Capítulo 35
Ehecucion di Babilonia e Grandi
1. Ki detaye e angel ta duna dje bestia salbahe di color scarlata, i ki clase di sabiduría ta necesario pa comprende símbolo di Revelacion?
DUNANDO mas detaye dje bestia salbahe di color scarlata di Revelacion 17:3, e angel a bisa Juan: “Aki ta unda inteligencia i sabiduría ta drenta: E siete cabez kier men siete montaña, riba locual e muher ta sinta. I tin siete rey: cinco a cai, uno tá, i e otro no a yega ainda, pero ora e sí yega, e tin cu permanece pa un tempo cortico.” (Revelacion 17:9, 10) E angel ei a comunica sabiduría djariba, e único sabiduría cu por duna comprendimento di símbolo di Revelacion. (Santiago 3:17) Tal sabiduría a ilumina e grupo cu Juan a simboliza i su compañénan en cuanto e seriedad dje tempo den cua nos ta biba. E ta edifica den curazón deboto un aprecio di huicio di Jehova, cu pronto lo ser ehecutá, i cu ta inculca un temor saludable di Jehova. Manera Proverbio 9:10 ta bisa: “Temor di Jehova ta e comienzo di sabiduría, i conocimento dje Haltísimo ta loke ta comprendimento.” Kico sabiduría divino ta revela na nos tocante e bestia salbahe?
2. Kico ta e nificacion dje siete cabez dje bestia salbahe di color scarlata, i di ki manera “cinco a cai, i uno ta”?
2 E siete cabez dje bestia feroz ta representa siete “montaña,” of siete “rey.” E dos palabra ta ser usá den e Bijbel pa indica poder gobernamental. (Jeremías 51:24, 25; Daniel 2:34, 35, 44, 45) Den e Bijbel, seis poder mundial ta ser mencioná cu ta afecta asunto dje pueblo di Dios: Egipto, Asiria, Babilonia, Medo-Persia, Grecia, i Roma. Di eseinan, cinco a bini i a bai caba ne tempo cu Juan a recibi Revelacion, mientras cu Roma ainda tabata mashá fuerte como un poder mundial. Esei ta corresponde bon cu e palabra, “cinco a cai, uno tá.” Pero, kico dje “otro” cu no a yega ainda?
3. (a) Con e imperio romano a yega di ser partí? (b) Kico a sosode den Europa? (c) Con nos mester considera e imperio romano santo?
3 E imperio romano a permanece i asta a aumenta pa cientos di aña despues di dia di Juan. Na aña 330 EC, emperador Constantino a cambia su capital for di Roma te na Bizancio, cu el a duna e nomber Constantinopla. Na aña 395 EC, e imperio romano a parti den dos, esun oriental i esun occidental. Na 410 EC, Roma mes a cai bao di Alarico, rey di visigodo (un tribu alemán cu a conberti na “cristianismo” di tipo arriano). Tribu alemán (també “cristian”) a domina Spaña i hopi territorio di Roma den Nortáfrica. Tabatin siglonan di lantamento, inketud, i reahustamento den Europa. Emperador notable a lanta den e parti occidental, tal como Carlomagno, cu a cera un alianza cu papa Leo III den siglo 9, i Federico II, cu a reina den siglo 13. Pero nan dominio, aunque nan a yamé Imperio Romano Santo, tabata hopi mas chikito cu esun dje Imperio Romano di antes na su máximo di poder. Esei tabata mas tanto un restoracion of continuacion dje imperio bieu en bez di un imperio nobo.
4. Ki éxito e imperio oriental a logra, pero kico a pasa hopi dje territorio di antes di Roma di antigua den Nortáfrica, Spaña, i Siria?
4 E imperio oriental di Roma, cu su centro den Constantinopla, a logra mantene un relacion swak cu e imperio occidental. Den siglo seis, emperador oriental Hustiniano I por a reconquista hopi di Nortáfrica, i també a drenta den Spaña i Italia. Den siglo siete, Hustiniano II a recobra pe imperio un parti di Macedonia cu tribu di slaba a conquista. Sin embargo, den siglo ocho, hopi dje territorio di antes di Roma di antigua den Nortáfrica, Spaña, i Siria a cai bao dje imperio nobo di Islam i asina a scapa for di control di Constantinopla i Roma.
