Triunfando Riba Satanas i Su Obranan
“P’esei, someté boso mes na Dios; pero oponé e Diabel, i lo e hui di boso.”—SANTIAGO 4:7.
1. Con “e man dje malbado” a afectá humanidad awe?
JOB a declará corectamente: “E tera mes a ser duná den man dje malbado.” (Job 9:24) I awor nos ta enfrentá e tempu di mas crítico den tur historia humano. Pakico? Pasobra esakinan ta “e último dianan” di Satanas su dominio demoniaco dje tera. Nada straño cu, bou di instigacion di Satanas, ‘mal hende i gañadornan ta bayendo di malu pa pió, engañando i siendo engañá.’ (2 Timoteo 3:1, 13) Ademas, persecucion, inhusticia, crueldad, crímen, dificultad económico, malesa crónico, dolor di behes, depresion emocional—esakinan i mas por tin un efecto masha penoso i desanimador riba nos.
2. Con nos por enfrentá e atakenan di Satanas awe?
2 E gran adversario, Satanas e Diabel, ta lansando un atake concentrá riba humanidad i riba berdadero adoradornan di Dios en particular. Su meta ta pa haci tur potencial wardador di integridad bira contra Dios i causa nan ruina huntu cuné i su angelnan demoniaco. Sin embargo, nos tin e siguransa cu si nos wanta den integridad, e Diabel lo hui for di nos. Mescos cu Jesus, nos por ‘siña obedencia’ na Dios mediante e cosnan cu nos ta sufri i mediante Su bondad inmerecí, nos por alcansá bida eterno.—Hebreo 5:7, 8; Santiago 4:7; 1 Pedro 5:8-10.
3, 4. (a) Ki pruebanan externo Pablo tabatin cu lucha cuné? (b) Kico tabata Pablo su preocupacion como un anciano cristian?
3 Apostel Pablo tambe a ser probá den hopi manera. Declarando su credencialnan como un minister di Cristo, el a skirbi: “Mi ta unu mas sobresalientemente: den labor mas abundantemente, den prizon mas abundantemente, den golpi, cu exceso, cerca di morto hopi bes. Dje hudiunan cincu bes mi a ricibí cuarenta golpi ménos un, tres bes mi a ser sutá cu bara, un biaha mi a ser piedrá, tres bes mi a experenciá naufragio, mi a pasa un dia i un anochi den profundidad; den biahamentu hopi bes, den peliger di riu, den peliger di salteador, den peliger di mi mes rasa, den peliger dje nacionnan, den peliger den stad, den peliger den mondi, den peliger riba laman, den peliger entre rumannan falsu, den labor i afan, den anochinan sin drumi hopi bes, den hamber i sed, den abstinencia di cuminda hopi bes, den friu i desnudes.
4 “Ademas dje cosnan ei di un carácter externo, tin loke ta basha riba mi dia tras dia, e ansiedad pa tur e congregacionnan. Ken ta débil, i ami no ta débil? Ken ta ser trompecá, i ami no ta consumí?” (2 Corintio 11:23-29) Pues, Pablo a warda integridad ora el a enfrentá persecucion i prueba for di pafó, i como un anciano cristian, e tabata profundamente preocupá pa fortalecé e rumannan mas débil den e congregacion, yudando nan pa warda integridad. Ki un ehempel excelente pa ancianonan cristian awe!
Integridad Bou di Persecucion
5. Kico ta e solucion pa persecucion directo?
5 Ki inventonan Satanas ta usa pa kibra integridad? Manera a ser indicá ariba, un di Satanas su strategianan di mas malicioso ta persecucion directo, pero tin un solucion. Efesio 6:10, 11 ta consehá nos: “Sigui adkirí poder den Señor i den e potencia di su fortalesa. Bisti e armadura completo cu ta bini di Dios pa boso por para firme contra e trikinan [of, “obranan mañoso,” nota] dje Diabel.”
