Bo Ta Konfia e Manera Ku Yehova Ta Hasi Kosnan?

1-2. (a) Dikon ta difísil pa hopi awe konfia hende ku tin outoridat? (b) Kiko nos ta bai studia den e artíkulo akí?

PA HOPI hende awe ta difísil pa konfia hende ku tin outoridat. Nan ta mira ku henter e sistema legal i polítiko ta lèn na fabor di e rikunan anto e pobernan nunka ta haña hustisia. Ta manera Beibel ta bisa: “Hende a ehersé outoridat riba un otro hende pa su daño.” (Ekl. 8:9) Ademas, kondukta di algun lider religioso ta laga hopi di deseá i esei a pone ku algun hende a pèrdè fe i konfiansa den Dios. P’esei ora nos tin un studiante di Beibel nos tin ku siñ’é konfia den Yehova i den esnan ku el a nombra aki riba tera.

² Pero, e studiantenan no ta e únikonan ku tin ku siña konfia den Yehova i den su organisashon. Asta nos ku tin basta tempu den e bèrdat, tin ku sigui konfia ku e manera ku Yehova ta hasi kosnan semper ta mihó. Tin biaha por surgi situashon ku por pone nos konfiansa den Yehova na prueba. Den e artíkulo akí, nos lo papia tokante tres di nan: (1) ora nos ta lesa un relato den Beibel, (2) ora nos risibí instrukshon for di Yehova su organisashon i (3) ora nos haña nos ku pruebanan den futuro.

KONFIA YEHOVA ORA BO TA LESA BEIBEL

3. Splika kon sierto relatonan den Beibel por pone nos konfiansa den Yehova na prueba.

³ Segun ku nos ta lesa sierto relato den Beibel, nos por puntra nos mes dikon Yehova a trata algun hende na un sierto manera òf a tuma sierto desishon. Por ehèmpel, na Numbernan nos ta lesa ku tabatin un israelita ku a piki palu riba sabat anto Yehova a sentensi’é na morto. Pero, na 2 Samuel nos ta lesa ku algun siglo despues Yehova a pordoná Rei David aunke ku el a kometé adulterio i a mata un hende. (Num. 15:32, 35; 2 Sam. 12:9, 13) Nos por kuminsá puntra nos mes: ‘Dikon Yehova a pordoná David pa e kosnan grave ku el a hasi pero a kondená un hòmber pa un piká ku no ta parse dje serio ei?’ Pa kontestá e pregunta ei, ta importante pa nos tene tres kos na mente ora nos ta lesa Beibel.

4. Kon Génesis 18:20 i 21 i Deuteronomio 10:17 ta fortalesé nos konfiansa den Yehova su desishonnan?

⁴ No ta semper Beibel ta duna tur detaye. Por ehèmpel, nos sa ku David a arepentí di loke el a hasi. (Sal. 51:2-4) Pero, ki tipo di hende e hòmber ku a kibra e lei di sabat tabata? El a arepentí di loke el a hasi? El a yega di kibra Dios su leinan na otro okashon? A yega di spièrt’é, pero e no a hasi kaso? Beibel no ta bisa. Pero un kos sí nos por tin sigur di dje: Yehova nunka ta kometé inhustisia. (Deu. 32:4) Hende ta husga inkorektamente pasó nan ta laga opinion di otro hende òf prehuisio dominá nan. Pero esei no ta e kaso ku Yehova. Ora e tuma un desishon, e ta tene kuenta ku delaster un detaye. (Lesa Génesis 18:20, 21; Deuteronomio 10:17.) Mas nos siña konosé Yehova i su normanan, mas nos lo konfia su desishonnan. Pues, si un relato den Beibel ta lanta preguntanan ku bo no por kontestá aworakí, loke bo sa tokante Yehova ta sufisiente pa konfia ku e ta “hustu den tur su kamindanan.”—Sal. 145:17.

5. Kon imperfekshon ta afektá nos manera di husga? (Wak tambe e kuadro “Imperfekshon Ta Stroba Nos di Mira Kosnan Manera Yehova Ta Mira Nan.”)

