E poder di un palabra di bondad

“Cuanto un palabra di bondad por refresca un curazón doblá cu ansiedad!”​—⁠Proverbio 12:​25, Knox.

HENDE cristian no tin proteccion completo contra calamidad. Tin bez cu nan ta experimenta ansiedad pa motibo cu nos ta biba den “tempo crítico duro pa trata cuné.”​—⁠2 Timoteo 3:⁠1.

Ora nos ta sufri di tal calamidad, ta ki un bendicion pa tende palabra di bondad di un amigo leal! Segun e Bijbel, “Un berdadero compañé ta stima tur ora, i ta un ruman cu a nace pe tempo ora cu tin afliccion.” (Proverbio 17:17) Job, e homber di fe, tabata conocí como tal clase di amigo. Asta Elifaz a bisa di dje: “Ora un hende a trompica, tabata swak i cansá, bo palabra a animé pa para firme.”​—⁠Job 4:​4, Today’s English Version.

Sin embargo, ora Job mes tabatin mester di animacion, Elifaz i compañé di dje no a duné palabra di bondad. Nan a culpa Job pa su calamidad, indicando cu e mester tabatin falta secreto. (Job 4:⁠8) The Interpreter’s Bible ta comenta: “Loke Job a falta tabata e compasion di un curazón humano. Loke el a recibi tabata un serie di frase religioso comun i expresion moral bieu, absolutamente ‘berdadero’ i absolutamente bonita.” Job a keda asina molestiá ora el a tende e papiamento di Elifaz i su compañénan cu el a keda obligá di sclama: “Pa cuanto tempo boso lo sigi irrita mi alma i sigi aplastámi cu palabra?”​—⁠Job 19:⁠2.

Nos nunca mester haci otro sirbidor di Dios sclama den afliccion pa causa di nos palabra imprudente i bruto. (Compara cu Deuteronomio 24:15.) Un proverbio bíblico ta adverti: “Loke bo ta bisa por conserba bida of destruyé; pues, bo tin cu acepta e consecuencia di bo palabra.”​—⁠Proverbio 18:​21, TEV.

Reconociendo e poder di nos papiamento, láganos sigi ehempel di apóstol Pablo. Ora e tabata den Macedonia, el a “anima esnan ei cu hopi palabra.”​—⁠Echo 20:⁠2.