Un Multitud Grandi Rindiendo Sirbishi Sagrado

“Nan ta rindiend’é sirbishi sagrado di dia i anochi den su tempel.”—REVELACION 7:15.

1. Ki logro importante di comprendimentu spiritual a ser alcansá na 1935?

DIA 31 di mei, 1935, tabatin gran goso entre e delegadonan na un congreso di Testigonan di Jehova na Washington, D.C. Aya, pa promé biaha, e multitud grandi di Revelacion 7:9 a ser identificá claramente na armonia cu e resto dje Bijbel i cu sucesonan cu ya a cuminsá desaroyá.

2. Kico a indicá cu un cantidad creciente di ruman a realisá cu Dios no a yama nan pa bida celestial?

² Rond di seis siman mas promé, n’e celebracion dje Cena di Señor den congregacionnan di Testigonan di Jehova, 10.681 persona di esnan presente (rond di 1 di cada 6) no a tuma dje emblemanan, e pan i biña, i 3.688 di esakinan tabata proclamadornan activo dje Reino di Dios. Pakico nan a keda sin tuma dje emblemanan? Pasobra a base di loke nan a siña for di Bijbel, nan a realisá cu Dios no a yama nan pa bida celestial pero cu nan por a participá den Jehova su percuracionnan amoroso den un otro manera. Pues n’e congreso ei, ora e orador a pidi: “Esnan cu tin e speransa di biba pa semper riba tera por lanta para por fabor,” kico a sosodé? Miles di hende a lanta para, siguí pa un aplauso prolongá di parti dje auditorio.

3. Pakico e identificacion dje multitud grandi a duna un empuhe nobo n’e ministerio di veld, i con e Testigonan a sinti tocante esaki?

³ Loke e delegadonan a siña n’e congreso ei a duna un empuhe nobo na nan ministerio. Nan a bin comprendé cu awor, promé cu e fin dje sistema bieu, no solamente algun mil sino un multitud grandi di hende lo ser duná e oportunidad pa drenta den Jehova su areglo pa preservacion di bida, cu bista riba bida eterno den un paradijs riba tera. Ki un mensahe emocionante a ser presentá ei na amantenan dje berdad! Testigonan di Jehova a realisá cu tabatin un trabou grandi pa ser hací—un trabou gososo. Añanan despues, John Booth, kende a bira miembro dje Cuerpo Gobernante, a corda: “E asamblea ei a duna nos hopi motibu pa alegrá.”

4. (a) Te na ki grado tabatin realmente un recogementu dje multitud grandi desde 1935? (b) Den ki manera esnan dje multitud grandi ta dunando evidencia cu nan fe ta un fe bibu?

⁴ Durante e añanan cu a sigui, e cantidad di Testigonan di Jehova a aumentá drásticamente. Apesar dje persecucion hopi bes violento cu a asotá nan durante Guera Mundial II, nan a bira casi tres biaha mas tantu na cantidad den un solo década. I e 56.153 publicadornan cu tabata duna testimonio público na 1935 a aumentá, te cu 1994, na mas cu 4.900.000 proclamador di Reino plamá den mas cu 230 pais. E gran mayoria di esakinan ta spera cu anticipacion ansioso pa ser incluí entre esnan kende Jehova ta faborecé cu perfeccion di bida den un tera paradísico. Compará cu e trupa chikitu, nan berdaderamente a bira un multitud grandi. Nan no ta hende cu ta bisa cu nan tin fe i tog no ta demostr’é. (Santiago 1:22; 2:14-17) Nan tur ta compartí cu otronan e bon nobo tocante e Reino di Dios. Abo ta parti dje multitud felis ei? Ser un Testigo activo ta un marca di identificacion importante, pero mas ta enbolbí.