5. Aunque e stad di Roma a cai na aña 410 EC, di ki manera hopi mas siglo a pasa pa tur laster dje imperio romano político desparce den mundo?
5 E stad di Constantinopla mes a permanece pa poco tempo mas. El a sobrebiba atake frecuente di Persia, Arabia, Bulgaria, i Rusia te cu su caimento final na 1203—no na mohamedano sino bao di cruzada cu a bini di Europa. Pero, na aña 1453, el a cai bao di poder di gobernante otomano mohamedano, Mahomet II i pronto a bira e capital dje imperio otomano of turco. Pues, aunque e stad di Roma a cai na aña 410 EC, hopi siglo mas a pasa pa tur laster dje imperio romano político desparce for di mundo. I asta ne tempo ei, su influencia ainda tabata visibel den imperio religioso fundá riba papa di Roma i religion ortodoxo oriental.
6. Cua imperio completamente nobo a desaroya, i cua tabatin mas éxito?
6 Sin embargo, den siglo 15 algun país tabata edifica imperio totalmente nobo. Aunque algun poder imperial nobo tabata situá den territorio di colonia di Roma di antes, nan imperio no tabata simplemente continuacion dje imperio romano. Portugal, Spaña, Francia, i Holanda a bira centro di dominio extenso i lehano. Pero esun cu mas éxito tabata Gran Bretaña, cu a yega di domina un imperio enorme riba locual ‘solo nunca a drenta.’ Na diferente tempo e imperio a plama riba hopi di Nortamérica, Africa, India, i Zuidoost Asia, i també a domina e Zuidpacífico.
7. Di ki manera un clase di imperio dobel a presenta, i segun Juan, ‘cabez’ of poder mundial di siete lo sigi pa cuanto tempo?
7 Den siglo 19, algun colonia di Nortamérica a separa caba for di Gran Bretaña pa forma e independiente Estados Unidos di América. Den asunto político, algun conflicto a sigi entre e nacion nobo i Gran Bretaña. No obstante, e promé gera mundial a obliga e dos país pa reconoce nan interés común i cera un relacion special entre nan. Pues, un sorto di poder mundial dobel a yega di existi, componí di Estados Unidos di América, awor e nacion di mas ricu, i Gran Bretaña, e centro dje imperio mas grandi di mundo. Esei, pues, ta ‘cabez’ of poder mundial di siete, cu ta sigi den e tempo di fin i den territorio di locual Testigo di Jehova djawe a establecénan na principio. Compara cu e reinado largu di cabez di seis, esun di siete ta permanece pa “poco tempo” so, te cu e Reino di Dios ta destrui tur gobierno nacional.
Pakico yamé rey di ocho?
8, 9. Kico e angel a yama e bestia salbahe di color scarlata simbólico, i di ki manera el a sali for dje sietenan?
8 E angel a sigi splica Juan: “I e bestia salbahe cu tabata pero cu no tá, e mes també ta rey di ocho, pero a bini dje sietenan, i ta bai na destruccion.” (Revelacion 17:11) E simbólico bestia salbahe di color scarlata “a bini dje” siete cabez; esta, a nace di, of ta debe su existencia na, cabez dje original “bestia salbahe . . . saliendo for di lamá,” di locual e bestia salbahe di color scarlata ta su imagen. Di ki manera? Wel, na 1919 e poder anglo-americano tabata e cabez cu a subi. E seis cabez di antes a cai, i e puesto di poder mundial dominante a pasa ne cabez dobel i awor tabatin su centro den dje. Cabez di siete, como e representante corriente dje liña di poder mundial, tabata e forza cu a impulsa establecimento dje Liga di Nacion i ainda ta e promovedor principal i apoyo financiero di Naciones Unidas. Pues, simbólicamente, e bestia salbahe di color scarlata, esta, rey di ocho, ta “bini dje” siete cabez original. Mirá asina, e declaracion di cu el a bini dje sietenan ta armoniza bon cu e revelacion di promé cu e bestia salbahe cu e dos cachu manera lamchi (poder mundial anglo-americano, cabez di siete dje bestia salbahe original) a anima trahamento dje imagen i a duné bida.—Revelacion 13:1, 11, 14, 15.
