Testigunan di Yehova ta duna hopi importansia na enseñansa teokrátiko. P’esei, nos tin skolnan spesial pa Testigunan di Yehova ku ta dediká gran parti di nan tempu na e trabou di prediká e Reino. E skolnan akí ta yuda nan ‘kumpli ku nan sirbishi kabalmente.’—2 Timoteo 4:5.

Skol di Sirbishi di Pionero. Esaki ta un kurso di seis dia pa pionero regular ku ta tuma lugá na un Salòn di Reino. Un pionero por haña invitashon pa asistí na e skol akí despues ku e tin por lo ménos un aña den sirbishi di tempu kompleto. Meta di e skol ta pa yuda pioneronan hala mas serka Yehova, bira mas efikas den tur aspekto di sirbishi i animá nan pa sigui ku e trabou fielmente.

Skol pa Predikadó di Reino. E kurso akí ta dura dos luna i su meta ta pa train pioneronan eksperensiá ku ta dispuesto pa laga nan kas pa bai sirbi kaminda tin nesesidat. Siguiendo e ehèmpel di e Misionero di mas importante ku a yega di biba aki riba tera, Hesukristu, ta komo si fuera nan ta bisa: “At’ami aki! Manda ami!” (Isaías 6:8; Huan 7:29) Kisas ora nan muda, nan tin ku adaptá nan mes na un nivel di bida mas simpel. Podisé e kultura, klima i kuminda ta totalmente diferente for di loke nan a kustumbrá kuné. Kisas nan tin ku asta siña un otro idioma. E kurso akí ta yuda ruman hòmber i muhé soltero i parehanan kasá, entre 23 i 65 aña, kultivá e kualidatnan spiritual ku ta nesesario pa nan asignashon i desaroyá abilidatnan ku lo kapasitá nan pa sirbi Yehova i su organisashon mas plenamente.

Skol Bíbliko di Galaad di Watchtower. Na hebreo, e palabra “Galaad” tin di haber ku “Testimonio.” For di tempu ku Galaad a ser fundá na 1943, a manda mas ku 8.000 graduado di e skol akí komo misionero kendenan tabatin masha éksito den duna testimonio “te na e parti mas leu di tera.” (Echonan 13:47) Por ehèmpel, ora e promé graduadonan a yega Perú, no tabatin niun kongregashon den e pais. Pero awor tin mas ku 1.000 kongregashon. Tempu nos misioneronan a yega Hapon, tabatin ménos ku dies Testigu den e pais. Awe tin mas ku 200.000 Testigu. E kurso bíbliko di Galaad ku ta dura sinku luna ta inkluí un estudio profundo di e Palabra di Dios. Pioneronan spesial, misioneronan ku ta traha den sirbishi di vèlt, e personanan ku ta traha na sukursal òf ku ta den e trabou di sirkuito ta esnan ku ta ser invitá pa asistí na e skol akí. Nan ta haña un entrenamentu intensivo pa yuda stabilisá i sostené e obra mundial.

• Kiko ta e propósito di e Skol di Sirbishi di Pionero?

• Ken por asistí na e Skol pa Predikadó di Reino?

Den nos organisashon no tin klero ku ta kobra salario. Mas bien, meskos ku tempu e kongregashon kristian a kuminsá, awe tambe superintendentenan kualifiká ta ser nombrá “pa pastoriá e kongregashon di Dios.” (Echonan 20:28) E ansianonan akí ta ruman hòmbernan spiritualmente maduro ku ta dirigí i pastoriá e kongregashon “no obligá, sino di buena gana; no pa amor pa ganashi desonesto, sino ku entusiasmo.” (1 Pedro 5:1-3) Ki sirbishi nan ta rindi pa nos bienestar?

Nan ta kuida nos i ta protehá nos. Ansianonan ta guia e kongregashon i ta yuda proteh’é den sentido spiritual. Nan ta konsiente ku ta Dios a konfia nan ku e tarea importante akí. P’esei, nan no ta manda riba e pueblo di Dios; mas bien, nan ta kontribuí na nos bienestar i goso. (2 Korintionan 1:24) Meskos ku un wardadó di karné ta kuida kada un di su karnénan, asina tambe ansianonan ta purba di konosé i mustra interes den kada un di e miembronan di e kongregashon.—Proverbionan 27:23.

Nan ta siña nos kon pa hasi e boluntat di Dios. Tur siman e ansianonan ta dirigí e reunionnan di kongregashon pa asina fortalesé nos fe. (Echonan 15:32) Ademas, e rumannan dediká akí ta dirigí e aktividat di prediká; nan ta traha ku nos i ta entrená nos den tur aspekto di sirbishi.

Nan ta duna nos animashon personal. Pa e ansianonan di nos kongregashon por duna kada un di nos e yudansa spiritual i e konsuelo ku nos tin mester for di e Palabra di Dios, nan ta bishitá nos na nos kas òf ta papia ku nos na Salòn di Reino.—Santiago 5:14, 15.

Aparte di nan trabou den e kongregashon, mayoria di ansiano tin tambe nan trabou i responsabilidatnan di famia ku ta eksigí tempu i atenshon di nan. E ruman hòmbernan diligente akí meresé nos rèspèt.—1 Tesalonisensenan 5:12, 13.

• Kiko ta tarea di un ansiano di kongregashon?

• Kon ansianonan ta mustra interes personal den nos?

Beibel ta papia di dos grupo di hòmber kristian ku ta perkurá pa e responsabilidatnan di kongregashon: ‘superintendente i sirbidó ministerial.’ (Filipensenan 1:1) Generalmente, den kada kongregashon tin ansiano i sirbidó ministerial. Ki trabou sirbidónan ministerial ta hasi pa nos bienestar?

Nan ta yuda e kuerpo di ansiano. Sirbidónan ministerial ta ruman hòmbernan spiritualmente fuerte, konfiabel i diligente. Algun di nan ta yòn; otronan tin mas edat. Nan ta perkurá pa diferente tarea importante di karakter atministrativo i organisatorio ku tin di haber ku e kongregashon. Esaki ta permití ansianonan enfoká riba nan responsabilidat di siña i pastoriá e kongregashon.

Nan ta duna yudansa práktiko. Algun sirbidó ministerial tin e tarea pa yama tur hende ku asistí na reunion bon biní. Otronan ta atendé ku ekipo di zonido, literatura, kuenta di kongregashon i teritorio pa prediká. Nan ta yuda tambe den mantenshon di e Salòn di Reino. E ansianonan por pidi nan pa yuda rumannan di edat. Sirbidónan ministerial ta dispuesto pa hasi tur tarea ku nan risibí, i e kongregashon ta respetá nan pa nan trabou diligente i nan bon aktitut.—1 Timoteo 3:13.

Nan ta pone bon ehèmpel komo hòmbernan kristian. Ta nombra ruman hòmber komo sirbidó ministerial a base di nan bon kualidatnan kristian. Nan partinan na reunion ta fortalesé nos fe. E manera ku nan ta guia nos den sirbishi ta duna nos mas entusiasmo. Nan bon kooperashon ku e kuerpo di ansiano ta promové goso i union. (Efesionan 4:16) Ku tempu, nan tambe por kualifiká pa sirbi komo ansiano.

• Ki tipo di ruman hòmber sirbidónan ministerial ta?

• Kon e sirbidónan ta yuda kosnan kana bon den kongregashon?