Konsolá Esnan Ku Ta Tristu
1 Pèrdè un ser kerí den morto ta un eksperensia troumátiko, spesialmente pa hende ku no tin e speransa di Reino. (1 Tes. 4:13) Hopi hende ta puntra nan mes ku frekuensia: ‘Dikon hende ta muri? Unda nan ta bai? Lo mi mira mi ser kerí atrobe?’ Laga nos konsiderá algun sugerensia enkuanto kon pa konsolá hende ku nos topa den sirbishi di vèlt ku ta tristu pa motibu ku un famia òf amigu a muri.—Isa. 61:2.
2 Di Kas pa Kas: Un doño di kas por bisa nos ku un famia di dje a kaba di muri. E persona ta yorando? E kas ta yen di famia tristu? Den e kaso ei, ta mihó pa no duna un testimonio largu. (Ekl. 3:1, 7) Podisé nos por kondoler e hende, dun’é un tratado, revista, òf foyeto apropiá i despedí na un manera respetuoso. Despues nos por bin bèk ora ta mas kumbiniente pa dun’é mas konsuelo for di Beibel.
3 Na otro okashon, kisas nos ta diserní ku nos por bisa mas durante e promé bishita. Ounke no ta momento pa refutá ideanan robes, kisas nos por habri Beibel i mustra nan e promesa di resurekshon. (Juan 5:28, 29) Òf nos por kompartí loke Beibel ta bisa tokante e kondishon di morto. (Ekl. 9:5, 10) Un relato bíbliko di resurekshon tambe por duna konsuelo. (Juan 11:39-44) Un otro opshon ta pa konsiderá e palabranan di fiel Jòb ku a demostrá ku e tabata spera riba Yehova. (Jòb 14:14, 15) Promé ku nos bai, nos por ofresé Kico Ta Sosodé cu Nos ora Nos Muri?, Ora un Persona Stimá Muri, òf un otro foyeto òf tratado apropiá. Tambe nos por laga e buki Beibel Ta Siña, despues hala atenshon na e informashon na kapítulo 6 i hasi areglo pa sigui konsiderá e tema ora nos bolbe.
4 Na Otro Okashon: Si e akto di entiero òf e diskurso so ta na Salòn di Reino, lo bai tin hende presente ku no ta kreyente? Den e kaso ei, por perkurá pa tin literatura disponibel ku por duna nan konsuelo. Algun kasa mortuorio ta apresiá ora nan tin literatura na man pa e famianan ku ta sufriendo. Tin bes, un anunsio di morto den korant ta habri kaminda pa nos skirbi un karta kòrtiku pa konsolá famianan di e defuntu. Na un okashon un biudo i su yu muhé a haña un karta i un par di tratado for di un publikadó. Despues di esei nan a bai kas di e publikadó i a puntr’é: “Abo ta e persona ku a manda e karta aki? Wèl, mi ke haña sa mas tokante Beibel!” E hòmber i su yu muhé a aseptá un estudio di Beibel, i nan a kuminsá asistí na e reunionnan di kongregashon.
5 Eklesiastés 7:2 ta bisa: “Ta mihó bai na un kas di rou ku bai na un kas di fiesta.” Un hende den tristesa hopi bes ta mas dispuesto pa skucha e Palabra di Dios ku un hende ku ta interesá den dibertishon. Nos tur mester ta alerta pa probechá di kualke oportunidat pa konsolá esnan ku ta tristu debí ku nan a pèrdè un ser kerí.
[Study Questions]
1. Pakiko hende ku ta di luto tin mester di konsuelo?
2. Si un doño di kas indiká ku e ta di luto, semper nos mester purba duna un testimonio largu?
3. Si sirkunstansia ta permití, ki teksto bíbliko nos por mustra un doño di kas ku ta tristu?
4. Na ki otro okashon nos por duna konsuelo?
5. Dikon nos mester ta alerta pa probechá di oportunidat pa konsolá hende ku ta tristu?