1. Kiko profesia di Beibel ta yuda nos sa?

KIKO ta spera e pueblo di Yehova den futuro? Nos no tin nodi di rei esei, pasobra den Beibel nos ta haña hopi profesia. Nan ta duna nos un bista riba suseso importante den futuro ku lo tin efekto riba nos. Un di e profesianan ei ta permití nos wak kiko algun di e gobièrnunan di mas poderoso na mundu lo hasi. Esei ta e profesia na Daniel kapítulo 11. E ta papia tokante dos rei ku ta bringa kontra otro: e rei di nort i e rei di zùit. Gran parti di e profesia ei a kumpli kaba, p’esei nos por tin sigur ku e restu tambe lo kumpli.

2. Manera Génesis 3:15 i Revelashon 11:7 i 12:17 ta indiká, kiko nos mester tene na mente ora nos ta studia e profesia di Daniel?

² Pa nos por komprondé e profesia na Daniel kapítulo 11, nos mester tene dos punto na mente. Promé, e profesia ei ta papia solamente tokante gobernante i gobièrnu ku a goberná riba e sirbidónan di Dios i a persiguí nan. Ta bèrdat ku e pueblo di Dios ta djis un kantidat chikitu na komparashon ku henter e poblashon di mundu. Pero, tòg e gobièrnunan ei ta persiguí nan. Dikon? Pasobra Satanas i henter su mundu malbado tin un solo meta: Kaba ku tur hende ku ta sirbi Yehova i obedesé Hesus. (Lesa Génesis 3:15; Revelashon 11:7; 12:17.) Di dos, nos splikashon di e profesia di Daniel mester ta na armonia ku otro profesia den Palabra di Dios. E realidat ta ku nos por komprondé e profesia di Daniel korektamente solamente si nos kompar’é ku otro teksto di Beibel.

3. Kiko nos lo analisá den e artíkulo akí i den esun siguiente?

³ Pues den e artíkulo akí, nos lo analisá Daniel 11:25-39. Nos lo wak ken e rei di nort i e rei di zùit tabata for di 1870 te 1991. Ademas, nos lo mira dikon tin bon motibu pa nos ahustá nos komprondementu di un parti di e profesia ei. Den e siguiente artíkulo, nos lo analisá Daniel 11:40–12:1. Nos lo splika loke e parti ei di e profesia ta bisa tokante e periodo for di 1991 te Armagedon. Segun ku bo ta studia e dos artíkulonan akí, usa e tabèl “Dos Rei Rival den Tempu di Fin.” Esei lo yuda bo masha hopi mes. Pero promé, laga nos wak ken e dos reinan den e profesia ei ta.

KON NOS POR IDENTIFIKÁ E REI DI NORT I E REI DI ZÙIT?

4. Ki tres kos ta yuda nos identifiká e rei di nort i e rei di zùit?

⁴ Na prinsipio, e gobernantenan di e áreanan situá parti nort i zùit di Israel tabata haña e títulonan “rei di nort” i “rei di zùit.” Kon nos por sa esei? Wèl, e angel ku a duna Daniel e profesia a bis’é: “Mi a bini pa duna bo komprondementu di loke ta bai sosodé ku bo pueblo [e pueblo di Dios].” (Dan. 10:14) Awor, ken tabata e pueblo di Dios? Promé ku Pentekòste di aña 33, esei tabata e nashon di Israel. Pero despues di Pentekòste, Yehova a demostrá klaramente ku ta e fiel disipelnan di Hesus a bira Su pueblo. P’esei, gran parti di e profesia di Daniel kapítulo 11 no ta apliká na e nashon di Israel, sino na e disipelnan di Kristu. (Echo. 2:1-4; Rom. 9:6-8; Gal. 6:15, 16) Ku tempu, e identidat di e rei di nort i di e rei di zùit a kambia. Apesar di esei, e gobernantenan ei semper tabatin tres kos en komun. Promé, nan a goberná riba e sirbidónan di Dios i a persiguí nan. Di dos, nan a demostrá ku nan tabata odia Yehova, e Dios berdadero, na e manera ku nan tabata trata su adoradónan. I di tres, e dos reinan tabata bringa ku otro pa poder.