“Pará Dilanti e Trono”

5. Kico e echo cu e multitud grandi ta “pará dilanti e trono” ta indicá?

⁵ Den e vision cu apostel Juan a ricibí, el a mira nan “pará dilanti e trono i dilanti e Lamchi.” (Revelacion 7:9) Nan paramentu dilanti e trono di Dios, manera e ta ser describí den e contexto aki, ta indicá cu nan ta duna pleno reconocimentu n’e soberania di Jehova. Esaki ta incluí hopi cos. Por ehempel: (1) Nan ta reconocé Jehova su derecho di dicidí pa su sirbidornan loke ta bon i loke ta malu. (Génesis 2:16, 17; Isaías 5:20, 21) (2) Nan ta scucha Jehova segun cu e ta papia cu nan mediante su Palabra. (Deuteronomio 6:1-3; 2 Pedro 1:19-21) (3) Nan ta comprendé e importancia di someté nan mes na esnan cu Jehova a encargá cu supervision. (1 Corintio 11:3; Efesio 5:22, 23; 6:1-3; Hebreo 13:17) (4) Aunke nan ta imperfecto, nan sinceramente ta haci esfuerso pa respondé na instruccion teocrático, no cu mala gana, sino di buena gana, di curason. (Proverbio 3:1; Santiago 3:17, 18) Nan ta dilanti e trono pa rindi sirbishi sagrado na Jehova, kende nan ta respetá i ta stima profundamente. Den e caso dje multitud grandi aki, nan ‘paramentu’ dilanti e trono ta indicá e aprobacion di Esun sintá riba e trono. (Compará cu Revelacion 6:16, 17.) Aprobacion riba ki base?

“Bistí cu Pañanan Largu Blancu”

6. (a) Kico ta nificá cu e multitud grandi ta “bistí cu pañanan largu blancu”? (b) Con e multitud grandi ta gana un posicion hustu dilanti Jehova? (c) Te na ki grado fe den e sanger dramá di Cristo ta influenciá bida dje multitud grandi?

⁶ Apostel Juan su descripcion di loke el a mira ta bisa cu e miembronan dje multitud grandi aki ta “bistí cu pañanan largu blancu.” E pañanan largu blancu ei ta simbolisá nan posicion limpi i hustu dilanti Jehova. Con nan a gana un posicion asina? Nos a ripará caba cu den Juan su vision nan tabata pará “dilanti e Lamchi.” Nan ta reconocé Jesucristo como “e Lamchi di Dios cu ta kita picá dje mundu.” (Juan 1:29) Juan a tende un dje ancianonan kende, den e vision, tabata presente n’e trono di Dios, splica: “Nan a laba nan pañanan largu i a haci nan blancu den e sanger dje Lamchi. Ta p’esei nan ta dilanti e trono di Dios.” (Revelacion 7:14, 15) Figurativamente, nan a laba nan bistí dor di ehercé fe den e sanger rescatador di Cristo. Nan no ta djis aceptá cu nan mente e siñansa bíblico tocante e rescate. Aprecio p’e ta afectá e clase di persona cu nan ta di paden; pues, ta “cu curason” nan ta ehercé fe. (Romano 10:9, 10) Esaki tin un efecto di largu alcance riba loke nan ta haci cu nan bida. Cu fe, nan ta dedicá nan mes na Jehova riba base dje sacrificio di Cristo, nan ta simbolisá e dedicacion ei dor di bautismo bou di awa, nan ta biba berdaderamente na armonia cu nan dedicacion, i asina nan ta yega di disfrutá di un relacion aprobá cu Dios. Ki un privilegio excelente—unu pa protegá cuidadosamente!—2 Corintio 5:14, 15.

7, 8. Con Jehova su organisacion a yuda e multitud grandi mantené nan bistí incontaminá?

⁷ Cu interes amoroso pa nan bienestar eterno, Jehova su organisacion bes tras bes a dirigí atencion na actitud i conducta cu lo por mancha, of contaminá, un persona su bistí di identificacion di manera cu, apesar di pretensionnan di pafó, e persona realmente lo no cuadra cu e descripcion profético na Revelacion 7:9, 10. (1 Pedro 1:15, 16) Reforsando loke a ser publicá anteriormente, E Toren di Vigilancia [na ingles], na 1941 i despues di esei, a mustra bes tras bes cu lo ta sumamente inapropiado pa predicá na otronan i despues, na otro ora, participá den conducta manera fornicacion of adulterio. (1 Tesalonicense 4:3; Hebreo 13:4) Na 1947 a ser enfatisá cu Jehova su normanan pa matrimonio cristian ta aplicá na tur pais; sin importá kico custumber local kisas ta aprobá, esnan cu a sigui practicá poligamia no por tabata Jehova su Testigonan.—Mateo 19:4-6; Tito 1:5, 6.

