Kico Ta Nificá Stima Dios?

ROND di seis mil aña pasá, e promé baby humano a nace. Despues di su nacementu, su mama, Eva, a bisa: “Mi a producí un homber cu yudansa di Jehova.” (Génesis 4:1) Su declaracion ta revelá cu, aunke ya caba nan tabata condená na morto pa nan rebelion, Eva i su esposo, Adam, ainda tabata conciente di Jehova su Divinidad. Despues nan a producí un di dos yu. E muchanan a ser yamá Cain i Abel.

Segun cu e yunan tabata crece, nan sin duda a siña hopi tocante Jehova su amor solamente dor di examiná su creacion. Nan a disfrutá dje colornan bunita den naturalesa i e variedad di bestia i mata. Dios no solamente a duna nan bida sino tambe el a duna nan e abilidad di haña placer den bida.

Nan a siña cu nan mayornan a ser creá perfecto i cu Jehova su propósito original tabata pa hende biba pa semper. Probablemente Adam i Eva a describí pa nan con e bunita hofi di Eden tabata, i di un manera of otro nan tabatin cu splica pakico nan a ser expulsá for di un hogar paradísico asina. Kisas Cain i Abel tambe tabata conciente dje profecia divino registrá na Génesis 3:15. Cu e profecia ei Jehova a expresá su propósito pa rectificá asuntunan n’e debido tempu p’e beneficio di esnan cu ta stim’é i cu ta resultá di ta leal na dje.

Siñando tocante Jehova i su cualidadnan mester a generá den Cain i Abel un deseo pa haña e fabor di Dios. Di manera cu nan a acercá Dios presentando ofrenda na dje. E relato bíblico ta bisa: “Despues cu algun tempu a transcurí a sosodé cu Cain a procedé na trece algun fruta dje suela como ofrenda pa Jehova. Pero en cuanto Abel, e tambe a trece algun primogénito di su tou, asta nan pidanan yen di sebu.”—Génesis 4:3, 4.

Nan deseo pa obtené e fabor di Dios a establecé un fundeshi pa un relacion cuné. Al final Cain a rebelá contra Dios, miéntras cu Abel a sigui ser motivá pa amor genuino pa Dios. Abel hamas lo a desaroyá un relacion asina cu Dios aménos cu el a gana conocimentu promé tocante Jehova su personalidad i su propósitonan.

Abo tambe por yega na conocé Jehova. Por ehempel, den Bijbel bo por siña cu Dios ta un persona real, no simplemente un forsa sin bida cu ta crea cosnan pa casualidad. (Compará cu Juan 7:28; Hebreonan 9:24; Revelacion 4:11.) Tambe Bijbel ta siña cu Jehova ta “un Dios misericordioso i yen di gracia, tardá pa rabia i abundante den bondad amoroso i berdad.”—Exodo 34:6.

“Obedecé Ta Mihó cu un Sacrificio”

Manera e relato di Cain i Abel ta ilustrá, no ta suficiente pa tin un conocimentu di Dios i un deseo pa tin un relacion íntimo cuné. Ta cierto cu e dos rumannan a acercá Dios cu ofrendanan. Sin embargo, “aunke Jehova a mira Abel i su ofrenda cu fabor, e no a mira Cain ni su ofrenda cu ningun fabor. I Cain a cushi di gran rabia, i su cara a cuminsá trek.”—Génesis 4:3-5.

Pakico Jehova a rechasá e sacrificio di Cain? Tabatin algu robes cu e calidad di su ofrenda? Jehova a keda ofendí pasobra Cain a ofrecé “fruta dje suela” en bes di un sacrificio di animal? No necesariamente. Mas despues, Dios gustosamente a aceptá ofrenda di grano i otro frutanan dje suela for di hopi di su adoradornan. (Levítico 2:1-16) Evidentemente, anto, tabatin algu robes cu Cain su curason. Jehova por a lesa e curason di Cain i a spiert’é: “Pakico bo ta cushi di rabia i pakico bo cara a trek? Si bo dirigí bo mes pa haci loke ta bon, lo no tin un halsamentu? Pero si bo no dirigí bo mes pa haci loke ta bon, tin picá di bùk n’e entrada, i su deseo fuerte ta pa bo.”—Génesis 4:6, 7.

Berdadero amor pa Dios ta nificá mas cu simplemente ofrecé sacrificio. P’e motibu ei Jehova a animá Cain pa ‘dirigí su mes pa haci loke ta bon.’ Dios tabata kier obedencia. Tal obedencia na Dios lo a yuda Cain forma un bon fundeshi pa un relacion amoroso cu e Creador. Bijbel ta enfatisá e balor di obedencia cu e palabranan aki: “Jehova tin mes tantu deleite den ofrendanan kimá i sacrificionan cu den obedecé e bos di Jehova? Mira! Obedecé ta mihó cu un sacrificio, presta atencion cu e sebu di chubat’i carné.”—1 Samuel 15:22.