5. Tabatin un rei di nort i un rei di zùit for di aña 100 te 1870? Splika.

⁵ Algun tempu despues di aña 100, esta durante siglo 2, mas i mas kristian falsu a bini den e kongregashon kristian. Nan tabata siña hende siñansa di religion falsu i tabata skonde e bèrdat di Palabra di Dios. For di e tempu ei te 1870, no tabatin un grupo organisá di sirbidó di Dios riba tera. Meskos ku mal yerba den kunuku, asina e kristiannan falsu a oumentá i a bira masha difísil pa identifiká e kristiannan berdadero. (Mat. 13:36-43) Dikon ta importante pa nos sa esei? Pasobra esei ta indiká ku loke Beibel ta bisa tokante e rei di nort i e rei di zùit no por ser apliká na ningun gobernante ku tabata na poder for di aña 100 te 1870. Dikon nò? Pasobra no tabatin un grupo organisá di sirbidó di Dios durante e periodo ei pa nan ataká.b Pero poko despues di 1870 sí tabata posibel pa identifiká e rei di nort i e rei di zùit atrobe. Kon bini?

6. Na ki tempu por a identifiká e pueblo di Dios atrobe? Splika.

⁶ Kuminsando for di 1870, e pueblo di Dios a kuminsá bira un grupo organisá. Tabata den e aña ei ku Charles T. Russell i su kolaboradónan a forma un grupo di estudio di Beibel. E grupo ei tabata e mensahero ku, segun profesia di Beibel, ‘lo a prepará e kaminda’ promé ku a establesé e Reino Mesiániko. (Mal. 3:1) Por fin tabata posibel pa identifiká e pueblo di Dios atrobe! Awor, tabatin gobièrnu òf potensia mundial e tempu ei ku a persiguí e sirbidónan di Dios? Laga nos wak.

KEN TA E REI DI ZÙIT?

7. Ken tabata e rei di zùit te 1917?

⁷ Pa 1870 Gran Bretaña tabatin e forsa militar di mas poderoso, i el a bira e imperio di mas grandi na mundu. Profeta Daniel a referí na e imperio ei komo un kachu chikitu ku a vense tres otro kachu: Fransia, Spaña i Hulanda. (Dan. 7:7, 8) Anto Gran Bretaña tabata e rei di zùit te 1917. Durante Promé Guera Mundial, Merka a bira e pais di mas riku na mundu i a sera aliansa ku Gran Bretaña.

8. Ken ta e rei di zùit durante e último dianan?

⁸ Durante Promé Guera Mundial, Merka i Gran Bretaña a bringa huntu i a bira masha poderoso. Asina ei, nan a bira Potensia Mundial Angloamerikano. E profesia di Daniel ta referí na e potensia ei komo e rei ku a mobilisá òf reuní “un ehérsito masha grandi mes i poderoso pa guera.” (Dan. 11:25) Durante e último dianan, e aliansa Angloamerikano ta e rei di zùit.c Pero, ken ta e rei di nort?

KEN TA E REI DI NORT?

9. Na ki aña e rei di nort a bolbe aparesé, i kon Daniel 11:25 a kumpli?

⁹ Manera nos a mira, Russell i su kolaboradónan a forma nan grupo di estudio di Beibel na 1870. E siguiente aña, 1871, e rei di nort a bolbe aparesé. E aña ei, vários region di abla aleman a uni i a forma e nashon poderoso Alemania. Ku tempu, Alemania a kuminsá ehersé poder riba algun pais na Afrika i den e region di Oséano Pasífiko i tabata purba di bira mas poderoso ku Gran Bretaña. (Lesa Daniel 11:25.) Imperio Aleman a forma un ehérsito masha poderoso, i su ehérsito naval a bira e di dos di mas grandi na mundu. Durante Promé Guera Mundial, el a usa tur su forsa militar kontra su enemigunan.

10. Kon Daniel 11:25b i 26 a kumpli?

¹⁰ Despues, Daniel ta profetisá loke lo sosodé ku Imperio Aleman i ku su ehérsito poderoso. E profesia ta bisa: “Lo e [rei di nort] no por keda para.” Dikon nò? Pasobra nan lo traha kòmplòt kontra dje. “I esnan ku ta kome kuminda di e rei lo kibr’é.” (Dan. 11:25b, 26a) Den tempu di Daniel, esnan ku a kome “kuminda di rei” a inkluí funshonario ku tabata den “sirbishi personal di rei.” (Dan. 1:5) Na ken e profesia ta referí? Na funshonario di alto rango den Imperio Aleman—ku a inkluí general i konsehero militar di e emperador. E funshonarionan ei a kontribuí na e echo ku e emperador a pèrdè poder i ku Alemania a stòp di eksistí komo un monarkia.d E profesia di Daniel no a papia solamente tokante e kaida di Imperio Aleman, sino tambe tokante e resultado di e guera entre e dos reinan. Relashoná ku e rei di nort, e profesia ta bisa: “Su ehérsito lo basha bini manera un diluvio di awa, ma hopi lo wòrdu matá.” (Dan. 11:26b) Esei ta eksaktamente loke a sosodé durante Promé Guera Mundial. E ehérsito aleman a ser derotá i hopi hende a ser matá. Nunka promé den historia di humanidat no tabatin asina tantu morto den un guera so.

