e caso di un homber spañol yama Julián Hernández. Segun e buki di Foxe na inglés Historia di martirio cristian, Julián (of, Juliano) “a purba di hiba di Alemania na su mes país un gran cantidad di Bijbel, scondí den boco, i marcá como Rijnwijn.” Hende a traicioné i e Inquisicion católico romano a cogé. En cuanto hende cu mester a recibi e Bijbel, nan “tabata tormenta sin misericordia, anto e mayor parti di nan tabata sentenciá na varios castigo. Juliano tabata kimá, binti tabata hazá riba candela, varios tabata condená na cadena perpetua, algun tabata zutá den público, i hopi tabata sentenciá na sclabitud di hala rema di barcu.”⁸

12. Con nos sa cu autoridad religioso di mil aña pasá no a representa cristianismo bíblico?

¹² Ki un abuso horrible di poder! Claramente, tal autoridad religioso di ningun manera tabata representante di cristianismo bíblico! E Bijbel mes ta revela di ken nan tabata ora e ta bisa: “E echo aki ta haci claro ken ta yiu di Dios i yiu di Diabel: Tur cu no ta practica husticia no ta origina cu Dios, ni hende cu no ta stima nan ruman. Pasobra esaki ta e mensahe cu boso a tende desde principio, cu nos mester tene amor un pa otro; no manera Caín, cu a origina cu e malbado i a mata brutalmente su ruman.”—1 Juan 3:10-12.

13, 14. (a) Cua echo notable tocante e Bijbel di mil aña pasá ta mustra su origen divino? (b) Con e situacion a cambia den Europa en cuanto e Bijbel?

¹³ Pero, ta mashá extraordinario cu hende homber i muher a keda dispuesto pa risca tratamento asina cruel pa solamente tene un Bijbel! I ehempel asina a sigi aumenta hopi bez te na nos dia. E debocion profundo cu e Bijbel a inspira den hende, di manera cu nan a keda dispuesto di sufri cu pacenshi i di someténan sin keha na morto terribel sin lanta contra nan tormentador, ta duna evidencia fuerte cu e Bijbel sí ta e Palabra di Dios.—1 Pedro 2:21.

¹⁴ Cu tempo, despues dje rebelion protestante contra e poder católico romano den siglo 16, e Iglesia católico romano a keda obligá di produci traduccion di Bijbel den idioma corriente di Europa. Pero asta asina, e Bijbel a keda asociá mas cu protestantismo en bez di catolicismo. Manera pastor católico romano Edward J. Ciuba a skirbi: “Hende tin cu reconoce onradamente cu un consecuencia di mas trágico dje Reforma protestante tabata cu fiel pueblo católico a descuidá e Bijbel. Aunque nan nunca a lubidé completamente, e Bijbel tabata un buki cerrá pa casi tur católico.”⁹

Crítica intelectual

15, 16. Pakico protestantismo no ta liber di culpa en cuanto oposicion ne Bijbel?

¹⁵ Pero religion protestante no ta liber di culpa en cuanto oposicion ne Bijbel. Durante transcurso di tempo, cierto escolástico protestante a lanza un otro clase di atake contra e Bijbel: un atake intelectual. Durante siglo 18 i 19, nan a desaroya un moda di studia e Bijbel yamá crítica intelectual. Hende intelectual a siña cu hopi dje Bijbel ta leyenda i fantasía. Algun asta a bisa cu Jesús nunca a existi. En bez di yama e Bijbel e Palabra di Dios, escolástico protestante a yamé e palabra di hende, i además, un palabra mashá bruhá.

¹⁶ Aunque hende no ta kere idea di mas extremo mas, ainda nan ta siña tal crítica intelectual den seminario, i no ta raro pa tende pastor protestante nenga públicamente parti grandi di e Bijbel. P’sei, un curant di Australia a cita palabra di un pastor anglicano cu a bisa cu hopi di loke e Bijbel ta contene ta “simplemente incorrecto. Algun historia di dje ta incorrecto. Algun detaye ta keda claramente falsificá.” Tal moda di pensa ta e producto di crítica intelectual.

“Zundrá”

17, 18. Di ki manera conducta di cristiandad a trece reproche riba e Bijbel?

¹⁷ Sin embargo, e conducta di cristiandad por ta e obstáculo di mas grandi pa hende acepta e Bijbel como e Palabra di Dios. Cristiandad ta bisa cu e ta sigi e Bijbel. Pero su conducta a trece mashá reproche riba e Bijbel i riba e nomber cristian mes. Manera apóstol Pedro a profetiza, e camina dje berdad ta ser “zundrá.”—2 Pedro 2:2.

¹⁸ Por ehempel, mientras cu e iglesia tabata prohibi traduccion di Bijbel, e papa tabata apoya esfuerzo militar enorme contra mohamedano di Medio Oriente. Tal gera a yega di ser yamá crusada “santo,” pero no tabatin nada santo den nan. E promé gera—yamá “crusada di pueblo”—tabata un muestra di loke a bini despues. Promé cu nan a sali for di Europa, un ehército ingobernable, instigá pa predicador fanático, a bira contra hudío den Alemania i a mátanan brutalmente den un stad tras di otro. Pakico? Historiador Hans Eberhard Mayer a bisa: “E argumento di cu hudío, como enemigo di Cristo, a merece castigo tabata simplemente un esfuerzo swak pa sconde e berdadero motibo: cudishi.”¹⁰

19-21. Di ki manera e Gera di Trinta Aña, i també trabao di misionero i expansion colonial europeo, ta desacredita e Bijbel?

