Kiko Ta Dios Su Punto di Bista Tokante Alkohòl?

NOS Kreador, kende ta deseá lo mihó pa nos, no ta prohibí uso moderá di alkohòl.a Al kontrario, el a duna hende “biña ku ta hasi kurason di hende kontentu, zeta [di oleifi] pa hasi su kara lombra, i pan ku ta fortalesé kurason di hende.” (Salmo 104:15) Na un okashon, Hesukristu a kambia awa den “e mihó biña,” lokual a hasi un fiesta di kasamentu bira mas dushi.​—Juan 2:​3-10, BPK.

No kabe duda ku e Kreador sa eksaktamente kon alkohòl ta afektá e funshon di e kurpa i selebro. Mediante e páginanan di Beibel, nos Tata selestial ‘ta siña nos pa nos mes bon,’ i ta bisa nos pa tene masha kuidou pa no abusá di bibida stèrki. (Isaias 48:17) Tuma nota di e spièrtamentunan franko akí:

“No bebe biña bira burachi, pasobra esei ta libertinahe.” (Efesionan 5:18) “Buraché . . . lo no heredá e reino di Dios.” (1 Korintionan 6:​9-11) E Palabra di Dios ta kondená “buracheria, parandiamentu, i kosnan asin’akí.”​—Galationan 5:​19-21.

Awor laga nos konsiderá algun peliger ku hende ta kore ora nan bebe di mas.

E Peligernan di Bebementu di Mas

Ounke alkohòl por ta benefisioso, e ta kontené ingredientenan ku por afektá e manera ku e mente i kurpa ta funshoná. Bebementu di mas por kousa e siguiente problemanan:

Bebementu di mas ta afektá un hende su sano huisio di tal manera ku e ‘no por pensa kla.’ (Proverbionan 23:33, Today’s English Version) Allen, e alkoholista ku nos a menshoná den e artíkulo anterior, ta splika: “Alkoholismo no ta simplemente un malesa físiko; e ta un malesa ku ta afektá un hende su forma di pensa i su aktitut. Bo no ta pensa riba e daño ku bo ta kousa otro hende.”

Bebementu di mas por pone ku e hende no por dominá su pensamentu- i deseonan. Beibel ta spièrta: “Biña i biña nobo ta kita komprondementu.” (Oseas 4:11) Di ki manera? Bou di influensia di alkohòl, mal pensamentu i deseo ku normalmente nos ta dominá por kuminsá parse aseptabel—asta atraktivo. Nos determinashon pa hasi loke ta bon por debilitá. Alkohòl por suak nos defensa pa resistí inmoralidat, i resultá den desaster spiritual.

Por ehèmpel, John a pleita ku su esposa i a sali rabiá bai un bar. E tabatin un par di drinks aden kaba ora un dama a aserk’é. Despues di un par di drinks mas, John a bai kuné i a kometé adulterio. Despues, John a lamentá profundamente ku el a hasi algu ku nunka lo el a pensa di hasi si e no tabata bou di influensia di alkohòl.

Bebementu di mas por pone un hende pèrdè kontròl riba su abla i akshonnan. “Ken semper ta den problema? Ken ta diskutí i bringa?” Beibel ta puntra. “Tur esnan ku ta keda lantá te lat, bebiendo djis ún drinks so mas.” (Proverbionan 23:​29, 30, Contemporary English Version) Bebementu di mas por pone bo sinti “manera un hende drumí meimei di laman, òf manera un hende drumí riba tòp di un master.” (Proverbionan 23:34) Un hende ku ta abusá di alkohòl por spièrta i bisa: ‘Nan a gòlpia mi i mi n’ tabata sa mes.’​—Proverbionan 23:35, BPK.

Bebementu di mas por daña un hende su salú. “Na final [alkohòl] ta morde manera kolebra, i ta pika manera víbora.” (Proverbionan 23:32) Siensia médiko a komprobá e sabiduria tras di e proverbio antiguo ei. Alkohòl na gran kantidat ta un tóksiko sumamente peligroso ku por kousa vários tipo di kanser, hepatítis, sirósis di higra, inflamashon di pánkreas, nivel abou di suku serka diabétiko, atake selebral òf atake di kurason i por pone beibi nase ku defekto—pa menshoná djis un par di konsekuensia. I bebementu di mas djis ún biaha so por resultá den koma òf morto. Pero bebementu di mas tin konsekuensia hopi mas serio, ma bukinan médiko no ta papia di nan.

E peliger di mas grandi. Maske un hende no bira burachi, bebementu inmoderá por ta un peliger pa su spiritualidat. Beibel ta bisa frankamente: “Ai di esnan ku ta lanta mainta trempan pa kore tras di bibida stèrki, ku ta keda lantá te anochi lat, te ora biña subi na nan kabes!” Dikon? Isaias ta splika kiko ta e konsekuensia spiritual di bebementu inmoderá: “Nan no ta paga atenshon na e echonan di SEÑOR, ni nan no ta konsiderá e obra di su mannan.”​—Isaias 5:​11, 12.

E Palabra di Dios ta konsehá nos pa “no anda k’esnan ku ta yena nan kurpa ku biña.” (Lèter skùin ta di nos; Proverbionan 23:20, BPK) Beibel ta bisa muhénan di edat pa no ta “sklabisá na biña.” (Tito 2:3) Dikon nò? Pasobra hopi bes—sin ripará—pokopoko hende ta kuminsá bebe mas alkohòl i ku mas frekuensia. Dado momento, e bebedó ta pensa asina hopi riba alkohòl ku e ta bisa su mes: “Asina mi spièrta mi ta bolbe buska mas bibida.” (Proverbionan 23:35, BPK) Ta hopi peligroso ora un bebedó ta deseá un drinks pa e rekuperá.

Beibel ta spièrta ku esnan ku hiba un bida di “buracheria, paranda, fiesta di bebementu . . . lo duna kuenta na esun ku ta kla pa husga e bibunan i e mortonan.” (1 Pedro 4:​3, 5) I tokante e tempu krusial ku nos ta biba aden, Hesus a spièrta: “Tene kuidou pa boso kurason no ta kargá pa kousa di paranda i buracheria i e preokupashonnan di bida, i e dia [di Yehova] no bin diripiente riba boso manera un trampa.”​—Lukas 21:​34, 35.

Pero kiko esnan ku ta bebe alkohòl na un manera inmoderá por hasi pa evitá di bira ‘kargá pa kousa di buracheria’?

[Nota]

[Plachi na página 4, 5]

Uso eksesivo di alkohòl por kousa hopi problema