11. Segun Daniel 11:27-30, kiko e rei di nort i e rei di zùit a hasi?

¹¹ Daniel 11:27 i 28 ta deskribí loke a pasa promé ku Promé Guera Mundial: “Sintá na e mesun mesa nan [e rei di nort i e rei di zùit] lo gaña otro.” E profesia ta bisa tambe ku e rei di nort lo akumulá “hopi rikesa.” Un biaha mas, e profesia a kumpli: Alemania i Gran Bretaña a bisa otro ku nan ke pas, pero ora guera a kuminsá na 1914, a bira bisto ku esei tabata mentira. Den e dékadanan promé ku 1914, Alemania a bira e di dos pais di mas riku na mundu. Despues, Daniel 11:29 i e promé parti di versíkulo 30 a kumpli ora Alemania a bringa kontra e rei di zùit i a pèrdè.

E REINAN TA BRINGA KONTRA E PUEBLO DI DIOS

12. Kiko tantu e rei di nort komo e rei di zùit a hasi durante Promé Guera Mundial?

¹² Desde 1914, e dos reinan a intensifiká nan atake kontra otro i kontra e pueblo di Dios. Por ehèmpel, den Promé Guera Mundial, tantu e gobièrnu di Alemania komo esun di Gran Bretaña a persiguí e sirbidónan di Dios ku a nenga di bringa den guera. I, komo kumplimentu di e profesia na Revelashon 11:7-10, e gobièrnu di Merka a sera e rumannan ku tabata guia e trabou di prediká.

13. Kiko e rei di nort a hasi desde 1933 i durante Segundo Guera Mundial?

¹³ Anto desde 1933 i spesialmente durante Segundo Guera Mundial, e rei di nort a ataká e pueblo di Dios sin miserikòrdia. Durante e tempu ei, e nazinan a bini na poder, i Hitler i su siguidónan a prohibí nos obra. E enemigunan ei a mata mas o ménos 1.500 Testigu di Yehova i a manda míles den kampo di konsentrashon. Daniel a profetisá tokante tur e susesonan ei. E profesia ta bisa ku e rei di nort a ‘profaná e santuario’ i a “deshasí di e sakrifisio di tur dia.” Esei a pasa ora Alemania a prohibí e obra di predikashon kompletamente. (Dan. 11:30b, 31a) Hitler, lider di e gobièrnu di e tempu ei, a asta hura ku lo e kaba ku e pueblo di Dios na Alemania.

UN REI DI NORT NOBO TA APARESÉ

14. Ken a bira e rei di nort despues di Segundo Guera Mundial? Splika.

¹⁴ Despues di Segundo Guera Mundial, e gobièrnu komunista di Union Soviétiko a poderá di e teritorionan grandi ku promé tabata pertenesé na Alemania. Meskos ku e gobièrnu nazi, gobièrnu di Union Soviétiko i su aliadonan a eksigí pa hende ta totalmente obedesidu na e gobièrnu. Nan a persiguí tur hende ku a pone adorashon di e Dios berdadero na promé lugá den nan bida. P’esei, Union Soviétiko i su aliadonan a bira e rei di nort.

15. Kiko e rei di nort a hasi despues ku Segundo Guera Mundial a terminá?

¹⁵ Djis despues ku Segundo Guera Mundial a terminá, e rei di nort nobo, Union Soviétiko i su aliadonan, a ataká e pueblo di Dios. Nan a prohibí nos trabou di prediká i a manda míles di Testigu di Yehova den eksilio na Siberia. Esei a kumpli ku e profesia na Revelashon 12:15-17. De echo, durante henter e periodo akí di e último dianan, Satanas a usa e rei di nort pa basha un “riu” di persekushon riba e pueblo di Dios. Pero, e no por stòp e sirbidónan di Yehova di kumpli ku nan trabou di prediká.e

16. Kon Union Soviétiko a kumpli ku Daniel 11:37-39?

¹⁶ Lesa Daniel 11:37-39. E profesia ei ta bisa ku e rei di nort lo no a “hasi kaso di e diosnan di su tatanan.” Kon esei a kumpli? Union Soviétiko a purba di kita poder di organisashon religioso tradishonal. Su meta tabata pa kaba ku tur religion. Pa logra esei, for di 1918 kaba, e gobièrnu soviétiko a saka un dekreto ku a pone e fundeshi pa siña ateismo na skol. E profesia di Daniel ta bisa tambe ku e rei di nort lo “onra un dios di fòrtinan.” Kon esei a sosodé? Union Soviétiko a gasta masha hopi plaka pa reforsá su ehérsito i a produsí míles di arma nuklear pa oumentá su poder. Tantu e rei di nort komo e rei di zùit a akumulá sufisiente arma poderoso pa mata míles di miónes di hende!

