Graduadonan di Galaad Ta Haña Instrukshon Ku Ta Konmové Nan Kurason

DIA 9 di sèptèmber 2006, tabatin e graduashon di e di 121 klas di e Skol Bíbliko di Galaad di Watchtower. Tabata un programa alentador ku a tuma lugá na e Sentro Edukativo di Watchtower na Patterson, New York.

Geoffrey Jackson, miembro di Kuerpo Gobernante di Testigunan di Yehova, a habri e programa yamando bonbiní na e 56 graduadonan i e ouditorio internashonal di 6.366 persona. El a konsiderá Salmo 86:11, ku ta bisa: “Siña mi bo kaminda, o [Yehova]; lo mi kana den bo bèrdat; uni mi kurason pa teme bo nòmber.” Ruman Jackson a señalá tres kos ku e versíkulo aki ta enfatisá. El a bisa: “Den e promé parti di e versíkulo, esei ta instrukshon; den e di dos parti, aplikashon; i den e di tres, motivashon. E tres kosnan aki ta spesialmente importante pa boso komo misionero awor ku boso ta bai na boso asignashon.” Despues di esei el a introdusí un seri di diskurso i entrevista ku a enfatisá tur e tres puntonan aki.

Palabranan Alentador di Instrukshon

William Malenfant, un miembro di e personal di e sede mundial, a konsiderá e tema “E Mihó Bida Ku Por Tin.” El a hala atenshon na e ehèmpel di Maria, ruman muhé di Marta. Na un okashon ku Hesus a bishitá nan kas, Maria a skohe pa sinta na pia di Hesus pa por a skuch’é, el a hasi esei su prioridat. Hesus a bisa Marta: “Maria a skohe e parti bon ku lo no wòrdu kitá for di dje.” (Lukas 10:38-42) E oradó di: “Pensa riba esei un ratu. Pa eternidat Maria lo kòrda ku el a sinta na pia di Hesus i personalmente a skucha bèrdatnan spiritual maravioso; tur esei pasobra el a skohe bon.” Despues di a elogiá e graduadonan pa e bon desishonnan spiritual ku nan a tuma, el a bisa: “Loke boso a skohe p’e a hiba boso na e mihó bida ku tin.”

Siguientemente Anthony Morris, un miembro di Kuerpo Gobernante, a desaroyá e tema basá riba Romanonan 13:14, “Bisti Boso ku Señor Hesukristu.” Kon nos por hasi esaki? ‘Bisti e Señor Hesukristu’ ta enserá imitá e maneranan di e Señor. E ta nifiká imitá e ehèmpel i karakter di Hesus. E oradó a bisa: “Hesus a laga hende sinti nan mes kómodo serka dje pasobra e tabata sinseramente interesá den nan, i nan por a sinti esei.” Anto e oradó a mustra ku e studiantenan a gana hopi konosementu for di e lèsnan di Galaad pa nan ‘por komprondé e hanchura i largura i haltura i profundidat’ di e bèrdat, manera Efesionan 3:18 ta bisa. Pero el a rekordá nan loke versíkulo 19 ta bisa: “Pa konosé e amor di Kristu ku ta surpasá konosementu.” Ruman Morris a urgi e studiantenan: “Segun ku boso ta sigui hasi boso estudio personal, reflekshoná riba kon boso por imitá e kompashon amoroso di Kristu i realmente ‘bisti boso ku Señor Hesukristu.’”

Konseho di Despedida di e Instruktornan di Galaad

E siguiente diskurso tabata na enkargo di e instruktor di Galaad, Wallace Liverance. Su tema tabata basá riba Proverbionan 4:7. El a bisa ku ounke sabiduria divino ta sumamente importante, nos mester “gana komprondementu” tambe, ya ku esei ta enserá kombiná echonan isolá i mira kon nan ta konektá ku otro pa asina kapta e nifikashon di un asuntu. E oradó a mustra ku ganamentu di konosementu ta duna goso. Por ehèmpel, den tempu di Nehemias, e levitanan tabata “splika e lei” i yuda e pueblo “komprondé loke tabata wòrdu lesá.” Despues, e pueblo a “selebrá un gran fiesta, pasobra nan a komprondé e palabranan ku a wòrdu spliká na nan.” (Nehemias 8:7, 8, 12) Ruman Liverance a konkluí: “Un resultado sekundario ku nos ta haña despues di a komprondé e Palabra di Dios inspirá pa spiritu santu ta goso.”

