Capítulo 31

Obra di Jehova—grandi i maraviyoso

Vision 10—Revelacion 15:1–16:21

Tema: Jehova den su santuario; siete conchi di su rabia bashá riba tera

Tempo di cumplimento: Di 1919 te Armagedón

1, 2. (a) Juan ta informa di cua tercera siñal? (b) Sirbidor di Jehova tabata sa pa mashá tempo tocante cua papel cu angel ta hunga?

UN HENDE muher ta duna luz na un yiu homber! Un dragón grandi ta purba di devora e yiu! E dos siñal celestial, pintá asina bibo den Revelacion capítulo 12, ta impresioná den nos mente cu e cuestion di siglonan largu enbolbiendo e Simía dje esposa di Dios i Satanás i su simía demoniáco ta yega su culminacion. Dunando énfasis ne dos símbolo, Juan a bisa: “I un siñal grandi tabata mirá den cielo . . . I un otro siñal a wordu mirá.” (Revelacion 12:1, 3, 7-12) Awor Juan ta informa di un tercera siñal: “I mi a mira den cielo un otro siñal, grandi i maraviyoso, siete angel cu siete plaga. Nan ta e últimonan, pasobra pa medio di nan e rabia di Dios ta keda terminá.” (Revelacion 15:1) E tercera siñal també tin un nificacion vital pa sirbidor di Jehova.

² Ripara e papel importante cu angel ta hunga di nobo den e cumplimento dje boluntad di Dios. Sirbidor di Jehova Dios tabata conoce tal echo pa mashá tempo. Sí, bao di inspiracion e salmista di antigua asta a papia cu angel asina, estimulando nan pa: “Bendiciona Jehova, O angelnan di dje, fuerte den poder, cu ta cumpli cu su palabra, door di scucha e boz di su palabra”! (Salmo 103:20) Awor, den e otro vision aki, angel ta ser asigná pa basha e último siete plaga.

3. Cua ta e siete plaga, i bashamento di nan ta indica kico?

³ Cua plaga eseinan tá? Mescos cu e siete tocamento di trompet, nan ta declaracion picante di huicio cu ta publica e punto di bista di Jehova di varios aspecto di mundo i ta adverti dje resultado final di decision hudicial di dje. (Revelacion 8:1–9:21) E bashamento di eseinan ta señala na ehecucion di tal huicio, ne destruccion di obheto di rabia di Jehova den e dia di su rabia ardiente. (Isaías 13:9-13; Revelacion 6:16, 17) Asina, dje manera ei e “rabia di Dios ta keda terminá.” Pero, promé cu Juan ta duna detaye di bashamento di plaga, e ta informános tocante algun hende cu plaga lo no afecta desfavorablemente. Ya cu nan a rechaza e marca dje bestia salbahe, tal hende leal ta canta alabanza pa Jehova mientras cu nan ta proclama e dia di su vinganza.—Revelacion 13:15-17.

E cantica di Moisés i dje Lamchi

4. Kico a yega na bista di Juan awor?

⁴ Awor un bista notable a presenta pa Juan: “I mi a mira loke a parce di ser un lamá di glas bruhá cu candela, i esnan cu ta sali victorioso for dje bestia salbahe i for di su imagen i for dje número di su nomber ta pará cant’i lamá di glas, teniendo arpa di Dios den nan man.”—Revelacion 15:2.

5. Kico “lamá di glas bruhá cu candela” ta simboliza?

⁵ E “lamá di glas” ta e mesun lamá cu Juan a mira na antes, poní dilanti dje trono di Dios. (Revelacion 4:6) Esei ta similar cu e “lamá di líquido” (tanki di awa) dje tempel di Salomón, unda sacerdote a obtene awa pa baña. (1 Rey 7:23) Pues, esei tabata un representacion excelente dje “baño di awa,” esta, e Palabra di Dios, cu Jesús ta usa pa haci limpi e congregacion sacerdotal di cristian ungí. (Efesio 5:25, 26; Hebreo 10:22) E lamá di glas ta “bruhá cu candela,” indicando cu e ungínan ta ser purbá i purificá mientras cu nan ta obedece ley halto establecí pa nan. Además, esei ta hácinos corda cu e Palabra di Dios també ta contene expresion di huicio ardiente contra su enemigo. (Deuteronomio 9:3; Sofonías 3:8) Algun huicio ardiente ta ser manifestá den e último siete plaga cu ta cla pa ser bashá.

