Capítulo 34

Solucion di un misterio impresionante

1. (a) Con Juan a reacciona ora el a mira e gran muher di mala bida i su montura spantoso, i pakico? (b) Con e grupo djawe cu Juan a simboliza ta reacciona mientras cu sosodimento ta desaroya na cumplimento dje vision profético?

CON Juan a reacciona ora el a mira e gran muher di mala bida i su montura spantoso? E mes a contesta: “Wel, ora mi a haya bista di dje, mi a straña cu gran strañamento.” (Revelacion 17:6b) Simplemente imaginacion humano nunca por inventa tal bista. Sin embargo, e tabatei—leu den un desierto—un prostituta corrupta sintá riba un bestia salbahe horrible, di color scarlata! (Revelacion 17:3) E grupo djawe cu Juan a simboliza també ta straña cu gran strañamento mientras cu suceso ta desaroya na cumplimento dje vision profético. Si hende di mundo por miré, nan lo sclama, ‘Increíbel!’ i gobernante di mundo lo repiti algo parecido, ‘Impensable!’ Pero e vision ta bira un realidad spantoso den nos tempo. E pueblo di Dios ya caba a tene un parti notable den cumplimento dje vision, i esei ta dúnanan e siguranza di cu e profecía lo sigi numa te na su culminacion sorprendible.

2. (a) Reaccionando ne asombro di Juan, kico e angel a bisé? (b) Kico a ser revela ne grupo cu Juan a simboliza, i con esei a ser hací?

² E angel a ripara e asombro di Juan. Juan a sigi: “I p’sei e angel a puntrámi: ‘Pakico bo ta straña? Lo mi bisábo e misterio dje muher i dje bestia salbahe cu ta hibé i cu tin siete cabez i diez cachu.’” (Revelacion 17:7) Ai, sí, awor e angel ta resolve e misterio! El a splica na Juan asombrá e varios rasgo dje vision i suceso dramático cu ta cla pa desaroya. Di igual manera, e grupo vigilante djawe cu Juan a simboliza, mientras cu e ta sirbi bao di guía di angel awe, ta haya revelá na dje e comprendimento dje profecía. “Interpretacion no ta pertenece na Dios?” Mescos cu fiel Josef, nos ta kere esei. (Génesis 40:8; compara cu Daniel 2:29, 30.) Den un sentido, e pueblo di Dios ta ser poní den centro dje esenario mientras cu Jehova ta interpreta pa nan e nificacion dje vision i efecto di dje riba nan bida. (Salmo 25:14) Net na ora, Dios a dúnanan comprendimento dje misterio dje muher i dje bestia salbahe.—Salmo 32:8.

3, 4. (a) N. H. Knorr a duna cua discurso público na 1942, i con el a identifica e bestia salbahe di color scarlata? (b) N. H. Knorr a considera cua palabra cu e angel a papia cu Juan?

³ Dia 18 te 20 di September di 1942, ne culminacion di Gera Mundial II, Testigo di Jehova na América a celebra nan Asamblea Teocrático di Mundo Nobo. E stad central, Cleveland, Ohío, tabata conectá cu telefón cu mas cu 50 otro stad di asamblea, pa un asistencia máximo di 129.699. Unda cu circunstancia di tempo di gera a permiti, otro asamblea a repiti e programa rond di mundo. Ne tempo ei, hopi dje pueblo di Jehova Dios a spera pe gera escala pa bira Armagedón, e gera di Dios; p’sei e título dje discurso público, “Paz—e por permanece?,” a lanta hopi curiosidad. Con N. H. Knorr, e presidente nobo dje Sociedad Watch Tower por tribi papia tocante paz ora net lo contrario a parce di enfrenta e nacionan?a E motibo tabata cu e grupo cu Juan a simboliza tabata presta “mas cu e atencion acostumbrá” ne Palabra profético di Dios.—Hebreo 2:1; 2 Pedro 1:19.

⁴ E discurso “Paz—e por permanece?” a tira cua luz riba e profecía? Claramente identificando e bestia salbahe di color scarlata di Revelacion 17:3 como e Liga di Nacion, N. H. Knorr a sigi pa considera su carreda tempestuoso riba e base dje sigiente palabra dje angel dirigí na Juan: “E bestia salbahe cu bo a mira, tabata, pero no tá, i no obstante ta cla pa subi for di abismo, i tin cu bai na destruccion.”—Revelacion 17:8a.

5. (a) Di ki manera e “bestia salbahe . . . tabata” anto “no tá”? (b) Con N. H. Knorr a contesta e pregunta, “E Liga lo permanece den e abismo?”