⁸ Na 1973, Testigonan di Jehova mundialmente a ser mustrá cu nan tur mester rechasá completamente cualkier práctica cu innegablemente ta contaminá nos, manera maluso di tabaco, sin importá unda nan por ta—no solamente den Salon di Reino of den sirbishi di veld sino tambe na trabou seglar of den cierto lugánan alehá for di bista público. (2 Corintio 7:1) Na 1987 na congresonan di distrito di Testigonan di Jehova, hóbennan cristian a ser consehá fuertemente cu pa por mantené un posicion limpi dilanti Dios, nan mester vigilá contra hibamentu di un bida dobel. (Salmo 26:1, 4) Bes tras bes, E Toren di Vigilancia a spierta contra vários aspecto dje spiritu di mundu pasobra “e forma di adoracion cu ta limpi i incontaminá desde e punto di bista di nos Dios i Tata” ta incluí mantené bo mes “sin mancha dje mundu.”—Santiago 1:27.

9. Ken realmente lo para aprobá dilanti e trono di Dios despues dje tribulacion grandi?

⁹ Ta esnan kende nan fe ta impulsá nan pa biba den un manera cu nan ta keda spiritualmente i moralmente limpi, cu lo keda “pará dilanti e trono” como sirbidornan aprobá di Dios despues dje binidero tribulacion grandi. Esakinan ta hendenan cu no solamente ta cuminsá hiba un bida cristian sino ta perseverá lealmente den dje.—Efesio 4:24.

“Ramanan di Palma den Nan Man”

10. Ki nificacion e ramanan di palma cu Juan a mira den man dje multitud grandi tin?

¹⁰ Entre e rasgonan sobresaliente dje multitud grandi, manera apostel Juan a mira, ta cu “tabatin ramanan di palma den nan man.” Ki nificacion esei tin? Sin duda e ramanan di palma ei a recordá Juan dje festival hudiu di tabernáculo, e festival di mas gososo riba e calender hebreo, tené despues dje cosecha di zomer. Na armonia cu e Ley, blachinan di palma, huntu cu e takinan di otro palunan, a ser usá pa traha cabañanan den cua hende a hospedá durante e festival. (Levítico 23:39, 40; Nehemías 8:14-18) Tambe nan a ser wayá dor dje adoradornan n’e tempel durante e cantamentu dje Halel (Salmo 113-118). E wayamentu di ramanan di palma dor dje multitud grandi probablemente a recordá Juan tambe dje ocasion ora Jesus a drenta Jerusalem riba buricu miéntras un multitud di adoradornan gososamente tabata waya ramanan di palma i tabata grita: “Bendicioná ta esun cu ta bini den nomber di Jehova, asta e rey di Israel!” (Juan 12:12, 13) Pues e wayamentu di ramanan di palma ta indicá cu e multitud grandi gososamente ta aclamá Jehova su Reino i su Rey ungí.

11. Pakico sirbidornan di Dios berdaderamente ta haña goso den sirbi Jehova?

¹¹ Ta un spiritu di goso asina e multitud grandi ta manifestá asta awor segun cu nan ta sirbi Jehova. Esaki no ta nificá cu nan no ta topa cu dificultad of cu nan no ta experenciá tristesa of dolor. Pero e satisfaccion cu ta bini di sirbi i agradá Jehova ta yuda compensá e cosnan ei. Pues, un misionero kende a sirbi cu su esposo pa 45 aña na Guatemala a conta tocante e condicionnan primitivo cu a rondoná nan, e trabou duru i biahamentu peligroso cu tabata parti di bida segun cu nan tabata haci esfuerso pa pone e pueblonan indjan den contacto cu e mensahe di Reino. El a concluí: “Esei tabata e temporada di nos bida cu nos tabata sumamente felis.” Aunke e tabata sinti e efectonan di edad avansá i behes, entre e último anotacionnan den su ‘dagboek’ tabatin e palabranan: “Tabata un dushi bida, asina recompensador.” Rond mundu, Testigonan di Jehova ta sinti mescos tocante nan ministerio.