6. (a) Ken ta cantante cu ta para dilanti dje lamá di glas den cielo, i con nos sa esei? (b) Di ki manera nan a “sali victorioso”?

⁶ E echo cu e lamá di líquido dje tempel di Salomón tabata pa sacerdote usa ta indica cu cantante pará dilanti dje lamá di glas di cielo ta un grupo di sacerdote. Nan tin “arpa di Dios,” i p’sei nos ta asociánan cu e 24 anciano i e 144.000, siendo cu e dos grupo també ta canta i ta toca arpa. (Revelacion 5:8; 14:2) Cantante cu Juan a mira “ta sali victorioso for dje bestia salbahe i for di su imagen i for dje número di su nomber.” Pues, nan mester ta dje 144.000 cu ta biba riba tera durante e último dianan. Como un grupo, nan en berdad ta sali victorioso. Pa casi 90 aña caba desde 1919, nan a nenga di acepta e marca dje bestia salbahe of acudi na su imagen como e único speranza di paz pa humanidad. Hopi di nan a persevera fielmente te na morto caba, i eseinan, den cielo awor, sin duda ta sigi cu gozo special e cantamento di nan rumanan cu ta riba tera ainda.—Revelacion 14:11-13.

7. Con hende a usa arpa den Israel di antigua, i con e presencia di arpa di Dios den e vision di Juan mester afectános?

⁷ Tal vencedor leal tin arpa di Dios. Dje manera ei, nan ta mescos cu levita di tempel di antigua, cu a adora Jehova cantando cantica i tocando arpa. Algun també a profetiza compañando nan mes cu arpa. (1 Crónica 15:16; 25:1-3) Compañamento bonita di arpa a haci mas bonita cantica di gozo i oracion di alabanza i di agradicimento di Israel na Jehova. (1 Crónica 13:8; Salmo 33:2; 43:4; 57:7, 8) Den tempo di desconsuelo of esclabitud, nan no a toca arpa. (Salmo 137:2) E presencia di arpa di Dios den e vision mester yénanos cu e deseo di canta un gozoso cantica di victoria pe alabanza di nos Dios i di duné agradicimento.a

8. Cua cantica ta ser cantá, i e ta contene cua palabra?

⁸ Esei ta loke Juan a informa: “I nan tabata canta e cantica di Moisés e sclabo di Dios i e cantica dje Lamchi, bisando: ‘Grandi i maraviyoso ta bo obranan, Jehova Dios, Todopoderoso. Bo camina ta husto i berdadero, Rey di eternidad. Ken lo no realmente temébo, Jehova, i glorifica bo nomber, pasobra bo so ta leal? Pasobra tur nacion lo bini i adora dilanti bo, pasobra decreto husto di bo a ser manifestá.’”—Revelacion 15:3, 4.

9. Pakico e cantica ta ser yamá, en parti, e “cantica di Moisés”?

⁹ Tal vencedor ta canta e “cantica di Moisés,” esta, un cantica similar di esun cu Moisés a canta den circunstancia similar. Despues cu israelita a presencia e diez plaga den Egipto i e destruccion di ehército egipcio den Lamá Corá, Moisés a guíanan den un cantica asina, di alabanza triunfante pa Jehova, proclamando: “Jehova lo reina como rey te na tempo indefinitivo, asta pa semper.” (Exodo 15:1-19) Ta ki apropiado pa cantante den e vision di Juan, saliendo victorioso for dje bestia salbahe i enbolbí den e proclamacion dje último siete plaga, canta també pe “Rey di eternidad”!—1 Timoteo 1:17.

