Pregunta di Lektor

Kiko e unimentu di e dos pida palunan deskribí na Ezekiel kapítulo 37 ta nifiká?

Yehova a duna Ezekiel un mensahe di speransa: el a primintí ku lo el a uni e nashon di Israel despues ku nan lo a regresá e Tera Primintí. E mensahe ei tambe a profetisá tokante e unimentu di e pueblo di Dios ku a kuminsá tuma lugá den e último dianan.

Yehova a bisa profeta Ezekiel pa skirbi riba dos palu. Riba un di nan e mester a skirbi: “Pa Huda i pa e yunan di Israel, su kompañeronan.” I riba e otro: “Pa Yosef, e palu di Efraim i henter e kas di Israel, su kompañeronan.” E dos palunan mester a bira “un solo pida palu” den man di Ezekiel.—Eze. 37:15-17.

Kiko e nòmber “Efraim” ta representá? E promé rei di e reino di dies tribu di nort, Yeroboam, tabata di e tribu di Efraim, ku a bira e tribu prinsipal. (Deu. 33:13, 17; 1 Rei. 11:26) E tribu akí a bini di Efraim, yu di Yosef. (Num. 1:32, 33) Yosef a risibí un bendishon spesial for di su tata, Yakòb. P’esei, tabata na su lugá pa yama e palu ku tabata representá e reino di dies tribu “e palu di Efraim.” Pa e tempu ku Ezekiel a skirbi e profesia tokante e dos palunan, ya e asirionan a hiba e reino di dies tribu di nort di Israel den koutiverio. Esei a tuma lugá na aña 740 promé ku Kristu. (2 Rei. 17:6) Pues, pa e tempu ku Yehova a duna Ezekiel e profesia, mayoria di e israelitanan ei tabata plamá den e Imperio di Babilonia, ku a remplasá e Imperio Asirio.

Na aña 607 promé ku Kristu, e reino di zùit ku tabata konsistí di dos tribu, huntu ku kisas esnan ku a sobra di e reino di nort, a bai den eksilio na Babilonia. E reinan di e liña di Huda a goberná e dos tribunan akí, i e saserdotenan tabata konektá ku nan pasobra nan tabata sirbi na e tèmpel na Herúsalèm. (2 Kró. 11:13, 14; 34:30) Pues, tabata na su lugá ku e palu “pa Huda” a representá e reino di zùit ku tabata konsistí di dos tribu.

Na ki tempu e dos palunan simbóliko akí a uni? Esei tabata ora e israelitanan a regresá Herúsalèm pa rekonstruí e tèmpel na aña 537 promé ku Kristu. Hende di tantu e reino di zùit komo di e reino di nort a regresá huntu for di eksilio. No tabatin un divishon mas entre e yunan di Israel. (Eze. 37:21, 22) Un biaha mas, e israelitanan a adorá Yehova huntu. Isaías i Yeremías tambe a profetisá tokante e rekonsiliashon akí.—Isa. 11:12, 13; Yer. 31:1, 6, 31.

E profesia akí ta enfatisá un bèrdat importante tokante adorashon berdadero: Yehova lo pone su sirbidónan bira “ún.” (Eze. 37:18, 19) E profesia akí a kumpli den nos tempu? Sí. E profesia akí a kuminsá kumpli na 1919, ora ku den un forma gradual Dios a reorganisá i uni su pueblo. Satanas su intentonan pa dividí Dios su pueblo pa semper a frakasá.

Na e tempu ei, mayoria di sirbidó di Dios tabatin e speransa pa bira rei i saserdote huntu ku Hesus den shelu. (Rev. 20:6) Na un manera simbóliko, nan tabata manera e palu pa Huda. Pero, ku tempu, mas i mas hende ku tabatin e speransa di biba riba tera a kuminsá djòin e hudiunan spiritual. (Zak. 8:23) E hendenan akí tabata manera e palu pa Yosef, i nan no tabatin e speransa di reina ku Kristu.

Awe, tur dos grupo ta sirbi Yehova komo su pueblo uní bou di ún Rei, Hesukristu, kende e profesia ta yama “mi sirbidó David.” (Eze. 37:24, 25) Hesus a pidi den orashon pa su siguidónan ‘por ta ún, meskos ku su Tata ta den union kuné, i e den union ku su Tata.’a (Huan 17:20, 21) Hesus a profetisá tambe ku su tou chikitu di siguidó ungí i su ‘otro karnénan’ lo “bira ún tou.” Nan tur lo bira “ún tou bou di ún wardadó.” (Huan 10:16) Manera Hesus a deskribí, awe e pueblo di Yehova ta uní, sin importá ki speransa pa futuro nan tin.