¹⁹ E rebelion protestante di siglo 16 a kibra e poder di catolicismo romano den hopi país europeo. Un resultado tabata e Gera di Trinta Aña (1618-1648)—“un gera di mas terrible di historia europeo,” segun The Universal History of the World. Pakico nan a bringa e gera? “Odio di hende católico pa protestante, di hende protestante pa católico.”¹¹

²⁰ Ya caba, cristiandad a cuminza extendele for di Europa, hibando civilizacion “cristian” na otro parti di mundo. Tal expansion militar a practica crueldad i cudishi. Na América, conquistador spañol a destrui lihé civilizacion di pueblo americano natural. Segun un historia: “En general, gobernador spañol a destrui civilizacion di pueblo natural, sin introduci esun europeo. Nan golosidad pa oro tabata e motibo principal pa nan bini ne Mundo Nobo.”¹²

²¹ Misionero protestante també a bandona Europa pa otro continente. Un resultado di nan trabao tabata e promocion di colonialismo. Un idea general djawe di esfuerzo di misionero protestante tá: “Den hopi caso trabao di misionero a ser usá como hustificacion i pretexto pa domina pueblo. Hende wel sa dje relacion entre mision, tecnología, i imperialismo.”¹³

22. Di ki manera cristiandad a trece reproche riba e nomber di cristianismo durante siglo 20 aki?

²² Asociacion estrecha entre religion i político di cristiandad a sigi te na nos dia. E último dos gera mundial tabata bringá principalmente entre nacion “cristian.” Clero di ambos banda a estimula hovenan pa bringa i purba di mata enemigo—cu hopi bez tabata dje mesun religion. Segun e buki na inglés Si religion kier paz mundial: “Siguramente no ta un onor pa [religion] cu e sistema di gera djawe a desaroya i a causa mas destruccion den nacion cu ta dedicá na causa di cristianismo.”¹⁴

E Palabra di Dios ta sigi existi

23. Di ki manera e historia di cristiandad ta indica cu e Bijbel ta e Palabra di Dios?

²³ Nos ta relatá tal historia largu i tristu di cristiandad pa enfatiza dos punto. Promé: tal suceso ta un cumplimento di profecía bíblico. Tabata profetizá cu hopi hende cu ta yama nan mes cristian lo trece reproche riba e Bijbel i e nomber di cristianismo, i e echo cu esei ta sosode ta vindica e Bijbel como berdadero. No obstante, nos no mag perde bista dje echo cu e conducta di cristiandad no ta representa cristianismo bíblico.

24. Kico ta identifica cristian berdadero i asina ta condena claramente cristiandad como no cristian?

²⁴ Jesús mes a splica con pa reconoce berdadero hende cristian: “Cu esaki tur hende lo sa cu boso ta mi disípel, si boso tin amor den boso.” (Juan 13:35) Además, Jesús a bisa: “Nan no ta parti di mundo, mescos cu mi no ta parti di mundo.” (Juan 17:16) Ta keda claro den e dos aspecto ei cu cristiandad no ta representa cristianismo bíblico. E ta bisa cu e ta amigo di e Bijbel, pero e ta un amigo falso.

25. Pakico e Bijbel a sobrebiba tur tribulacion te na nos tempo?

²⁵ E segundo punto ta lo sigiente: Den bista dje echo cu cristiandad en conhunto a traha asina hopi contra interés di Bijbel, ta notable en berdad cu e Bijbel a sigi existi te ne dia djawe i ainda ta eherce un bon influencia riba e bida di hopi hende. E Bijbel a sobrebiba oposicion severo contra traduccion di dje, atake di escolástico modernista, i e conducta no cristian dje amigo falso, cristiandad. Pakico? Pasobra no tin otro buki skirbí manera e Bijbel. E Bijbel no por muri. Esei ta e Palabra di Dios, i e Bijbel mes ta bísanos: “Yerba ta seca, flor ta cai, pero e palabra di nos Dios ta permanece firme pa semper.”—Isaías 40:8, Version Popular.

[Nota]

[Komentario na página 34]

Religion protestante principal a participa den un atake intelectual grandi riba e Bijbel

[Plachi na página 26]

E historia di cristiandad realmente a cuminza ora Constantino a legaliza “cristianismo” di su dia

[Plachi na página 29]

Papa Gregorio Vii i Inocencio Iii tabata prominente den e lucha dje Iglesia católico pa stroba traduccion di Bijbel na idioma corriente di pueblo

[Plachi na página 33]

Conducta escandaloso di cristiandad a haci hopi hende duda cu e Bijbel realmente ta e Palabra di Dios

[Plachi na página 35]

Durante e promé gera mundial soldad ruso a buig pa imagen religioso promé cu nan a sali pa mata otro “cristian”