Pregunta di Lector

Como cu awor nan ta bisa cu proceduranan di sterilisacion ta reversibel riba peticion, un cristian lo por mira nan como un opcion pa planea famia?

Sterilisacion a bira e medio mas usá pa planea famia. Pa hopi hende, ta nan antecedente social, nan educacion i tambe nan punto di bista religioso, ta parce di determiná si e ta aceptabel of no. Cerca Testigonan di Jehova, e aspecto di creencia religioso ta un factor cu ta conta. Nan ta compartí e salmista su deseo: “Instruí mi, o Jehova, den bo caminda, i guia mi den e caminda di rectitud.” (Salmo 27:11) Kico e proceduranan di sterilisacion ta encerá?

Sterilisacion masculino pa planea famia yama vasectomia. Nan ta corta i blokea dos cabuya (of tubu) chikitu dje zaadleider den e sacu di testículo. Tin vários manera médico pa haci esaki, pero e intencion ta pa haci imposibel pa sperma pasa for dje testículonan. Sterilisacion femenino nan ta yama maramentu. Por lo general nan ta hacié dor di corta i mara (of, kima) e eileider cera, cu ta hiba e webunan for dje ovario pa e matris.

Pa hopi tempu hende a considerá e proceduranan aki como permanente, esta, cu nan a producí sterilisacion ireversibel. Pero tabatin hende cu a busca yudansa médico pa deshací e sterilisacion, sea pasobra ta duel nan loke nan a haci of dor cu nan circunstancia a cambia. Cu e invento di instrumentonan specialisá i microcirugia, a logra mihó éxito den deshací sterilisacion. No ta raro pa lesa cu cerca candidatonan selecto por tin 50 pa 70 porciento di éxito den deshací vasectomia dor di bolbe conectá e puntanan dje tubunan chikitu cu a corta. Dokternan ta bisa cu nan tin 60 pa 80 porciento di éxito den deshací sterilisacion cerca hende muher. Tin hende cu a tende di esaki i ta haña cu awor no mester mira sterilisacion mas como algu permanente. Podisé nan ta kere cu por pone vasectomia i maramentu den e mésun categoria cu píldora anticonceptivo, condon i diafragma, métodonan cu bo por stop di usa si bo ta deseá un embaraso. Sin embargo, tin algun aspecto serio cu nos no mag ignorá.

Un aspecto ta cu e chensnan pa deshací sterilisacion por bira drásticamente mas chikitu dor di factornan manera cuantu daño a haci na e tubunan durante e procedura di sterilisacion, e cantidad di tubu cu a kita of kima, e cantidad di aña cu a pasa despues dje procedura, i den caso di vasectomia, si a resultá cu awor tin anticurpa contra e sperma dje homber. I tampoco no mester ignorá e echo cu den hopi lugá, sea microcirugia no ta disponibel, of e gastu pa haci e operacion ta demasiado haltu. P’esei, hopi hende cu podisé ta deseá desesperadamente pa deshací un sterilisacion, lo no por hacié. Pa nan e ta permanente.a Pues e porcentahenan di éxito mencioná ariba en realidad ta djis teorético, nan no ta promedionan confiabel.

Tin algun echo cu ta duna un indicacion dje realidad. Un artículo publicá na Merca tocante deshací vasectomia a comentá cu despues dje operacion cu ta costa $12.000, “solamente 63 porciento di pashent por saca nan partner na estado.” Ademas, ta solamente “seis porciento di homber cu a haci vasectomia, ta busca pa deshací e procedura despues.” Den un estudio hací na Alemania tocante Europa central, un 3 porciento dje hombernan cu a scoge pa ser sterilisá, despues a busca pa deshací e procedura. Asta si mitar dje intentonan ei lo por a logra, esei lo a nificá cu pa 98,5 porciento, e vasectomia cu nan a haci ta igual cu un sterilisacion permanente. I e porcentahe ta mas haltu den paisnan cu poco of ningun microciruhano.