DOS ENEMIGU TA KOOPERÁ KU OTRO

17. Kiko ta e abominashon ku ta kousa desolashon?

¹⁷ E rei di nort a traha huntu ku e rei di zùit pa logra algu importante. Nan a “lanta e abominashon [“ku ta kousa,” NW] desolashon.” (Dan. 11:31) E “abominashon” ei ta e organisashon di Nashonnan Uní (NU).

18. Dikon Nashonnan Uní ta ser deskribí komo un “abominashon”?

¹⁸ Nashonnan Uní ta ser deskribí komo un “abominashon” pasobra e ta pretendé ku e por hasi algu ku solamente e Reino di Dios por hasi—trese pas mundial. E profesia ta bisa ku e abominashon ta kousa desolashon pasobra Nashonnan Uní lo ataká i destruí tur religion falsu.—Wak e tabèl “Dos Rei Rival den Tempu di Fin.”

DIKON TA BON PA NOS SA E PARTI EI DI HISTORIA?

19-20. (a) Dikon ta bon pa nos sa e parti ei di historia? (b) Ki pregunta nos lo kontestá den e siguiente artíkulo?

¹⁹ Ta bon pa nos sa e parti ei di historia pasobra e ta demostrá bon kla ku e promé parti di e profesia di Daniel tokante e rei di nort i e rei di zùit a kumpli for di 1870 te 1991. Pues, nos por tin konfiansa ku e di dos parti di e profesia ei tambe lo kumpli.

²⁰ Na 1991, Union Soviétiko a stòp di eksistí. Pues, ken ta e rei di nort awe? E siguiente artíkulo lo kontestá e pregunta ei.

1-2. Kiko nos lo analisá den e artíkulo akí?

AWOR mas ku nunka nos ta mira prueba ku nos ta bibando na final di e último dianan di e mundu malbado akí. Pronto, Yehova i Hesukristu lo destruí tur gobièrnu ku ta oponé e Reino di Dios. Pero, promé ku esei, e rei di nort i e rei di zùit lo sigui bringa kontra otro i kontra e pueblo di Dios.

² Den e artíkulo akí, nos lo analisá e profesia na Daniel 11:40–12:1. Nos lo haña sa ken ta e rei di nort aworakí, i kon nos por enfrentá ku konfiansa e difikultatnan ku ta spera nos.

UN REI DI NORT NOBO TA APARESÉ

3-4. Ken a bira e rei di nort, i dikon nos ta bisa asina?

³ Despues ku Union Soviétiko a stòp di eksistí na 1991, e sirbidónan di Dios ku tabata biba den e área grandi ei a haña “djis un poko yudansa,” esta, un periodo di libertat. (Dan. 11:34) Komo resultado, nan por a prediká libremente i, den poko tempu e kantidat di publikadó den e paisnan ku tabata forma parti di Union Soviétiko a bira sientos di míles. Pero pokopoko, Rusia i su aliadonan a bira e rei di nort. Manera nos a trata den e artíkulo anterior, pa un gobièrnu bira e rei di nort òf e rei di zùit, e mester hasi tres kos: (1) goberná riba e pueblo di Dios i persiguí nan, (2) demostrá ku su echonan ku e ta un enemigu di Yehova i su pueblo i (3) bringa kontra e rei rival.

⁴ Laga nos wak dikon nos por bisa ku Rusia i su aliadonan ta e rei di nort. (1) Nan a ataká e pueblo di Dios ora nan a prohibí e trabou di prediká i a persiguí míles di ruman ku ta biba den área bou di nan mando. (2) E prohibishon i persekushon ei ta demostrá ku nan ta odia Yehova i su pueblo. (3) Nan a bin ta bringa kontra e rei di zùit, Potensia Mundial Angloamerikano. Laga nos wak kiko Rusia i su aliadonan ta hasiendo i dikon esei ta demostrá ku nan ta e rei di nort.

E REI DI NORT I E REI DI ZÙIT TA SIGUI ATAKÁ OTRO

5. Ki periodo Daniel 11:40-43 ta deskribí, i kiko ta pasa durante e periodo ei?

⁵ Lesa Daniel 11:40-43. E parti di e profesia ei ta deskribí e tempu di fin. E versíkulonan ta resaltá e rivalidat ku tin entre e rei di nort i e rei di zùit. Manera Daniel a profetisá, den e tempu di fin, e rei di zùit “lo atak’é [e rei di nort].”—Dan. 11:40.