10. Moisés a compone cua otro cantica, i con e último verso di dje ta relacioná cu e multitud grandi djawe?

¹⁰ Den un otro cantica, componí ora Israel tabata prepara pa conquista Canán, e anciano Moisés a bisa e nacion: “Lo mi declara e nomber di Jehova. Boso atribui grandeza na nos Dios!” E último verso dje cantica també a duna animacion na hende no israelita, i e palabra inspirá di Moisés ta yega te ne multitud grandi djawe: “Boso alegra, O nacionan, cu su pueblo.” I pakico nan mester alegra? Pasobra awor Jehova “lo vinga e sanger di su sirbidornan, i lo paga vinganza na su enemigonan.” Tal ehecucion di huicio husto lo duna gran gozo na tur hende cu ta spera den Jehova.—Deuteronomio 32:3, 43; Romano 15:10-13; Revelacion 7:9.

11. Con e cantica cu Juan a tende ta sigi haya cumplimento?

¹¹ Moisés mes lo alegra si e por ta den e dia di Señor djawor, cantando hunto cu e coro celestial: “Tur nacion lo bini i adora dilanti bo”! Tal cantica sublime ta sigi tene un cumplimento maraviyoso den e dia djawe manera nos ta mira, no den un vision so sino como un realidad bibo, den e miyones di hende dje “nacionan” cu ta basha gozosamente den e organizacion terrenal di Jehova Dios.

12. Pakico e cantica di esnan victorioso ta ser yamá també e “cantica dje Lamchi”?

¹² No obstante, esei ta e cantica no solamente di Moisés sino també dje “Lamchi.” Di ki manera? Moisés tabata e profeta di Jehova pa Israel, pero Moisés mes a profetiza di cu Jehova lo lanta un profeta mescos cuné. Esei a resulta di ser e Lamchi, Jesucristo. Mientras cu Moisés tabata “esclabo di Dios,” Jesús tabata Yiu di Dios, en realidad, Moisés Mayor. (Deuteronomio 18:15-19; Echo 3:22, 23; Hebreo 3:5, 6) Pues, cantante també ta canta e “cantica dje Lamchi.”

13. (a) Aunque Jesús ta mayor cu Moisés, con e ta parcé? (b) Con nos por unínos cu tal cantante?

¹³ Mescos cu Moisés, Jesús a canta públicamente e alabanza di Dios i a profetiza di su victoria riba tur enemigo di dje. (Mateo 24:21, 22; 26:30; Lucas 19:41-44) Jesús també a anhela e tempo ora tur nacion lo drenta pa alaba Jehova, i como e “Lamchi di Dios” cu a ofrece su mes como sacrificio, el a entrega su bida humano pa haci esei posibel. (Juan 1:29; Revelacion 7:9; compara cu Isaías 2:2-4; Zacarías 8:23.) I mescos cu Moisés a yega di aprecia Jehova, e nomber di Dios, i di halza su nomber, asina Jesús a duna di conoce e nomber di Dios. (Exodo 6:2, 3; Salmo 90:1, 17; Juan 17:6) Siendo cu Jehova ta leal, promesa glorioso di dje siguramente lo ser cumplí. Siguramente, anto, nos ta hunto cu tal cantante leal, cu e Lamchi, i cu Moisés, cantando palabra dje cantica: “Ken realmente lo no temébo, Jehova, i glorifica bo nomber?”