“Sirbishi Sagrado di Dia i Anochi”

12. Sea durante dia of anochi, kico Jehova ta mira aki riba tera?

¹² E adoradornan gososo aki ta rindi na Jehova “sirbishi sagrado di dia i anochi den su tempel.” (Revelacion 7:15) Rond mundu, miyones di hende ta participando den e sirbishi sagrado aki. Ora ta anochi den algun pais i hende ta na soño ei, den otro paisnan ta di dia i Testigonan di Jehova ta ocupá dunando testimonio. Segun cu e mundu ta bira, constantemente, di dia i anochi, nan ta cantando Jehova su alabansanan. (Salmo 86:9) Pero e sirbishi di dia-i-anochi na cua Revelacion 7:15 ta referí ta asta mas personal.

13. Con e Scritura ta indicá loke ta nificá sirbi “di dia i anochi”?

¹³ Individuonan cu ta forma e multitud grandi ta rindi sirbishi sagrado di dia i anochi. Esaki ta nificá cu tur loke cu nan ta haci ta ser considerá como sirbishi sagrado? Ta cierto cu sin importá loke nan ta haciendo, nan ta siña haci’é den un manera cu ta onra Jehova. (1 Corintio 10:31; Colosense 3:23) Sin embargo, “sirbishi sagrado” ta aplicá solamente na loke ta enbolbé directamente un persona su adoracion na Dios. Participacion den un actividad “di dia i anochi” ta implicá regularidad of constancia i tambe esfuerso sincero.—Compará cu Hosué 1:8; Lucas 2:37; Echo 20:31; 2 Tesalonicense 3:8.

14. Kico lo haci nos sirbishi di veld personal cuadra cu e descripcion di sirbishi “di dia i anochi”?

¹⁴ Segun cu nan ta sirbi den e pationan terenal di Jehova su gran tempel spiritual, esnan cu ta forma e multitud grandi ta haci esfuerso pa participá regularmente i consistentemente den e ministerio di veld. Hopi publicador a haci’é nan meta pa participá den e ministerio di veld tur siman. Otronan ta haci esfuerso pa traha como pionero regular of auxiliar. Hopi biaha esakinan ta ocupá dunando testimonio riba caya i den tiendanan mainta trempan. Pa acomodá esnan interesá, algun Testigo ta conducí studionan di Bijbel te lat parti anochi. Nan ta duna testimonio ora nan ta di cómpras, ora nan ta biaha, durante nan pausa merdia, i via telefon.

15. Aparte dje ministerio di veld, kico ta ser incluí den nos sirbishi sagrado?

¹⁵ Participacion den reunionnan di congregacion tambe ta parti di nos sirbishi sagrado; mescos ta e trabou enbolbí den construccion i percuracion pa lugánan di asamblea cristian. Esfuersonan cu ta ser hací pa animá i yuda e rumannan cristian, spiritualmente i materialmente, pa keda bibu den Jehova su sirbishi, tambe ta ser incluí. Esaki ta incluí e trabou di nos Comiténan di Enlace di Hospital. Sirbishi di Betel den tur su vários formanan, i tambe sirbishi di boluntario na nos congresonan, tur ta sirbishi sagrado. Berdaderamente, ora nos bida ta drei rond di nos relacion cu Jehova, e ta yená cu sirbishi sagrado. Manera e texto ta bisa, Jehova su pueblo ta rindi “sirbishi sagrado di dia i anochi,” i nan ta haña gran goso den haci esei.—Echo 20:35; 1 Timoteo 1:11.

