Deskubrimentu Arkeológiko Ta Indiká Ku Rei David A Eksistí di Bèrdat

Di akuerdo ku Beibel, Rei David di Israel a biba den e di 11 siglo promé ku Kristu. Ademas, su desendientenan a goberná pa sientos di aña. Pero algun krítiko ta bisa ku David nunka a eksistí, ku e ta un mito òf un personahe ku hende a inventá mas despues. Rei David a eksistí di bèrdat?

Na aña 1993, e arkeólogo Avraham Biran i su tim a deskubrí un fragmento di piedra na Tel Dan, nort Israel, ku un inskripshon ku ta referí na e “Kas di David.” E inskripshon, skirbí ku lèter hopi antaño, ta for di e di nuebe siglo promé ku Kristu. E piedra akí evidentemente tabata parti di un monumento ku e arameonan a traha pa broma tokante nan viktorianan riba Israel.

Un artíkulo den Bible History Daily ta bisa: “Tabatin duda enkuanto e inskripshon di e ‘Kas di David’. Sinembargo, mayoria di eksperto riba tereno di Beibel i un grupo di arkeólogo ta di akuerdo ku e fragmento di piedra di Tel Dan akí ta e promé prueba konkreto ku ta indiká ku Rei David, menshoná den Beibel, a eksistí di bèrdat. Esei ta hasié un di e deskubrimentunan arkeológiko di Beibel mas importante ku a ser raportá den BAR [Biblical Archaeology Review].”