“Mantené Boso Sano Huisio i Sea Alerta”!

1. Kiko Hesus a bisa su disipelnan tokante e fin, i ki atvertensia el a duna nan?

UN PAR di dia promé ku Hesus su morto, kuater di su disipelnan a puntr’é: “Kiko lo ta e señal . . . di konklushon di e era akí?” (Mat. 24:3) Probablemente nan tabata puntra nan mes kon nan por sa na ki momento Herúsalèm i su tèmpel lo ser destruí. Hesus su kontesta a referí tantu na e destrukshon di Herúsalèm i su tèmpel komo na e “konklushon di e era” den kua nos ta biba awor. Tokante e fecha di e fin, Hesus a bisa: “Pa loke ta e dia ei òf e ora, ningun hende no sa, ni e angelnan den shelu ni e Yu, sino e Tata so.” Djei el a atvertí su disipelnan pa “keda lantá” i pa “keda vigilá.”​—Mar. 13:32-37.

2. Dikon tabata importante pa e kristiannan di promé siglo keda vigilá?

² E kristiannan di promé siglo ku tabata biba na Hudea mester a keda vigilá. Nan bida a dependé di esei. Hesus a bisa su siguidónan loke nan mester a paga tinu na dje pa nan sa ku Herúsalèm su fin tabata serka. El a bisa nan: “Ora boso mira Herúsalèm rondoná pa ehérsito, boso por ta sigur e ora ei ku su desolashon a yega serka.” Na e momento ei, nan mester a obedesé Hesus su spièrtamentu i “hui bai den seru.” (Luk. 21:20, 21) Ora e romanonan a destruí Herúsalèm, e kristiannan ku a hasi kaso na e atvertensia a sobrebibí.

3. Kiko nos lo trata den e artíkulo akí?

³ Pronto e mundu malbado akí lo yega na su fin. Turesten, nos tambe mester mantené nos sano huisio i keda vigilá. Den e artíkulo akí, nos lo trata kon nos por keda balansá den sentido spiritual segun ku nos ta paga tinu na loke ta pasa den mundu. Nos lo analisá tambe kon pa presta atenshon na nos mes i kon pa usa e tempu ku a sobra na e mihó manera.

SEA BALANSÁ ORA TA SIGUI NOTISIA

4. Dikon nos mester ta interesá den mira kon susesonan di mundu ta kumpli ku profesia di Beibel?

⁴ Hesus a papia di kosnan spesífiko ku lo sosodé pa yuda nos sa ku fin di Satanas su mundu ta yegando serka. (Mat. 24:3-14) Apòstel Pedro a animá nos pa presta atenshon na kumplimentu di profesia pa asina nos fe keda fuerte. (2 Ped. 1:19-21) Ademas, e último buki di Beibel ta kuminsá bisa: “Esaki ta un revelashon di Hesukristu, ku Dios a dun’é, pa e mustra su esklabonan e kosnan ku tin ku sosodé pronto.” (Rev. 1:1) P’esei, nos ta interesá pa mira kon e susesonan di mundu ta kumpli ku e profesianan di Beibel. I kisas nos ta ansioso pa papia di esei ku otronan.

5. Kiko nos mester evitá di hasi, pero kiko sí nos mester hasi? (Wak e plachinan.)

⁵ Ora nos ta kòmbersá ku otronan tokante profesia, nos tin ku evitá di spekulá. Dikon? Pasó nos no ke kousa desunion den e kongregashon. Por ehèmpel, kisas nos ta tende ku gobernantenan di mundu ta konsiderá maneranan pa solushoná un konflikto i asina trese pas i siguridat. Na lugá di kuminsá asumí ku e deklarashon ei ta kumpli ku e profesia na 1 Tesalonisensenan 5:3, nos tin ku keda al dia ku e último informashon ku e organisashon di Yehova ta publiká. Ora nos kòmbersashonnan ta basá riba loke a sali den nos publikashonnan, nos ta yuda e kongregashon keda uní den “mesun opinion.”—1 Kor. 1:10; 4:6.

