LÈS 28
Mustra Apresio pa Loke Yehova i Hesus A Hasi pa Bo
Kon bo ta sinti bo ora un amigu duna bo un bunita regalo? Probablemente, lo bo ta masha kontentu i lo bo tin gana di mustra bo amigu ku bo ta apresiá su regalo. Yehova i Hesus a duna nos e mihó regalo ku hende por haña: e reskate. Kon nos por mustra apresio pa e regalo ei?
1. Kon ta un manera ku nos por mustra apresio pa loke Dios i Kristu a hasi pa nos?
Beibel ta primintí ku “tur ku pone fe den [Hesus]” lo por biba pa semper. (Huan 3:16) Kiko ke men pone fe den Hesus? Esei ke men ku nos mester hasi mas ku djis kere den Hesus. E desishonnan ku nos ta tuma i e kosnan ku nos ta hasi mester demostrá ku nos tin fe den Hesus. (Santiago 2:17) Ora nos ta demostrá nos fe pa medio di loke nos ta bisa i hasi, nos ta fortalesé nos amistat ku Hesus i su Tata, Yehova.—Lesa Huan 14:21.
2. Ki okashon spesial ta duna nos oportunidat pa mustra apresio pa loke Yehova i Hesus a hasi?
E anochi promé ku Hesus a muri, el a bisa su siguidónan ku tabatin un otro manera mas ku nan por mustra apresio pa su sakrifisio. El a bisa nan pa bini huntu pa un okashon spesial ku Beibel ta yama “sena di Señor,” ku ta konosí tambe komo Konmemorashon di e morto di Kristu, òf Memorial. (1 Korintionan 11:20) Hesus tabata ke pa su apòstelnan, i tur kristian berdadero despues di nan, kòrda ku el a duna su bida pa nos. Pues, el a bisa nan: “Sigui hasi esaki na mi memoria.” (Lukas 22:19) Ora bo asistí na Memorial, bo ta mustra apresio pa e amor ku Yehova i Hesus tin pa nos.
KIKO MAS NOS POR SIÑA?
Wak na ki manera mas bo por mustra apresio pa e amor ku Yehova i Hesus a mustra na nos. Ademas, wak dikon Konmemorashon di e morto di Kristu ta asina importante.
3. Kiko nos por hasi pa mustra ku nos ta gradisidu?
Imaginá si un hende a salba bo bida. Lo bo djis lubidá loke e persona a hasi pa bo? Òf lo bo buska manera pa mustr’é ku bo ta apresiá loke el a hasi pa bo?
Danki na Yehova ku nos tin e oportunidat pa biba pa semper. Lesa 1 Huan 4:8-10. Despues, analisá e siguiente preguntanan:
Dikon Hesus su sakrifisio ta un regalo spesial?
Kon bo ta sinti bo ora bo pensa riba loke Yehova i Hesus a hasi pa bo?
Kon nos por mustra apresio pa loke Yehova i Hesus a hasi pa nos? Lesa 2 Korintionan 5:15 i 1 Huan 4:11; 5:3. Despues di lesa kada teksto, analisá e siguiente pregunta:
Di akuerdo ku e teksto ei, kon nos por mustra ku nos ta gradisidu?
4. Imitá Hesus
Un otro manera pa mustra nos apresio ta di imitá Hesus. Lesa 1 Pedro 2:21. Despues, analisá e siguiente pregunta:
Den ki manera bo por sigui Hesus su pasonan fielmente?
Hesus a stima e Palabra di Dios, a prediká e bon notisia i a yuda otro hende
5. Asistí na Konmemorashon di e morto di Kristu
Pa haña sa loke a tuma lugá na e promé Sena di Señor, lesa Lukas 22:14, 19 i 20. Despues, analisá e siguiente preguntanan:
Kiko a tuma lugá na Sena di Señor?
Kiko e pan i e biña ta representá?—Wak versíkulo 19 i 20.
Hesus tabata ke pa su disipelnan konmemorá su morto un biaha pa aña, riba e fecha ku el a muri. Pues, Testigunan di Yehova ta reuní tur aña pa konmemorá e morto di Kristu na e manera ku el a siña su disipelnan pa hasi esei. Pa haña sa tokante e okashon spesial akí, pasa e VIDIO. Despues, analisá e siguiente pregunta:
Kiko bo por spera ora bo asistí na Konmemorashon di e morto di Hesus?
Kiko e pan i e biña ta representá? E pan ta representá Hesus su kurpa humano perfekto ku el a sakrifiká pa nos. E biña ta representá su sanger
LOKE HENDE SA BISA: “E úniko kos ku bo tin ku hasi pa ser salbá ta di aseptá Kristu den bo kurason.”
Kon bo por usa Huan 3:16 i Santiago 2:17 pa mustra un persona ku bo tin ku hasi mas ku esei?
RESÚMEN
Nos ta mustra apresio pa loke Hesus a hasi pa nos ora nos ta pone fe den dje i ta asistí na Konmemorashon di su morto.
Repaso
Kiko ke men pone fe den Hesus?
Abo ke mustra apresio pa loke Yehova i Hesus a hasi pa bo? Kon bo por hasi esei?
Dikon ta asina importante pa asistí na Konmemorashon di e morto di Kristu?
MAS INFORMASHON INTERESANTE
Kiko morto di Kristu ta motivá nos pa hasi?
Haña sa mas tokante fe i siña kon bo por demostrá ku bo tin fe.
“Pone Fe den e Promesanan di Yehova” (E Toren di Vigilansia di òktober 2016)
Lesa e relato “Awor Mi Ta Disfrutá di Bida i Ta Sinti Mi na Pas” pa wak kon un señora su bida a kambia ora el a haña sa kon balioso e sakrifisio di Hesus ta.
“Beibel Ta Kambia Bida di Hende” (E Toren di Vigilansia di 1 di ougùstùs 2011, na spañó)
Wak dikon ta un par di hende so ta kome di e pan i bebe di e biña na Konmemorashon.