E importancia di obedencia a keda bon establecí mas despues cu e palabranan di 1 Juan 5:3: “Pasobra esaki ta loke e amor di Dios ta nificá, pa nos warda su mandamentunan; i tog su mandamentunan no ta un carga pisá.” No tin un mihó manera pa demostrá nos amor pa Jehova cu di someté nos mes na su autoridad. Esaki ta nificá obedencia n’e principionan moral di Bijbel. (1 Corintionan 6:9, 10) E ta nificá stima loke ta bon i odia loke ta malu.—Salmo 97:10; 101:3; Proverbionan 8:13.

Un manifestacion importante di nos amor pa Dios ta nos amor pa próhimo. Bijbel ta bisa nos: “Si un hende ta haci e declaracion: ‘Mi ta stima Dios,’ i tog ta odia su ruman, e ta un mentiroso. Pasobra esun cu no ta stima su ruman, cu el a mira, no por stima Dios, cu e no a mira.”—1 Juan 4:20.

Intimidad cu Dios Ta Posibel

Algun hende por bisa, ‘Mi ta adorá Jehova. Mi ta obedecé su leynan. Mi ta trata mi próhimo sin mustra parcialidad. Mi ta haci tur esei. Apesar di esei, mi no ta sintí mi realmente cerca di Dios. Mi no ta sinti un amor fuerte p’e, i esei ta poné mi sinti mi mes culpabel.’ Algun por pensa cu nan no ta digno di yega di tin un relacion íntimo asina cu Jehova.

Despues di casi 37 aña di sirbishi dedicá na Jehova, un homber cristian a skirbi: “Hopi biaha den mi bida mi a sinti cu mi tabata mas bien dunando un sirbishi di rutina na Jehova, cu tal bes mi no tabata haciendo esei di curason. Pero mi tabata sa cu sirbiendo Jehova tabata e cos corecto pa haci, i mi no a permití mi mes di stop. Sin embargo, cada bes cu mi tabata lesa di un persona cu a bisa cu su ‘curason tabata hincha cu amor pa Jehova,’ mi tabata puntra mi mes, ‘Kico tin robes cu mi, ya cu nunca mi a sinti asina?’” Con nos por haña intimidad cu Dios?

Ora bo berdaderamente ta stima un persona, hopi biaha bo ta pensa riba e persona ei. Bo tin un deseo fuerte pa ta íntimo cuné pasobra bo ta interesá den dje. Mas bo mir’é, papia cuné, i pensa riba dje, mas bo amor p’e ta crece. E principio aki ta aplicá tambe den e asuntu di cultivá amor pa Dios.

Na Salmo 77:12, e escritor inspirá ta bisa: “Siguramente lo mi meditá riba tur bo actividad, i den bo tratonan lo mi interesá mi mes.” Pa cultivá amor pa Dios meditacion ta vital. Esaki ta specialmente e caso en bista dje echo cu e ta invisibel. Pero mas bo pensa riba dje, mas real lo e bira pa bo. Solamente e ora ei bo por desaroyá un relacion sincero i afectuoso cuné—pasobra e ta real pa bo.

Bo inclinacion pa meditá frecuentemente riba e camindanan i tratonan di Jehova lo dependé riba cuantu bo ta scucha na dje. Bo ta scucha dor di lesa i studia su Palabra, Bijbel, regularmente. E salmista ta papia di un homber felis como unu kende su “deleite ta den e ley di Jehova, i den su ley e ta lesa na bos abou di dia i anochi.”—Salmo 1:1, 2.

Un otro elemento importante ta oracion. P’e motibu ei Bijbel bes tras bes ta exhortá nos pa haci oracion—“na tur ocasion,” “dedicá tempu na oracion,” “perseverá den oracion,” i “resa incesantemente.” (Efesionan 6:18; 1 Corintionan 7:5; Romanonan 12:12; 1 Tesalonicensenan 5:17) Nos oracionnan incesante na Jehova lo haci nos stim’é, i e siguransa cu e ta scucha lo hala nos cerca dje. E salmista a confirmá esaki, ora el a declará: “Di berdad mi ta stima, pasobra Jehova ta tende mi bos, mi súplicanan. Pasobra el a incliná su orea na mi, i durante tur mi dianan lo mi yama.”—Salmo 116:1, 2.