⁵ “E bestia salbahe . . . tabata.” Sí, el a existi como e Liga di Nacion desde dia 10 di Januari di 1920 padilanti, cu 63 nacion participando na un tempo of otro. Pero, un tras di otro, Hapón, Alemania, i Italia a retira, i ex-Union Soviética tabata excluí foi dje Liga. Na September di 1939 e dictador nazista di Alemania a duna comienzo na Gera Mundial II.b Ya cu e Liga di Nacion no por a mantene paz den mundo, e casi a tira zambuya den e abismo di inactividad. Na 1942 e no a existi mas. Ni promé cu esei ni na un fecha despues—sino net ne tempo crítico—Jehova Dios a interpreta pa su pueblo tur loke e vision a nifica! Ne Asamblea Teocrático dje Mundo Nobo, N. H. Knorr por a declara, di acuerdo cu e profecía, cu “e bestia salbahe . . . no tá.” Anto el a haci e pregunta, “E Liga lo permanece den e abismo?” Citando Revelacion 17:8, el a contesta: “Tal asociacion di nacion mundano lo lanta di nobo.” El a resulta di ser precisamente asina—na vindicacion dje Palabra profético di Jehova!

Subiendo for di abismo

6. (a) Na ki tempo e bestia salbahe di color scarlata a subi for di abismo, i cu cua nomber nobo? (b) Pakico Naciones Unidas realmente ta un rebibamento dje bestia salbahe di color scarlata?

⁶ E bestia salbahe di color scarlata en berdad a subi for di abismo. Dia 26 di Juni di 1945, cu publicidad ruidoso den San Francisco, EUA, 50 nacion a vota pa acepta e Statuut dje organizacion di Naciones Unidas. E organizacion tabatin cu “mantene paz i siguridad internacional.” Tin hopi cos similar den e Liga i NU. Segun The World Book Encyclopedia: “Di algun manera, NU ta parce e Liga di Nacion, cu tabata organizá despues di Gera Mundial I . . . Hopi nacion cu a funda NU també a funda e Liga. Mescos cu e Liga, NU tabata establecí pa mantene paz entre e nacionan. Funcion principal di NU ta parce hopi esun dje Liga.” Anto, NU realmente ta un rebibamento dje bestia salbahe di color scarlata. E rond di 190 nacion miembro ta hopi mas cu e 63 miembro dje Liga; també el a acepta responsabilidad mas amplio cu e Liga.

7. (a) Di ki manera habitante dje tera a straña cu admiracion ne bestia salbahe di color scarlata rebibá? (b) Cua meta NU no a alcanza, i kico su secretario-general a bisa tocante esei?

⁷ Na principio, nan a expresa mashá speranza pa NU. Esei tabata na cumplimento dje palabra dje angel: “I ora nan ta mira con e bestia salbahe tabata, pero no tá, i no obstante ta presente, esnan cu ta biba riba tera lo straña cu admiracion, pero nan nomber no a ser skirbí den e rol di bida desde e fundamento di mundo.” (Revelacion 17:8b) Habitante dje tera sí ta admira e monster nobo, funcionando desde su oficina central imponente na oriya di East River di New York. Pero, berdadero paz i siguridad ta evita NU. Durante gran parti di siglo 20, nan a mantene paz mundial solamente cu “destruccion mutua segurá,” i e carreda di armamento ta sigi escalá astronómicamente. Despues di casi 40 aña di esfuerzo di NU, su secretario-general dje tempo ei, Javier Pérez de Cuéllar, a lamenta na 1985: “Nos ta biba den un otro era di hende fanático, i nos no sa kico pa haci tocante dje.”

8, 9. (a) Pakico NU no tin solucion pa problema di mundo, i kico lo sosode pronto segun e decreto di Dios? (b) Pakico fundador i admirador di NU no tin nan nomber skirbí den e “rol di bida” di Dios? (c) E Reino di Jehova Dios lo logra kico cu bon éxito?

⁸ NU no tin e solucion. I pakico? Pasobra e Dunador di bida na tur humanidad no ta esun cu a duna bida na NU. E duracion di su bida lo ta cortico, pasobra segun e decreto di Dios, “e tin cu bai na destruccion.” Fundador i admirador di NU no tin nan nomber skirbí den e rol di bida di Dios. Di ki manera hende pecaminoso i mortal, hopi di locual ta desprecia e nomber di Dios, por logra haci cu NU loke Jehova Dios a declara cu e ta cla pa haci, sin usa medio humano, sino usando e Reino di su Cristo?—Daniel 7:27; Revelacion 11:15.

