Ki Dia e di Tres Milenio Ta Cuminsa?

ABO a tende hende pretendé cu e di tres milenio lo no cuminsá na aña 2000 sino na 2001? Te na cierto grado esei ta corecto. Si nos asumí cu Jesucristo a nace na loke awor ta conocí como aña 1 P.E.C., manera algun persona a suponé un tempu, e ora ei 31 di december 2000 (no 1999) en berdad lo marca e fin dje di dos milenio, i 1 di januari 2001 lo marca e cuminsamentu dje di tres.a Pero, awe casi tur erudito ta di acuerdo cu Jesucristo no a nace na aña 1 P.E.C. Wel, na ki tempu el a nace anto?

Ki Dia Jesus A Nace?

Bijbel no ta revelá e fecha exacto di Jesus su nacementu. Pero, e ta bisa sí cu el a nace “den e dianan di Herodes e rey.” (Mateo 2:1) Hopi erudito di Bijbel ta kere cu Herodes a muri na aña 4 P.E.C. i cu Jesus a nace promé cu esei, tal bes for di aña 5 of 6 P.E.C. caba. Nan ta basa nan conclusionnan tocante e morto di Herodes riba declaracionnan cu e historiadó hudiu di promé siglo, Flavio Josefo, a haci.b

Segun Josefo, djis promé cu rey Herodes a muri, tabatin un eclipse di luna. Eruditonan di Bijbel ta señalá na un eclipse lunar parcial dia 11 di mart di aña 4 P.E.C., como prueba cu Herodes lo mester a muri den e aña ei. Sin embargo, na aña 1 P.E.C. tabatin un eclipse lunar total dia 8 di januari i un eclipse parcial dia 27 di december. Ningun hende no por bisa si Josefo a referí na un dje eclipsenan di aña 1 P.E.C. of na esun di 4 P.E.C. Consecuentemente, nos no por usa Josefo su palabranan pa señalá e aña exacto cu Herodes a muri. Asta si nos tabata por, sin mas informacion nos lo no por a determiná tog ki dia Jesus a nace.

E evidencia mas fuerte cu nos tin dje fecha di Jesus su nacementu ta bini for di Bijbel. E registro inspirá ta declará cu Jesus su primu, Juan Bautista, a cuminsá su carera como profeta den e di 15 aña di emperador romano Tiberio César. (Lucas 3:1, 2) Historia seglar ta confirmá cu a nombra Tiberio como emperador dia 15 di september di aña 14 E.C. Pues, su di 15 aña lo a cuminsá core for dje último parti di 28 E.C. p’e último parti di 29 E.C. Juan a cuminsá su ministerio durante e tempu ei, i evidentemente Jesus a cuminsá su ministerio seis luna despues. (Lucas 1:24-31) Esaki, combiná cu otro evidencia, ta pone e cuminsamentu di Jesus su ministerio den otoño di 29 E.C.c Bijbel ta bisa cu Jesus tabatin “mas o ménos trinta aña di edad” ora el a cuminsá su ministerio. (Lucas 3:23) Si e tabatin 30 aña di edad den otoño di 29 E.C., lo e mester a nace den otoño di aña 2 P.E.C. Awor, si nos conta dos mil aña bini ariba for di otoño di aña 2 P.E.C. (cordando cu no tabatin aña sero; p’esei, for di aña 2 P.E.C. pa 1 E.C. ta dos aña), nos ta realisá cu e di dos milenio a terminá den otoño di 1999 i cu e di tres milenio a cuminsá e ora ei!

Esei ta importá? Por ehempel, e cuminsamentu dje di tres milenio lo marca cuminsamentu dje Reino di Mil Aña di Jesucristo na cua e buki di Revelacion ta referí? No. Ningun caminda Bijbel ta indicá un coneccion entre e di tres milenio i e Reino di Mil Aña di Cristo.

Jesus a spierta su siguidónan pa no speculá tocante fecha. El a bisa su disipelnan: “No ta pertenecé na boso pa haña conocimentu di tempu of temporadanan cu e Tata a pone bou di su mes hurisdiccion.” (Echonan 1:7) Mas promé, Jesus a revelá cu ni e no tabata sa ki dia Dios lo ehecutá huicio riba e mal sistema aki, i asina prepará e caminda p’e Gobernacion di Mil Aña di Cristo. El a bisa: “En cuanto e dia i ora ei ningun hende no sa, ni e angelnan di shelu ni e Yu, sino solamente e Tata.”—Mateo 24:36.

Ta razonabel pa spera cu Cristo lo bolbe bek exactamente 2.000 aña despues dje fecha di su nacementu como hende? No. Jesus lo mester tabata sa su fecha di nacementu. I e sigur tabata sa con pa conta 2.000 aña for dje fecha ei. Tog, e no tabata sa ni e dia ni e ora di su binida. Obviamente, lo no ta dje simpel ei pa señalá e dia cu e ta bolbe bek! E ‘tempu i temporadanan’ tabata bou dje Tata su hurisdiccion—e so tabata sa su orario.

