Pará na Drempel di Mayor Actividad

“NO TABATIN spiritu di competencia. Tur hende tabata kier pa tur sobrá caba cu exito.” Asina Richard cu Lusia a describí nan coleganan dje di 105 klas dje Scol Bíblico di Galad di Watchtower. “Nos cada un ta mashá diferente for di otro, pero pa nos, cada alumno ta precioso.” Un colega di klas, Lowell, a bai di acuerdo, i a agregá: “Nos diferencianan a atraé nos na otro.”

E klas, cu a gradua dia 12 di september 1998, tabata sumamente variá. Algun dje alumnonan a traha como pionero den áreanan caminda tin un necesidad grandi pa publicadónan di Reino; otronan a sirbi fielmente mas cerca di cas. Algun di nan, manera Mats cu Rose-Marie, mester a traha duru pa hopi tempu pa mehorá nan ingles promé cu nan a bini e scol. Vários dje alumnonan a pensa riba e sirbishi di misionero for di tempu nan tabata mucha. Un pareha a aplicá 12 biaha; esta contentu nan a keda di ricibí invitacion pa e di 105 klas!

E binti simannan di entrenamentu intensivo a pasa muchu lihé. Promé cu e alumnonan por a kere, ya nan a entregá nan último tarea skirbí, a duna nan último relato oral, i e dia di graduacion a yega.

Presidente dje programa, Albert Schroeder, miembro dje Cuerpo Gobernante di Testigonan di Jehova, a corda e klas cu nan tabata “pará na drempel di mayor actividad den e campo di educacion bíblico,” siguiendo mas cu 7.000 otronan cu a bai Galad promé cu nan. El a remarcá cu durante zomer, e alumnonan a gosa di e oportunidad único di asociá cu algun misionero cu tin hopi tempu den e trabou, ora cu e últimonan aki a bishitá e oficina central na ocasion dje congresonan internacional.

Despues, Ruman Schroeder a introducí Max Larson, di Comité di Operacion di Betel. El a desaroyá e tema “Educacion cu Ta Hiba na Bida Eterno.” Ruman Larson a cita Proverbionan 1:5, cu ta bisa: “Un persona sabí lo scucha i ricibí mas instruccion, i un homber di comprendimentu ta esun cu ta adkerí direccion apto.” Aptitud ta necesario pa ser un misionero eficas. Hende apto ta para dilanti rey. (Proverbionan 22:29) Despues di a ricibí instruccion cincu luna largu, e alumnonan ta bon ekipá pa representá e Reynan mas haltu cu tin, Jehova Dios i Cristo Jesus.

Despues, David Olson, di Departamento di Sirbishi, a papia riba e tema: “Yuda Haci Jehova Su Curason Alegrá.” El a puntra: “Kico hende imperfecto por haci pa pone Jehova su curason alegrá?” Kico ta e contesta? Nan por sirbié cu fieldad, lealtad i goso. Jehova kier pa su pueblo disfrutá di nan sirbishi na dje. Ora nos haci Dios su boluntad cu goso, nos ta alegrá su curason. (Proverbionan 27:11) Ruman Olson a lesa un carta di un pareha misionero cu a gradua na Galad den e di 104 klas. Nan ta disfrutá di nan asignacion nobo? Wel, tocante nan congregacion, nan a skirbi: “Nos tin como 140 publicadó, cu un asistencia promedio na reunion di 250 pa 300 persona. Sirbishi di veld ta e cos mas dushi. Nos tur dos tin cuater studio, i algun di nan ta biniendo reunion caba.”

Lyman Swingle, di Cuerpo Gobernante, a papia riba e tópico: “Un Tempu pa Para Ketu i Repasá Bo Bendicionnan.” E entrenamentu di Galad a trece hopi bendicion. El a yuda e alumnonan su conocimentu aumentá, haci nan aprecio pa Jehova su organisacion crece, i yuda nan cultivá cualidadnan esencial manera humildad. Ruman Swingle a bisa: “E echo di bini aki, anto pasa tempu scuchando instruccion, ta un experencia cu ta siña bo ser humilde.” Anto el a agregá: “Boso ta sali for djaki mihó ekipá pa engrandesé Jehova.”