⁹ NU realmente ta un falsificacion blasfemoso dje Reino Mesiánico di Dios bao di su Prinz di Paz, Jesucristo—i lo no tin fin di gobernacion di prinz. (Isaías 9:6, 7) Aunque NU por logra konkel un paz temporario, gera lo cuminza pronto di nobo. Esei ta den e naturaleza di hende pecaminoso. “Nan nomber no a ser skirbí den e rol di bida desde fundamento di mundo.” E Reino di Jehova Dios bao di Cristo lo no solamente establece paz eterno riba tera sino també, riba e base dje sacrificio di rescate di Jesús, lo lanta hende morto, hende husto i inhusto cu ta den e memoria di Dios. (Juan 5:28, 29; Echo 24:15) Esei ta inclui tur hende cu a permanece firme apesar di atake di Satanás i di su simía, i otro hende cu ainda lo mustra cu nan ta obediente. Claramente, e rol di bida di Dios nunca lo contene nomber di miembro terco di Babilonia e Grandi ni di ningun hende cu ta sigi adora e bestia salbahe.—Exodo 32:33; Salmo 86:8-10; Juan 17:3; Revelacion 16:2; 17:5.

Paz i siguridad—un speranza bano

10, 11. (a) Kico NU a proclama na 1986, i con e nacionan a responde? (b) Cuanto “famía religioso” a reuni den Assisi, Italia, pa pidi paz, i Dios ta contesta oracion asina? Splica.

¹⁰ Den un esfuerzo pa fortalece e speranza di humanidad, Naciones Unidas a proclama aña 1986 di ser un “Aña Internacional di Paz,” cu e tema “Pa proteha paz i e futuro di humanidad.” Nacion den gera tabata pidí pa bandona nan arma, por lo menos pa un aña. Con nan a reacciona? Segun un informe dje Instituto di Investigacion di Paz Internacional, te cu cinco miyón hende a ser matá como resultado di gera durante 1986 so! Aunque nan a traha moneda i stampía conmemorativo special, e mayor parti dje nacionan a haci poco tocante sigimento dje ideal di paz na 1986. No obstante, religion di mundo—semper ansioso pa manifesta plena armonía cu NU—a cuminza haci propaganda pe aña di varios manera. Dia 1 di Januari di 1986, papa Juan Pablo II a elogia e trabao di NU i a dedica e aña nobo na paz. I dia 27 di October, el a reuni lider di hopi religion di mundo den Assisi, Italia, pa haci oracion pa paz.

¹¹ Dios a contesta tal oracion pa paz? Wel, tal lider religioso a haci oracion na cua Dios? Si bo a púntranan, cada grupo lo a duna un contesta distinto. Tin un coleccion di miyones di dios cu por tende i contesta loke ta ser pidí di tanto diferente manera? Hopi participante ta adora e trinidadc di cristiandad. Budista, hindú, i otronan a repiti oracion na dios incontable. Na total, 12 “famía religioso” a reuni, i tabata representá pa hende notable tal como arzobispo anglicano di Canterbury, e dalai lama di budismo, un metropolitano dje religion ortodoxo di Rusia, e presidente dje Asociacion di Santuario sintoísta di Tokio, animista africano, i dos indjan americano bistí cu sombré di pluma. Por lo menos, e grupo tabata yen di color, birando espectacular pa TV. Un grupo a reza sin fin pa 12 ora. (Compara cu Lucas 20:45-47.) Pero, algun oracion a penetra mas ayá cu nubia di awaceru cu a tapa e reunion? No, pe sigiente motibo:

12. Pa cua motibo Dios no a contesta oracion pa paz di lider religioso di mundo?

¹² Na contraste cu hende cu ta “camna den e nomber di Jehova,” ningun hende religioso ei a reza na Jehova, e Dios bibo, kende su nomber ta pará skirbí mas cu 7.000 bez den e texto original dje Bijbel. (Miqueas 4:5; Isaías 42:8, 12)d Como un grupo, nan no a acudi na Dios den e nomber di Jesús, ya cu e mayoría di nan ni sikiera ta kere den Jesucristo. (Juan 14:13; 15:16) Ningun di nan ta haci e boluntad di Dios pa nos dia, locual ta di proclama mundialmente e binidero Reino di Dios—i no NU—como e berdadero speranza pa humanidad. (Mateo 7:21-23; 24:14; Marco 13:10) Principalmente, nan organizacion religioso a participa den e gera sangriente di pasado, incluyendo e dos geranan mundial di siglo 20. Dios ta bisa tal hende: “Aunque boso ta haci hopi oracion, mi no ta scucha; boso man mes a ser yená cu dramamento di sanger.”—Isaías 1:15; 59:1-3.