9 Ademas, miembro original dje Liga di Nacion a inclui, hunto cu Gran Bretaña, gobierno cu a manda den centro di algun cabez di antes, esta, Grecia, Iran (Persia), i Italia (Roma). Cu tempo, gobierno cu a domina territorio bao di control dje seis poder mundial di antes a bira miembro cu ta apoya imagen dje bestia salbahe. Den e sentido aki, també, nos por bisa cu e bestia salbahe di color scarlata a bini dje siete poder mundial.
10. (a) Con e por bisa cu e bestia salbahe di color scarlata “e mes també ta rey di ocho”? (b) Con un lider di ex-Union Soviética a expresa apoyo pa Naciones Unidas?
10 Ripara cu e bestia salbahe di color scarlata “e mes també ta rey di ocho.” Pues, Naciones Unidas djawe tin e aparencia di un gobierno mundial. Tin bez cu e asta a actua manera esei, mandando ehército na campo di bataya pa resolve pleitu internacional, tal como den Corea, e península di Sinaí, algun país africano, i Líbano. Pero e ta solamente imagen di un rey. Mescos cu un imagen religioso, e no tin berdadero influencia of poder fuera di loke hende ta duné, hende cu a duné existencia i ta adoré. Tin bez cu e bestia salbahe simbólico ta parce swak; pero e nunca a experimenta e clase di abandonamento na escala mayor di parti di miembro cu gobierno di dictador cu a manda e Liga di Nacion tambaleando na abismo. (Revelacion 17:8) Aunque nan ta tene opinion radicalmente diferente den otro sector, un lider prominente di ex-Union Soviética na 1987 a unié cu papa di Roma expresando apoyo pa NU. E asta a pidi un “sistema comprensivo di siguridad internacional” fundá riba NU. Manera Juan a tende pronto, e tempo lo yega ora NU lo actua cu basta autoridad. Anto, den su turno, e “lo bai na destruccion.”
Diez rey pa un ora
11. Kico e angel di Jehova a bisa tocante e diez cachu riba e bestia salbahe di color scarlata simbólico?
11 Den capítulo 16 di Revelacion, angel di seis i di siete a basha conchi di rabia di Dios. Asina nos tabata avisá cu rey dje tera ta ser reuní pe gera di Dios di Armagedón i cu ‘Babilonia e Grandi lo ser recordá den bista di Dios.’ (Revelacion 16:1, 14, 19) Awor nos ta siña mas en detaye con e huicio di Dios riba eseinan lo ser ehecutá. Scucha atrobé ne angel di Jehova ora e ta papia cu Juan. “I e diez cachu cu bo a mira kier men diez rey, cu ainda no a recibi un reino, pero sí ta recibi autoridad como rey pa un ora cu e bestia salbahe. Nan tin un solo pensamento, i p’sei ta duna nan poder i autoridad ne bestia salbahe. Eseinan lo combati contra e Lamchi, pero, door cu e ta Señor di señornan i Rey di reynan, e Lamchi lo véncenan. També, esnan yamá i scogí i fiel cuné lo haci esei.”—Revelacion 17:12-14.
12. (a) Kico e diez cachu ta representa? (b) Di ki manera e diez cachu simbólico ‘no a recibi reino ainda’? (c) Con e diez cachu simbólico tin un “reino” awor, i pa cuanto tempo?