Ademas, Jesus no a manda su siguidónan warda riba dje na un cierto sitio geográfico. El a bisa nan, no pa bini huntu i warda, sino pa plama bai n’e “parti mas lehano dje tera” i haci disipel di hende di tur nacion. E no a cancelá e mandamentu ei nunca.—Echonan 1:8; Mateo 28:19, 20.

Nan Speransa di Milenio Lo Caba na Nada?

No obstante, algun fundamentalista religioso tin gran expectativa pa aña 2000. Nan ta kere cu durante e próximo par di lunanan, partinan dje buki di Revelacion lo haña un cumplimentu literal. Sí, nan ta mira nan mes ta participá personalmente den e cumplimentu ei. Por ehempel, nan ta señalá n’e profecia registrá na Revelacion 11:3, 7 i 8, cu ta papia di dos testigo cu ta profetisá den un “stad grandi cu den un sentido spiritual tabata yama Sódoma i Egipto, unda nan Señor a ser clabá tambe n’e staca.” Ora nan caba di duna nan testimonio, un bestia salbahe feros cu ta sali for di un abismo ta mata e dos testigonan.

Segun un informe den The New York Times Magazine di 27 di december 1998, e lider di un grupo religioso “a bisa su siguidónan cu e ta un dje dos testigonan cu ta predestiná pa anunciá e destruccion di tera i binida di Señor—i despues ser matá dor di Satanas den e cayanan di Jerusalem.” Ta di comprendé cu autoridadnan israelí ta preocupá. Nan ta teme cu cierto extremistanan lo purba “cumpli” cu e profecia riba nan mes, asta si esei ta nificá provocá un conflicto armá! Sin embargo, Dios no tin mester di “yudansa” di hende pa realisá su propósito. Tur e profecianan di Bijbel lo cumpli na Dios su tempu i na Dios su manera.

E buki di Revelacion a ser skirbí “den señal.” Segun Revelacion 1:1, Jesus kier a revelá na “su esclabonan,” (no na mundu en general) loke lo sosodé pronto. Pa comprendé e buki di Revelacion, Cristo su esclabonan, of siguidónan, lo tin mester di Dios su spiritu santu, cu Jehova ta duna esnan cu ta agrad’é. Si ta den sentido literal mester a comprendé e buki di Revelacion, asta hende sin fe lo por a les’é i comprend’é. E ora ei lo no ta necesario pa cristiannan pidi den oracion p’e spiritu santu pa nan por comprend’é.—Mateo 13:10-15.

Nos a mira cu segun evidencia bíblico, e di tres milenio contando for di Jesus su nacementu ta cuminsá den otoño di 1999 i cu ni e fecha ei, ni 1 di januari 2000, ni 1 di januari 2001, no tin nificacion special. Tog, tin un milenio cu ta interesá cristiannan profundamente. Si no ta e di tres milenio, ta cua anto? E artículo final den e seri aki lo contestá e pregunta ei.

[Nota]

[Kuadro na página 5]

2000 of 2001?

Pa comprendé di con algun hende ta pretendé cu e di tres milenio for di Jesus su nacementu lo cuminsá dia 1 di januari 2001, pensa riba e ilustracion aki. Suponé cu bo ta lesando un buki di 200 página. Ora bo yega na cabes di página 200, bo a caba di lesa 199 página, i bo falta un página mas pa lesa. Lo bo no completá e buki sino te ora bo yega na fin di página 200. Mescos tambe, 999 aña dje milenio actual, segun opinion general, lo pasa dia 31 di december 1999, i lo falta un aña mas pa yega te na fin dje milenio. Contand’e asina, e di tres milenio ta cuminsá dia 1 di januari 2001. Ma, esei no ta nificá cu riba e fecha ei lo a pasa exactamente 2.000 aña desde e fecha di Jesus su nacementu, manera e artículo aki ta mustra.

[Kuadro na página 6]

Con A Desaroyá e Sistema di Marca Fecha P.C. of A.D.

Na cuminsamentu di siglo 6 E.C., Papa Juan I a comisioná un mónik cu yama Dionisio Exiguo pa desaroyá un sistema di calculacion cu lo a permití iglesianan establecé un fecha oficial pa Pascu di Resureccion.

Dionisio a pone man na obra. El a calculá bai atras den tempu, pasa morto di Jesus, yega na loke el a pensa tabata e aña cu Jesus a nace; despues el a numerá cada aña djei bin ariba. Dionisio a designá e periodo desde Jesus su nacementu como “A.D.” (pa Anno Domini, esta, “den e aña di nos Señor.”) Aunke Dionisio su intencion tabata pa solamente inventá un manera confiabel pa calculá Pascu di Resureccion cada aña, sin cu e por a yuda el a introducí e concepto di numerá aña for dje nacementu di Cristo bin ariba.

Aunke mayoria erudito ta di acuerdo cu Jesus no a nace den e aña cu Dionisio a usa como base pa su calculacion, su sistema di cronologia sí ta permití nos localisá sucesonan den e coriente di tempu i mira nan relacion cu otro.