6. Con por ser mustrá cu Testigonan di Jehova a sali “completamente victorioso” for dje lucha?
6 Hopi biaha, durante e último dianan aki, Testigonan di Jehova tabatin cu lucha cu pruebanan. Pues, nos por bisa huntu cu Pablo: “Den tur e cosnan aki nos ta sali for dje lucha completamente victorioso mediante esun cu a stima nos.” (Romano 8:37) Esaki ta ser probá dor dje registro di integridad di Testigonan di Jehova den e camponan di concentracion di Alemania, Austria, Polonia i Yugoslavia durante e era nazista entre 1933 i 1945, bou dje opresion comunista na Europa Oriental entre 1945 i 1989, i durante e persecucionnan cu a afligí partinan di Africa i Latino América den añanan mas reciente.
7. Ki ehempelnan conmovedor di integridad ta ser informá for di Etiopia?
7 E Testigonan di Jehova na Etiopia a proveé un ehempel conmovedor di integridad entre 1974 i 1991. Un di e capturadornan incliná políticamente a bisa un ruman homber encarcelá: “Lo ta mihó pa libra e leonnan for di e parke zoológico cu laga boso sali liber atrobe!” E persiguidornan cruel aki a torturá Jehova su sirbidornan, i despues di vários aña un corte di apelacion a ordená pa ehecutá nan. E cadaver di un ruman a ser exhibí públicamente como un ehempel spiertador. Otro rumannan cu a apelá e sentencia di morto a ser librá dor di un corte mas liberal, i algun dje ‘vencedornan’ fiel aki tabatin partinan den e programa n’e Congreso di Distrito “Siñansa Divino” na Addis Ababa na principio di 1994.a—Juan 16:33; compará cu 1 Corintio 4:9.
8. Con Satanas a purba saca probecho di “purificacion étnico”?
8 Satanas a faya den kibra e integridad dje rumannan leal ei dor di atake frontal directo. Pues, ki otro obranan mañoso e ta usa? Revelacion 12:12 ta bisa dje último dianan aki: “Ai dje tera i dje laman, pasobra e Diabel a baha cerca boso, masha rabiá, sabiendo cu ta ked’é poco tempu mas.” Dor cu el a faya pa eliminá Dios su pueblo leal mediante persecucion, den su rabia e ta trata na masacrá poblacionnan henter, sin duda cu e intencion di destruí Jehova su pueblo huntu cu e resto dje poblacion. E asina yamá purificacion étnico a ser efectuá den partinan di ex-Yugoslavia, i exterminacion di rasa a ser intentá na Liberia, Burundi i Ruanda.
9. Pakico Satanas su tácticanan ta faya hopi biaha? Duna ehempel.
9 Sin embargo, hopi biaha Satanas su tácticanan tin un efecto contraproducente riba dje, pasobra afliccion satánico ta haci hende onrado realisá cu nan único speransa ta basá riba e Reino di Dios, cua ta ser proclamá celosamente dor di Testigonan di Jehova. (Mateo 12:21) En berdad, esnan interesá ta basha bin n’e Reino! Por ehempel, na Bosnia i Herzegovina, afligí pa conflictonan, n’e celebracion di Memorial dje morto di Jesus dia 26 di mart, 1994, 1.307 persona a asistí, 291 mas cu e aña anterior. Asistencianan máximo a ser registrá na Sarajevo (414), Zenica (223), Tuzla (339), Banja Luka (255), i otro pueblonan. N’e pais bisiña Croatia tabatin un máximo nobo den asistencia di 8.326 persona. E violencia cu ta tumando lugá rond di nan no a prevení e Testigonan di Jehova den e paisnan ei di obedecé e mandamentu pa “sigui proclamá e morto di Señor, te ora e yega.”—1 Corintio 11:26.
Na Ruanda Afligí pa Conflicto
10, 11. (a) Kico a sosodé den e pais supuestamente cristian di Ruanda? (b) Con fiel misioneronan a expresá nan mes?