12 E diez cachu ta representa tur poder político cu ta na mando actualmente den mundo i cu ta apoya e imagen dje bestia salbahe. Mashá poco país cu ta existi awor tabata conocí den e dia di Juan. I esnan cu tabata conocí, tal como Egipto i Persia (Iran), awe tin un estructura político completamente diferente. P’sei, den e promé siglo, e ‘diez cachu no a recibi un reino ainda.’ Pero awor den e dia di Señor, nan tin “un reino,” of autoridad político. Cu e colapso di imperio colonial grandi, specialmente desde e segundo gera mundial, hopi nacion nobo a nace. Eseinan, i també poder establecí pa mas tempo, tin cu reina cu e bestia salbahe pa poco tempo—“un ora” so—promé cu Jehova ta pone fin na tur autoridad político di mundo na Armagedón.
13. Di ki manera e diez cachu tin “un solo pensamento,” i esei ta garantiza cua actitud tocante e Lamchi?
13 Awe, nacionalismo ta un forza di mas fuerte cu ta motiva e diez cachu. Nan tin “un solo pensamento” pasobra nan kier mantene nan soberanía nacional en bez di acepta e Reino di Dios. Esei tabata nan propósito ora nan a bira miembro dje Liga di Nacion i e organizacion di Naciones Unidas originalmente, esta, pa mantene paz mundial i asina proteha nan mes existencia. Tal actitud ta garantiza cu tal cachu lo opone e Lamchi, e “Señor di señornan i Rey di reynan,” pasobra e propósito di Jehova ta cu su Reino bao di Jesucristo pronto lo reemplaza tur reino asina.—Daniel 7:13, 14; Mateo 24:30; 25:31-33, 46.
14. Con ta posibel pa gobernante di mundo combati cu e Lamchi, i ki resultado lo tini?
14 Naturalmente, no tin nada cu gobernante di mundo por haci contra Jesús mes. E ta den cielo, leu for di nan alcance. Pero e rumanan di Jesús, e resto dje simía dje muher, ta riba tera ainda i aparentemente ta vulnerable. (Revelacion 12:17) Hopi cachu caba a demonstra enemistad amarga contra nan, i dje manera ei ta combati contra e Lamchi. (Mateo 25:40, 45) Pero, pronto e tempo lo yega pe Reino di Dios “machica i pone fin na tur reino ei.” (Daniel 2:44) Anto, rey di tera lo ta den un gera te na fin contra e Lamchi, manera nos lo mira pronto. (Revelacion 19:11-21) Pero aki nos ta siña suficiente pa comprende cu e nacionan no por logra. Aunque eseinan i e bestia salbahe di color scarlata di NU tin “un solo pensamento,” nan no por derota e gran “Señor di señornan i Rey di reynan,” ni tampoco nan no por derota “esnan yamá i escogí i fiel cuné,” cu ta inclui su sigidornan ungí cu ta riba tera ainda. Eseinan també a vence, wardando nan integridad dunando contesta na acusacion baho di Satanás.—Romano 8:37-39; Revelacion 12:10, 11.
Destruccion dje muher di mala bida
15. Kico e angel a bisa tocante e muher di mala bida i e actitud i accion dje diez cachu dje bestia salbahe tocante dje?
15 E pueblo di Dios no ta tur loke ta enemigo dje diez cachu. Awor e angel ta hala di nobo e atencion di Juan ne muher di mala bida: “I el a bisámi: ‘E awa cu bo a mira, unda e muher di mala bida ta sinta, ta nifica pueblo i multitud i nacion i lenga. I e diez cachu cu bo a mira, i e bestia salbahe, eseinan lo odia e muher di mala bida i lo hacié keda desolá i desnudo, i lo come su carni i kimé completamente cu candela.’”—Revelacion 17:15, 16.
16. Pakico Babilonia e Grandi no por depende di su awa pa apoyo protector ora gobierno político ta bira contra dje?
16 Mescos cu Babilonia di antigua a depende di awa como defensa, Babilonia e Grandi djawe ta depende di un gran cantidad di miembro di “pueblo i multitud i nacion i lenga.” Apropiadamente, e angel ta hala nos atencion na esei promé cu e ta menciona un sosodimento tolondrador: Gobierno político di mundo lo bira violentamente contra Babilonia e Grandi. Kico tur e “pueblo i multitud i nacion i lenga” lo haci? E pueblo di Dios a duna spiertamento caba na Babilonia e Grandi di cu e awa di rio Eufrates lo seca. (Revelacion 16:12) E awa finalmente lo seca por completo. Nan no por duna e muher bieu repugnante ningun apoyo efectivo den su tempo di mayor necesidad.—Isaías 44:27; Jeremías 50:38; 51:36, 37.
