E Skritura Griego Kristian ta menshoná Bárnabas i apòstel Pablo vários biaha. E dos hòmbernan akí tabata sirbi komo superintendente biahero ku tabata bishitá e kongregashonnan di promé siglo. Pa ki motibu? Nan tabatin e bienestar di nan rumannan spiritual na pechu. Pablo a bisa ku e kier a ‘bai bèk i bishitá e rumannan’ pa wak kon a sigui ku nan. E tabata dispuesto pa biaha sientos di kilometer pa e por a bai fortalesé nan. (Echonan 15:36) Awe, nos superintendentenan biahero tin e mesun deseo.

Nan ta bini pa animá nos. Kada superintendente di sirkuito ta bishitá mas o ménos 20 kongregashon dos biaha pa aña; e ta dediká un siman na kada kongregashon. Nos por siña hopi for di e rumannan akí i, si nan ta kasá, di nan esposa tambe. Nan ta hasi esfuerso pa konosé tantu mucha komo hende grandi, i ku entusiasmo nan ta kompañá nos den sirbishi i na estudionan di Beibel. E superintendentenan akí ta hasi bishita di pastoreo ku e ansianonan. Anto e diskursonan ku nan ta duna na reunion- i asambleanan ta animá nos i fortalesé nos.—Echonan 15:35.

Nan ta mustra interes den nos tur. Superintendentenan di sirkuito ta masha interesá den e kondishon spiritual di e kongregashonnan. Nan ta reuní ku e ansiano- i sirbidónan ministerial pa analisá den ki área e kongregashon a progresá i pa duna nan konseho práktiko ku por yuda nan kumpli ku nan responsabilidatnan. Tambe nan ta siña e pioneronan kon nan por haña bon resultado den sirbishi. Ademas, nan ta keda kontentu pa sera konosí ku personanan ku a kuminsá asistí na reunion i pa tende di nan progreso spiritual. Kada un di e superintendentenan biahero akí ta duna di nan mes boluntariamente komo ‘kolaboradó ku ta sirbi na nos interes.’ (2 Korintionan 8:23) Nos mester imitá nan fe i nan deboshon na Dios.—Hebreonan 13:7.

• Ku ki meta superintendentenan di sirkuito ta bishitá e kongregashonnan?

• Kon bo por benefisiá di nan bishita?

Ora un desaster tuma lugá, mesora Testigunan di Yehova ta dal paso pa yuda nan rumannan ku keda afektá. Tal esfuersonan ta demostrá e berdadero amor ku nos tin pa otro. (Huan 13:34, 35; 1 Huan 3:17, 18) Den ki forma nos ta yuda?

Nos ta duna yudansa finansiero. Den promé siglo, ora un hamber grandi a dal Hudea, e kristiannan na Antiokia a manda sèn pa yuda nan rumannan spiritual. (Echonan 11:27-30) Awe tambe, asina ku nos haña sa ku nos rumannan na sierto parti di mundu ta den difikultat, nos ta manda donashon via nos kongregashon pa duna yudansa material na esnan ku ta den gran nesesidat.—2 Korintionan 8:13-15.

Nos ta duna yudansa práktiko. Ansianonan ku ta na e lugá di desaster ta hasi esfuerso pa sa paradero di kada miembro di nan kongregashon i pa hasi sigur ku nan ta sano i salvo. Un komité di yudansa ta koordiná suministro di kuminda, awa di bebe, paña, lugá pa keda i yudansa médiko. Hopi Testigu ku tin sierto fishi ta bai yuda boluntariamente riba nan propio gastu. Nan ta duna un man den e trabounan di ousilio òf ta yuda drecha kasnan i Salònnan di Reino ku a sufri daño. E union ku tin den nos organisashon i e eksperensia ku nos a gana trahando komo ekipo ta permití nos mobilisá lihé ora mester duna yudansa. Aunke nos meta ta pa yuda “nos rumannan den fe,” ora ta posibel, nos ta yuda otro hende tambe sin importá di kua religion nan ta.—Galationan 6:10.

Nos ta duna konsuelo for di e Skritura i sosten emoshonal. Loke víktima di desaster tin mas mester di dje ta konsuelo. Den situashonnan asina nos ta haña fortalesa for di Yehova, e “Dios di tur konsuelo.” (2 Korintionan 1:3, 4) Gustosamente nos ta kompartí e promesanan di Beibel ku esnan ku ta den angustia. Nos ta duna nan e siguransa ku pronto e Reino di Dios lo pone fin na tur tragedia ku ta kousa doló i sufrimentu.—Revelashon 21:4.

• Kiko ta permití Testigunan mobilisá mesora pa yuda na momento di desaster?

• Ki konsuelo for di e Skritura nos por duna e sobrebibientenan?

Poko promé ku Hesus su morto, e tabatin un kòmbersashon ku kuater di su disipelnan—Pedro, Santiago, Huan i Andres. Ora e tabata papia di e señal di su presensia den e último dianan, el a hasi nan un pregunta masha importante: “Ken realmente ta e esklabo fiel i prudente ku su Doño a nombra riba su sirbidónan di kas pa duna nan nan kuminda na e debido tempu?” (Mateo 24:3, 45; Marko 13:3, 4) Hesus a duna su disipelnan e siguransa ku e, komo nan “Doño,” lo a nombra un grupo di hende ku lo a perkurá un suministro konstante di kuminda spiritual pa su siguidónan durante e tempu di fin. Ken lo a forma e esklabo akí?

E ta un grupo chikitu di siguidónan ungí di Hesus. E “esklabo” ta ser identifiká komo e Kuerpo Gobernante di Testigunan di Yehova. E ta perkurá kuminda spiritual na ora pa e pueblo di Yehova. Nos ta dependé di e esklabo fiel akí pa sigui haña “sufisiente kuminda na e debido tempu.”—Lukas 12:42.

E ta manehá e kas di Dios. (1 Timoteo 3:15) Hesus a duna e esklabo akí e gran responsabilidat di manehá Yehova su organisashon riba tera. Esei ta enserá kuida e propiedatnan material di e organisashon, dirigí e aktividat di prediká i siña nos pa medio di nos kongregashonnan. Pa “e esklabo fiel i prudente” por duna nos e kuminda spiritual ku nos tin mester, na e ora ku nos tin mester di dje, e ta distribuí esaki pa medio di e publikashonnan ku nos ta usa den sirbishi i tambe pa medio di e programanan ku nos ta haña na nos reunionnan i nos asambleanan.

E esklabo akí ta fiel na e bèrdatnan di Beibel i na e enkargo ku el a haña pa prediká e bon notisia. I e ta prudente den e manera sabí ku e ta kuida e interesnan di Kristu riba tera. (Echonan 10:42) Yehova ta bendishoná e esfuersonan di e esklabo akí ku oumento i tambe un abundansia di kuminda spiritual.—Isaías 60:22; 65:13.

• Ken Hesus a nombra pa alimentá su disipelnan spiritualmente?

• Den ki sentido e esklabo ta fiel i prudente?