‘For di Tur Nacion, Tribu, Pueblo i Lenga’

16. Den ki manera ta resultando cierto cu e multitud grandi ta sali “for di tur nacion”?

¹⁶ For di tur nacion, esnan dje multitud grandi ta biniendo. Dios no ta parcial, i e percuracion di rescate hací mediante Jesucristo ta suficiente pa cubri nan tur. Ora e multitud grandi a ser identificá bíblicamente pa promé bes na 1935, Testigonan di Jehova tabata activo den 115 pais. Den añanan 90, e búskeda pa personanan semehante na carné a extendé te den dos bes mas tantu pais.—Marco 13:10.

17. Kico ta ser hací pa yuda hende di tur ‘tribu, pueblo i lenga’ ser incluí den e multitud grandi?

¹⁷ Den buscamentu di miembronan prospectivo dje multitud grandi, Testigonan di Jehova a duna atencion no solamente na gruponan nacional sino tambe n’e tribunan i pueblonan i gruponan di idioma den e nacionnan ei. Afin di alcansá e hendenan aki, e Testigonan ta publicá literatura bíblico den mas cu 300 idioma. Esaki ta enbolbé entrenamentu i mantencion di ‘teamnan’ di traductornan cualificá, percuracion di ekipo di computer capas pa procesá tur e idiomanan aki, i tambe e imprenta mes. Durante solamente e último cincu añanan, 36 idioma papiá dor di mas o ménos 98.000.000 hende, a ser agregá n’e lista. Ademas, e Testigonan ta haci esfuerso pa bishitá e hendenan aki personalmente pa yuda nan comprendé e Palabra di Dios.—Mateo 28:19, 20.

“For dje Tribulacion Grandi”

18. (a) Ora e tribulacion grandi dal aden, ken lo ser protegá? (b) Ki proclamacionnan felis lo ser hací e ora ei?

¹⁸ Ora e angelnan los e bientunan di destruccion na cua Revelacion 7:1 ta referí, no solamente e ‘esclabonan ungí di nos Dios’ lo experenciá e proteccion amoroso di Jehova sino tambe e multitud grandi cu a uni cu nan den adoracion berdadero. Manera apostel Juan a ser bisá, esnan dje multitud grandi lo “sali for dje tribulacion grandi” como sobrebibientenan. Ki un gritu di gratitud i alabansa nan lo dal segun nan ta declará: “Salbacion nos ta debe na nos Dios, kende ta sintá riba e trono, i n’e Lamchi”! I tur e sirbidornan leal di Dios den cielu lo agregá nan bos declarando: “Amen! E bendicion i e gloria i e sabiduria i e gradicimentu i e onor i e poder i e fortalesa sea na nos Dios pa semper hamas. Amen.”—Revelacion 7: 10-14.

19. Den ki actividad gososo e sobrebibientenan lo ta ansioso pa participá?

¹⁹ Ki un tempu felis esei lo ta! Tur persona cu ta na bida lo ta sirbidornan dje único Dios berdadero! E mayor goso di tur esakinan lo ta di sirbi Jehova. Lo tin hopi trabou pa haci—trabou gososo! E tera mester ser transformá den un Paradijs. Miles di miyones dje mortonan mester ser resucitá i despues educá den e camindanan di Jehova. Ki un privilegio gososo lo ta pa participá den esei!

Kico Ta Bo Comentario?

◻ Ki efecto e sucesonan na 1935 tabatin riba e ministerio di veld di Testigonan di Jehova?

◻ Kico e echo cu e multitud grandi ta ser mustrá “pará dilanti e trono” ta indicá?

◻ Con aprecio pa e sanger dje Lamchi mester afectá e manera cu nos ta biba?

◻ Kico nan wayamentu di ramanan di palma ta nificá?

◻ Con e multitud grandi ta rindi sirbishi sagrado di dia i anochi?

[Plachinan na página 16, 17]

Nan sirbishi sagrado ta reflehá regularidad, diligencia i esfuerso sincero