Betel—Un Stad di Bon i Malu

ALGUN stad ta bira famoso—of notorio—debí na sucesonan cu a tuma lugá den nan. Sin embargo, Betel ta diferente pa motibu cu el a bira conocí pa tantu loke ta bon como pa loke ta malu. E patriarca Jacob a yama e stad Betel, loke ta nificá “Cas di Dios.” Pero mil aña despues, profeta Oséas a yama e stad e “Cas di Loke Ta Perhudicial.” Con e stad aki a cambia di bon pa malu? I kico su historia por siña nos?

Na 1943 P.E.C., tempu cu Abraham tabata na bida ainda, a cuminsá relacioná Betel cu e pueblo di Dios. N’e tempu ei, e stad tabata conocí bou dje nomber Luz, su nomber cananeo original. E tabata situá den e region montañoso un 17 kilometer nort di Jerusalem. Visualisá Abraham i su subrino Lot, pará na haltu den e cerunan cu ta rondoná Betel, for di unda nan tin un bon bista, ta wak abou riba e yanuranan fértil dje Vaye di Jordan mas abou. Cu tacto, Abraham ta hala Lot su atencion n’e problema relacioná cu áreanan pa nan tounan grandi come: “Por fabor, no laga pa tin mas pleitu entre ami cu bo i entre mi cuidadónan di bestia i bo cuidadónan di bestia, pasobra ta ruman nos ta. No ta henter e pais ta na bo disposicion? Por fabor, separá for di mi. Si bo bai banda robes, e ora ei ami sigur lo bai banda drechi; pero si bo bai banda drechi, e ora ei ami sigur lo bai banda robes.”—Génesis 13:3-11.

Abraham no a haci uso di su derecho pa scoge promé. Mas bien, el a permití e homber mas hóben scoge e mihó parti. Nos por imitá e actitud excelente di Abraham. Nos por calma un pleitu dor di tuma e iniciativa pa papia trankil i actua inegoistamente.—Romanonan 12:18.

Añanan despues ora Abraham su nietu, Jacob, tabata biba den tent na Luz, el a soña algu extraordinario. El a mira “un trapi pará riba tera i su top ta yega te den shelu; i, mira! angelnan di Dios tabata subi i baha for di dje. I mira! Jehova tabata pará riba dje.” (Génesis 28:11-19; compará cu Juan 1:51.) E soño tabatin un nificacion importante. E angelnan cu Jacob a mira lo a sirbié pa cumpli cu loke Jehova a primintié relacioná cu su simia. Jehova su posicion elevá riba e trapi a mustra cu e lo a dirigí e angelnan den e trabou aki.

E garantia di apoyo divino aki a conmové Jacob profundamente. Ora el a spierta for di soño, el a yama e lugá Betel, cu ta nificá “Cas di Dios,” i el a haci un voto na Jehova: “Di tur loke bo duná mi, sin falta lo mi duná bo un décimo.”a (Génesis 28:20-22) Reconociendo cu tur loke e tabatin a bini di Dios, el a deseá di duna un porcion generoso bek como muestra di su gratitud.

Awe tambe tin angel cu ta traha na fabor di cristiannan. (Salmo 91:11; Hebreonan 1:14) Nan tambe por mustra aprecio pa tur nan bendicionnan dor di ta “ricu cu hopi expresion di gradicimentu na Dios.”—2 Corintionan 9:11, 12.

Cu tempu, Jacob su desendencia a bira un nacion. Nan lider Hosué a vence e rey pagano di Betel na principio di su conkista di Canan. (Hosué 12:16) Durante e periodo dje huesnan, profetisa Débora a biba cerca di Betel i el a conta hende tocante e palabra di Dios. Tempu cu Samuel tabata hues dje nacion di Israel, e tambe tabata bishitá Betel regularmente.—Huesnan 4:4, 5; 1 Samuel 7:15, 16.

Betel Ta Bira un Centro di Apostasia

Pero despues cu a bin division den e Reino na 997 P.E.C., Betel a stop di ta asociá cu adoracion puru. Rey Jeroboam a haci Betel un centro pa adoracion di bisé, cu supuestamente a representá Jehova. (1 Reynan 12:25-29) Ta p’esei ora el a profetisá dje destruccion di Betel, Oséas a yam’é “Bet-aven,” loke ta nificá “Cas di Loke Ta Perhudicial.”—Oséas 10:5, 8.

Aunke Betel a bira un centro di cosnan spiritualmente perhudicial, sucesonan cu tin di haber cuné a sigui percurá lesnan importante. (Romanonan 15:4) Un les asina ta relacioná cu un profeta anónimo cu a ser mandá for di Huda pa bai Betel i predicí tocante e destruccion dje altar i sacerdotenan di Betel. Tambe Jehova a bis’é pa bolbe Huda—djis algun kilometer direccion zuid—sin come of bebe. Cu curashi e profeta aki a profetisá dilanti Jeroboam, rey di Israel, i a maldicioná e altar di Betel. Pero despues el a desobedecé Dios dor di come na cas di un profeta bieu na Betel. Di con? E profeta bieu a gañ’é cu un angel di Jehova a mand’é mustra hospitalidad na un compañero profeta. E desobedencia dje profeta di Huda a hiba na su morto prematuro.—1 Reynan 13:1-25.

Si un compañero creyente bisa nos haci algu cu ta parce cuestionabel, con nos mester reaccioná? Corda cu asta un conseho bon intencioná por ta perhudicial si e ta robes. (Compará cu Mateo 16:21-23.) Dor di busca guia di Jehova mediante oracion i studio di su palabra, nos lo por evitá e eror trágico cu e profeta anónimo a cometé.—Proverbionan 19:21; 1 Juan 4:1.

Despues di un 150 aña, profeta Amos tambe a biaha bai nort pa profetisá contra Betel. Cu firmesa Amos a denunciá su auditorio hostil, incluso e sacerdote Amasías, kende yen di arogancia a bisa Amos p’e “bai, core p’e tera di Huda.” Pero sin miedu Amos a bisa Amasías dje calamidadnan cu lo a bini riba e sacerdote su mes famia di cas. (Amos 5:4-6; 7:10-17) Su ehempel ta recordá nos cu Jehova por duna curashi na su humilde sirbidónan.—1 Corintionan 1:26, 27.

Finalmente, Rey Hosías di Huda a tumba ‘e altar cu tabata na Betel, a kima e lugá haltu, a mul’é te cu el a keda stof, i a kima e palu sagrado.’ (2 Reynan 23:15, 16) Awe, ancianonan por imitá su excelente ehempel dor di sigui Jehova su instruccionnan celosamente i hiba delantera pa mantené e congregacion limpi.

E incidentenan aki den historia di Betel ta describí cu luho di detaye e consecuencianan di rectitud i maldad, di obedencia i desobedencia na Jehova. Añanan mas promé, Moises a pone dilanti Israel e chens aki pa scoge: “Di berdad mi ta pone dilanti bo awe bida i loke ta bon, i morto i loke ta malu.” (Deuteronomio 30:15, 16) Si nos meditá riba e historia di Betel, lo e animá nos pa identificá nos mes cu e “Cas di Dios,” un lugá di adoracion berdadero, en bes di cu e “Cas di Loke Ta Perhudicial.”

[Nota]

[Plachi na página 23]

Ruinanan caminda tabata Betel, unda Jeroboam a establecé un centro pa adoracion di bisé