Librá for di Prizon

MIRA e angel ei ta tene e porta di prizon habrí. E ta libra e apòstelnan di Hesus. Laga nos mira pakiko nan tabata den prizon.

Ta djis un poko tempu so a pasa desde ku spiritu santu a ser dramá riba e disipelnan di Hesus. I esaki ta loke a sosodé: Pedro i Juan a drenta e tèmpel na Yerusalèm un atardi. Serka di e porta tabatin un hòmber ku a nase koho. Hende tabata karg’é trese einan tur dia pa e por pidi plaka serka e hendenan ku tabata drenta e tèmpel. Ora el a mira Pedro i Juan, el a pidi nan dun’é algu. Kiko e dos apòstelnan a hasi?

Nan a para i a wak e pober hòmber. Pedro a bisa: ‘Mi no tin plaka, pero mi ta duna bo loke mi tin. Den nòmber di Hesus, lanta i kana!’ Anto Pedro a tene man drechi di e hòmber, i el a bula lanta umbes i a kuminsá kana. Ora e hendenan a mira esei nan a keda asombrá i masha kontentu ku e milager maravioso.

Pedro a bisa: ‘Ta ku e poder di Dios, kende a lanta Hesus for di morto, nos a hasi e milager ei.’ Miéntras Pedro i Juan tabata papia, algun lider religioso a pasa. Nan a rabia pasobra Pedro i Juan a bisa e pueblo ku Dios a lanta Hesus for di morto. P’esei nan a gara Pedro i Juan i a sera nan den prizon.

Su siguiente dia e lidernan religioso a tene un reunion grandi. Nan a trese Pedro i Juan huntu ku e hòmber ku nan a kura nan dilanti. E lidernan religioso a puntra nan: ‘Ku ki poder boso a hasi e milager aki?’

Pedro a bisa nan ku ta ku e poder di Dios, kende a lanta Hesus for di morto. E saserdotenan no sa kiko pa hasi, pasobra nan no por nenga ku un milager maravioso realmente a sosodé. P’esei nan a spièrta e apòstelnan pa no papia mas tokante Hesus, i despues a laga nan bai.

Segun ku dianan a pasa e apòstelnan a sigui prediká tokante Hesus i a kura hende enfermo. Notisia di e milagernan ei a plama. I p’esei asta for di e pueblonan rònt di Yerusalèm multitut di hende tabata trese hende enfermo pa e apòstelnan kura nan. Esei a hasi e lidernan religioso yalurs, i p’esei nan a kohe e apòstelnan i a sera nan den prizon. Pero nan no a keda ei hopi tempu.

Durante anochi un angel di Dios a habri porta di e prizon, manera bo ta mira ei. E angel a bisa: ‘Bai i para den e tèmpel, i sigui papia ku e pueblo.’ Su manisé ora e lidernan religioso a manda hòmber na e prizon pa trese e apòstelnan, nan no tabat’ei. Despues, nan a haña nan siñando hende den tèmpel i nan a hiba nan na e sala di Sanedrin.

E lidernan religioso a bisa nan: ‘Nos a prohibí boso estriktamente pa no siña mas tokante Hesus. Pero boso a yena Yerusalèm ku boso siñansa.’ Anto e apòstelnan a kontesta: ‘Nos mester obedesé Dios komo gobernante mas bien ku hende.’ P’esei nan a sigui siña e “bon nobo.” Esei no ta un bon ehèmpel pa nos sigui?