Den Mundu i tog No Parti di Dje

“Dor cu boso no ta parti di mundu, . . . mundu ta odia boso.”—JUAN 15:19.

1. Ki relacion cristiannan tin cu mundu, sin embargo con mundu ta mira nan?

SU ULTIMO anochi cu su disipelnan, Jesus a bisa nan: “Boso no ta parti di mundu.” Di cua mundu e tabata papia? E no a bisa na un ocasion anterior: “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno”? (Juan 3:16) E disipelnan tabata claramente parti dje mundu ei pasobra nan tabata e proménan cu a ehercé fe den Jesus pa bida eterno. Pakico, anto, Jesus a bisa awor cu su disipelnan tabata separá for di mundu? I pakico el a bisa tambe: “Dor cu boso no ta parti di mundu, . . . pa causa di esaki mundu ta odia boso”?—Juan 15:19.

2, 3. (a) Di cua “mundu” cristiannan lo no mester tabata parti? (b) Kico Bijbel ta bisa tocante e “mundu” di cua cristiannan no ta parti?

² E contesta ta cu Bijbel ta usa e palabra “mundu” (griego, koʹsmos) den diferente manera. E artículo anterior a splica cu tin biaha den Bijbel “mundu” ta referí na humanidad en general. Esaki ta e mundu cu Dios a stima i pa cua Jesus a muri. Sin embargo, The Oxford History of Christianity ta declará: “‘Mundu’ ta un término tambe cu cristiannan ta usa pa algu alehá for di Dios i hostil pa cuné.” Con nos tin cu comprendé esaki? Den su buki Les chrétiens et le monde (Cristiannan i e Mundu), autor católico Roland Minnerath, ta splica: “Tumá den un sentido negativo, mundu ta ser mirá anto como . . . e region caminda gobiernunan hostil pa cu Dios ta efectuá nan actividad i esei ta forma dor di su oposicion contra e mando victorioso di Cristo un imperio enemigu bou dje control di Satanas.” E “mundu” aki ta e masa di humanidad cu ta alehá for di Dios. Cristiannan berdadero no ta parti dje mundu aki, i e ta odia nan.

³ Yegando na fin dje promé siglo, Juan tabatin e mundu aki na mente ora el a skirbi: “No stima ni mundu ni loke ta den mundu. Si un hende ta stima mundu, e amor dje Tata no ta den dje; pasobra tur loke tin den mundu—e deseo di carni i e deseo di wowo i e exhibicion grandioso di bo medio di biba—no ta originá cu e Tata, sino ta originá cu mundu.” (1 Juan 2:15, 16) Tambe el a skirbi: “Nos sa cu nos a originá cu Dios, pero henter e mundu ta drumí den poder dje malbado.” (1 Juan 5:19) Jesus mes a yama Satanas “e gobernante dje mundu aki.”—Juan 12:31; 16:11.

E Crecementu di Potencianan Mundial

4. Con potencianan mundial a bin na existencia?

⁴ E mundu di humanidad alehá for di Dios cu ta existí awor a cuminsá desaroyá djis despues dje Diluvio den tempu di Noe, ora hopi dje desendientenan di Noe a stop di adorá Jehova Dios. Un di esnan principal e tempu ei tabata Nimrod, un constructor di stad i “un yagdó poderoso na oposicion cu Jehova.” (Génesis 10:8-12) Den e añanan ei gran parti dje mundu aki tabata organisá den stadnan chikitu cu a forma reinonan. De bes en cuando nan a forma coalicionnan i a bringa guera contra otro. (Génesis 14:1-9) Algun dje reinonan aki a haña dominio riba otronan pa bira podernan regional. Cu tempu algun poder regional a crece bira gran potencianan mundial.

5, 6. (a) Cua ta e shete potencianan mundial di historia di Bijbel? (b) Con e potencianan mundial aki ta ser simbolisá, i di unda nan poder ta bini?