Angel cu conchi

14. Ken Juan a mira saliendo for dje santuario, i kico tabata duná na nan?

¹⁴ Ta apropiado pa nos tende cantica di tal vencedor ungí. Pakico? Pasobra nan a publica riba tera huicio cu conchi ta contene cu ta yen dje rabia di Dios. Pero bashamento di tal conchi ta enbolbe mas cu simplemente hende, manera Juan a sigi mustra: “Despues di esei mi a wak, i santuario dje tent di testimonio tabata habrí den cielo, i e siete angel cu e siete plaga a sali for dje santuario, bistí cu linen limpi i briyante i fahá rond di nan pecho cu faha di oro. I uno dje cuater criatura bibiente a duna e siete angel siete conchi di oro cu tabata yen dje rabia di Dios, cu ta biba pa semper hamás.”—Revelacion 15:5-7.

15. Pakico no ta un sorpresa cu e siete angel ta sali for dje santuario?

¹⁵ En relacion cu e tempel israelita, locual a contene representacion di cosnan celestial, e sumosacerdote so por a drenta den e Lugar Santísimo, yamá aki e “santuario.” (Hebreo 9:3, 7) Esei ta representa e lugar dje presencia di Jehova den cielo. Sin embargo, den cielo mes, no ta e Sumosacerdote Jesucristo so cu tin e privilegio di drenta dilanti Jehova sino e angelnan també. (Mateo 18:10; Hebreo 9:24-26) No ta un sorpresa, anto, cu Juan a mira e siete angel sali for dje santuario den cielo. Nan tin un comision di Jehova Dios mes: Basha conchi yen di rabia di Dios.—Revelacion 16:1.

16. (a) Kico ta mustra cu e siete angel ta bon capacitá pa nan trabao? (b) Kico ta indica cu otronan ta enbolbí den e trabao grandi di basha e conchinan simbólico?

¹⁶ Tal angel ta bon capacitá pe trabao. Nan ta bistí cu linen limpi i briyante, mustrando cu nan ta spiritualmente limpi i santo, husto den bista di Jehova. També, nan ta bisti faha di oro. Generalmente hende ta faha nan curpa pa haci un trabao. (Levítico 8:7, 13; 1 Samuel 2:18; Lucas 12:37; Juan 13:4, 5) Pues, angel a faha nan curpa pa cumpli cu nan asignacion. Además, nan faha ta di oro. Den e tabernáculo di antigua, oro tabata usá pa representa cos divino i celestial. (Hebreo 9:4, 11, 12) Esei kier men cu tal angel tin cu cumpli cu un comision di sirbishi precioso i divino. E trabao grandi ta enbolbe otronan també. Uno dje cuater criatura bibiente ta pasa conchi mes na nan. Sin duda, esei tabata e promé criatura bibiente, cu ta parce león, simbolizando ánimo i curashi indominabel necesario pe proclamacion dje huicio di Jehova.—Revelacion 4:7.

Jehova den su santuario

17. Kico Juan ta bísanos tocante e santuario, i con esei ta hácinos corda e santuario di Israel di antigua?

¹⁷ Finalmente, completando e parti aki dje vision, Juan ta bísanos: “I e santuario a yena cu huma pa causa dje gloria di Dios i pa causa di su poder, i ningun por a drenta den e santuario te cu e siete plaga dje siete angel tabata terminá.” (Revelacion 15:8) Tabatin ocasion den e pasado di Israel ora nubia a tapa e santuario mes, i tal manifestacion dje gloria di Jehova a stroba sacerdote di drenta. (1 Rey 8:10, 11; 2 Crónica 5:13, 14; compara cu Isaías 6:4, 5.) Esei tabata e tempo ora Jehova a enbolbele activamente den loke ta sosode riba tera.

18. Na ki tempo e siete angel ta bolbe pa duna un informe na Jehova?

¹⁸ Jehova Dios ta interesá profundamente també den loke ta sosode riba tera awor. E kier pe siete angel cumpli cu nan asignacion. Esaki ta un tempo culminante di huicio, locual ta ser detayá den Salmo 11:4-6: “Jehova—ta den su tempel santo. E trono di Jehova ta den cielo. Su mes wowo ta mira, su propio wowo radiante ta examina e yiunan di hende. Jehova mes ta examina hende husto i també hende malbado, i ken cu ta stima violencia, Su alma siguramente ta odia. Lo e basha riba hende malbado trampa, candela i swafel i bientu cu ta kima, como nan porcion den nan copa.” E siete angel lo no bolbe ne presencia sublime di Jehova te cu nan basha e siete plaga riba hende malbado.