“Ken Realmente Ta Bo Enemigu?” tabata e tema ku Mark Noumair, un otro instruktor di Galaad, a trata. Den guera, basta sòldá ta muri a konsekuensia di ‘tiru di amigu,’ es desir, nan ta ser ataká pa nan propio tropanan. E oradó a puntra: “Kiko di e guera spiritual ku nos ta aden?” El a bisa: “Si nos no tene kuidou, nos por bruha lubidá ta ken ta e berdadero enemigu i heridá nos propio tropanan.” Kisas envidia ta pone ku pa algun ruman ta difísil pa mira ta ken ta e enemigu. Envidia a pone ku Rei Saul a purba mata David, su kompañero di adorashon, siendo ku en realidat ta e filisteonan tabata e enemigu. (1 Samuel 18:7-9; 23:27, 28) Anto e oradó a sigui bisa: “Kiko si bo ta sirbi ku un misionero ku ta sobresalí den hopi manera? Lo bo heridá bo kompañero sòldá ku komentarionan krítiko, òf lo bo konformá bo ku e echo ku otro hende lo surpasá bo den vários manera? Si nos ta enfoká riba e imperfekshonnan di otro hende, esei solamente lo por konfundí nos tokante ken ta e berdadero enemigu. Bringa kontra e berdadero enemigu, Satanas.”

Eksperensianan Agradabel i Entrevistanan Informativo

E siguiente parti, “Hasi e Trabou di un Predikadó di Evangelio,” tabata na enkargo di e instruktor di Galaad, Lawrence Bowen, i a konsistí di entrevista i eksperensia. E trabou prinsipal di un misionero entrená na Galaad ta pa plama e bon nobo, i e klas aki a hasié na unda ku nan por a haña hende. Anto e rumannan a tene demostrashon di algun eksperensia masha agradabel.

Despues tabatin riba programa dos parti presentá respektivamente pa Michael Burnett i Scott Shoffner, kende ámbos ta miembro di e famia di Bètel. Nan a entrevistá miembronan di Komité di Sukursal di Barbados, Korea, Oustralia i Uganda. E komentarionan di e miembronan di komité a revelá kuantu esfuerso e rumannan ta hasi pa atendé e nesesidatnan di e misioneronan, inkluso ta sòru pa nan tin akomodashon i kuido médiko adekuá. E miembronan di komité a enfatisá ku misioneronan eksitoso ta esnan ku ta dispuesto pa adaptá nan mes na sirkunstansianan lokal.

Un Konklushon Stimulante i Konmovedor

E diskurso prinsipal di e programa tabatin komo tema “Teme Dios i Dun’é Gloria,” presentá pa John E. Barr, kende tin hopi aña komo miembro di Kuerpo Gobernante. El a konsiderá Revelashon 14:6 i 7, ku ta bisa: “Mi a mira un otro angel ta bula meimei di shelu, kende tabatin un evangelio eterno pa prediká na esnan ku ta biba riba tera, i na tur nashon i tribu i lenga i pueblo; i el a bisa na bos haltu: ‘Teme Dios i dun’é gloria, pasobra e ora di su huisio a yega.’”

Ruman Barr a urgi e studiantenan pa keda kòrda tres kos relashoná ku e angel ei. Di promé, e tabatin ku deklará e evangelio òf bon nobo eterno ku Kristu ta gobernando awor ku pleno outoridat di Reino. E oradó a bisa: “Nos ta plenamente konvensí ku su entronisashon a tuma lugá na aña 1914. Pues nos tin ku proklamá e notisia gososo aki rònt mundu.” Di dos, e angel a deklará: “Teme Dios.” E oradó a splika ku e graduadonan tin ku yuda nan studiantenan di Beibel kultivá rèspèt profundo pa Dios di manera ku nan lo no hasi nada ku ta desagrad’é. Di tres, e angel a manda: ‘Duna gloria na Dios.’ E studiantenan a haña e animashon: “No lubidá nunka ku nos ta sirbi pa e gloria di Dios, no pa nos mes gloria.” Anto durante Ruman Barr su splikashon di ‘e ora di huisio,’ el a deklará: “Tempu ta kabando i nos ta aserkando e momento ku lo deklará e huisio final. Hopi hende den nos teritorionan ainda tin ku tende e mensahe di e bon nobo promé ku ta lat.”

Ku e palabranan aki resonando den nan orea, e 56 graduadonan a risibí nan diploma i asignashon pa bai na e finnan di tera. Kurason di e graduadonan i di tur hende presente a keda profundamente konmoví pa e konseho motivador ku nan a haña riba e dushi dia ei.

[Kuadro na página 17]

ESTADÍSTIKANAN DI E KLAS

Kantidat di pais representá: 6

Kantidat di pais na kua a asigná nan: 25

Kantidat di studiante: 56

Promedio di edat: 35,1

Promedio di aña den e bèrdat: 18,3

Promedio di aña den sirbishi di tempu kompletu: 13,9

[Plachi na página 18]

E di 121 Klas di Graduado di e Skol Bíbliko di Galaad di Watchtower

Den e lista aki bou, e reinan ta numerá di dilanti bai patras, i e nòmbernan ta bai di robes pa drechi den kada rei.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.