⁵ Siguiendo e modelo di Nimrod, e gobernantenan dje potencianan mundial no tabata adorá Jehova, un echo cu a reflehá den nan obranan cruel i violento. E potencianan mundial aki ta simbolisá den e Scritura pa bestianan salbahe, i atrabes di siglonan, Bijbel ta identificá seis di nan cu tabatin un impacto poderoso riba e pueblo di Jehova. Esakinan tabata Egipto, Asiria, Babilonia, Medo-Persia, Grecia i Roma. Despues di Roma, Bijbel a profetisá cu un di shete potencia mundial lo a lanta. (Daniel 7:3-7; 8:3-7, 20, 21; Revelacion 17:9, 10) Esaki a resultá di ta e Poder Mundial Anglo-Americano, consistiendo di e Imperio Británico cu su aliado Merca, cu despues di tempu a surpasá Gran Bretania na poder. E Imperio Británico a cuminsá desaroyá despues cu e último rastro dje Imperio Romano finalmente a disparcé.a

⁶ E shete potencianan mundial cu a sigui otro ta ser simbolisá den e buki di Revelacion pa e cabesnan di un bestia salbahe di shete cabes cu ta subi for dje laman di humanidad inkieto. (Isaías 17:12, 13; 57:20, 21; Revelacion 13:1) Ken ta duna e bestia gobernante aki su poder? Bijbel ta contestá: “E dragon a duna e bestia su poder i su trono i gran autoridad.” (Revelacion 13:2) E dragon ta ningun otro cu Satanas e Diabel.—Lucas 4:5, 6; Revelacion 12:9.

E Binidero Gobernacion dje Reino di Dios

7. Den kico cristiannan ta spera, i con esaki ta afectá nan relacion cu e gobiernunan di mundu?

⁷ Pa casi 2.000 aña, cristiannan a pidi den oracion: “Laga bo reino bini. Laga bo boluntad sosodé, mescos cu den shelu, tambe riba tera.” (Mateo 6:10) Testigonan di Jehova sa cu ta e Reino di Dios so por trece berdadero pas riba tera. Siendo observadónan atento di profecia di Bijbel, nan ta convencí cu pronto e oracion aki lo ser contestá i cu dentro di poco e Reino lo tuma encargo di asuntunan dje tera. (Daniel 2:44) Nan pegamentu n’e Reino aki ta haci nan neutral den asuntunan di gobiernunan di mundu.

8. Con gobiernunan ta reaccioná n’e gobernacion dje Reino di Dios, manera Salmo 2 a predicí?

⁸ Algun nacion ta pretendé di warda principionan religioso. No obstante, den práctica nan ta ignorá e echo cu Jehova ta e Soberano Universal i cu el a entronisá Jesus como Rey celestial cu autoridad riba e tera. (Daniel 4:17; Revelacion 11:15) Un salmo profético ta declará: “Reynan dje tera ta tuma nan posicion i oficialnan haltu mes a reuní huntu manera unu contra Jehova i contra su ungí [Jesus], bisando: ‘Laga nos sker nan banchinan i tira nan cabuyanan for di nos!’” (Salmo 2:2, 3) Gobiernunan no ta aceptá ningun ‘banchi’ ni ‘cabuya’ divino cu lo limitá e manera cu nan ta ehercé nan soberania nacional. P’esei, Jehova ta bisa Jesus, su Rey scogí: “Pidí mi, pa mi duna nacionnan como bo herencia i e extremonan dje tera como bo mes posesion. Lo bo kibra nan cu un bara di heru, lo bo kibra nan na pida pida mescos cu un wea di un trahadó di klei.” (Salmo 2:8, 9) Sin embargo, no ta henter e mundu di humanidad pa cua Jesus a muri lo ser ‘kibrá.’—Juan 3:17.

Evitando “e Marca” dje “Bestia”

9, 10. (a) Di kico e buki di Revelacion ta spierta nos? (b) Kico e echo cu un hende tin ‘e marca dje bestia’ ta simbolisá? (c) Ki marcanan sirbidónan di Dios ta aceptá?

