Abraham—Un Amigu di Dios

UN LUGÁ unda hende a bai biba despues di Diluvio tabata yamá Ur. El a bira un stat importante ku bon kas den dje. Pero e hendenan ei tabata adorá dios falsu. Asina nan tabata hasi na Babel tambe. E hendenan di Ur i Babel no tabata manera Noe i su yu Sèm, ku a sigui sirbi Yehova.

Finalmente, 350 aña despues di e diluvio, fiel Noe a muri. Dos aña so despues di esei e hòmber ku bo ta mira riba e plachi a nase. E tabata un persona masha spesial pa Dios, yamá Abraham. El a biba ku su famia den e stat Ur.

Un dia Yehova a bisa Abraham: ‘Bandoná Ur i bo famia, i bai biba den un tera ku lo mi mustra bo.’ Abraham a obedesé Dios i laga atras tur e bon bida na Ur? Sí, el a hasié. I pa motibu ku Abraham semper a obedesé Dios, el a yega di ser yamá amigu di Dios.

Algun miembro di famia di Abraham a bai huntu kuné ora el a bandoná Ur. Su tata Taré a bai kuné. Su subrino Lòt tambe. I naturalmente, su esposa Sara tambe a bai kuné. Ku tempu nan tur a yega Haran, unda Taré a muri. Nan tabata leu for di Ur.

Despues di un tempu Abraham i su famia di kas a bandoná Haran i a yega na e tera yamá Kánaan. Ei Yehova a bisa: ‘Esaki ta e tera ku lo mi duna bo yunan.’ Abraham a keda na Kánaan i a biba den tènt.

Dios a kuminsá yuda Abraham di tal manera ku el a haña tou grandi di karné i otro bestia i sientos di kriá. Pero Abraham ku Sara no tabatin yu di nan mes.

Ora Abraham tabatin 99 aña di edat, Yehova a bis’é: ‘Mi ta primintí bo ku lo bo bira tata di hopi nashon di pueblo.’ Pero, kon esei por a sosodé? Abraham ku Sara tabata muchu bieu kaba pa haña yu.