Bo a ripará riba e potrètnan den e foyeto akí kon nèchi Testigunan di Yehova ta bisti pa bai nan reunionnan? Dikon nos ta pone atenshon na nos manera di bisti i na nos aparensia?

Pa mustra rèspèt pa Dios. Beibel ta mustra ku Dios no ta husga hende a base di nan aparensia. (1 Samuel 16:7) Sinembargo, ora nos ta reuní pa ador’é, di kurason nos ke mustra e debido rèspèt p’e i pa nos rumannan spiritual. Si ta dilanti di un rei òf presidente nos tin ku presentá, sin duda nos lo tene kuenta ku nos manera di bisti i nos aparensia. Asina tambe, e manera ku nos ta bisti pa bai reunion ta mustra nos apresio pa e “Rei di eternidat,” Yehova Dios, i pa e lugá kaminda nos ta ador’é.—1 Timoteo 1:17.

Pa mustra ki norma i balor nos tin. Beibel ta animá kristiannan pa nan bisti ‘ku modestia i ku sano huisio.’ (1 Timoteo 2:9, 10) Un hende ku ta bisti “ku modestia” no ta hala muchu atenshon na su mes. E ta evitá di bisti paña yamativo, provokativo òf muchu sunú. I “sano huisio” ta yud’é evitá di skohe paña ku ta slòns òf muchu grandi. Tòg e prinsipionan akí ta duna kada un di nos sufisiente espasio pa skohe entre un variedat amplio di manera di bisti. Nos aparensia di bon gustu so kaba ta “dòrna e siñansa di nos Salbador” i ta “glorifiká Dios.” (Tito 2:10; 1 Pedro 2:12) Pues, e forma nèchi ku nos ta bisti pa bai reunion por influensiá e manera ku otro hende ta mira e adorashon  di Yehova.

No laga paña stroba bo di asistí na Salòn di Reino. Un paña no tin nodi di ta karu ni ekstrabagante; pa e ta apropiá, e mester ta limpi i representabel.

• Dikon e manera ku nos ta bisti pa bai reunion ta importante?

• Ki prinsipionan mester guia nos den nos manera di bisti?

Si bo ta studia Beibel ku un Testigu di Yehova, probablemente bo ta hasi esfuerso pa repasá e informashon promé ku e estudio. Meskos ta konta pa e reunionnan di kongregashon. Si bo ke saka e mayor benefisio for di nan, bo mester repasá e material di reunion di antemano. Ora bo kustumbrá hasi esaki, bo ta haña bon resultado.

Stipulá e ora i e lugá. Ki ora bo por konsentrá mihó? Mainta trempan promé ku bo kuminsá traha, òf anochi lat despues ku e muchanan bai drumi? Asta si bo no tin hopi tempu pa studia, ta bon pa bo pone un ora fiho i no laga nada stroba bo. Buska un lugá ketu i paga radio, televishon i telefòn selular ya ku nan por distraí bo. Ademas, ta bon pa hasi orashon promé ku bo kuminsá. Esaki lo aliviá bo un poko di bo preokupashonnan i permití bo konsentrá mihó riba e Palabra di Dios.—Filipensenan 4:6, 7.

Marka e kontesta i prepará pa partisipá. Pa kuminsá, purba di haña un kuadro general di e tópiko. Analisá e tema di e artíkulo òf kapítulo. Despues, tuma nota kon kada suptema ta konektá ku e tema, i si tin plachi i kuadro di repaso, analisá kon esakinan ta enfatisá e puntonan prinsipal. Kaba, lesa kada paragraf i buska e kontesta di e pregunta bou di e paragraf. Buska e tekstonan menshoná, anto lesa nan i analisá kon kada un ta apoyá e informashon. (Echonan 17:11) Ora bo haña kontesta di e pregunta, marka e palabra- òf frasenan klave den e paragraf ku lo yuda bo kòrda e kontesta. Anto na reunion, sinti bo liber pa hisa bo man i duna un komentario kòrtiku ku bo mes palabra.

Ora bo tuma tempu pa analisá e diferente tópikonan ku ta trata tur siman na e reunionnan, lo bo amplia bo “tesoro” di konosementu bíbliko.—Mateo 13:51, 52.

• Kiko bo tin ku tene kuenta kuné ora di prepará pa reunion?

• Kon bo por prepará pa duna komentario na e reunion?

Hopi tempu pasá Yehova a duna instrukshon pa kada famia pasa tempu huntu pa nan fortalesé nan relashon kuné i sera mas ku otro komo famia. (Deuteronomio 6:6, 7) P’esei tur siman famianan Testigu di Yehova ta dediká tempu na adorá Dios komo famia. Den un ambiente relahá nan ta trata tópikonan spiritual adaptá na e nesesidatnan di e famia. Asta si bo ta biba bo so, bo por hasi bon uso di e okashon akí pa analisá un tema bíbliko ku por yuda bo hala mas serka Dios.

Un okashon pa hala mas serka Yehova. Santiago 4:8 ta animá nos: “Hala serka Dios, i lo e hala serka boso.” Ora nos ta lesa Beibel i siña tokante Yehova su personalidat i trato ku hende, nos ta siña konos’é mihó. Un manera fásil pa bo kuminsá tene adorashon komo famia ta pa laga kada miembro di famia lesa algun versíkulo di Beibel na bos haltu. Kisas boso por usa e programa semanal di e Reunion Nos Bida i Sirbishi Kristian. Despues di e lesamentu, kada miembro di famia por komentá riba loke nan a siña for di e Skritura.

Un okashon pa e famia hala mas serka otro. Tantu esposo komo esposa, tambe mayornan i yunan, ta sera mas ku otro ora nan ta studia Beibel komo famia. Pues, e okashon akí mester ta un tempu agradabel, un dia di siman ku tur hende ta anhelá pa yega. Dependiendo di edat di e yunan, mayornan por trata tópikonan práktiko ku nan por haña den E Toren di Vigilansia òf otro publikashon i tambe riba nos website, jw.org. Boso por papia tokante un problema ku boso yunan a haña nan kuné na skol i kon nan por trata ku esaki. Tambe boso por wak un programa di JW Broadcasting (tv.jw.org) i despues trata esaki huntu komo famia. Ta dushi tambe pa train e kantikanan ku boso lo kanta na e siguiente reunionnan, i despues di e adorashon komo famia boso por kome i bebe algu huntu.

E tempu presioso ku boso ta dediká tur siman na adorá Yehova huntu lo yuda henter e famia haña delisia den e Palabra di Dios, i Yehova lo bendishoná boso esfuersonan rikamente.—Salmo 1:1-3.

• Dikon nos ta dediká tempu na adorashon komo famia?

• Kon mayornan por hasi e okashon akí plasentero pa henter famia?