Yudando Otronan Siña e Rekisitonan di Dios

“Necesidad ta poné riba mi. Realmente, ai di mi si mi no declará e bon nobo!”—1 CORINTIONAN 9:16.

1, 2. (a) Den ki trabou cu tin dos aspecto Jehova ta rekerí pa nos participá? (b) Kico hende di curason onrado mester siña pa por bira súbdito dje Reino di Dios?

JEHOVA tin bon noticia pa humanidad. E tin un Reino, i e kier pa hende na tur parti tende tocante dje! Una bes nos siña dje bon nobo aki, Dios ta rekerí pa nos compartié cu otronan. Esaki ta un trabou cu tin dos aspecto. Na promé lugá, nos mester proclamá e bon nobo dje Reino di Dios. Den su profecia tocante e “conclusion dje sistema di cosnan,” Jesus a bisa: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.”—Mateo 24:3, 14.

² E di dos aspecto dje trabou aki ta enbolbé siña esnan cu ta respondé faborablemente n’e proclamacion di Reino. Despues di su resureccion, Jesus a bisa un grupo grandi di su disipelnan: “Bai, pues, i haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan pa warda tur loke mi a manda boso. I, mira! mi ta cu boso tur dia te na e conclusion dje sistema di cosnan.” (Mateo 28:19, 20) ‘Loke Cristo a manda’ no a bini di dje mes; el a siña otronan warda e mandamentunan of rekisitonan di Dios. (Juan 14:23, 24; 15:10) Di manera cu siñando otronan pa ‘warda loke Cristo a manda’ ta enbolbé yuda nan siña e rekisitonan di Dios. Hende di curason onrado tin cu cumpli cu e rekisitonan di Dios pa por bira súbdito di su Reino.

3. Kico e Reino di Dios ta, i kico lo e logra cu ta haci e mensahe di Reino asina un bon nobo?

³ Kico e Reino di Dios ta? I kico lo e logra cu ta haci e mensahe di Reino asina un bon nobo? E Reino di Dios ta un gobiernu celestial. E ta masha precioso i kerí pa Jehova, pasobra e ta e medio dor di cua lo e santificá su nomber, limpiando e di tur reproche. E Reino ta e instrumento cu Jehova lo usa pa causa cu su boluntad ta ser hací riba tera mescos cu den shelu. P’e motibu ei Jesus a siña nos pidi den oracion p’e Reino di Dios bini i a urgi nos pa pon’é na promé lugá den nos bida. (Mateo 6:9, 10, 33) Bo ta mira pakico ta asina importante pa Jehova cu nos ta siña otronan tocante su Reino?

Un Desafio Pero No un Carga Pisá

4. Con nos por ilustrá cu nos obligacion pa predicá e bon nobo no ta un carga pisá?

⁴ Ta un carga pa predicá e bon nobo aki? Absolutamente cu no! Pa ilustrá: Un tata tin un obligacion pa percurá materialmente pa su famia. Keda sin haci esei ta ekivalente na rechasá e fe cristian. Apostel Pablo a skirbi: “Siguramente si un hende no ta percurá pa esnan cu ta di dje mes, i specialmente pa esnan cu ta miembro di su famia, el a nenga e fe i ta pió cu un persona sin fe.” (1 Timoteo 5:8) Pero e obligacion ei ta un carga p’e homber cristian? No si e ta stima su famia, pasobra den tal caso e kier percurá pa nan.

5. Aunke e trabou di predicá i haci disipel ta un obligacion, pakico nos mester ta encantá pa participá den dje?

⁵ Di igual manera, e trabou di predicá i haci disipel ta un obligacion, un rekisito, di cua nos bida mes ta dependé. Pablo a expres’é asina aki: “Necesidad ta poné riba mi. Realmente, ai di mi si mi no declará e bon nobo!” (1 Corintionan 9:16; compará cu Ezekiel 33:7-9.) Sin embargo, nos motivacion pa predicá ta amor, no djis deber. Na promé lugá nos ta stima Dios, pero tambe nos ta stima nos próhimo, i nos sa ki importante ta pa nan tende e bon nobo. (Mateo 22:37-39) E ta duna nan un speransa pa futuro. E Reino di Dios pronto lo corigí inhusticia, eliminá tur opresion, i restorá pas i unidad—tur p’e bendicion eterno di esnan cu ta someté nan mes na su mando hustu. Nos no ta encantá, sí emocioná, pa compartí un bon nobo asina cu otronan?—Salmo 110:3.