17. (a) Pakico e riqueza di Babilonia e Grandi no por salbé? (b) Con e fin di Babilonia e Grandi lo falta hopi dignidad? (c) Además dje diez cachu, of nacion individual, kico mas ta uni den e atake contra Babilonia e Grandi?
17 Siguramente, e riqueza material inmenso di Babilonia e Grandi no por salbé. E por asta haci su destruccion bini mas lihé, pasobra e vision ta mustra cu ora e bestia salbahe i e diez cachu ta saca nan odio riba dje, nan lo kita su paña real i tur hoya di dje. Nan lo plunder su riqueza. Nan lo “hacié keda . . . desnudo,” bergonzosamente denunciando su berdadero naturaleza. Ki desolacion! Su fin també ta falta dignidad. Nan ta destruyé, ta “come su carni,” ta lagué ser un cadáver sin bida. Finalmente, nan ta “kimé completamente cu candela.” E ta ser kimá manera hende cu tin plaga, i sin sikiera un entierro decente! No ta e nacionan so, cu e diez cachu ta representa, cu ta destrui e gran muher di mala bida, sino e “bestia salbahe,” cu kier men cu NU mes ta uni cu nan den e destruccion. E ta aproba dje destruccion di religion falso. Hopi dje mas cu 190 nacion den NU a demonstra caba, mediante nan manera di vota, un enemistad contra religion, specialmente religion di cristiandad.
18. (a) E nacionan tin cua potencial pa bira contra religion babilónico segun cu nos a mira caba? (b) Cua motibo básico lo tin pa un atake total contra e gran muher di mala bida?
18 Pakico e nacionan ta trata nan frei di antes asina terriblemente? Nos a mira den tempo reciente e potencial di tal biramento contra religion babilónico. Oposicion oficial di gobierno a reduci mashá e influencia di religion den país tal como ex-Union Soviética i China. Den sector protestante di Europa, indiferencia extenso i duda ta laga misa bashí, di manera cu religion ta casi morto. E imperio católico enorme ta kibrá pa rebelion i desacuerdo, locual su lidernan no por calma. Pero, nos no mag perde bista dje echo cu e atake final i total contra Babilonia e Grandi ta bini como un expresion dje huicio incambiabel di Dios riba e gran muher.
Cumpliendo cu e pensamento di Dios
19. (a) Con e huicio di Jehova contra Jerusalem apóstata na 607 PEC por ta un ilustracion di ehecucion di huicio di dje contra e gran muher di mala bida? (b) E estado desolá sin habitante di Jerusalem despues di 607 PEC ta simboliza kico pa nos dia?
19 Con Jehova ta ehecuta su huicio? Un ilustracion di esei ta e accion di Jehova contra su pueblo apóstata den tempo di antigua, tocante locual el a bisa: “Den profeta di Jerusalem mi a mira cosnan horrible, nan ta comete adulterio i ta camna den falsedad; i nan a fortalece man di malechor pa nan no bolbe, cada un for di nan mes maldad. Pa mi, nan tur a bira manera Sodoma, i habitante di dje manera Gomorra.” (Jeremías 23:14) Na aña 607 PEC, Jehova a usa Nabucodonosor pa ‘kita e paña, hiba artículo bonita, i laga desnudo i sin bistí’ e stad spiritualmente adúltero. (Ezekiel 23:4, 26, 29) Jerusalem dje tempo ayá tabata un modelo di cristiandad djawe, i manera Juan a mira den vision di antes, Jehova lo duna cristiandad i e resto di religion falso un castigo similar. E estado desolá i sin habitante di Jerusalem despues di 607 PEC ta mustra e aparencia di cristiandad religioso despues di perde su riqueza i ser denunciá bergonzosamente. I e resto di Babilonia e Grandi lo no pasa mihor.