⁹ E Revelacion cu apostel Juan a ricibí a spierta cu e mundu di humanidad cu ta alehá for di Dios lo aumentá su exigencianan djis promé cu su fin, poniendo “bou di obligacion tur hende, chikitu i grandi, i ricu i pober, liber i esclabo, pa nan duna esakinan un marca den nan man drechi of riba nan frenta, i pa ningun hende por cumpra of bende excepto un persona cu tin e marca.” (Revelacion 13:16, 17) Kico esaki ta nificá? Un marca den man drechi ta un símbolo apropiado di apoyo activo. Kico dje marca riba frenta? The Expositor’s Greek Testament ta declará: “E referencia altamente figurativo aki ta n’e custumber di marca soldat i catibunan cu un tatuahe of cu heru cayente . . . ; of, mihó ainda, n’e custumber religioso di carga nomber di un dios como un talisman.” Cu nan accionnan i palabranan hopi hende ta carga e marca aki simbólicamente, identificando nan mes como ‘catibu’ of “soldat” dje “bestia.” (Revelacion 13:3, 4) En cuanto nan futuro, e Theological Dictionary of the New Testament ta bisa: “E enemigunan di Dios ta permití p’e [marca] dje bestia, e cifra misterioso cu ta contené su nomber, ser di stempel riba nan frenta i un man. Esaki ta duna nan hopi oportunidad pa progresá económicamente i comercialmente, pero e ta trece nan bou dje rabia di Dios i ta excluí nan for dje reino di mil aña, Rev. 13:16; 14:9; 20:4.”

¹⁰ Mas i mas curashi i awante ta necesario pa resistí e presion di ricibí “e marca.” (Revelacion 14:9-12) Sin embargo, sirbidónan di Dios tin un fortalesa asina, i pa motibu di esaki, hopi biaha nan ta ser odiá i calumniá. (Juan 15:18-20; 17:14, 15) En bes di carga e marca dje bestia, Isaías a bisa cu simbólicamente nan lo skirbi riba nan man: “Perteneciendo na Jehova.” (Isaías 44:5) Ademas, siendo cu nan ta ‘suspirá i keha’ riba e cosnan detestabel cu religion apóstata ta haci, nan ta ricibí un marca simbólico riba nan frenta cu ta identificá nan como digno pa ser di spar ora e huicionan di Jehova ser ehecutá.—Ezekiel 9:1-7.

11. Ken ta permití gobiernunan humano goberná te ora e Reino di Dios bini pa tuma over gobernacion dje tera?

¹¹ Dios ta permití gobiernunan humano goberná te ora e tempu yega p’e Reino celestial di Cristo tuma e gobernacion dje tera aki completamente over. Den su buki The State in the New Testament, profesor Oscar Cullmann a referí n’e echo aki cu Dios ta tolerá estadonan político. E ta skirbi: “E nocion complicá dje caracter ‘temporal’ di Estado ta e motibu pakico e actitud dje promé cristiannan pa cu Estado no ta consistente, sino mas bien ta parce di ta contradictorio. Mi ta enfatisá, cu e ta parce asina. Nos tin cu mencioná solamente Romanonan 13:1, ‘Laga tur hende ser sumiso n’e podernan cu ta . . . ,’ banda di Revelacion 13: Estado como e bestia cu ta subi for di abismo.”

