Dios mes a splika e nifikashon di su nòmber na su fiel sirbidó Moisés. Ora Moisés a puntra tokante e nòmber di Dios, Yehova a kontestá: “Lo mi resultá di ta loke lo mi resultá di ta.” (Eksodo 3:14, NW) E tradukshon di Rotherham ta bis’é asin’aki: “Lo Mi Bira loke sea mi kier.” Pues Yehova por bira loke sea ta nesesario pa por kumpli ku su propósito.

Suponé ku bo por a bira loke sea bo kier bira. Kiko lo bo a hasi pa bo amigunan? Si un di nan a bira hopi malu, lo bo por a bira un bon dòkter i kur’é. Si un otro a sufri un pèrdida finansiero, lo bo por a bira un spònser riku i yud’é ku su problema. Pero bèrdat ta, ku bo ta limitá den loke bo por bira. Nos tur ta limitá. Ma segun ku bo ta studia Beibel, lo bo keda sorprendí pa mira kon Yehova ta bira loke sea ta nesesario pa por kumpli ku su promesanan. I gustosamente e ta usa su poder na fabor di hende ku ta stim’é. (2 Krónikanan 16:9) Hende ku no konosé e nòmber di Yehova no ta ripará e bunita fasetanan aki di Yehova su personalidat.

Ta bisto anto ku e nòmber Yehova mester ta den Beibel. Konosé su nifikashon i us’é libremente den nos adorashon ta dos yudansa grandi pa nos por hala mas serka di nos Tata selestial, Yehova.a

PROFETA Daniel a biba mas ku 500 aña promé ku Hesus a nase. Sin embargo, Yehova a revelá na Daniel informashon ku lo a hasi posibel pa señalá e tempu ku lo a ungi, òf nombra, Hesus komo e Mesias òf Kristu. Un angel a bisa Daniel: “Sabi anto i komprondé ku for di e momentu ku e òrdu a wòrdu duná pa restorá i rekonstruí Yerusalèm te na e Mesias, e Prens, lo tin shete siman i sesentidos siman.”—Daniel 9:25.

Pa determiná e tempu di e yegada di e Mesias, nos tin ku sa promé ki tempu e periodo ku ta hiba na e Mesias a kuminsá. Segun e profesia, esei ta “for di e momentu ku e òrdu a wòrdu duná pa restorá i rekonstruí Yerusalèm.” Ki tempu “e òrdu a wòrdu duná”? Segun e eskritor bíbliko Nehemias, “den e di binti aña di rei Artaherhes” a duna e òrdu pa rekonstruí e murayanan rònt di Yerusalèm. (Nehemias 2:1, 5-8) Historiadónan ta konfirmá ku aña 474 promé ku nos era (P.E.K.) tabata Artaherhes su promé aña kompletu komo gobernante. Pues anto e di 20 aña di su reinado tabata aña 455 P.E.K. Awor nos sa ki tempu Daniel su profesia Mesiániko a kuminsá kumpli, esta, na aña 455 P.E.K.

Daniel ta indiká tambe kon largu e periodo di tempu ku a hiba na yegada di e “Mesias, e Prens” lo a dura. E profesia ta menshoná “shete siman i sesentidos siman,” un total di 69 siman. Kon largu e periodo di tempu aki ta? Vários tradukshon di Beibel ta menshoná ku e simannan aki no ta siman di shete dia, sino siman di aña. Es desir, kada siman ta representá shete aña. E hudiunan di antigwedat tabata konosí ku e konsepto aki di siman di aña, òf sekshonnan di shete aña. Por ehèmpel, kada shete aña nan a warda un aña di sabat. (Eksodo 23:10, 11) P’esei e 69 simannan profétiko ta suma 69 sekshon di shete aña kada un, òf un total di 483 aña.

Tur loke nos tin ku hasi awor ta konta. Si nos kuminsá konta for di aña 455 P.E.K., 483 aña despues ta hiba nos na aña 29 di nos era (E.K.). Esei ta presis e aña ku Hesus a batisá i bira e Mesias!a (Lukas 3:1, 2, 21, 22) Esaki no ta un kumplimentu remarkabel di profesia bíbliko?

PA YUDA nos identifiká e Mesias, Yehova Dios a inspirá hopi profeta di Beibel pa duna detayenan tokante e nasementu, ministerio i morto di e Libertadó primintí. Tur e profesianan bíbliko aki a kumpli den Hesukristu. Nan ta asombrosamente eksakto i detayá. Pa ilustrá esaki, laga nos konsiderá algun profesia ku a predisí susesonan relashoná ku e nasementu i infansia di e Mesias.

Profeta Isaias a predisí ku e Mesias lo tabata un desendiente di Rei David. (Isaias 9:7) Hesus en bèrdat a nase den e liña di desendensia di David.—Mateo 1:1, 6-17.

Mikeas, un otro profeta di Dios, a predisí ku e yu aki ku tempu lo a bira un gobernante i ku lo el a nase na “Bètlehèm Efrata.” (Mikeas 5:2) Tempu ku Hesus a nase tabatin dos stat den Israel ku yama Bètlehèm. Unu tabata situá serka di Názarèt den e parti nort di e pais, i e otro tabata serka di Yerusalèm den Huda. E Bètlehèm serka di Yerusalèm tabata esun ku ántes nan a yama Efrata. Hesus a nase den e stat ei, presis manera e profesia a predisí!—Mateo 2:1.

Un otro profesia bíbliko a predisí ku e Yu di Dios lo a ser yamá “for di Egipto.” Na mucha, Hesus a ser hibá Egipto, i nan a tres’é bèk despues ku Herodes a muri. Pues, asina e profesia a kumpli.—Oseas 11:1; Mateo 2:15.

Den e lista na página 200, e tekstonan bíbliko bou dje enkabesamentu “Profesia” ta kontené detayenan tokante e Mesias. Sea asina bon di kompará esakinan ku e tekstonan bíbliko bou dje enkabesamentu “Kumplimentu.” Si bo hasi esaki, bo fe ku e Palabra di Dios ta bèrdat lo bira mas fuerte ainda.

Segun ku bo ta eksaminá e tekstonan bíbliko aki, tene na mente ku esnan di un karakter profétiko tabata skirbí sientos di aña promé ku Hesus a nase. Hesus a deklará: “Tur kos ku ta pará skirbí tokante di mi den e Lei di Moisés i e Profetanan i e Salmonan mester wòrdu kumplí.” (Lukas 24:44) Manera bo por konfirmá den bo propio Beibel, nan a kumpli, anto den delaster un detaye!

HENDE ku ta kere den e siñansa di Trinidat ta bisa ku Dios ta konsistí di tres persona: e Tata, e Yu i e Spiritu Santu. Nan ta bisa ku kada un di e tres personanan aki ta igual ku otro, todopoderoso i sin un prinsipio. Pues segun e doktrina di Trinidat, e Tata ta Dios, e Yu ta Dios i e Spiritu Santu ta Dios, sin embargo ta un solo Dios tin.