6. Pakico e trabou di predicá i haci disipel ta presentá un berdadero desafio?

⁶ Na mésun tempu, e trabou aki di predicá i haci disipel ta presentá un berdadero desafio. Hende ta diferenciá for di otro. No ta tur hende tin e mésun interesnan of abilidadnan. Algun ta bon educá, miéntras otronan tin masha poco educacion. Lesamentu—un tempu un pasatempu faborito—awor ta ser considerá frecuentemente como algu trabahoso. Un problema creciente, asta den paisnan cu ta poseé un tasa haltu di alfabetismo, ta flohera pa cu lesamentu, esta e condicion caminda hende por lesa pero ta desinteresá pa haci esei. Con, anto, nos por yuda hende cu antecedente i interesnan asina variá siña loke Dios ta rekerí?—Compará cu 1 Corintionan 9:20-23.

Adecuadamente Ekipá pa Yuda Otronan

7. Con “e esclabo fiel i discreto” a ekipá nos pa yuda otronan siña e rekisitonan di Dios?

⁷ Un tarea difícil ta mas fácil pa haci si bo tin e bon hermentnan of ekipo. Un herment cu ta apropiado pa un trabou particular awe por ser modificá of asta reemplasá mañan debí na necesidadnan nobo. Ta mescos cu nos comision di proclamá e mensahe tocante e Reino di Dios. Atrabes di añanan, “e esclabo fiel i discreto” a duna nos exactamente e hermentnan corecto, publicacionnan specialmente diseñá pa usa den conducí studio di Bijbel na cas. (Mateo 24:45) Asina nos a ser ekipá pa yuda hende di “tur nacion i tribu i . . . lenga” siña e rekisitonan di Dios. (Revelacion 7:9) De bes en cuando, instrumentonan adicional a ser percurá pa keda al dia cu e necesidadnan nobo den e campo mundial. Laga nos considerá un par di ehempel.

8. (a) Ki papel e buki “Dios Sea Berdadero” a hunga den promové educacion bíblico? (b) Ki instrumento pa e trabou di duna studio di Bijbel a ser percurá na 1968, i con el a ser diseñá specialmente? (c) Con e buki Berdad a yuda den e trabou di haci disipel?

⁸ For di 1946 pa 1968, e buki “Dios Sea Berdadero” a ser usá como un instrumento poderoso pa educacion bíblico, i rond di 19.250.000 ehemplar a ser publicá den 54 idioma. E berdad cu ta hiba na bida eterna cu a ser publicá na 1968, a ser usá pa hopi aña eficasmente pa studia Bijbel cu personanan interesá. Anteriormente, no tabata algu straño pa un hende studia cu Testigonan di Jehova añanan largu sin ser bautisá. Pero e instrumento aki a ser diseñá pa enbolbé e studiante, animando e pa aplicá loke e tabata siñando. E resultado? E buki Los testigos de Jehová, proclamadores del Reino de Dios ta declará: “Pa e tres añanan di sirbishi cuminsando dia 1 di september, 1968, i terminando dia 31 di augustus, 1971, un total di 434.906 persona a ser bautisá—mas cu dobel e cantidad cu a ser bautisá durante e tres añanan di sirbishi anterior!” Desde su publicacion, e buki Berdad a alcansá un circulacion asombroso—mas cu 107.000.000 den 117 idioma.

9. Ki rasgo special e buki Biba pa semper tin, i ki impacto e tabatin riba e fila di proclamadornan di Reino?

⁹ Na 1982 e buki Bo por biba pa semper den Paradijs riba tera a bira e buki primario pa usa pa conducí studio di Bijbel. E herment aki tin mas cu 150 plachi, cada un compañá pa un comentario di splicacion significativo cu ta resaltá brevemente loke e plachinan ta siña. E edicion di october 1982 di Nos Ministerio di Reino a declará: “Den e mas o ménos 20 añanan cu ‘Dios Sea Berdadero’ tabata nos buki primario di studio (for di 1946 pa meimei di añanan ’60) nos fila a crece cu mas di 1.000.000 proclamador nobo di Reino. Anto 1.000.000 publicador mas a bini acerca ora E berdad cu ta hiba na bida eterna a bira nos buki primario di studio despues di su publicacion na 1968. Usando nos buki nobo di studio, Bo por biba pa semper den Paradijs riba tera, nos lo mira un expansion similar den e fila di publicadornan di Reino? Siguramente, si esaki ta Jehova su boluntad!” Tabata evidentemente Jehova su boluntad, pasobra for di 1982 te 1995, mas cu 2.700.000 persona mas a ser agregá n’e fila di proclamadornan di Reino!

10. Ki herment nobo a ser percurá na 1995, i pakico e mester permití studiantenan di Bijbel haci progreso spiritual bastante rápido?

