Nan A Haci e Boluntad di Jehova

Hañando un Esposa pa Isaac

E HOMBER di edad sintá banda dje pos tabata agotá. E i su asistentenan huntu cu nan dies kamelnan a biaha tur e caminda for dje becindario di Beer-seba pa e parti nort di Mesopotamia—un distancia di mas cu 800 kilometer.a Awor cu nan a alcansá nan destinacion, e biahero cansá aki a pausa pa refleccioná riba su mision difícil. Ken e homber aki tabata, i pakico el a efectuá e biahe trabahoso aki?

E homber tabata sirbidor di Abraham, “esun di mas bieu di su cas.” (Génesis 24:2) Aunke e nomber no ta ser mencioná den e relato, aparentemente esaki tabata Eliezer, na ken Abraham na un ocasion a referí como ‘un yu di su cas’ i di ken el a papia como siendo den fila pa ‘siguié como heredero.’ (Génesis 15:2, 3) Naturalmente, esei tabata ora Abraham i Sara no tabatin yu. Awor nan yu, Isaac, tabatin 40 aña di edad, i aunke Eliezer no tabata Abraham su heredero principal mas, ainda e tabata su sirbidor. Pues el a bai di acuerdo ora Abraham a hacié un peticion difícil. Kico esei tabata?

Un Mision Difícil

Den tempu di Abraham un matrimonio a afectá no solamente e famia sino tambe henter e tribu, of comunidad dje patriarca. P’esei tabata un custumber p’e mayornan selectá un casá pa nan yunan. Sin embargo, buscando un esposa pa su yu homber Isaac, Abraham a enfrentá un dilema. E custumbernan profano dje cananeonan local a haci cu e no a ni pensa mes di cas’é cu un di nan. (Deuteronomio 18:9-12) I aunke tabata un custumber pa un homber casa cu un persona di su mes tribu, e famianan di Abraham tabata biba cientos di kilometer leu den parti nort di Mesopotamia. E no por a djis manda Isaac bai biba aya, pasobra Jehova a primintí Abraham: “Na bo simia mi ta bai duna e tera aki,” e tera di Canan. (Génesis 24:7) Pues, Abraham a bisa Eliezer: “Bai na mi pais i na mi famianan, i abo siguramente lo tuma un esposa pa mi yu, pa Isaac.”—Génesis 24:4.

Ora Eliezer a completá e biahe largu, el a sosegá banda dje pos segun cu e tabata meditá riba su mision. El a realisá cu pronto e hende muhernan lo a bini n’e pos pa coge e suministro di awa pa anochi. Pues el a implorá Jehova: “E muher hóben na ken ami lo bisa, ‘Baha bo poron di awa, por fabor, pa mi por bebe,’ i cu realmente lo bisa, ‘Bebe i tambe lo mi duna bo kamelnan awa,’ esaki ta esun cu bo tin cu asigná na bo sirbidor, na Isaac; i pa medio di esaki lagá mi sa cu bo a efectuá amor leal pa cu mi doño.”—Génesis 24:14.

Miéntras ainda e tabata haci oracion, un muher hóben atractivo yamá Rebeca a yega cerca. “Duná mi, por fabor, un slok chikitu di awa for di bo poron,” Eliezer a bis’é. Rebeca a haci esei, i a bisa e ora ei: “Pa bo kamelnan tambe lo mi saca awa te ora nan caba di bebe.” Esaki tabata un oferta bastante generoso, ya cu un kamel cu sed por bebe te cu 95 liter di awa den solamente dies minuut! Sea e kamelnan di Eliezer tabatin asina tantu sed of no, Rebeca mester tabata sa cu e servicio cu el a ofrecé pa haci lo a bira un trabou duru. En berdad, “rápidamente el a haci su poron bashí den e baki di awa i a core bes tras bes n’e pos pa saca awa, i a sigui saca awa pa tur su kamelnan.”—Génesis 24:15-20.

Sintiendo Jehova su guia, Eliezer a duna Rebeca un renchi di nanishi di oro i dos pulsera di oro, cu tin un balor di US$1.400 na placa djawe. Ora Rebeca a bis’é cu e tabata e nietu di Náhor, ruman homber di Abraham, Eliezer a haci un oracion di gradicimentu na Dios. “Jehova a guiá mi n’e cas dje ruman hombernan di mi doño,” el a bisa. (Génesis 24:22-27) Eliezer a ser hibá n’e famia di Rebeca. Cu tempu, Rebeca a bira esposa di Isaac, i e tabatin e privilegio di bira antepasado dje Mesías, Jesus.

Lesnan pa Nos

Jehova a bendicioná Eliezer su esfuerso compañá cu oracion pa haña un casá temeroso di Dios pa Isaac. Sin embargo, corda cu Isaac su matrimonio tabata directamente relacioná cu e propósito di Dios pa producí un simia mediante Abraham. Pues e relato aki no mester pone nos concluí cu tur hende cu pidi den oracion pa un casá lo ricibí unu milagrosamente. No obstante, si nos pega n’e principionan di Jehova, lo e duna nos e fortalesa pa wanta e desafionan cu ámbos circunstancia den bida ta trece cuné—matrimonio of solteria.—1 Corintionan 7:8, 9, 28; compará cu Filipensenan 4:11-13.

Eliezer tabatin cu haci hopi esfuerso pa haci cosnan n’e manera di Jehova. Nos tambe por haña cu pa conformá na e normanan di Jehova no ta semper fácil. Por ehempel, lo por ta difícil pa haña un trabou cu no ta stroba actividad teocrático, un casá cu ta temeroso di Dios, compañeronan cu ta edificante, entretenimentu cu no ta degradante. (Mateo 6:33; 1 Corintionan 7:39; 15:33; Efesionan 4:17-19) Sin embargo, Jehova por sostené esnan cu ta nenga di comprometé principionan bíblico. Bijbel ta primintí: “Confia den Jehova cu tur bo curason i no len riba bo mes comprendimentu. Den tur bo camindanan tuma nota di dje, i e mes lo haci bo camindanan stret.”—Proverbionan 3:5, 6.

[Nota]