10 Na 1993, Ruanda, cu 2.080 publicador di Reino, 4.075 persona a asistí n’e Congreso di Distrito “Siñansa Divino,” i 230 a ser bautisá. Di esakinan, 142 a aplicá mesora pa sirbishi di pionero auxiliar. Studionan di Bijbel di cas cu ta ser conducí a aumentá na 7.655 na 1994—claramente muchu hopi na smak di Satanas! Aunke e gran mayoria dje pueblo ta profesá di ta cristian, masacrenan entre e tribunan hutu i tutsi a ser iniciá. L’Osservatore Romano di Vaticano a admití: “Esaki ta un exterminacion di rasa den e sentido mas completo dje palabra, pa cua desafortunadamente asta católiconan ta responsabel.” Un cálculo di mei miyon hende homber, muher i mucha a muri, i rond di dos miyon a perde nan cas of mester a hui. Manteniendo nan neutralidad cristian no-violento, Testigonan di Jehova a purba keda huntu. Cientos di nos rumannan a ser matá. Pero den un congregacion di 65 publicador di Reino, unda 13 ruman a ser matá, asistencia na reunion a subi te na 170 na augustus 1994. Suministronan di yudansa for di Testigonan den otro paisnan tabata entre e proménan pa yega. Nos ta haci oracion na fabor dje sobrebibientenan.—Romano 12:12; 2 Tesalonicense 3:1, 2; Hebreo 10:23-25.
11 Meimei di tur e horor, e tres misioneronan cu tabata na Ruanda a scapa. Nan ta skirbi: “Nos ta realisá cu nos rumannan rond mundu tabatin cu enfrentá situacionnan similar of pió, i nos sa cu tur esaki ta parti dje señal dje último dianan dje mal sistema aki. Tog, ora bo ta personalmente enbolbí, e ta hací bo masha conciente dje realidad di cosnan i ta hací bo apreciá con precioso bida ta. Cierto textonan a haña un nificacion nobo pa nos, i nos ta anticipá ansiosamente e tempu ora e cosnan anterior lo no ser recordá mas. Miéntras tantu nos kier keda ocupá den Jehova su sirbishi.”
Wardadornan di Integridad Hóben
12, 13. (a) Con un hobencita a warda integridad? (b) Unda nos hóbennan por haña animacion awe?
12 Jesus a indicá cu esnan cu ta ser rechasá dor di miembronan di famia pa causa dje berdad lo ser recompensá “cien biaha mas tantu.” (Marco 10:29, 30) Esaki tabata e caso cu Entellia, un hobencita di dies aña di edad na parti nort di Africa, kende a stima e nomber di Dios—Jehova—asina cu el a tend’é. El a studia cu Testigonan di Jehova i tabata cana 90 minuut pa bai i pa bini bek for dje reunionnan, aunke su famia cu a opon’é hopi biaha no a permiti’é drenta cas ora el a regresá. Cu 13 aña di edad, el a cuminsá predicá di cas pa cas, i e oposicion dje famia a intensificá. Un dia algun miembro dje famia a mara su man i pianan i a lagu’e drumi den un higra di solo pa shete ora, de bes en cuando tirando awa shushi riba dje. Nan a bati’é ferosmente, destruyendo un di su wowonan, i finalmente a sak’é for di cas. Sin embargo, el a haña trabou den un hospital i cu tempu a cualificá como enfermera. Cu 20 aña di edad el a ser bautisá i a inscribí mesora como pionero auxiliar. Impresioná pa su integridad, su famia a acept’é bek den nan cas, i nuebe di nan a aceptá studio di Bijbel di cas.
13 Entellia a saca hopi animacion for di Salmo 116, specialmente versículo 1-4, cua el a lesa bes tras bes atrobe: “Mi ta stima, pasobra Jehova ta tende mi bos, mi súplicanan. Pasobra el a incliná su orea na mi, i durante tur mi dianan lo mi yama. E cabuyanan di morto a rondoná mi i e circunstancianan angustioso di Sheol mes a hañá mi. Angustia i pena mi a sigui haña. Pero e nomber di Jehova mi a pasa na inbocá: ‘Ai, Jehova, proveé escape pa mi alma!’ ” Jehova ta contestá oracionnan asina!
14. Con Testigonan polaco a demostrá integridad sobresaliente?
14 Mescos cu den tempu di Jesus, Satanas hopi biaha a usa fanatismo religioso pa stimulá persecucion—pero sin éxito. Sobresaliente ta e ehempel di nos rumannan na Polonia, manera e Anuario de los testigos de Jehová para 1994 a describí. Asta hóbennan tabatin cu duna prueba di ta wardadornan di integridad. Na 1946 un dje hóbennan ei tabata un hobencita di 15 aña di edad kende a ser bisá: “Djis haci e señal católico di crus. Di otro manera un bala di skopet ta sperá bo!” Wardando integridad, el a ser lastrá den un mondi, torturá horiblemente, i dispará.—Compará cu Mateo 4:9, 10.