⁵ Debí ku nos ta imperfekto, nos no por husga semper na e manera korekto. Dios a traha nos den su imágen. P’esei, nos no gusta inhustisia. (Gén. 1:26) Pero, debí ku nos ta imperfekto, nos por husga robes, asta ora nos ta kere ku nos tin tur informashon. Por ehèmpel, wak loke a pasa ku Yonas. El a rabia masha pisá ora Yehova a disidí di mustra miserikòrdia na e hendenan di Nínive. (Yon. 3:10–4:1) Pero kiko Yehova a logra ku su desishon? Mas ku 120.000 ninivita a arepentí i a salba. Al fin i al kabo, ta Yonas mester a kambia su manera di pensa, no Yehova.

6. Dikon Yehova no ta obligá pa duna nos splikashon?

⁶ Yehova no debe hende niun splikashon. Ta bèrdat ku Yehova a permití algun di su sirbidónan duna nan opinion tokante algun desishon ku el a tuma òf tabata bai tuma. (Gén. 18:25; Yon. 4:2, 3) Anto tin biaha, el a splika dikon el a tuma sierto desishon. (Yon. 4:10, 11) Pero eigenlijk, Yehova no tin niun obligashon di splika nos su desishonnan. E ta nos Kreador i pa e hasi algu e no tin ku pidi nos aprobashon ni promé ni despues.—Isa. 40:13, 14; 55:9.

KONFIA YEHOVA ORA BO RISIBÍ INSTRUKSHON

7. Kiko por ta difísil pa nos, i dikon?

⁷ Sin duda nos tur ta konvensí ku Yehova semper ta hasi loke ta korekto. Pero kisas nos tin problema pa konfia esnan ku el a skohe pa kuida su pueblo. Nos por kuminsá puntra nos mes: ‘Loke nan ta hasi ei ta ègt loke Yehova ke òf ta kos ku nan mes a bin kuné?’ Kisas esei ta loke algun hende den tempu di Beibel a pensa. Pensa riba e ehèmpel na paragraf 3. Un famia di e hòmber ku a kibra e lei di sabat kisas por a puntra su mes: ‘Di bèrdat Moises a papia ku Yehova promé ku el a bisa e sentensia di morto?’ Anto un amigu di Urías, kende tabata esposo di Bètsabé, por a pensa: ‘David a usa su outoridat komo rei pa skapa kastigu di morto.’ Yehova ta konfia esnan ku el a skohe pa dirigí su pueblo. Pues, si nos no ta konfia nan, nos no por bisa ku nos ta konfia Yehova.

8. Ki similaridat bo ta mira den loke Echonan 16:4 i 5 ta bisa ku e manera ku kongregashonnan ta funshoná awe?

⁸ Awe Yehova ta usa “e esklabo fiel i prudente” pa dirigí e parti di su organisashon ku ta aki riba tera. (Mat. 24:45) Meskos ku e kuerpo gobernante di promé siglo, e esklabo akí ta guia Yehova su pueblo rònt mundu i ta duna e ansianonan di kongregashon instrukshon. (Lesa Echonan 16:4, 5.) E ansianonan na nan turno ta hasi sigur di apliká e instrukshon ei den e kongregashon. Ora nos obedesé instrukshon di e organisashon i di e ansianonan, nos ta mustra ku nos ta konfia e manera ku Yehova ta hasi kosnan.

9. Ki ora por ta difísil pa nos apoyá e desishonnan di e ansianonan, i dikon?

⁹ Tin biaha nos por haña ku ta difísil pa apoyá e desishonnan di e ansianonan. Por ehèmpel, den e último añanan a reorganisá hopi kongregashon i sirkuito. Den algun kaso, pa hasi mihó uso di e Salònnan di Reino, e ansianonan a pidi algun publikadónan pa kambia di kongregashon. Si esei pasa ku nos, nos por sinti ku ta hopi duru pa bai laga nos famia- i amigunan. Akaso Dios ta bisa e ansianonan unda kada publikadó tin ku bai? Nò. Anto kisas ta nèt p’esei nos ta haña ku ta difísil pa nos sigui e instrukshonnan ku nos ta haña. Pero Yehova ta konfia nan desishonnan, i nos tambe tin ku konfia nan.b

10. Segun Hebreonan 13:17, dikon nos mester apoyá e ansianonan?

¹⁰ Dikon ta bon pa nos apoyá e desishonnan di e ansianonan, asta ora nos no ta eens? Pasobra, ora nos hasi esei, nos ta yuda tene Dios su pueblo uní. (Efe. 4:2, 3) Ademas, e kongregashon ta bira fuerte ora nos tur ta humilde i ta apoyá e desishonnan di e kuerpo di ansiano. (Lesa Hebreonan 13:17.) I mas importante ainda, ora nos ta kooperá ku esnan ku Yehova a skohe pa kuida nos, nos ta demostrá Yehova ku nos ta konfi’é.—Echo. 20:28.