6. Ki prueba nos tin ku e dos reinan ta sigui bringa kontra otro?

⁶ E rei di nort i e rei di zùit ta sigui bringa kontra otro pa poder, pasobra kada un ke bira e gobièrnu di mas poderoso na mundu. Por ehèmpel, wak loke a pasa despues di Segundo Guera Mundial, Union Soviétiko i su aliadonan a kuminsá dominá un gran parti di Europa. Esei a obligá e rei di zùit pa forma un aliansa militar internashonal, konosí komo Organisashon di Tratado di Nort Atlántiko (OTAN). E rei di nort i e rei di zùit ta gasta hopi plaka pa purba di tin e ehérsito di mas poderoso na mundu. Ademas, e rei di nort a apoyá guera di e enemigunan di e rei di zùit, i e rei di zùit a hasi meskos kontra e rei di nort, manera a sosodé na Afrika, Asia i Latino Amérika. Den e último añanan, Rusia i su aliadonan a bira mas i mas poderoso. I nan a drenta den un guera sibernétiko ku e rei di zùit. E dos reinan a akusá otro di ta usa programa di kòmpiuter peligroso pa perhudiká nan ekonomia i sistema polítiko. I manera Daniel a profetisá, e rei di nort ta sigui ataká e pueblo di Dios.—Dan. 11:41.

E REI DI NORT TA DRENTA “TERA BUNITA”

7. Kiko “Tera Bunita” ta?

⁷ Daniel 11:41 ta bisa ku e rei di nort lo drenta “Tera Bunita.” Kiko e tera ei ta? Den antigwedat, e ekspreshon ei a referí na e tera di Israel. Nan tabata bisa ku e tabata “e gloria di tur tera.” (Eze. 20:6) En realidat, loke a hasi e tera ei asina bunita tabata ku einan tabata adorá Yehova. Pero desde Pentekòste di aña 33, “Tera Bunita” no ta un lugá literal den sentido geográfiko. Esei no por ta posibel pasobra e sirbidónan di Yehova ta biba den diferente pais rònt mundu. E ora ei, kiko “Tera Bunita” ta? E ekspreshon ei ta referí na e manera ku Dios su pueblo ta hiba nan bida. E ta inkluí nan adorashon di Yehova na reunion i den sirbishi.

8. Den ki forma e rei di nort a drenta “Tera Bunita”?

⁸ Durante e último dianan, bes tras bes e rei di nort a drenta “Tera Bunita.” Por ehèmpel, ora Alemania nazi tabata e rei di nort, prinsipalmente durante Segundo Guera Mundial, e rei ei a drenta “Tera Bunita” ora el a persiguí i mata vários sirbidó di Dios. Despues di Segundo Guera Mundial ora Union Soviétiko a bira e rei di nort, el a drenta “Tera Bunita” ora el a persiguí e pueblo di Dios i a manda hopi di nos rumannan den eksilio.

9. Den e último añanan, kon Rusia i su aliadonan a drenta “Tera Bunita”?

⁹ Den e último añanan, Rusia i su aliadonan tambe a drenta “Tera Bunita.” Kon? Na 2017, e rei di nort ei a prohibí e obra di e pueblo di Yehova i a hinka algun di nos rumannan den prizòn. Ademas, el a prohibí nos publikashonnan, inkluso Tradukshon di Mundu Nobo. I el a konfiská e sukursal na Rusia i algun Salòn di Reino i Salòn di Asamblea. Despues di tur esei, na 2018 Kuerpo Gobernante a identifiká Rusia i su aliadonan komo e rei di nort. Sinembargo, asta ora e pueblo di Yehova ta sufri persekushon intenso, nan no ta rebeldiá kontra e gobièrnu òf purba di bah’é. En bes di esei, e sirbidónan di Dios ta sigui e konseho bíbliko pa resa pa “tur esnan ku ta den puesto haltu,” spesialmente ora e hendenan ei tuma desishon ku por afektá libertat di adorá.—1 Tim. 2:1, 2.

E REI DI NORT LO KABA KU E REI DI ZÙIT?

10. Akaso e rei di nort lo kaba ku e rei di zùit? Splika.

¹⁰ E profesia di Daniel 11:40-45 ta konsentrá prinsipalmente riba e rei di nort. Akaso esei ta nifiká ku lo e kaba ku e rei di zùit? Nò. E rei di zùit lo ta “bibu” ainda na e guera di Armagedon, ora Yehova i Hesus destruí tur gobièrnu humano. (Rev. 19:20) Kon nos por ta asina sigur? Wak kiko e profesianan di Daniel i Revelashon ta bisa.