“Boso Goso Ta Asina Grandi—Pakico Preocupá Anto?” tabata título di un discurso di Daniel Sydlik, cu tambe ta dje Cuerpo Gobernante. Ora cu problema lanta cabes, busca guia den Scritura, ta loke el a urgi nan pa haci. Ruman Sydlik a usa algun versículo selectá for di capítulo 6 di Mateo pa ilustrá con pa haci esei. Falta di fe por pone nos preocupá tocante cos di tur dia manera cuminda i paña. Sin embargo, Jehova sa loke nos tin mester. (Mateo 6:25, 30) Si nos preocupá, esei lo solamente agregá un dolor mas na tur e dificultadnan cu cada dia ta trece cuné caba. (Mateo 6:34) Di otro banda, cierto planeamentu ta necesario sí. (Compará cu Lucas 14:28.) Ruman Sydlik a splica: “Loke Jesus ta prohibí no ta di pensa sabiamente tocante futuro, sino di preocupá tocante dje na moda bobo. Accion ta un dje mihó remedinan pa ansiedad. Ora nos cuminsá sinti ansha, lo ta bon pa nos cuminsá papia tocante e berdad.”

Conseho di Despedida Cerca e Instructornan

Siguientemente tabatin discursonan na encargo di tres miembro dje staf di Galad. Karl Adams a papia promé, riba e tema: “Kico Lo Bo Paga Jehova?” Su discurso tabata basá riba Salmo 116, cu lo por ta esun cu Jesus a canta riba e anochi promé cu su morto. (Mateo 26:30, nota) Kico a pasa den Jesus su mente ora cu e tabata canta e palabranan: “Kico lo mi paga Jehova pa tur su beneficionan pa mi”? (Salmo 116:12) Por ta cu el a refleccioná riba e curpa perfecto cu Jehova a prepará p’e. (Hebreonan 10:5) Su siguiente dia e tabata bai ofrecé e curpa ei como sacrificio, i asina mustra e profundidad di su amor. E alumnonan dje di 105 klas a purba Jehova su bondad durante e último cincu lunanan. Awor nan lo bai mustra nan amor pa Dios trahando duru den nan asignacionnan di misionero.

Mark Noumair, e di dos instructor di Galad cu a papia, a consehá e alumnonan pa “Sigui Haci Loke Ta Bon.” Despues cu nan a bend’é como catibu na Egipto, Jozef a soportá 13 aña di trato inhustu. El a laga e cosnan malu cu otro hende a cometé, strob’é? No, el a sigui haci loke ta bon. Anto despues, na Dios su tempu señalá, Jozef a keda librá for di su pruebanan. Di ripiente el a sali for di un prizon, bai biba den un palacio. (Génesis, capítulonan 37-50) E instructor a puntra su alumnonan:“Si boso expectativanan no bira realidad den boso asignacion di misionero, boso lo entregá? Boso lo sucumbí na desconsuelo? Of boso lo wanta manera Jozef?”

Na final, e secretario di Galad, Wallace Liverance, a guia un consideracion animá cu miembronan dje klas, riba e tema “Anunciá e Rey i e Reino.” Algun dje alumnonan a relatá experencianan cu nan tabatin, trahando di cas pa cas, di negoshi pa negoshi i riba kaya. Algun otro a conta con nan ta haci predicá na hende di otro idioma. Otronan a mustra con pa predicá na hende di diferente antecedente religioso. Tur e graduadonan tabata ansioso pa haci nan parti cabalmente den e campo di misionero.