Pues anto, ta irealístico pa trata sterilisacion masculino of femenino levemente, como si fuera e tabata un medio temporal pa planea famia. I pa e cristian sincero, tin otro aspectonan mas pa considerá.

Un punto central ta cu e poder reproductivo ta un don for di nos Creador. Su propósito original a encerá cu hende perfecto lo a haña yu i “yena e tera i domin’é.” (Génesis 1:28) Despues cu e Diluvio a reducí e poblacion di tera na ocho hende, Dios a ripití e instruccionnan básico ei. (Génesis 9:1) Dios no a ripití e mandamentu ei na e nacion di Israel, pero e israelitanan a mira hañamentu di yu como algu masha deseabel.—1 Samuel 1:1-11; Salmo 128:3.

E Ley di Dios pa Israel a contené indicacionnan di su respet haltu pa procreacion humano. Por ehempel, si un homber casá a muri promé cu el a producí un yu homber pa sigui cu su liña di desendencia, su ruman homber mester a haña un yu homber dor di casa cu su cuñá. (Deuteronomio 25:5) Mas al caso tabata e ley tocante un esposa cu a purba yuda su casá den un pelea. Si e esposa a gara e partinan privá dje contrincante di su casá, nan mester a amputá su man; ta significativo cu Dios no a rekerí pa causa daño bek na e órganonan reproductivo dje esposa ni dje casá. (Deuteronomio 25:11, 12) E ley aki claramente lo a fomentá respet pa órganonan reproductivo; no tabatin mag di destruí esakinan innecesariamente.b

Nos sa cu cristiannan no ta bou dje Ley di Israel, pues e reglamentu na Deuteronomio 25:11 i 12, no ta obligatorio pa nan. Jesus no a manda ni no a implicá cu su disipelnan tabatin cu casa i haña mas tantu yu posibel, i esei ta loke hopi pareha a considerá ora di dicidí si mester usa un método pa planea famia. (Mateo 19:10-12) Apostel Pablo sí a animá ‘biudanan mas hóben i pasioná, pa casa i haña yu.’ (1 Timoteo 5:11-14) E no a mencioná sterilisacion permanente di cristiannan, esta, pa nan sacrificá boluntariamente nan potencial reproductivo pa haña yu.

Cristiannan ta haci bon di evaluá e indicacionnan aki di cu Dios ta duna gran balor na nan abilidad reproductivo. Cada pareha tin cu dicidí pa nan mes si nan lo usa métodonan apropiado pa planea famia i ki ora. Ta cierto cu nan decision lo ta mas pisá si tin confirmacionnan médico cu sea e mama of e yu lo core rísiconan serio di salú, asta e chens di muri, si tin un embaraso den futuro. Aunke di mala gana, algun cristian den e situacion ei a haci un dje proceduranan di sterilisacion describí anteriormente, pa haci sigur cu un embaraso lo no pone na peliger bida dje mama (cu podisé tin otro yu caba) ni bida dje yu, cu lo por nace despues cu un problema di salú cu ta pone su bida na peliger.

Pero cristiannan cu no ta confrontá un riesgo asina extraordinario i distintivo, sigur lo kier usa “sano huicio” i forma nan manera di pensa i actua di acuerdo cu e balor cu Dios ta duna na e potencial reproductivo. (1 Timoteo 3:2; Tito 1:8; 2:2, 5-8) Esaki lo reflehá cu nan tin e madures pa distinguí indicacionnan bíblico. Pero, kico si bira públicamente conocí cu un cristian ta pasa por haltu di Dios su evaluacion sin tin cunes? Otro hende lo no duda si e ta un bon ehempel, i si e tin un reputacion di ta tuma decisionnan na armonia cu Bijbel? Di mes, un mancha perturbador asina riba un persona su reputacion lo por afectá su posicion di ta cualificá pa privilegionan special di sirbishi. Ma esei lo no ta e caso di un hende cu a laga haci e procedura aki den ignorancia.—1 Timoteo 3:7.

[Nota]