19. (a) Cua mandamento a sali, i ken a duné? (b) Na ki tempo bashamento di conchi simbólico mester a cuminza?

¹⁹ E mandamento inspirador di temor ta sali manera donder: “I mi a tende un boz fuerte sali for dje santuario bisa e siete angel: ‘Bai i basha e siete conchi dje rabia di Dios riba tera.’” (Revelacion 16:1) Ken a saca e mandamento? Esei mester ta Jehova Dios mes, siendo cu e briyo di su gloria i poder a stroba tur otro persona di drenta den e santuario. Jehova mes a bini na su tempel spiritual pa huzgamento na 1918. (Malaquías 3:1-5) Pues, anto, tabatin cu ser un poco tempo despues di 1918 cu el a duna e mandamento di basha conchi di rabia di Dios. Realmente, e huicio cu conchi simbólico a contene a cuminza ser proclamá cu intensidad na 1922. I nan proclamacion ta aumenta pa yega nan culminacion awe.

Conchi i tocamento di trompet

20. Conchi di rabia di Jehova ta revela i ta adverti di kico, i con nan ta ser bashá?

²⁰ Conchi di rabia di Jehova ta revela rasgo di estado di mundo manera Jehova ta miré i ta duna advertencia di huicio cu Jehova lo ehecuta. Angel a basha e conchinan usando e congregacion di cristian ungí riba tera como nan agencia, esnan cantando e cantica di Moisés i dje Lamchi. Mientras cu nan ta proclama e Reino como noticia alegre, e grupo cu Juan a simboliza a revela cu franqueza loke tal conchi di rabia ta contene. (Mateo 24:14; Revelacion 14:6, 7) Asina, nan mensahe tin dos aspecto: uno pacífico proclamando libertad pa humanidad pero uno ta duna advertencia di gera dje “dia di vinganza di parti di nos Dios.”—Isaías 61:1, 2.

21. Con e punto di atake dje promé cuater conchi dje rabia di Dios ta corresponde cu blancu dje promé cuater tocamento di trompet, i di ki manera nan ta diferente?

²¹ E punto di atake dje promé cuater conchi dje rabia di Dios ta corresponde cu esnan dje promé cuater tocamento di trompet, esta, e tera, lamá, rio i fontein di awa, i fuente celestial di luz. (Revelacion 8:1-12) Pero tocamento di trompet ta anuncia plaga riba “un tercera parti,” mientras cu bashamento di conchi dje rabia di Dios ta dal e blancu henter. Pues, aunque cristiandad como un “tercera parti,” tabata esun promé pa recibi atencion durante e dia di Señor, ningun parti dje sistema di Satanás ta scapa for di plaga dje mensahe irritante di Jehova i e dolor cu nan ta causa.

22. Di ki manera e tres tocamento final di trompet ta diferente, i con nan ta relacioná cu e tres conchi final dje rabia di Jehova?

²² E tres tocamento final di trompet ta diferente, pasobra nan ta ser yamá calamidad. (Revelacion 8:13; 9:12) E promé dosnan a consisti specialmente di sprinkhan i ehército di cabai, pero e tercera a introduci e nacimento dje Reino di Jehova. (Revelacion 9:1-21; 11:15-19) Segun cu nos ta bai mira, e tres conchi final di su rabia lo cubri també algun di tal aspecto, pero tin algun diferencia entre eseinan i e tres calamidad. Awor, láganos presta sumo atencion na revelacion dramático cu ta resulta di bashamento di conchi dje rabia di Jehova.

[Nota]