Angel Por Influensiá Bo Bida?

Riba un djadumingu mèrdia, Kenneth ku Filomena, kendenan ta biba na Kòrsou, a bai bishitá un pareha ku nan tabata studia Beibel kuné.

Kenneth ta konta: “Ora nos a yega, e kas tabata duru será i e outo no tabat’ei. Pero algu a bisa mi pa yama e señora na telefòn.”

E señora a kontestá e yamada i a bisa ku su kasá tabata na trabou. Pero, asina ku el a mira ku Kenneth ku Filomena tabata einan, el a invitá nan drenta paden.

Mesora ku e señora a habri porta, nan a ripará ku e tabata yora. Kenneth a hasi un orashon pa kuminsá ku e estudio di Beibel, pero e señora a bolbe kuminsá yora. Pues Kenneth ku Filomena a puntr’é ta kiko a pas’é.

E señora a splika ku e atardi ei mes e kier a mata su kurpa, i e tabata skirbiendo un karta pa su kasá ora Kenneth su yamada a par’é. E señora a bisa nan ku e tabata sufri di depreshon, pues nan a lesa algun teksto di Beibel pa konsol’é. E animashon ei a salba bida di e señora.

Kenneth a bisa: “Nos a gradisí Yehovaa ku el a laga nos yuda e señora desesperá akí, i spesialmente pasobra el a motivá nos, kisas mediante un angel òf spiritu santu, pa yama e señora na telefòn.”

Kenneth ku Filomena por pensa ku ta Dios a intervení, sea pa medio di angel òf pa medio di su spiritu santu, òf su forsa aktivo? Òf Kenneth su yamada tabata djis pa kasualidat?

Nos no por bisa sigur. Pero nos sa sí ku Dios ta usa su angelnan pa yuda hende den sentido spiritual. Por ehèmpel, Beibel ta bisa ku Dios a usa un angel pa guia e evangelisadó kristian Felipe pa bai serka un ofisial etiope ku tabata buska yudansa spiritual.—Echonan 8:26-31.

Vários religion ta promové e kreensia ku ta eksistí kriaturanan spiritual sobrenatural i ku algun di nan ta kriaturanan bondadoso ku ta kumpli ku e boluntat di Dios òf ku ta angel wardadó ku ta protehá nos. Hopi hende no solamente ta kere ku angel ta eksistí sino ku nan ta influensiá nos bida tambe. Pero, tambe tin hopi otro hende ku no ta kere mes den angel.

Angel ta eksistí di bèrdat? Si ta asina, di unda nan a bini? Kiko Beibel ta bisa di angel? Nan por influensiá bo bida? Ban wak e kontestanan pa e preguntanan ei.