Imitando e Dios di Amor

Jehova ta bon pa nos. Siendo e Creador dje universo, e siguramente tin hopi cos pa tene cuenta cuné i percurá p’e. Sin embargo, Bijbel ta bisa nos cu pa mahestuoso cu e ta, tog e ta interesá den su creacion humano. E ta stima nos. (1 Pedro 5:6, 7) E salmista ta confirmá esaki cu su palabranan: “O Jehova nos Señor, ki mahestuoso bo nomber ta riba henter e tera, abo kende su dignidad ta ser relatá riba e shelunan! Ora mi mira bo shelunan, e obranan di bo dedenan, e luna i e streanan cu bo a prepará, kico ta homber mortal pa bo tene cuenta cuné, i e yu di hende terenal pa bo percurá p’e?”—Salmo 8:1, 3, 4.

Con Jehova a tene cuenta cu homber mortal? Bijbel ta contestá: “Den esaki e amor di Dios a ser manifestá den nos caso, pasobra Dios a manda su Yu unigénito den e mundu pa nos por gana bida mediante dje. Amor ta consistí den esaki, no cu nos a stima Dios, sino é a stima nos i a manda su Yu como sacrificio di reconciliacion pa nos picánan.”—1 Juan 4:9, 10.

Den ki manera e sacrificio di reconciliacion aki ta e evidencia di mas grandi dje amor di Dios? Laga nos considerá loke a sosodé den e hofi di Eden. Adam i Eva a enfrentá e decision pa sea someté nan n’e ley di Jehova cu e prospecto di bida perfecto pa semper of rebelá contra Jehova cu morto como resultado. Nan a scoge pa rebelá. (Génesis 3:1-6) Haciendo esei nan a condená tambe henter humanidad na morto. (Romanonan 5:12) Den un manera tribí nan a horta nos dje oportunidad pa dicidí pa nos mes. Ningun di nos tabatin algu di bisa den e asuntu.

Sin embargo, Jehova amorosamente a tene cuenta cu homber mortal, reconociendo su posicion difícil. Mediante e morto sacrificial di Su Yu, Jesucristo, Jehova a percurá e base legal pa cada un di nos scoge pa su mes bida of morto, obedencia of rebelion. (Juan 3:16) Ta como si fuera Jehova a duna nos nos propio dia den corte—un oportunidad pa bai bek den Eden, na moda di papia, i tuma nos propio decision. Esaki ta e manifestacion di mas grandi di amor cu a yega di ser hací.

Imaginá bo e dolor cu Jehova a soportá segun cu el a mira su primogénito ser insultá, torturá i clabá na staca mescos cu un criminal. I Dios a soportá tur esei pa nos causa. E echo cu nos ta conciente cu Jehova a tuma e iniciativa pa stima nos promé, en buelta mester motivá nos pa stim’é i incitá nos pa busk’é. (Santiago 1:17; 1 Juan 4:19) Bijbel ta invitá nos pa “busca Jehova i su forsa. Busca su cara constantemente. Corda su obranan maraviyoso cu el a efectuá, su milagernan i e decisionnan hudicial di su boca.”—Salmo 105:4, 5.

Pa nos tin un apego personal i un relacion amoroso cu Dios, pa ta su amigu, no ta algu irealístico. Nos por logra esei. Ta cierto cu nos no por compará nos amor pa Dios cu relacionnan humano. E amor cu nos ta sinti pa nos casá, mayornan, rumannan, yunan of amigunan ta diferente for dje amor cu nos tin pa Dios. (Mateo 10:37; 19:29) Stima Jehova ta enbolbé nos debocion, adoracion i un dedicacion incondicional na dje. (Deuteronomio 4:24) Ningun otro relacion tin implicacionnan asina. Tog, nos por desaroyá emocionnan fuerte i profundo pa Dios den un manera reverencial, cu temor.—Salmo 89:7.

Aunke bo ta imperfecto, mescos cu Cain i Abel bo tin e potencial pa stima bo Creador. Cain a haci su scogementu, a uni cu Satanas, i a bira e promé asesino humano. (1 Juan 3:12) Na contraste, Jehova lo recordá Abel como un homber di fe i husticia i lo recompens’é cu bida den e binidero Paradijs.—Hebreonan 11:4.

Abo tambe por scoge. Cu e yudansa dje spiritu di Dios i su Palabra, abo berdaderamente por yega na stima Dios “cu tur bo curason i cu tur bo alma i cu tur bo forsa vital.” (Deuteronomio 6:5) Jehova, en buelta, lo sigui stimá bo, pasobra e ta “e recompensador di esnan cu ta busk’é cu empeño.”—Hebreonan 11:6.

[Plachi na página 7]

E sacrificio di Abel tabata aceptabel pa Dios