E “Bestia” i “César”

12. Ki punto di bista balansá Testigonan di Jehova tin di gobiernunan humano?

¹² Lo ta incorecto pa concluí cu tur hende cu tin autoridad gubernamental ta agente di Satanas. Hopi a resultá di ta hende di principio, manera e procónsul Sergio Paulo cu ta ser describí den Bijbel como “un homber inteligente.” (Echonan 13:7) Cu curashi algun gobernante a defendé e derechonan di gruponan minoritario, guiá pa e concenshi cu Dios a duna nan maske nan no tabata conocé Jehova i su propósitonan. (Romanonan 2:14, 15) Corda, Bijbel ta usa e palabra “mundu” den dos manera cu ta na contraste cu otro: e mundu di humanidad, cu Dios ta stima i cu nos mester stima, i e mundu di humanidad alehá for di Jehova, di cua Satanas ta e dios i for di cua nos mester keda apartá. (Juan 1:9, 10; 17:14; 2 Corintionan 4:4; Santiago 4:4) Pues, Jehova su sirbidónan tin un punto di bista balansá pa cu gobernacion humano. Nos ta neutral den asuntunan político siendo cu nos ta sirbi como embahadornan dje Reino di Dios i nos bida ta dedicá na Dios. (2 Corintionan 5:20) Di otro banda, pa motibu di concenshi nos ta sumiso na esnan cu ta den puesto di autoridad.

13. (a) Con Jehova ta mira gobiernunan humano? (b) Te con leu sumision cristian na gobiernunan humano ta bai?

¹³ E posicion balansá aki ta reflehá Jehova Dios su mes punto di bista. Ora potencianan mundial, of asta paisnan chikitu, ta abusá di nan autoridad, ta oprimí nan pueblo of ta persiguí esnan cu ta adorá Dios, nan siguramente ta merecé e descripcion profético di ta bestia feros. (Daniel 7:19-21; Revelacion 11:7) Sin embargo, ora gobiernunan nacional ta sirbi e propósito di Dios pa mantené ley i ordu den husticia, e ta considerá nan como su “sirbidónan público.” (Romanonan 13:6) Jehova ta spera pa su pueblo respetá gobiernunan humano i ser sumiso na nan, pero nan sumision no ta sin límite. Ora hende ta rekerí di Dios su sirbidónan cosnan cu e ley di Dios ta prohibí of ora nan ta prohibí cosnan cu Dios ta rekerí pa su sirbidónan haci, e últimonan aki ta sigui e posicion cu e apostelnan a adoptá, esta: “Nos tin cu obedecé Dios como gobernante mas bien cu hende.”—Echonan 5:29.

14. Con Jesus, i despues Pablo, a splica sumision cristian na gobiernunan humano?

¹⁴ Jesus a bisa cu su siguidónan lo tin obligacionnan tantu pa cu gobiernunan como pa cu Dios ora el a declará: “P’esei, paga bek e cosnan di César na César, pero na Dios e cosnan di Dios.” (Mateo 22:21) Apostel Pablo a skirbi bou di inspiracion: “Laga tur alma sea sumiso na autoridadnan superior . . . Pero si bo ta haciendo loke ta malu, teme: pasobra no ta sin propósito cu e ta carga e spada; pasobra e ta minister di Dios, un vengadó pa expresá rabia riba esun cu ta practicá loke ta malu. P’esei, tin motibu obligatorio pa boso ta sumiso, no solamente pa motibu dje rabia ei, sino tambe pa motibu di boso concenshi. Pasobra p’esei mes tambe boso ta paga belasting.” (Romanonan 13:1, 4-6) For dje promé siglo E.C. te awe, cristiannan tabatin cu cumpli cu exigencianan di Estado. Nan tabatin cu dicerní si cumplimentu cu e exigencianan ei lo a comprometé nan adoracion of si e exigencianan ei tabata legítimo i cu mester a cumpli cu nan pa motibu di concenshi.

Ciudadanonan Conciencial

15. Con Testigonan di Jehova conciencialmente ta paga bek na César loke nan debe?

¹⁵ E “autoridadnan superior” político ta “minister” di Dios ora nan ta cumpli cu nan papel cu Dios a aprobá, cu ta encerá autoridad “pa duna castigu na malechornan, pero pa elogiá hacidónan di loke ta bon.” (1 Pedro 2:13, 14) Conciencialmente Jehova su sirbidónan ta paga bek na César loke e legítimamente ta exigí den forma di belasting, i nan ta bai mes leu cu nan concenshi bíblicamente entrená lo permití nan di bai den ser “obediente na gobiernu i autoridad como gobernante, . . . cla pa tur bon obra.” (Tito 3:1) “Bon obra” ta encerá yuda otronan, manera ora tin catástrofe. Hopi hende a papia di e bondad cu Testigonan di Jehova a mustra pa cu nan próhimo den e situacionnan aki.—Galationan 6:10.