Otro Inventonan Mañoso di Satanas
15, 16. (a) Kico ta Satanas su táctica demoniaco, i con nos por resisti’é? (b) Pakico nos hóbennan no tin nodi trompecá?
15 Satanas su táctica demoniaco en berdad ta di “reina of ruiná”! E tin hopi arma cruel den su arsenal. Nada straño anto, cu apostel Pablo ta spierta: “Nos tin un lucha, no contra sanger i carni, sino contra e gobiernunan, contra e autoridadnan, contra e gobernantenan di mundu dje scuridad aki, contra e mal forsanan spiritual den e lugánan celestial. Pa causa di esaki, bisti e armadura completo cu ta bini di Dios, pa boso por resistí den e dia malu i, despues cu boso a haci tur cos cabalmente, para firme.” (Efesio 6:12, 13) Deseonan materialista, entretenimentu i propaganda degradá, música satánico, presion di hóbennan na scol, abusu di droga i buracheria—cualkier di esakinan por ruiná nos bida. P’esei, e apostel ta sigui, consehando: “Riba tur cos, bisti e escudo grandi di fe, cu cua boso por paga tur e flechanan di candela dje malbado.”—Efesio 6:16.
16 Esaki ta parce di ta specialmente necesario awe en bista dje música extravagante cu cua Satanas ta saturá e mundu aki. Den algun caso tin un coneccion directo cu satanismo. Un informe for dje oficina dje comandante di polis di Distrito di San Diego (Merca) a declará: “Nos tabatin un concierto aki na San Diego unda e banda tabatin 15.000 mucha cantando ‘Natas’—esta ‘Satan’ pronunciá robes pa drechi.” Satanismo a ser describí como un buracu den suela den cua algun adolesente ta trompecá “pasobra nan a bin ta dual desesperá, rabiá i solitario.” Boso, hóbennan den e congregacion cristian, boso no tin nodi trompecá! Jehova ta proveé boso cu un armadura spiritual cu Satanas su flechanan lo no bora nunca.—Salmo 16:8, 9.
17. Con nos por vence depresion emocional?
17 Flechanan di candela satánico ta ser diseñá pa manipulá e emocionnan. Dor di presionnan di bida, manera malesa físico of un estado di depresion profundo, nos adversario por pone algun di nos haña un sintimentu di inutilidad. Nos por bira desanimá debí cu nos no por dedicá hopi ora den sirbishi di Dios of debí cu nos a falta algun reunion di congregacion. Interes amoroso di parti dje ancianonan i otro rumannan bondadoso por yuda vence traumanan difícil. Corda semper cu Jehova ta stima su fiel sirbidornan. (1 Juan 4:16, 19) Salmo 55:22 ta declará: “Tira bo carga riba Jehova mes, i e mes lo sostené bo. Nunca lo e permití p’e hustu tambaleá.”
18. Cu ki trikinan satánico algun persona tin cu lucha cuné?
18 Satanas su “trikinan” mañoso recientemente a aparecé den un otro forma atrobe. Den algun pais hopi adulto a experenciá pensamentunan invasor cu ta transmití e impresion aplastante cu, como mucha, cultonan satánico a abusá sadísticamente di nan. Di unda ideanan asina ta bini? Apesar di investigacion extenso, opinionnan di specialistanan mundano ta varia bastante. Algun hende ta mira pensamentunan asina como recuerdonan real, otronan ta mira nan como fantasianan—talbes inducí dor di terapia cuestionabel—i otronan atrobe como un clase di halucinacion causá dor di un ke otro trauma di hubentud.
19. (a) Ki pensamentunan Job tabatin cu lucha cuné? (b) Con ancianonan por sigui ehempel di Elihú?