¹⁰ “E cosecha ta grandi, pero e trahadornan ta poco,” Jesus a bisa. (Mateo 9:37) E cosecha en berdad ta grandi. Ainda tin hopi pa haci. Den algun pais hende mester bai riba un lista di espera pa ricibí studio di Bijbel. P’esei cu e intencion di plama e conocimentu di Dios mas rápidamente, na 1995 “e esclabo fiel i discreto” a percurá un herment nobo, e buki di 192 página titulá Conocimentu cu Ta Hiba na Bida Eterno. E instrumento balioso aki no ta enfocá riba doctrina falsu. E ta presentá e berdadnan di Bijbel den un manera positivo. Nos ta spera cu lo e permití studiantenan di Bijbel haci progreso spiritual bastante rápido. E buki Conocimentu ya caba ta haciendo un impacto den e campo mundial cu 45.500.000 ehemplar imprimí den 125 idioma i cu traduccion den 21 idioma mas na caminda.

11. Ki herment eficas a ser percurá pa siña esnan cu ta analfabeta of cu no por lesa muchu bon, i con el a contribuí hopi na nos programa mundial di educacion?

¹¹ Na algun ocasion, “e esclabo fiel” a percurá hermentnan diseñá pa un público specífico of limitá. Por ehempel, kico di hende cu por tin mester di yudansa special debí na nan antecedente cultural of religioso? Con nos por yuda nan siña e rekisitonan di Dios? Na 1982 nos a ricibí net loke nos tabatin mester—e foyeto di 32 página Disfruta di bida riba tera pa semper! E publicacion ampliamente ilustrá aki tabata un herment eficas pa siña esnan cu ta analfabeta of cu no por lesa muchu bon. E ta contené un presentacion di siñansa básico di Bijbel masha simpel i fácil pa comprendé. Desde su publicacion, e foyeto Disfruta di bida a contribuí hopi na nos programa mundial di educacion. Mas cu 99.860.000 ehemplar a ser imprimí den 227 idioma, haciend’e e publicacion mas ampliamente traducí cu e Sociedad Watch Tower a yega di producí te awor!

12, 13. (a) Desde 1990, ki manera nobo “e esclabo fiel” a percurá pa alcansá un público extenso? (b) Con nos por usa e videonan dje Sociedad den nos ministerio di veld? (c) Ki herment nobo a ser percurá recientemente pa asistí nos den nos trabou di haci disipel?

¹² Ademas di publicacionnan imprimí, cuminsando na 1990 “e esclabo fiel” a duna nos un medio di instruccion cu ta ofrecé un manera nobo pa alcansá un público extenso—videocaset. Na october dje aña ei, e video di 55 minuut Los testigos de Jehová... la organización tras el nombre a ser publicá—e promé video cu a yega di ser producí dor dje Sociedad Watch Tower. E presentacion bunita i informativo, disponibel den 35 idioma, ta mustra e organisacion mundial di Jehova su pueblo dedicá, cumpliendo cu e mandamentu di Jesus pa proclamá e bon nobo den tur e tera habitá. E video ta specialmente diseñá pa asistí nos den nos trabou di haci disipel. Publicadornan di Reino mesora a haci uso dje herment nobo aki den e ministerio di veld. Algun a cana cuné den nan tas, semper cla pa mustra of fia personanan interesá. Djis despues di su publicacion, un superintendente biahero a skirbi: “Video a bira un medio di siglo 21 pa alcansá mente i curason di miyones di persona, p’esei nos ta spera cu e video aki lo ta solamente e promé di hopi video cu e Sociedad lo usa pa adelantá e obra mundial di Reino.” En berdad, mas video a ser percurá, incluyendo, e seri di tres parti La Biblia: Un libro de hechos y profecías i Jehovah’s Witnesses Stand Firm Against Nazi Assault. Si e videonan dje Sociedad ta disponibel den bo idioma, bo a haci uso di nan den bo ministerio di veld?a

¹³ Recientemente un herment nobo, e foyeto Kico Dios Ta Rekerí di Nos?, a ser percurá pa asistí nos den nos trabou di haci disipel. Pakico el a ser publicá? Con nos por us’é?

Examinando un Herment Nobo

14, 15. Pa ken e foyeto Rekerí a ser diseñá, i kico e ta contené?

¹⁴ E publicacion nobo Kico Dios Ta Rekerí di Nos? ta diseñá pa hende cu ya caba ta kere den Dios i ta respetá Bijbel. Superintendentenan biahero i tambe misioneronan entrená na Galad cu hopi aña di experencia den paisnan den desaroyo a yuda den e preparacion dje foyeto aki. E ta contené un curso completo di studio cu ta cubri e siñansanan básico di Bijbel. E ta usa un idioma caluroso, simpel i directo. Na mésun tempu, e texto no ta simplista. E ta presentá no solamente “lechi” sino tambe “cuminda sólido” for dje Palabra di Dios den un manera cu mayoria hende mester por comprendé.—Hebreonan 5:12-14.