11. Kiko por yuda nos konfia mas den e instrukshonnan di e ansianonan?

¹¹ Kiko nos por hasi pa konfia mas den e instrukshonnan ku nos ta haña for di e ansianonan? Esei ta di kòrda ku promé ku nan atendé ku kualke asuntu di e kongregashon, nan ta pidi Yehova pa su spiritu santu. Ademas, nan ta tene kuenta ku prinsipionan di Beibel i e guianan di e organisashon. Nan ke hasi Yehova su kurason kontentu i kuida su pueblo na e mihó manera. E rumannan fiel akí sa ku nan ta responsabel dilanti Yehova pa e manera ku nan ta kuida su pueblo. (1 Ped. 5:2, 3) Pensa riba esaki: mundu awe ta dividí debí na rasa, religion i polítika, pero Yehova su pueblo ta uní i ta adorá e úniko Dios berdadero. E úniko manera ku esaki por ta posibel ta pasobra Yehova ta bendishonando su organisashon.

12. Kiko e ansianonan mester hasi pa wak si un persona a arepentí di kurason?

¹² Yehova a duna e ansianonan un responsabilidat hopi pisá; esei ta di tene e kongregashon limpi. P’esei, si un ruman kometé un piká serio, Yehova ta ferwagt ku e ansianonan lo analisá si e persona akí por keda den kongregashon. Entre otro, nan tin ku haña sa si e persona a arepentí di kurason. Aunke e ta bisa ku el a arepentí, e ta ègt odia loke el a hasi? Si ta mal amistat a pon’é peka, e ta dispuesto pa kibra ku e amistatnan ei? E ansianonan ta hasi orashon na Yehova, ta analisá tur e detayenan di akuerdo ku loke Beibel ta bisa. I nan ta tene kuenta kon esun ku a kometé e piká ta sinti tokante loke el a hasi. Despues, nan ta disidí si e por keda den e kongregashon. Den algun kaso, tin ku ekspuls’é.—1 Kor. 5:11-13.

13. Ki preokupashon nos por tin si un famia òf amigu di nos ser ekspulsá?

¹³ Ta masha fásil pa aseptá desishon di e ansianonan ora ku e persona ku ser ekspulsá no ta un famia òf un bon amigu di nos. Pero kiko si e ta un persona ku nos ta será kuné? Kisas e situashon ei lo pone nos konfiansa den e ansianonan na prueba. Nos por kuminsá pensa ku e ansianonan no a tene kuenta ku tur e detayenan òf ku nan no a husga manera Yehova lo a husga. Kiko por yuda nos apoyá e desishon?

14. Kiko ta e kosnan ku nos tin ku kòrda si e ansianonan disidí ku tin ku ekspulsá un amigu òf famia di nos?

¹⁴ Ta bon pa nos kòrda ku ekspulshon ta parti di Yehova su areglo ku ta benefisiá e kongregashon i esun ku a peka. Si permití un persona ku a peka i ku no a arepentí keda den e kongregashon, e por ta un mal influensia. (Gal. 5:9) Ademas, kisas e no ta mira e gravedat di su piká i ku e tin ku stòp ku loke e ta hasi i kambia su manera di pensa pa e por drecha su amistat ku Yehova. (Ekl. 8:11) Nos por tin sigur ku ora e ansianonan tin ku disidí si un persona mester ser ekspulsá, nan ta tuma e responsabilidat ei hopi na serio. Nan sa ku, meskos ku e huesnan den tempu di Israel, nan no ta husga pa hende sino pa Yehova.—2 Kró. 19:6, 7.