Misioneronan Experenciá i Felis

E siguiente parti, titulá “E Resultadonan Gososo di Sirbishi di Misionero,” a keda presentá dor di Robert Wallen. El a consistí di entrevista cu cuater ruman di staf di e oficina central, cu recientemente tabatin asociacion edificante cu misioneronan experenciá. E misioneronan ei no a duda pa admití cu no tabata fácil pa nan a siña un idioma nobo, ni pa nan a adaptá na un otro cultura of un otro clima. Anto no lubidá e heimwee cu nan mester a siña trata cuné. Na algun ocasion nan mester a enfrentá problema di salú tambe. Pero, semper e misioneronan a mantené un actitud positivo, i nan perseverancia a ser bendicioná. Algun a siña un cantidad di hende conocé Jehova. Otronan a contribuí den vários manera n’e crecementu general dje trabou di Reino den nan pais.

E último ruman na palabra tabata Carey Barber, miembro di Cuerpo Gobernante. El a repasá algun punto sobresaliente cu tabatin riba programa dje congreso “Dios Su Caminda di Bida.” El a puntra su auditorio: “Ki efecto e programa di congreso tabatin riba bo relacion cu Jehova?” E orador a mustra e contraste cu tin entre e resultadonan felis di sigui Dios su caminda, i e fin desastroso di esnan cu ta sigui e caminda di mundu. Refiriendo na Moises su transgresion na Meriba, el a spierta: “Asta despues cu un persona a sirbi fielmente pa hopi aña, Jehova no ta minimisá ni sikiera un infraccion chikitu di Su leynan hustu.” (Númeronan 20:2-13) Mare cu tur Dios su sirbidónan, unda cu nan ta, por keda gara duru na nan privilegionan precioso di sirbishi!

E ora ei a yega tempu pa e alumnonan ricibí nan diploma. Despues un representante dje klas a lesa un carta di aprecio pa e entrenamentu cu e alumnonan a ricibí. Despues di cera cu un cantica i un oracion sincero, e programa di graduacion a finalisá. Pero pa e di 105 klas esaki tabata djis un comienso, pasobra e misioneronan nobo tabata “pará na drempel di mayor actividad.”

[Kuadro na página 23]

Estadísticanan dje Klas

Cantidad di pais representá: 9

Cantidad di pais na cua a asigná nan: 17

Cantidad di alumno: 48

Cantidad di pareha casá: 24

Edad promedio: 33

Promedio di aña den e berdad: 16

Promedio di aña den e ministerio di tempu completo: 12

[Kuadro na página 24]

Nan A Scoge Sirbishi di Tempu Completo

“Tempu mi tabata mas hóben mi no tabatin plan pa traha pionero,” segun Ben, un graduado dje di 105 klas. E ta agregá: “Mi tabata pensa cu ta esnan cu abilidad special i circunstancia ideal so por a traha pionero. Pero mi a siña stima sirbishi di veld sí. Anto un dia mi a cai ariba cu ser un pionero kier men simplemente participá mas plenamente den e ministerio. Ta n’e momento ei mi a realisá cu lo mi por a traha pionero.”

Lusia ta relatá lo siguiente: “Na mi cas semper nos a apreciá ministernan di tempu completo masha tantu.” E ta corda con cada bes cu misioneronan tabata bini di bishita, un ola di entusiasmo tabata lanta den su congregacion. E ta conta: “Segun cu mi tabata crece, tur hende a asumí cu sirbishi di tempu completo lo ta den mi plannan.”

Theodis su mama a muri ora cu e tabatin 15 aña. E ta conta: “E congregacion a apoyá mi masha bon den e temporada ei. P’esei, mi a puntra mi mes: ‘Kico mi por haci pa mustra mi aprecio?’” Dor di esei el a drenta sirbishi di tempu completo, i awor den e trabou di misionero.

[Plachi na página 25]

E di 105 Klas di Graduadonan dje Scol Bíblico di Galad di Watchtower

Den e lista aki bou, e rijnan ta numerá di dilanti bai patras, i e nombernan ta bai di robes pa drechi den cada rij

(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.