¹⁵ Den añanan recien publicadornan di Reino den vários pais a pidi pa exactamente un publicacion asina. Por ehempel, e sucursal dje Sociedad Watch Tower na Papua Nueva Guinea a skirbi: “Hende ta confundí dor di siñansanan religioso na conflicto cu otro. Nan tin mester di declaracionnan breve dje berdad, apoyá pa un cantidad di textonan bíblico cu nan por averiguá den nan propio Bijbel. Nan tin mester di un presentacion cla i specífico di loke Dios ta rekerí di cristiannan berdadero i ki custumbernan i prácticanan ta inaceptabel p’e.” E foyeto Rekerí ta net loke nos tin mester pa yuda personanan asina siña e rekisitonan di Dios.

16. (a) Ken particularmente lo por beneficiá dje splicacionnan simpel den e foyeto nobo? (b) Con esnan den bo teritorio por beneficiá dje foyeto Rekerí?

¹⁶ Con lo bo por usa e instrumento nobo aki? Na promé lugá, bo por us’é pa studia cu hende cu tin dificultad pa lesa of cu no ta incliná na lesa.b Personanan asina por beneficiá dje splicacionnan simpel den e foyeto. Despues di a repasá un ehemplar dje publicacion aki cu a ser mandá di antemano, sucursalnan di Watch Tower a skirbi lo siguiente: “E foyeto lo ta masha útil den hopi parti dje pais unda hende no ta incliná na lesa hopi.” (Brazil) “Tin un cantidad basta grandi di imigrante cu no por lesa nan idioma natal i cu ainda tin algun dificultad pa lesa frances. E foyeto aki por ser usá como un yudansa pa studia cu personanan asina.” (Francia) Bo por pensa di hende den bo teritorio cu lo por beneficiá dje foyeto Rekerí.

17. Den ki manera e foyeto nobo por ta útil den hopi pais, i pakico?

¹⁷ Na di dos lugá, den hopi pais e foyeto por sirbi bon pa cuminsá studio di Bijbel cu hende temeroso di Dios sin importá con educá nan ta. Naturalmente, mester haci esfuerso pa cuminsá un studio for dje buki Conocimentu cu Ta Hiba na Bida Eterno. Pero den algun caso lo ta mas fácil pa cuminsá un studio for di un foyeto. Anto na un tempu apropiado, mester pasa e studio p’e buki Conocimentu, nos buki di studio primario i preferí. Relacioná cu e uso aki dje foyeto Rekerí, sucursalnan di Watch Tower a skirbi: “Pa cuminsá studio di Bijbel ta difícil, i e chens di cuminsá un studio ta parce mihó ora publicadornan cuminsá cu un foyeto.” (Alemania) “Un foyeto dje clase aki lo ta masha eficas pa cuminsá studio di Bijbel nobo, cua por ser continuá e ora ei cu e buki Conocimentu.” (Italia) “Aunke haponesnan tin un nivel haltu di educacion, mayoria tin un conocimentu masha limitá di Bijbel i di su siñansanan básico. E foyeto lo mester ta un trampolin excelente p’e buki Conocimentu.”—Hapon.

18. Kico nos mester corda tocante cumpli cu e rekisitonan di Dios?

¹⁸ Rond mundu e sucursalnan di Sociedad a pidi p’e foyeto aki, i aprobacion a ser duná pa traducié den 221 idioma. Nos deseo ta p’e publicacion nobo aki resultá di ta balioso den yuda nos asistí otronan siña loke Jehova Dios ta rekerí di nan. Di nos parti, laga nos corda cu cumpliendo cu e rekisitonan di Dios, incluyendo e mandamentu pa predicá i haci disipel, ta duna nos un oportunidad precioso pa mustra Jehova cuantu nos ta stim’é. Sí, loke Dios ta rekerí di nos no ta un carga pisá. E ta e mihó manera di biba!—Salmo 19:7-11.

[Notas]

Bo Por Splica?

◻ Den ki trabou di dos aspecto Jehova ta rekerí pa su sirbidornan participá?

◻ Pakico nos obligacion pa predicá i haci disipel no ta un carga pisá pa nos?

◻ Ki hermentnan “e esclabo fiel i discreto” a percurá pa nos usa den nos trabou di predicá i haci disipel?

◻ Pa ken e foyeto Rekerí a ser diseñá, i con nos lo por us’é den nos teritorio?

[Plachi na página 24]

Nos trabou di predicá i haci disipel no ta un carga pisá

[Plachinan na página 26]

“Dios Sea Berdadero” (1946, revisá na 1952): 19.250.000 den 54 idioma

“E berdad cu ta hiba na bida eterna” (1968): 107.000.000 den 117 idioma (mustrá na frances)

“Bo por biba pa semper den Paradijs riba tera” (1982): 80.900.000 den 130 idioma (mustrá na ruso)

“Conocimentu cu Ta Hiba na Bida Eterno” (1995): 45.500.000 den 125 idioma (mustrá na aleman)