16. Ki bon obranan Testigonan di Jehova ta haci conciencialmente pa gobiernu i próhimo?

¹⁶ Testigonan di Jehova ta stima nan próhimo i ta haña cu e mihó obra cu nan por haci pa nan ta di yuda nan yega na un conocimentu exacto di Dios su propósito pa producí un hustu “shelu nobo i un tera nobo.” (2 Pedro 3:13) Dor di siña i practicá e principionan moral haltu di Bijbel, nan tin hopi balor pa sociedad humano, dor cu nan ta salba hopi hende for di delincuencia. Jehova su sirbidónan ta obediente na ley i ta respetuoso pa cu minister, oficial, hues i autoridadnan gubernamental di stad, rindiendo onor na ‘esnan cu ta exigí onor.’ (Romanonan 13:7) Mayornan testigo gustosamente ta cooperá cu maestronan di scol di nan yunan i ta yuda nan yunan studia bon, di manera cu despues esakinan lo por gana nan pan di cada dia i no ser un carga pa sociedad. (1 Tesalonicensenan 4:11, 12) Den nan congregacion, e Testigonan ta contra prehuicio racial i distincion di clase, i nan ta duna hopi importancia na fortalecé bida di famia. (Echonan 10:34, 35; Colosensenan 3:18-21) P’esei, cu nan accionnan, nan ta mustra cu e acusacionnan cu nan ta kibra famia i cu nan no ta yuda comunidad ta falsu. Asina, e palabranan di apostel Pedro ta resultá cierto: “Asina e boluntad di Dios ta, cu dor di haci bon boso por bosalá e papiamentu ignorante di hende irazonabel.”—1 Pedro 2:15.

17. Con cristiannan por sigui “cana den sabiduria pa cu esnan di pafó”?

¹⁷ Pues aunke Cristo su berdadero siguidónan “no ta parti di mundu,” tog nan ta den e mundu di sociedad humano i mester sigui “cana den sabiduria pa cu esnan di pafó.” (Juan 17:16; Colosensenan 4:5) Tanten cu Jehova ta permití e autoridadnan superior funcioná como su minister, nos lo mustra debido respet na nan. (Romanonan 13:1-4) Aunke nos ta keda neutral pa loke ta política, nos ta haci oracion en cuanto “reynan i tur esnan cu ta den puesto haltu,” foral ora esakinan tin cu tuma decision cu lo por afectá libertad di adoracion. Nos lo sigui haci esaki “afin cu nos por sigui hiba un bida calmu i ketu cu pleno debocion piadoso i seriedad,” pa “tur clase di hende ser salbá.”—1 Timoteo 2:1-4.

[Nota]

Preguntanan di Repaso

◻ Di cua “mundu” cristiannan ta parti, pero di cua “mundu” nan no por ta parti?

◻ Kico “e marca” dje “bestia” riba un persona su man of frenta ta simbolisá, i ki marcanan fiel sirbidónan di Jehova tin?

◻ Ki punto di bista balansá cristiannan berdadero tin pa cu gobiernunan humano?

◻ Cua ta algun manera den cua Testigonan di Jehova ta contribuí n’e bienestar di sociedad humano?

[Plachinan na página 16]

Bijbel ta identificá gobiernu humano tantu como sirbidó di Dios i como un bestia salbahe

[Plachi na página 17]

Dor cu Testigonan di Jehova ta mustra interes amoroso den otro hende, nan tin hopi balor pa nan comunidad