Den promé siglo, un grupo chikí ku a konsistí di “e apòstelnan i e ansianonan na Herúsalèm” a fungi komo un kuerpo gobernante, esta, un direktiva ku a tuma desishonnan importante na interes di henter e kongregashon di kristian ungí. (Echonan 15:2) Pa nan por a yega na un desishon unánime, nan mester a konsiderá loke e Skritura ta bisa i sigui e guia di spiritu santu. (Echonan 15:25) Awe nos ta mira algu similar.

Dios ta usa e kuerpo akí pa hasi Su boluntat. E ruman hòmbernan ungí ku ta forma parti di e Kuerpo Gobernante tin gran interes den e Palabra di Dios. Ademas, nan tin hopi eksperensia riba e tereno di organisá e trabou di prediká i den trata asuntunan spiritual. Nan ta reuní tur siman pa konsiderá e nesesidatnan di e hermandat mundial. Meskos ku den promé siglo, nan ta duna instrukshon basá riba Beibel via karta, superintendente biahero i otro medionan. Esaki ta yuda e pueblo di Dios pensa i aktua na un manera uní. (Echonan 16:4, 5) E Kuerpo Gobernante ta supervisá preparashon di kuminda spiritual, ta animá tur ruman pa duna prioridat na e trabou di prediká e Reino i ta supervisá nombramentu di ruman hòmber den posishon di responsabilidat.

E ta sigui guia di spiritu santu. E Kuerpo Gobernante ta sigui e guia di Yehova, e Soberano di Universo, i Hesus, Kabes di e kongregashon kristian. (1 Korintionan 11:3; Efesionan 5:23) Miembronan di e kuerpo akí no ta mira nan mes komo lider di e pueblo di Dios. Mas bien, meskos ku tur otro kristian ungí, nan ta “sigui e Lamchi [Hesus] unda ku e bai.” (Revelashon 14:4) E Kuerpo Gobernante ta apresiá mashá e orashonnan ku nos ta hasi pa nan i pa nan trabou.

• Ken a forma parti di e kuerpo gobernante di promé siglo?

• Kon e Kuerpo Gobernante djawe ta buska e guia di Dios?

Bètel ta un nòmber hebreo ku ta nifiká “Kas di Dios.” (Génesis 28:17, 19) E ta un nòmber apropiá pa e komplehonan ku Testigunan di Yehova a establesé rònt mundu for di unda nan ta dirigí i sostené e trabou di prediká. E Kuerpo Gobernante ta sirbi na e sede mundial ku ta keda den e Estado di New York, Merka. For di einan e direktiva akí ta supervisá aktividat di e sukursalnan ku tin den vários pais. E rumannan ku ta sirbi na e komplehonan akí ta manera un famia, e asina yamá famia di Bètel. Manera un famia uní, nan ta biba i traha huntu, nan ta kome huntu i nan ta studia Beibel huntu.—Salmo 133:1.

Un lugá úniko kaminda miembronan di e famia ta duna di nan mes. Na tur Bètel tin hòmber- i muhénan kristian ku a dediká nan mes pa hasi e boluntat di Dios i pa sirbi interesnan di Reino fultaim. (Mateo 6:33) Niun di nan no ta haña salario, pero sí nan ta haña un lugá di biba, kuminda i un zakgeld pa yuda nan ku nan gastunan personal. Tur e rumannan ku ta sirbi na Bètel tin un asignashon, sea den ofisina, kushina òf komedor. Algun ta sirbi den e departamento di imprimí i enkuaderná literatura, e departamento di limpiesa, di labanderia, di mantenshon òf otro departamento.

Un lugá aktivo ku ta apoyá e aktividat di prediká e Reino. E meta prinsipal di kada Bètel ta pa yuda mas tantu hende posibel konosé e bèrdatnan di Beibel. E foyeto akí mes ta un bon ehèmpel di esei. A skirbié bou di supervishon di e Kuerpo Gobernante. Despues a mand’é elektrónikamente na sientos di tim di tradukshon rònt mundu, pa despues imprimié riba ekipo di alta velosidat na diferente drùkerei di Bètel. Finalmente, a mand’é na e mas di 110.000 kongregashonnan. Durante kada parti di e proseso akí, e famianan di Bètel ta duna nan apoyo indispensabel na e tarea di mas urgente ku nos tin awe, esta, di prediká e bon notisia.—Marko 13:10.

• Ken ta sirbi na Bètel, i kon nos organisashon ta perkurá pa nan?

• Ki trabou urgente tur Bètel ta apoyá?

Miembronan di e famia di Bètel ta sirbi den diferente departamento, sosteniendo asina e aktividat di prediká den un òf vários pais. Nan ta traha den tim di tradukshon, ta imprimí revista, enkuaderná buki, distribuí literatura, produsí material oudio/vidio òf atendé otro asuntunan di e teritorio ku nan ta sirbi.

Un Komité di Sukursal ta supervisá e aktividat. E Kuerpo Gobernante ta nombra na kada sukursal tres òf mas ansiano kualifiká pa sirbi komo un Komité di Sukursal. E komité akí ta responsabel pa e bon funshonamentu di e sukursal. Tambe nan mester tene e Kuerpo Gobernante na haltura di e progreso di e trabou di prediká i di kualke problema ku por surgi den e pais òf paisnan ku ta forma parti di e teritorio ku nan ta supervisá. E informenan akí ta yuda e Kuerpo Gobernante disidí ki tópiko ta bon pa trata den futuro publikashonnan i tambe na reunion- i asambleanan. Regularmente e Kuerpo Gobernante ta manda su representante pa bishitá e sukursalnan i duna e Komiténan di Sukursal e guia nesesario pa nan por kumpli ku nan tareanan. (Proverbionan 11:14) Komo parti di un programa spesial, e representante di sede mundial ta duna un diskurso pa animá esnan ku ta biba den e teritorio di e sukursal.

E ta duna yudansa na e kongregashonnan lokal. Ruman hòmbernan responsabel na e sukursal ta aprobá formashon di kongregashon nobo. Tambe nan ta dirigí aktividat di pionero, misionero i superintendente di sirkuito ku ta sirbi den e teritorio di e sukursal. Ademas, e komité ta organisá asamblea i kongreso, koordiná konstrukshon di Salòn di Reino nobo i perkurá pa kada kongregashon haña literatura pa nan mes i pa nan traha kuné. Tur loke ta tuma lugá na un sukursal ta yuda kumpli ku e meta di prediká e bon notisia na un manera ordená.—1 Korintionan 14:33, 40.

• Kon un Komité di Sukursal ta yuda e Kuerpo Gobernante?

• Kiko ta e responsabilidatnan di un sukursal?