11. Kiko Daniel 2:43-45 ta indiká? (Wak e plachi riba portada.)

¹¹ Lesa Daniel 2:43-45. Profeta Daniel ta deskribí un imágen grandi trahá di vários metal. Kada parti di e imágen ta representá un potensia mundial diferente ku a persiguí e pueblo di Dios i ku a goberná na diferente tempu. E pianan trahá di heru mesklá ku klei ta representá e último potensia mundial—Potensia Mundial Angloamerikano. E profesia di Daniel ta indiká ku e potensia mundial ei ainda lo ta na poder ora e Reino di Dios destruí tur gobièrnu humano.

12. Kiko e di shete kabes di e bestia salbahe ta representá, i dikon e detaye ei ta importante?

¹² Apòstel Huan tambe ta deskribí vários potensia mundial ku lo a goberná riba e pueblo di Yehova. E profesia di Huan ta kompará e gobièrnunan ei ku un bestia salbahe di shete kabes. E di shete kabes di e bestia ei ta representá Potensia Mundial Angloamerikano. Esei ta un detaye importante pasobra no tin mas kabes despues di esun ei. E di shete kabes di e bestia ei lo ta na poder ainda ora Kristu i su ehérsito selestial destruyé huntu ku e restu di e bestia.b—Rev. 13:1, 2; 17:13, 14.

KIKO E REI DI NORT LO HASI DEN FUTURO SERKANO?

13-14. Ken ta “Gòg di tera di Magòg,” i kiko lo pon’é ataká e pueblo di Dios?

¹³ E profesia na Ezekiel 38:10-23 ta duna nos un idea di loke lo pasa promé ku destrukshon di e rei di nort i e rei di zùit. Ta parse ku e profesia ei di Ezekiel i esnan na Daniel 2:43-45; 11:44–12:1 i Revelashon 16:13-16 i 21 ta menshoná e mesun periodo di tempu i e mesun susesonan. Si esei ta bèrdat, esaki ta loke nos ta pensa ku lo sosodé.

¹⁴ Poko tempu despues ku tribulashon grandi kuminsá, “e reinan di henter e tera habitá” lo forma un koalishon, òf grupo, di nashon. (Rev. 16:13, 14; 19:19) Beibel ta yama e grupo ei “Gòg di tera di Magòg.” (Eze. 38:2) Gòg lo ataká e pueblo di Dios i lo purba di destruí nan kompletamente. Kiko lo pone Gòg hasi esei? Relashoná ku e tempu ei, Apòstel Huan a mira piedra grandi di eis ta kai riba e enemigunan di Dios. Kisas e tormenta di piedra di eis ei ta representá e mensahe di huisio fuerte ku e sirbidónan di Yehova lo proklamá. Podisé ta e mensahe ei lo pone Gòg ataká e pueblo di Dios ku e meta di kaba ku nan tur.—Rev. 16:21.

15-16. (a) Na ki suseso Daniel 11:44 i 45 probablemente ta referí? (b) Kiko lo pasa ku e rei di nort i sobrá di Gòg di Magòg?

¹⁵ E mensahe fuerte ei i e atake final ku e enemigunan di Dios lo lansa ta parse di ta e mesun susesonan ku Daniel 11:44 i 45 (les’é) ta menshoná. Ei, Daniel ta bisa ku “rumornan for di pariba i for di nort” lo molestiá e rei di nort. E ora ei, e rei di nort lo sali “ku gran furia” pa “kaba ku hopi hende.” Aparentemente, “hopi hende” ta referí na e sirbidónan di Yehova.c Ta posibel ku Daniel tabata papia tokante e atake final kontra e pueblo di Dios.

¹⁶ E atake di e rei di nort i e otro gobièrnunan di mundu lo provoká Dios Todopoderoso na rabia. E ora ei e guera di Armagedon lo kuminsá. (Rev. 16:14, 16) Na e momento ei, e rei di nort “lo yega na su fin, i ningun hende lo no yud’é.” (Dan. 11:45) Meskos lo pasa ku tur e nashonnan ku ta forma parti di Gòg di Magòg.