6. Ki lès nos ta siña for di 2 Pedro 3:11-13?

⁶ Lesa 2 Pedro 3:11-13. Loke Apòstel Pedro a bisa ta yuda nos keda balansá ora nos ta analisá profesia. El a bisa nos pa “kòrda semper riba e binida di e dia di Yehova.” Pa ki propósito? No pa purba di saka ‘fó ki “dia i ora” Yehova lo trese Armagedon, sino pa usa e tempu ku a sobra pa “ta hende di kondukta santu i . . . hasi obranan ku ta demostrá deboshon na Dios.” (Mat. 24:36; Luk. 12:40) Ku otro palabra, nos ke sigui komportá nos mes na e manera korekto i hasi sigur ku tur loke nos ta hasi pa Yehova ta demostrá ku nos ta stim’é masha hopi mes. Pero si nos ke hasi esei, nos mester presta atenshon na nos mes.

KIKO KE MEN PRESTA ATENSHON NA NOS MES?

7. Di ki manera nos ta mustra ku nos ta presta atenshon na nos mes? (Lukas 21:34)

⁷ Hesus a bisa su disipelnan pa presta atenshon no solamente na susesonan di mundu, pero tambe na nan mes. Esei ta bisto den e spièrtamentu na Lukas 21:34. (Les’é.) Hesus a atvertí: “Presta atenshon na boso mes.” Un berdadero kristian ta tene kuidou ku kualke kos ku por daña su amistat ku Yehova i ta hasi loke sea ta nesesario pa protehá su mes. Asina ei, e ta “keda den e amor di Dios.”​—Pro. 22:3; Hudas 20, 21.

8. Kiko Apòstel Pablo a bisa e kristiannan?

⁸ Apòstel Pablo tambe a bisa e kristiannan pa presta atenshon na nan mes. Por ehèmpel, el a bisa e rumannan na Efeso: “Paga bon tinu pa e manera ku boso ta kana no ta manera hende imprudente sino manera hende sabí.” (Efe. 5:15, 16) Konstantemente Satanas ta purba di daña nos amistat ku Yehova. P’esei, Beibel ta konsehá nos pa “sigui komprondé kiko ta e boluntat di Yehova” pa asina nos por protehá nos mes di tur sorto di peliger.​—Efe. 5:17.

9. Kon nos por komprondé kiko ta Yehova su boluntat pa nos?

⁹ Beibel no tin un lista di tur peliger ku por daña nos amistat ku Yehova. Mayoria di biaha nos tin ku tuma desishon riba kosnan ku Beibel no ta papia di dje direktamente. Pa por tuma bon desishon, nos mester komprondé, òf saka afó, kiko ta “e boluntat di Yehova.” Nos ta hasi esei dor di studia Beibel regularmente i meditá riba loke nos ta lesa. Mas nos komprondé Yehova su boluntat i purba di tin “e mente di Kristu,” mas chèns nos tin di kana “manera hende sabí,” asta ora no tin regla presis tokante esei. (1 Kor. 2:14-16) Sierto peliger ta fásil pa mira; pero tin otro nò.

10. Menshoná algun peliger ku nos mester evitá.

¹⁰ Algun peliger ku nos mester evitá ta: flirtmentu, bebementu i komementu di mas, papia kos ku ta hùrt otro hende, pornografia, pelíkula i programa violento i kosnan similar. (Sal. 101:3) Nos atversario, Diabel, konstantemente ta buska manera pa daña nos amistat ku Yehova. (1 Ped. 5:8) Si nos no vigilá, Satanas por sembra den nos mente i kurason simia di envidia, di desonestidat, di golosidat, di odio, di orguyo i di renkor. (Gal. 5:19-21) Na kuminsamentu, e sintimentunan ei lo no ta dje fuerte ei. Pero, si nos no ranka nan mesora, nan lo sigui krese meskos ku un mata venenoso i kousa daño.​—Sant. 1:14, 15.

