Capítulo 84

E responsabilidad di ser disípel

DESPUES di a sali for di cas dje fariseo prominente, cu aparentemente tabata miembro dje Sanedrín, Jesús a sigi den direccion di Jerusalem. Multitud grandi a sigié. Ki motibo nan tabatin? Conbertimento di bo mes na un berdadero sigidor di dje realmente ta enbolbe kico?

Riba camina, Jesús a papia cu e multitud i kizás a dalnan un golpi ora el a bisa: “Si un hende ta sigími i no ta odia su tata i mama i esposa i yiunan i ruman homber i ruman muher, sí, asta su mes alma, e no por ta mi disípel.”

Kico Jesús kier men? Jesús no a bisa ei cu sigidor di dje tin cu literalmente odia nan famía. Mas bien, nan tin cu ódianan den e sentido di stímanan menos cu nan ta stima Jesús. Jacob, e antepasado di Jesús, segun e Scritura, a “odia” Lea i a stima Raquel, locual a nifica cu el a stima Lea menos cu el a stima su ruman, Raquel.

Considera, també, cu Jesús a bisa cu un disípel tin cu odia “asta su mes alma,” of bida. Atrobé, loke Jesús a nifica tabata cu un berdadero disípel tin cu stimé mas cu e ta stima su mes bida. Asina Jesús a enfatiza cu ora hende ta bira disípel di dje, esei ta un responsabilidad serio. Esei no ta algo pa acepta sin consideracion cuidadoso.

Disípel di Jesús tabatin cu enfrenta dificultad i persecucion, manera el a sigi indica: “Ken cu no ta carga su staca di tormento i sigi tras di mi no por ta mi disípel.” Pues, un berdadero disípel tin cu keda dispuesto di wanta e mesun carga di reproche cu Jesús a wanta, asta incluyendo, si ta necesario, morto den man di enemigo di Dios, locual a sosode Jesús pronto.

P’sei, pa ser un disípel di Cristo tabata un asunto cu e multitud cu a sigié tabatin cu analiza cu sumo atencion. Jesús a enfatiza tal echo usando un comparacion. El a bisa: “Por ehempel, cua di boso cu kier traha un toren no ta sinta promé i calcula e gasto, pa mira si e tin suficiente pa completé? Di otro manera, e por pone su fundeshi pero no por cabé, i tur mirones lo cuminza tene mofa di dje, bisando, ‘E homber a cuminza edifica pero no por a caba.’”

Pues, Jesús a ilustra pe multitud cu tabata sigié cu promé cu nan por bira disípel di dje, nan mester decidi firmemente cu nan por cumpli cu loke esei a encerra, mescos cu e homber cu kier traha un toren a averigua promé cu el a cuminza cu e tabatin e recurso pa cabé. Contando un otro comparacion, Jesús a sigi:

“Of cua rey, marchando pa contra cu un otro rey den gera, no ta sinta promé i considera si e por cu diez mil soldad enfrenta esun cu ta bini contra dje cu binti mil? En realidad, si e no por, anto mientras cu e otro ta leu ainda, e ta manda un cuerpo di embahador i ta pidi paz.”

Anto Jesús a enfatiza e sentido di su comparacion, bisando: “Pues, boso por keda sigur cu ningun di boso cu no ta yama ayó na tur su pertenencia no por ta mi disípel.” Esei ta loke e multitud cu a sigié, i, sí, tur otro hende cu ta siña di Cristo, tin cu keda dispuesto pa haci. Nan tin cu keda dispuesto pa sacrifica tur loke nan tin—tur nan pertenencia, incluyendo nan bida mes—pa nan bira su disípel. Bo ta dispuesto pa haci esei?

Jesús a sigi: “Salu, di sigur, ta excelente.” Den su Sermón di Monte, el a bisa cu su disípelnan tabata “salu dje tera,” nificando cu nan tin un influencia di conserba hende, mescos cu salu mes ta conserba. Jesús a conclui: “Pero, si salu ta perde su forza, cu kico lo e ser sazoná? E no ta sirbi ni pe tera ni pa mest. Hende ta tiré afó. Laga ken cu tin orea, scucha.”

Asina Jesús a mustra cu asta hende cu tabata disípel di dje pa basta tempo no mag debilita den nan determinacion di sigi. Si nan ta hacié, nan no ta sirbi pa nada, ta bira un obheto di mofa pa mundo i inútil dilanti Dios, realmente, un reproche pa Dios. Pues, mescos cu salu sin forza i contaminá, nan lo ser tirá afó, sí, destruí. Lucas 14:25-35; Génesis 29:30-33; Mateo 5:13.

▪ Kico kier men “odia” bo famía i bo mes?

▪ Jesús a conta cua dos comparacion, i kico nan kier men?

▪ Splica e sentido dje comentario di conclusion di Jesús tocante salu.