13. (a) Pakico ta significativo cu lider religioso di mundo ta unínan cu NU pidiendo paz? (b) Sclamacion pa paz lo culmina den kico segun profecía divino?

¹³ Además, ta mashá significativo cu lider religioso di mundo ta uni cu Naciones Unidas pidiendo paz ne tempo aki. Nan kier influenciá NU pa nan mes probecho, specialmente ne tempo moderno aki ora tanto di nan pueblo ta bandona nan religion. Mescos cu infiel lider di Israel di antigua, nan ta sclama, “‘Tin paz! Tin paz!’ ora cu no tin paz.” (Jeremías 6:14) Sin duda nan sclamacion pa paz lo sigi, aumentando pa apoya e culminacion di locual apóstol Pablo a profetiza: “E dia di Jehova ta bini mescos cu ladrón den anochi. Ki ora cu hende ta bisa: ‘Paz i siguridad!’ anto destruccion di ripiente ta bini riba nan instantáneamente mescos cu dolor di ansia riba muher den estado; i nan lo no scapa di ningun manera.”—1 Tesalonicense 5:2, 3.

14. Ki forma e grito “Paz i siguridad” lo por adopta, i con nos por evita pa esei gáñanos?

¹⁴ Den último añanan, políticonan a usa e frase “paz i siguridad” pa describí varios plan humano. Acaso e esfuerzonan ei di lidernan mundial ta principio dje cumplimento di 1 Tesalonicense 5:3? Of Pablo tabata referí solamente na un suceso specífico di proporcion asina dramático cu esei lo capta atencion mundial? Como cu hopi bez profecía bíblico por ser comprende completamente solamente despues cu nan cumpli of segun cu nan ta cumpliendo, nos lo tin cu warda i mira. Mientras tanto, cristiannan sa cu apesar di cualkier paz i siguridad cu e nacionan por parce di logra, básicamente nada lo a cambia. Egoísmo, odio, crimen, kibramento di famía, inmoralidad, maleza, tristeza, i morto ainda lo existi. P’sei ningun grito di “paz i siguridad” no tin nodi gaña abo, si bo ta keda na haltura di nificacion di sosodimento mundial i ta haci caso dje advertencianan profético den e Palabra di Dios.—Marco 13:32-37; Lucas 21:34-36.

[Nota]

[Kuadro na página 250]

“Paz” contradictorio

Aunque NU a proclama 1986 e Aña Internacional di Paz, e suicida carreda di armamento a escala. E buki na inglés Gasto Militar i Social di Mundo na 1986 ta duna e sigiente detaye serio:

Na 1986 gasto militar mundial a alcanza $900 mil miyón.

Gasto militar di mundo den un ora lo a yega pa bacuna contra maleza infeccioso evitable e 3,5 miyón hende cu tabata muri pa aña.

Mundialmente, un persona di cada cinco a biba den pobreza fatal. Loke mundo a gasta pa armamento den dos dia por a alimenta tur hende hambrá asina pa un aña.

Energía explosivo den arma nuclear di mundo tabata 160.000.000 bez mas grandi cu esei dje explosion di Chernóbil.

Un bomba nuclear por a contene poder explosivo cu tabata 500 bez mas fuerte cu e bomba tirá riba Hiroshima na 1945.

E total di bomba nuclear tabata contene forza igual cu mas cu un miyón di esun di Hiroshima. Nan a representa 2.700 bez mas energía explosivo cu esei usá den Gera Mundial II, ora 38 miyón hende a muri.

Gera a bira mas frecuente i mas fatal. Den siglo 18 e total di hende cu a muri den gera tabata 4,4 miyón, den siglo 19 tabatin 8,3 miyón morto, den e promé 86 añanan di siglo 20 tabatin 98,8 miyón morto. Desde siglo 18, hende morto den gera a aumenta mas cu 6 bez mas lihé cu poblacion di mundo. Tabatin diez bez mas morto pa cada gera den siglo 20 cu den siglo 19.

[Plachi na página 247]

Segun e profecía tocante e bestia salbahe di color scarlata, e Liga di Nacion a baha den abismo durante Gera Mundial II pero tabata rebiba como Naciones Unidas

[Plachi na página 249]

Apoyando e “Aña di Paz” di NU, representante di religion di mundo a ofrece un babel di oracion den Assisi, Italia, pero ningun di nan a haci oracion ne Dios bibo, Jehova