KONFIA DEN YEHOVA AWOR TA SIÑA NOS KONFI’É DEN FUTURO

15. Dikon nos mester konfia Yehova su instrukshonnan awor mas ku nunka?

¹⁵ Segun ku e fin di e mundu malbado akí ta aserkando, ta bira mas i mas importante pa nos konfia Yehova su manera di hasi kosnan. Dikon? Pasobra durante tribulashon grandi, kisas nos por haña instrukshon ku por parse straño, ilógiko òf difísil pa obedesé. Klaru ku Yehova no ta bai papia ku nos direktamente. Probablemente lo e duna nos instrukshon via e rumannan ku ta dirigí. Anto durante e tempu ei no ta momento pa duda i puntra nos mes: ‘Di bèrdat e instrukshonnan ei ta bini di Yehova? Òf ta e rumannan mes ta bin ku nan kosnan?’ P’esei para ketu i puntra bo mes esaki: ‘Lo mi konfia den Yehova i den su organisashon durante e tempu importante ei?’ Wèl, e kontesta ta dependé di e manera ku bo ta sigui instrukshonnan aworakí. Si bo ta konfia den Yehova su instrukshonnan ku bo ta haña awor i ta obedesé nan mesora, chèns ta grandi ku lo bo hasi meskos durante e tribulashon grandi.—Luk. 16:10.

16. Kiko lo pasa den futuro ku por pone nos konfiansa den Yehova na prueba?

¹⁶ Tin un otro kos ku nos tin ku tene kuenta kuné: kon nos lo reakshoná riba e huisionan di Yehova na fin di e mundu malbado akí. Aworakí, nos tur konosé hende, kisas asta den nos famia, ku ègt nos ke pa nan kuminsá sirbi Yehova promé ku e fin yega. Loke nos tin ku kòrda ta ku Yehova, mediante Hesus, lo disidí kiko lo pasa ku nan. (Mat. 25:31-33; 2 Tes. 1:7-9) Pues, no ta nos ta disidí ken lo haña Yehova su miserikòrdia i ken nò. (Mat. 25:34, 41, 46) Nos lo konfia e huisionan di Yehova òf nos lo stòp di sirbié pasobra nos no ta di akuerdo ku su desishonnan? Pues, ta masha importante pa nos fortalesé nos konfiansa den Yehova awor, ya asina nos por konfi’é kompletamente den futuro.

17. Kua ta e benefisionan ku nos lo haña debí na e desishonnan ku Yehova lo tuma na fin di e mundu malbado?

¹⁷ Imaginá bo kon dushi bo ta bai sinti bo ora bo mira den e mundu nobo e resultado di Yehova su bon desishonnan. Religion falsu lo no eksistí mas ni e sistema komersial ku ta golos pa plaka ni e gobièrnunan ku ta oprimí hende. Malesa, behes i morto di un ser kerí lo no ta parti di nos bida mas. Pa mil aña, Satanas i su demoñonan lo no por hasi nos nada. Anto tur e kosnan malu ku a sosodé debí na nan rebelion lo no eksistí mas tampoko. (Rev. 20:2, 3) Nos ta bai ta hopi kontentu ku nos a skohe pa konfia den Yehova su manera di hasi kosnan!

18. Kiko nos ta siña for di e israelitanan? (Numbernan 11:4-6; 21:5)

¹⁸ Ora nos drenta Dios su mundu nobo, lo bai tin pruebanan ku por pone nos duda den Yehova su manera di hasi kosnan? Wak por ehèmpel kiko a pasa ku e israelitanan un poko despues ku nan a ser librá for di sklabitut na Egipto. Algun di nan a kuminsá keha i reklamá pasobra nan tabata sinti falta di e kuminda ku nan tabata haña na Egipto, i nan a kuminsá despresiá e mana ku Yehova tabata duna nan. (Lesa Numbernan 11:4-6; 21:5.) Kisas algu asina tambe por pasa despues di e tribulashon grandi. Nos no sa kuantu lo dura pa hasi e tera limpi i pokopoko hasié un paradeis. P’esei, na komienso kisas lo tin hopi trabou i bida lo no ta dje fásil ei. Durante e tempu ei, lo bo keha di e kosnan ku Yehova ta perkurá? Un kos nos por tin sigur di dje: Mas gradisidu nos ta pa loke Yehova ta perkurá pa nos aworakí, chèns ta hopi mas grandi ku nos lo ta gradisidu pa loke Yehova lo perkurá pa nos den futuro.

19. Kon lo bo resumí e puntonan prinsipal di e artíkulo akí?

¹⁹ Yehova su manera di hasi kosnan semper ta korekto. Nos mester ta konvensí di esei. Ademas, nos tin ku konfia esnan ku Yehova a skohe pa duna nos instrukshon. Nunka lubidá loke Yehova a bisa mediante su profeta Isaías: “Boso lo tin forsa si boso keda kalmu i demostrá konfiansa den mi.”—Isa. 30:15, NW.