E Toren di Bábel

Despues di e diluvio, e yu hòmbernan di Noe i nan esposanan a haña hopi yu. Nan famianan a bira famia grandi, i nan a bai biba na diferente lugá na mundu. Ta Yehova a bisa nan pa hasi esei.

Pero algun di e famianan ei no a obedesé Yehova. Nan a bisa: ‘Laga nos traha un stat i keda biba den e stat ei. I laga nos traha un toren haltu ku ta yega te shelu. Asina, nos ta bira famoso.’

Yehova no a keda niun tiki kontentu ku loke nan tabata ke hasi. P’esei, Yehova a stòp nan. Bo sa kon Yehova a hasi esei? Diripiente, Yehova a pone nan kuminsá papia diferente idioma. Nan no tabata por komprondé otro mas. P’esei, nan a stòp di traha e stat. E stat ku nan tabata traha a haña e nòmber Bábel. Bábel ta nifiká “konfushon.” E hendenan a bandoná e stat, i nan a bai biba na diferente lugá na mundu. Pero nan a sigui hasi loke tabata malu kaminda nan a bai biba. Tabatin hende ku sí tabata stima Yehova? Nos ta haña sa esei den e siguiente kapítulo.