11. Ki ta un peliger ku no ta fásil pa mira, i dikon nos mester evit’é?

¹¹ Un peliger ku no ta fásil pa mira ta mal amistat. Imaginá ku bo ta traha ku un hende ku no ta Testigu di Yehova. Naturalmente, bo ke p’e pensa bon di Testigunan. Pues, bo ta amabel i servisial. Ratu-ratu bo ta asta kome kuné den pousa. Despues, esei ta bira kos di tur dia. Tin biaha, e ta papia tokante kosnan inmoral. Na promé instante, bo ta sinti inkómodo i no ta gusta. Pero bo ta kustumbrá i ku tempu bo no tin problema ku esei mas. Djei, un dia e ta invitá bo pa ban bebe algu despues di trabou, i bo ta bai. Pokopoko, bo ta kuminsá pensa meskos ku bo kolega. Lo no tarda mashá ku lo bo kuminsá hasi e mesun kosnan ku e ta hasi. Klaru ku nos mester ta amabel i respetuoso ku tur hende. Pero, nos tin ku keda kòrda ku fásilmente nos por bira meskos ku e hendenan ku nos ta pasa tempu kuné. (1 Kor. 15:33) Si nos ke presta atenshon na nos mes, manera Hesus a animá nos, nos tin ku evitá amistat innesesario ku hende ku no ta obedesé Yehova su normanan. (2 Kor. 6:15) Nos lo mira e peliger i keda leu for di dje.

USA BO TEMPU DI E MIHÓ MANERA

12. Kiko Hesus su disipelnan mester a hasi miéntras nan tabata warda fin di Herúsalèm yega?

¹² Hesus no tabata ke pa su disipelnan sinta man krusa miéntras nan tabata warda fin di Herúsalèm yega. P’esei, el a duna nan e trabou di prediká e bon notisia “na Herúsalèm, den henter Hudea i Samaria, i te na e parti mas leu di tera.” (Echo. 1:6-8) Esei sí tabata un trabou inmenso. E disipelnan a usa nan tempu di e mihó manera, hasiendo tur loke nan tabata por pa prediká na otro hende.

13. Dikon nos mester usa nos tempu di e mihó manera? (Kolosensenan 4:5)

¹³ Lesa Kolosensenan 4:5. Pa nos por presta atenshon na nos mes nos tin ku pensa bon kon nos ta usa nos tempu. ‘Suseso inesperá’ por pasa ku kualke un di nos. (Ekl. 9:11) I nos por muri ònferwagt.

14-15. Kon nos por usa nos tempu di e mihó manera? (Hebreonan 6:11, 12) (Wak e plachi.)

¹⁴ Usa nos tempu di e mihó manera ta nifiká us’é pa hasi Yehova su boluntat i fortalesé nos amistat kuné. (Huan 14:21) Nos mester ta “firme, inmovibel, semper teniendo hopi di hasi den e trabou di Señor.” (1 Kor. 15:58) Anto, ora fin di nos bida òf di e mundu malbado akí yega, nos lo no tin duele ku nos no a hasi mas pa Yehova.​—Mat. 24:13; Rom. 14:8.

¹⁵ Awendia tambe Hesus ta guia su disipelnan ku ta prediká e Reino di Dios rònt mundu. Hesus a kumpli ku su promesa di ta ku su disipelnan te na fin. Na nos reunionnan i den nos publikashonnan, e ta siña nos kon pa prediká e bon notisia. Tambe el a duna nos tur loke nos mester pa hasi e trabou ei. (Mat. 28:18-20) Anto nos di nos parti ta partisipá ku smak den e trabou di prediká i di siña hende e bèrdat. Tambe nos ta keda alerta miéntras nos ta warda Yehova trese fin na e mundu malbado akí. Ora nos hasi kaso di e konseho na Hebreonan 6:11 i 12, nos lo tene duru na nos speransa “te na fin.”​—Les’é.

16. Kiko nos ta determiná pa hasi?

¹⁶ Yehova tin un dia i ora fiho pa trese fin na e mundu malbado akí. Ora e fecha ei yega, lo e kumpli ku tur su profesianan den su Palabra. Tin biaha nos por pensa ku e fin ta tarda. Sinembargo, e fecha ku Yehova a fiha lo no ta lat! (Hab. 2:3) P’esei, laga nos keda vigilá, sperando riba Yehova i wardando ku pasenshi “riba e Dios di [nos] salbashon.”​—Mik. 7:7.