17. Ken ta Miguel “e gran prens” menshoná na Daniel 12:1, kiko e ta hasi awor, i kiko lo e hasi den futuro?

¹⁷ Lesa Daniel 12:1. E versíkulo ei ta duna mas detaye tokante kon e rei di nort i su aliadonan lo yega na nan fin i kon nos lo ser salbá. Kiko e versíkulo ei ta nifiká? Miguel ta un otro nòmber pa nos Rei, Kristu Hesus. E ta “protehá” e pueblo di Dios desde 1914, e aña ku su Reino a ser establesí den shelu. Den futuro serkano, Miguel lo “lanta,” esta, destruí su enemigunan na e guera di Armagedon. E guera ei lo ta e final di loke Daniel ta yama e pió “tempu di angustia” den historia humano. E profesia di Huan na Revelashon ta yama e periodo ei “tribulashon grandi.”—Rev. 6:2; 7:14.

BO NÒMBER LO TA “SKIRBÍ DEN E BUKI”?

18. Dikon nos no mester tin miedu di futuro?

¹⁸ Nos no mester tin miedu di futuro. Tantu Daniel komo Huan ta konfirmá ku hende ku ta sirbi Yehova i Hesus lo sobrebibí tribulashon grandi. Daniel a bisa ku nòmber di e sobrebibientenan lo ta “skirbí den e buki.” (Dan. 12:1) Kiko nos tin ku hasi pa nos nòmber ta den e buki ei? Nos mester demostrá bon kla ku nos tin fe den Hesus, e Lamchi di Dios. (Huan 1:29) Ademas, nos mester dediká nos bida na Dios i batisá. (1 Ped. 3:21) I nos tin ku demostrá ku nos ta apoyá e Reino di Dios yudando otro hende siña tokante Yehova.

19. Kiko nos tin ku hasi awor, i dikon?

¹⁹ Awor ta tempu pa nos siña konfia den Yehova i den su organisashon. Anto, awor ta tempu pa nos apoyá e Reino di Dios. Si nos hasi esei, nos lo ser salbá ora e Reino di Dios destruí e rei di nort i e rei di zùit.

Algun di e profesianan den e tabèl akí ta deskribí suseso ku a sosodé na e mesun tempu. Nan tur ta demostrá ku nos ta bibando den “tempu di e fin.”—Dan. 12:4.

• 

  

  Teksto Rev. 11:7; 12:13, 17; 13:1-8, 12

  Profesia “E bestia salbahe” a bin ta dominá mundu pa hopi siglo. Den tempu di fin, su di shete kabes ta ser heridá. Mas despues, e kabes ei ta kura i “henter e tera” ta sigui e bestia. Satanas ta usa e bestia ei pa “bringa kontra [e] restu di e desendientenan di e muhé.”

  Kumplimentu Despues di Diluvio, gobièrnu humano ta aparesé; nan ta oponé Yehova. Míles di aña despues, durante Promé Guera Mundial, Imperio Britániko ta suak gravemente. Pero, e ta rekuperá ora e uni forsa ku Merka. Den tempu di fin, Satanas ta usa henter su sistema polítiko pa persiguí e pueblo di Dios.

• 

  Teksto Dan. 11:25-45

  Profesia Durante tempu di fin, e rei di nort i e rei di zùit ta bringa ku otro.

  Kumplimentu Alemania ta bringa kontra Gran Bretaña i Merka. Na 1945, Union Soviétiko i su aliadonan ta bira e rei di nort. Na 1991, Union Soviétiko ta stòp di eksistí i, ku tempu, Rusia i su aliadonan ta bira e rei di nort.

• 

  Teksto Isa. 61:1; Mal. 3:1; Luk. 4:18

  Profesia Yehova ta manda su “mensahero” pa “prepará e kaminda” promé ku Reino Mesiániko ser establesí. E “mensahero” ta kuminsá “hiba bon nobo na esnan afligí.”

  Kumplimentu Desde 1870, C. T. Russell i su kolaboradónan ta tuma tempu pa studia Beibel pa haña sa loke e ta siña realmente. Na 1881, nan ta kuminsá enfatisá ku ta importante pa sirbidó di Dios prediká. Nan ta publiká artíkulo manera “Ta Buska 1.000 Predikadó” i “Ungí pa Prediká.”

• 

  Teksto Mat. 13:24-30, 36-43

  Profesia Un hòmber ta planta trigu den kunuku. Despues, su enemigu ta bini i ta planta mal yerba den e kunuku ei. E mal yerba ta krese i ta tapa e trigu. Na tempu di kosecha, e mal yerba lo ser separá for di e trigu.

  Kumplimentu Kuminsando na 1870, e diferensia entre kristian berdadero i esnan falsu a bira mas i mas bisto. Durante e tempu di fin, kristian berdadero ta ser tresé den e kongregashon i separá for di esnan falsu.

• 

  Teksto Dan. 2:31-33, 41-43

  Profesia Pia di heru i klei di un imágen trahá di vários metal.

