Bonbiní na e Skol di Ministerio Teokrátiko

DEN mas ku 200 pais rònt mundu, miónes di studiante ta benefisiá tur siman di e formashon ku e Skol di Ministerio Teokrátiko ta brinda. Tin studiante ta nobo, miéntras ku otronan tin años ta asistí n’e skol kaba. E skol ta ser tené na mas ku 89.000 sitio. Sin importá unda bo ta biba, e mesun programa di edukashon ta disponibel pa bo. Hende di tur edat, rasa i nivel di edukashon ta risibiendo e instrukshon teokrátiko aki grátis.

Na aña 1943, e skol a kuminsá den e kongregashonnan di Testigunan di Yehova. I nan a duna un splikashon di su propósito ku e palabranan aki: “Pa kapasitá tur ‘hòmber fiel,’ esnan ku a tende e Palabra di Dios i a demostrá nan fe den dje, pa nan ‘por siña otronan’ . . . ku e meta di hasi nan . . . mihó prepará pa presentá públikamente e speransa ku nan tin.” (Kurso den Ministerio Teokrátiko, na ingles, pág. 4) Te awe e skol su meta a keda meskos.

Bon mirá, kiko ta e mihó kos ku nos por hasi ku e don di papia ku Dios a duna nos? Beibel ta kontestá: “Laga tur loke tin rosea alabá SEÑOR.” (Sal. 150:6) Ora nos hasi esei, nos ta alegrá e kurason di nos Tata selestial i ta demostrá na dje ku nos ta sinseramente agradesidu pa su bondat i amor mustrá na nos. Nada straño anto ku Beibel ta animá kristiannan pa “ofresé kontinuamente un sakrifisio di alabansa na Dios, esta, e fruta di lepnan ku ta duna gradisimentu na su nòmber”! (Heb. 13:15) Ku e deseo di yuda bo alabá Yehova mihó ainda, hasiendo uso di e abilidatnan ku el a duna bo, nos ta yama bo bonbiní na e Skol di Ministerio Teokrátiko.

Ounke e Skol di Ministerio Teokrátiko ta duna hopi atenshon na lesamentu públiko i na e arte di duna diskurso i di siña hende, su benefisionan no ta yega te ei so. Segun bo ta partisipá den e skol, lo e yuda bo kultivá kualidatnan balioso manera siña lesa bon, skucha ku atenshon, kòrda loke bo lesa òf tende, studia, hasi investigashon, analisá i organisá informashon, kòmbersá, kontestá pregunta, i pone bo pensamentunan riba papel. E Beibel mes i publikashonnan bíbliko lo forma e base di e studio, di e komentarionan i presentashonnan duná den e skol. Segun ku bo mente ta apsorbá e bèrdatnan presioso ku tin den e Palabra di Dios, lo bo siña pensa manera Dios ta pensa. I sin duda esei lo benefisiá bo den tur aspekto di bida! William Lyon Phelps, dosente universitario di siglo 20, a skirbi lo siguiente tokante e balor di e Palabra di Dios: “Tur hende ku tin un bon konosementu di Beibel por ser konsiderá berdaderamente eduká. . . . Mi ta kere ku un konosementu di Beibel sin un edukashon universitario tin mas balor ku un edukashon universitario sin konosementu di Beibel.”

Kon pa Benefisiá Plenamente

Naturalmente, pa bo por saka pleno benefisio di e formashon ku e Skol di Ministerio Teokrátiko ta brinda, abo komo studiante tin ku hasi esfuerso. Apòstel Pablo a konsehá su kompañero kristian Timoteo: “Perkurá pa e kosnan aki; sea dediká na nan, pa bo progreso por ta bisto pa tur hende.” (1 Tim. 4:15) Den ki maneranan práktiko bo por sigui e konseho aki?

Perkurá pa bo asistí tur siman na e Skol di Ministerio Teokrátiko. Tambe hasi bon uso di e buki di instrukshon aki, Benefisiá di e Skol di Ministerio Teokrátiko. Yena bo nòmber den e espasio ku tin p’e riba e promé página i semper bini kuné ora bo ta asistí na e skol. E buki di instrukshon aki ta alabes un buki di tarea. Ora bo les’é, hala strepi bou di puntonan importante ku bo ta kere lo ta útil pa bo. Usa e márgennan hanchu ku tin na banda pa hasi anotashon di puntonan práktiko ku bo ta siña durante e skol.

Lo bo haña un programa apart pa e Skol di Ministerio Teokrátiko ku tin detayenan dje skol mes. Kisas lo kumbiní bo warda e programa ei den e buki aki pa asina bo tiné semper na man.

Ora bo ta prepará pa e seshon semanal di e skol, kòrda ku ta Beibel ta e buki prinsipal di instrukshon. Duna prioridat na lesa e porshon di Beibel programá pa e siman. Lo ta masha probechoso tambe si bo por lesa di antemano e informashon riba kua e vários partinan lo ta basá.

Durante e skol lo tin oportunidat pa e ouditorio partisipá. Probechá plenamente di esakinan. Un partisipashon aktivo ta importante pa yuda bo kòrda loke bo a tende i pon’é na práktika den bo bida personal.

Klaru ku tur studiante lo haña oportunidat di duna diskurso òf tene demostrashon dilanti e kongregashon. Hasi bon uso di kada un di e oportunidatnan ei. Hasi bo bèst pa mehorá den tur e aspektonan di papia den públiko ku bo tin ku traha ariba. E konseho ku bo haña ta pa bo sigui hasi progreso. Aseptá tal yudansa personal di buena gana. Skirbi den bo buki e sugerensianan spesífiko ku bo haña pa mehorá. Komo ku ta difísil pa un persona mira su mes manera otronan ta mir’é, e sugerensia- i konsehonan amoroso basá riba Beibel ku ta ser duná por kontribuí hopi na bo progreso. Esaki ta konta asta pa esnan ku tin hopi aña ta partisipá kaba den e skol.—Pro. 1:5.

Lo bo kier progresá mas lihé? Lo bo logra esei si bo mes tuma e inisiativa. Studia di antemano tur e informashon ku lo ser tratá den e skol. Si tin mester di un supstituto pa un parti, lo bo por ofresé bo mes pa esei i asina bo ta haña mas eksperensia. Ora otro studiantenan ta duna parti, skucha bon kon nan ta presentá e informashon, pasobra nos tur ta siña di otro.

Ademas, si bo sirkunstansia ta permití, lo bo por progresá hopi mas lihé dor di studia e buki di instrukshon aki riba bo mes. Despues ku bo ta bon familiarisá ku e siguiente 15 lèsnan, pasa pa e “Programa pa Kultivá Bon Kualidatnan di Oradó i Maestro,” ku ta kuminsá na página 78. Promé bo ta studia kada lès, i hasi e tareanan ku ta korespondé kuné. Pone loke bo ta siña na práktika den bo sirbishi. Esaki por kontribuí hopi na bo progreso komo oradó i komo maestro di e Palabra di Dios.

E Skol di Ministerio Teokrátiko lo prepará bo pa loke ta mas importante den bida. Siendo ku ta grásias na Dios su boluntat nos ta na bida, nos ta biba prinsipalmente pa alabá Yehova manera e meresé: ku e alabansanan di mas sublime. (Rev. 4:11) E edukashon ku nos ta risibí di e skol ta un medio pa logra esaki, pasobra e ta yuda nos pensa kla, aktua sabí i transmití efikasmente e bèrdatnan maravioso di Dios su Palabra inspirá.