20. (a) Con Juan a mustra cu Jehova di nobo lo usa gobernante humano pa ehecuta huicio? (b) Kico ta e “pensamento” di Dios? (c) Di ki manera e nacionan lo cumpli cu nan “solo pensamento,” pero e pensamento di ken realmente lo ser cumplí?
20 Atrobé Jehova ta usa gobernante humano pa ehecuta huicio. “Pasobra Dios a pone den nan curazón pa cumpli cu su pensamento, asta cumpli cu nan solo pensamento di duna nan reino ne bestia salbahe, te cu e palabra di Dios ta ser cumplí.” (Revelacion 17:17) Kico ta e “pensamento” di Dios? Haci arreglo pa ehecutor di Babilonia e Grandi uni hunto, pa destruyé completamente. Naturalmente, e doel dje atake di gobernante ta pa cumpli cu nan “solo pensamento” propio. Nan ta kere cu ta conbinínan den un sentido nacionalista pa bira contra e gran muher di mala bida. Nan por mira existencia continuo di religion organizá den nan país como un peliger pa nan soberanía. Pero Jehova mes ta guia e asunto; nan lo cumpli cu su pensamento, destruyendo di golpi su enemigo bieu cu ta practica adulterio!—Compara cu Jeremías 7:8-11, 34.
21. Siendo cu e bestia salbahe di color scarlata lo ser usá pa destrui Babilonia e Grandi, ta parce cu e nacionan lo haci kico en cuanto Naciones Unidas?
21 Sí, e nacionan lo usa e bestia salbahe di color scarlata, esta, Naciones Unidas, pa destrui Babilonia e Grandi. Nan no ta dal paso riba nan mes iniciativa, pasobra Jehova ta hinca den nan curazón “asta pa cumpli cu nan solo pensamento, dunando nan reino ne bestia salbahe.” Ora e tempo ta yega, ta parce cu e nacionan lo mira e necesidad di fortalece Naciones Unidas. Den un sentido, nan lo duné djente, dunando na dje e autoridad i poder cu nan tin pe por bira contra religion falso i bringa cu éxito contra dje “te cu e palabra di Dios ta ser cumplí.” Asina, e muher bieu lo yega na su fin completo. Sí, lagué desparce!
22. (a) Den Revelacion 17:18, e manera cu e angel ta conclui su testimonio ta significa kico? (b) Con Testigo di Jehova ta reacciona né revelacion dje misterio?
22 Como si e ta duna énfasis ne ehecucion di huicio sigur di Jehova Dios dje imperio mundial di religion falso, e angel a conclui su testimonio, bisando: “I e muher cu bo a mira kier men e stad grandi cu tin un reino riba rey dje tera.” (Revelacion 17:18) Mescos cu Babilonia dje tempo di Belsasar, Babilonia e Grandi a ser “pisá riba balanza i ta ser hayá cu falta.” (Daniel 5:27, Version Moderna) Su ehecucion lo ser lihé i final. I con Testigo di Jehova ta reacciona ne revelacion dje misterio dje gran muher di mala bida i dje bestia salbahe di color scarlata? Nan ta mustra celo proclamando e dia di huicio di Jehova Dios, mientras cu nan ta contesta “cu gracia” buscador sincero dje berdad. (Colosense 4:5, 6; Revelacion 17:3, 7) Segun cu e sigiente capítulo ta mustra, tur hende cu kier sobrebiba ora e gran muher di mala bida ta ser ehecutá tin cu dal paso, i dalé lihé!
[Plachi na página 252]
E serie di siete poder mundial
EGIPTO
ASIRIA
BABILONIA
MEDO-PERSIA
GRECIA
ROMA
GRAN BRETAÑA I AMERICA
[Plachi na página 254]
“E mes també ta rey di ocho”
[Plachi na página 255]
Birando nan lomba pe Lamchi, “nan ta duna nan poder i autoridad ne bestia salbahe”
[Plachi na página 257]
Cristiandad como e parti principal di Babilonia e Grandi lo parce Jerusalem di antigua den desolacion total