19 Ta interesante pa nota cu Dios su sirbidor Job tabatin cu lucha cu “pensamentunan inkietante” cu Satanas a transmití mediante Elifas i Zofar. (Job 4:13-18; 20:2, 3) Job a sufri asina di “iritacion,” resultando den su entrega na “papiamentu insensato” tocante e “terornan” cu a afligí su mente. (Job 6:2-4; 30:15, 16) Elihú a scucha Job silenciosamente i sinceramente a yud’é mira Jehova su punto di bista perfectamente sabí di asuntunan. Di igual manera awe, ancianonan comprensivo ta mustra cu nan ta interesá den esnan afligí dor di no añadí mas “presion” riba esnan asina. Mas bien, mescos cu Elihú, nan ta scucha nan cu pacenshi i despues ta aplicá e zeta calmante dje Palabra di Dios. (Job 33:1-3, 7; Santiago 5:13-15) Pues cualkier persona kende su emocionnan ta ser molestiá dor di traumanan, real of imaginá, of kende ta ser “spantá . . . cu soñonan, i dor di visionnan” manera Job, por haña consuelo bíblico calmante den e congregacion.—Job 7:14; Santiago 4:7.
20. Con cristiannan afligí por ser yudá pa mantené nan ekilibrio spiritual?
20 Actualmente un cristian por ta sigur cu, di un manera of otro, Satanas ta tras dje pensamentunan horibel aki. Si algun ruman den e congregacion ta sufri den e manera aki, nan ta haci bon di mira tal impresionnan mental spantoso como un intento directo di Satanas pa trastorná nan ekilibrio spiritual. Nan mester di apoyo bíblico paciente i comprensivo. Dor di acudí den oracion na Jehova i dor di beneficiá for di pastoreo spiritual, esnan cu ta experenciá angustia lo haci uso dje poder cu ta fuera di loke ta normal. (Isaías 32:2; 2 Corintio 4:7, 8) Asina nan lo por wanta fielmente i nenga di permití mal pensamentunan intruso afectá e pas dje congregacion. (Santiago 3:17, 18) Sí, nan lo ta capas pa oponé e Diabel, mustrando e mésun spiritu cu Jesus tabatin ora el a bisa: “Bai for djaki, Satanas!”—Mateo 4:10; Santiago 4:7.
21. Con e Scritura ta spierta nos contra Satanas su maneranan astuto?
21 Nos sa cu Satanas su meta ta pa di un of otro manera corumpí nos mente, manera apostel Pablo a spierta na 2 Corintio 11:3: “Mi tin miedu cu di un of otro manera, mescos cu e colebra a seducí Eva dor di su astucia, boso mente por ser corumpí i alehá di e sinceridad i e puresa cu ta debí na Cristo.” E ruina actual di tur carni, of sociedad humano alehá for di Dios, ta recordá nos dje degradacion creá dor dje “Deribadornan” híbrido, corumpí i violento, di tempu di Noe. (Génesis 6:4, 12, 13, nota; Lucas 17:26) P’esei, no ta nada straño cu Satanas ta recurí na obranan mañoso i medionan astuto p’e baha su rabia, specialmente riba e pueblo di Dios.—1 Pedro 5:8; Revelacion 12:17.
22. Cu Satanas for di caminda, ki bendicionnan nos por spera?
22 Satanas ni sikiera ta ser mencioná den e capítulonan di conclusion dje buki bíblico di Job. Su desafio malbado cu sernan humano no por warda integridad na Dios a ser probá di ta falsu dor di Job su integridad. Di igual manera, den futuro cercano ora “un multitud grandi” di wardadornan di integridad “ta sali for dje tribulacion grandi,” Satanas lo ser cerá den abismo. Homber i muhernan di fe, incluyendo fiel Job, lo uni cu e “multitud grandi” ei, pa disfrutá di bendicionnan paradísico, asta mas grandi cu esnan cu a recompensá Job!—Revelacion 7:9-17; 20:1-3, 11-13; Job 14:13.
[Notanan]
a Mira e Anuario de los testigos de Jehová para 1992, página 177.
Preguntanan di Repaso
◻ Ki ehempelnan excelente di integridad Job, Jesus i Pablo a pone?
◻ Con wardadornan di integridad a enfrentá Satanas?
◻ Con hóbennan por resistí Satanas su inventonan mañoso?
◻ Kico por ser hací pa enfrentá trikinan satánico?
[Plachi na página 7]
Na Etiopia, Meswat i Yoalan awor ta sirbi Jehova den sirbishi di tempu completo siguiendo e ehempel di nan tata, kende a ser ehecutá
[Plachi na página 7]
Entellia, un fiel wardador di integridad hóben na parti nort di Africa