Bida di Famia Felis Ta Posibel!

UN SEÑORA di e stat Maladzyechna na Belarus a skirbi e ofisina di sukursal di Testigunan di Yehova na Rusia. El a splika ku e ta kasá i tin dos yu. El a skirbi: “Ami ku mi kasá ta stima otro. Sin embargo, mi a ripará ku segun tempu ta pasa mas nos ta rabia i pleita ku otro, i aparentemente sin ningun motibu. Un par di luna pasá un persona ku mi no konosé a pará mi riba kaya i a duna mi un tratado ku e título Disfrutá di Bida di Famia. Na promé instante, e plachi bunita di un famia felis a hala mi atenshon. Mas despues mi a lesa e informashon i mi a duna mi esposo e tratado p’e tambe les’é.

Ta komo si fuera un milager a sosodé, pasobra mi bida di famia no a drecha so, sino, mi por bisa ku el a kambia kompletamente. Awor nos ta komprendé ku no ta asina difísil pa ser felis. Tur loke bo tin ku hasi ta mustra kariño sinsero i di kurason i duna di bo mes. Tambe bo mester biba di akuerdo ku e mandamentunan di Dios i stima hende, inkluso miembronan di famia i hende straño.”

El a konkluí bisando: “Nos bida a bira mas plasentero i felis. Nos kier sigui studia Beibel i siña nos yunan.”

Nos ta kere ku abo tambe por disfrutá di e tratado Disfrutá di Bida di Famia. Nos lo ta kontentu tambe pa manda pa bo e buki di 192 página titulá E Secreto pa Felicidad den Famia. Pa bo haña un ehemplar di e tratado i tambe e buki, yena por fabor e kupòn aki bou i mand’é n’e adrès riba e kupòn òf na un adrès mas kumbiniente menshoná na página 5 dje revista aki.

□ Manda pa mi un ehemplar di e tratado Disfrutá di Bida di Famia i e buki E Secreto pa Felicidad den Famia.

□ Por fabor, tuma kontakto ku mi pa un studio di Beibel grátis na kas.