  Kumplimentu E klei ta representá hende ku ta bou di e gobièrnu di Gran Bretaña i Merka i ku ta protestá kontra e gobièrnunan ei. Pa motibu di esei, e gobièrnunan ei no por usa tur nan poder.

• 

  

  Teksto Mat. 13:30; 24:14, 45; 28:19, 20

  Profesia “E trigu” ta ser rekohé i ta ser wardá den “mangasina,” i “e esklabo fiel i prudente” ta ser apuntá riba e “sirbidónan di kas.” Predikashon di e bon notisia di e Reino di Dios ta kuminsá plama “den henter e tera habitá.”

  Kumplimentu Na 1919 e esklabo fiel ta ser apuntá riba e pueblo di Dios. Desde e tempu ei, Studiantenan di Beibel ta kuminsá prediká mas i mas. Awe, Testigunan di Yehova ta prediká den mas ku 200 pais i ta produsí publikashon bíbliko na mas ku 1.000 idioma.

• 

  Teksto Dan. 12:11; Rev. 13:11, 14, 15

  Profesia Un bestia salbahe ku dos kachu ta bisa hende pa traha “un imágen pa e bestia salbahe” di shete kabes i ta “supla rosea di bida den e imágen.”

  Kumplimentu Potensia Mundial Angloamerikano ta kuminsá Liga di Nashonnan. E organisashon ei ta haña apoyo di otro nashon. Di 1926 te 1933, e rei di nort tambe ta forma parti di Liga di Nashonnan. Liga di Nashonnan ta haña, meskos ku Nashonnan Uní (NU), e elogio ku solamente e Reino di Dios meresé.

• 

  

  Teksto Dan. 8:23, 24

  Profesia Un rei ku aspekto feros ta trese destrukshon “na un manera ekstraordinario.”

  Kumplimentu Potensia Mundial Angloamerikano a bin ta kousa hopi destrukshon. Por ehèmpel, durante Segundo Guera Mundial, Merka ta tira dos bòm atómiko riba un di e nashonnan enemigu di su aliado. E arma ei ta kousa mas destrukshon ku kualke otro promé kuné.

• 

  Teksto Dan. 11:31; Rev. 17:3, 7-11

  Profesia E bestia “koló kòrá bibu” ku dies kachu ta sali for di abismo i ta e di ocho rei. E buki di Daniel ta referí na e rei ei komo “e abominashon [“ku ta kousa,” NW] desolashon.”

  Kumplimentu Durante Segundo Guera Mundial, Liga di Nashonnan ta kai den inaktividat. Despues di e guera ei, Nashonnan Uní ta “lanta.” Meskos ku Liga di Nashonnan, Nashonnan Uní ta haña e gloria ku e Reino di Dios meresé. Nashonnan Uní lo ataká religion.

• 

  

  Teksto 1 Tes. 5:3; Rev. 17:16

  Profesia E nashonnan ta proklamá “pas i siguridat,” despues “e dies kachunan” i “e bestia salbahe” ta ataká “e prostituta” i ta destruyé. Despues, destrukshon lo bini riba e nashonnan.

  Kumplimentu E nashonnan ta bisa ku nan a logra pas i siguridat. E ora ei, e nashonnan ku ta apoyá Nashonnan Uní ta destruí e organisashonnan di religion falsu. Asina ei e promé fase di tribulashon grandi ta kuminsá. E tribulashon ei lo terminá ku destrukshon di henter e mundu malbado na Armagedon.

• 

  Teksto Eze. 38:11, 14-17; Mat. 24:31

  Profesia Gòg ta invadí e tera di e pueblo di Dios. Despues, e angelnan ta reuní e “skohínan.”

  Kumplimentu E rei di nort, ku yudansa di otro gobièrnu di mundu, ta ataká e pueblo di Dios. Algun tempu despues ku e atake ei kuminsá, e restu di e ungínan ta ser reuní den shelu.

• 

  Teksto Eze. 38:18-23; Dan. 2:34, 35, 44, 45; Rev. 6:2; 16:14, 16; 17:14; 19:20

  Profesia “Esun sintá” riba “un kabai blanku” ta kompletá “su viktoria” ora e destruí Gòg i su ehérsito. “E bestia salbahe” ta ser tirá “den e lago di kandela,” i un piedra ta destruí e imágen grandi.

  Kumplimentu Hesus, e rei di e Reino di Dios, ta sali na defensa di e pueblo di Dios. Huntu ku su 144.000 ko-gobernante i su ehérsito di angel, e ta destruí e koalishon di nashon, esta, henter Satanas su sistema polítiko.