Dikon e hendenan akí ta asina kontentu? Nan ta na un di nos asambleanan. Yehova a instruí su sirbidónan den pasado pa bini huntu tres biaha pa aña, i meskos ku nan, nos tambe ta anhelá pa reuní den gruponan mas grandi. (Deuteronomio 16:16) Tur aña, nos tin tres di e reunionnan akí: dos asamblea di sirkuito di ún dia i un kongreso regional di tres dia. Kon e reunionnan akí ta benefisiá nos?

Nan ta fortalesé nos hermandat kristian. Meskos ku e israelitanan a alegrá ora nan tabata alabá Yehova na e asambleanan, asina tambe nos ta disfrutá ora nos bini huntu na e okashonnan spesial ei pa adorá Dios. (Salmo 26:12; 111:1) E reunionnan akí ta duna nos oportunidat pa topa ku rumannan di diferente kongregashon òf asta di otro pais. Durante pousa, nos ta kome huntu na e lugá di asamblea, i esei ta hasi e okashonnan spiritual akí mas agradabel ainda, ya ku nos por sera amistatnan nobo. (Echonan 2:42) Na nos asambleanan nos ta mira ku nos mes wowo e amor ku ta uni “henter e hermandat” mundial.—1 Pedro 2:17.

Nan ta yuda nos progresá den sentido spiritual. Algu tambe ku a benefisiá e israelitanan tabata ku nan a “komprondé e palabranan” spliká for di e Skritura. (Nehemías 8:8, 12) Nos tambe ta balorá e instrukshonnan bíbliko ku nos ta haña na nos asambleanan. Kada programa ta basá riba un tema bíbliko. Mediante diskurso, simposio i presentashon interesante nos ta siña kon pa hasi e boluntat di Dios den nos bida. Nos ta sinti nos animá ora nos tende eksperensia di rumannan ku a enfrentá ku éksito e retonan ku un kristian ta haña su mes kuné den e tempu difísil akí. Na kongresonan regional, dramanan den trahe i esenario antiguo ta hasi relatonan bíbliko mas real pa nos i ta siña nos lèsnan práktiko. Na tur asamblea tin oportunidat pa esnan ku ke simbolisá nan dedikashon na Dios batisá.

• Kiko ta hasi nos asambleanan okashonnan gososo?

• Ki benefisio bo por saka for di un asamblea?

Djis promé ku Hesus su morto, el a bisa: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.” (Mateo 24:14) Pero kon nos mester prediká e bon notisia di Reino rònt mundu? Nos mester sigui e ehèmpel ku Hesus a pone tempu ku e tabata riba tera.—Lukas 8:1.

Nos ta purba di haña hende na nan kas. Hesus a siña su disipelnan kon pa prediká e bon notisia di kas pa kas. (Mateo 10:11-13; Echonan 5:42; 20:20) Nan a haña áreanan spesífiko kaminda nan mester a prediká. (Mateo 10:5, 6; 2 Korintionan 10:13) Awe ta meskos. Nos trabou di prediká ta bon organisá i kada kongregashon ta haña un área spesífiko pa kubri. Esaki ta permití nos kumpli ku e mandato di Hesus pa ‘prediká i duna testimonio kabal.’—Echonan 10:42.

Nos ta hasi esfuerso pa bai tur kaminda ku tin hende. Tambe Hesus a pone ehèmpel ora el a prediká na lugánan públiko, manera kantu di laman òf na un pos públiko. (Marko 4:1; Huan 4:5-15) Di igual manera, nos ta probechá di tur oportunidat ku nos haña pa papia ku hende tokante Beibel, entre otro riba kaya, den negoshi, den parke òf asta na telefòn. Ademas, ora nos haña chèns, nos ta prediká na bisiña, kolega di trabou, kompañero di skol i famia. Tur e esfuersonan akí a permití miónes di hende rònt mundu tende ‘e bon nobo di salbashon.’—Salmo 96:2.

Bo por pensa riba un hende ku lo bo ke kompartí e bon notisia di e Reino di Dios kuné i loke esei ta nifiká pa su futuro? E promé chèns ku bo haña, probechá di dje!

• Ki “bon notisia” tin ku ser proklamá?

• Kon Testigunan di Yehova ta imitá Hesus su forma di prediká?

Por lo general, un “pionero” ta un persona ku ta bai padilanti pa eksplorá áreanan i habri kaminda pa otronan. Hesus tabata manera un pionero, pasobra Dios a mand’é na tera pa kumpli ku un sirbishi ku ta duna bida i pa habri e kaminda ku ta hiba na salbashon. (Mateo 20:28) Awe, Hesus su siguidónan ta imit’é, ya ku nan tambe ta dediká mas tantu tempu posibel na e trabou di ‘hasi disipel.’ (Mateo 28:19, 20) Vários di nan a kuminsá ku loke nos ta yama sirbishi di pionero.

Un pionero ta usa gran parti di su tempu pa prediká. Tur Testigu di Yehova ta prediká e bon notisia. Ma algun di nan a organisá nan bida di tal manera ku nan por sirbi komo pionero regular i ta dediká 70 ora pa luna na e trabou di prediká. Pa nan logra esaki, hopi di nan ta buska trabou part-time. Otronan a haña e asignashon pa sirbi komo pionero spesial den áreanan kaminda tin mas nesesidat di proklamadó di Reino, i tur luna nan ta dediká 130 ora òf mas na nan sirbishi. Pioneronan ta satisfecho ku un bida simpel i tin e konfiansa ku Yehova lo perkurá pa nan nesesidatnan material. (Mateo 6:31-33; 1 Timoteo 6:6-8) Esnan ku no por sirbi komo pionero regular òf spesial por traha komo pionero ousiliar ora nan por, oumentando nan aktividat di prediká na 30 òf 50 ora pa luna.

Amor pa Dios i pa hende ta motivá nan. Meskos ku Hesus, awe nos tambe ta mira ku hopi hende ta den un kondishon spiritual deplorabel. (Marko 6:34) Pero nos tin e konosementu ku por yuda nan for di awor, loke por duna nan un fe sólido pa futuro. Amor pa próhimo ta motivá un pionero pa duna generosamente di su tempu i energia pa yuda otro hende spiritualmente. (Mateo 22:39; 1 Tesalonisensenan 2:8) Komo resultado, e pionero su fe ta bira mas fuerte, e ta hala mas serka Dios i ta mas felis.—Echonan 20:35.

• Kiko ta un pionero?

• Kiko ta motivá algun Testigu di Yehova pa usa gran parti di nan tempu pa prediká?