Hesus A Nase na Desèmber?

BEIBEL no ta bisa nos ki tempu Hesus a nase. Sin embargo, e ta duna nos motibu válido pa konkluí ku su nasementu no a tuma lugá na desèmber.

Konsiderá kon wer ta den e temporada ei di aña na Bètlehèm, kaminda Hesus a nase. E luna hudiu di kisleu (ku ta korespondé ku novèmber/desèmber) tabata un luna di wer friu i hopi áwaseru. E luna despues di esei tabata tebet (desèmber/yanüari), i e tabatin e temperatura di mas friu di aña. De bes en kuando asta sneu tabata kai den e partinan ku tin seru. Laga nos mira kiko Beibel ta konta nos di e klima di e region ei.

E eskritor bíbliko Esdras ta mustra ku kisleu tabata en bèrdat un luna konosí pa wer friu i hopi áwaseru. Despues di deklará ku un multitut a reuní na Yerusalèm den “e di nuebe luna riba e di binti dia di e luna,” Esdras ta informá ku e pueblo tabata “temblando . . . pa motibu di e áwaseru pisá.” Relashoná ku e wer den e tempu ei di aña, e pueblo reuní mes a bisa: “Ta tempu di áwaseru, asina ku nos no por para pafó.” (Esdras 10:9, 13; Jeremias 36:22) Nada straño anto ku wardadónan di karné ku a biba den e parti ei di mundu tabata sòru pa nan i nan tou no ta pafó mas ora desèmber yega.

Sin embargo, Beibel ta informá ku riba e anochi ku Hesus a nase, wardadó di karné tabata den sabana ta atendé nan tou. De echo, e eskritor bíbliko Lukas ta mustra ku e tempu ei “tabatin wardadónan ku tabata keda den e sabananan, i ku anochi tabata tene warda riba nan tou di karné” serka di Bètlehèm. (Lukas 2:8-12) Tuma nota ku e wardadónan tabata keda den sabana, nan no a djis bai kana pafó un ratu durante dia. Nan tabatin nan tou den sabana anochi. E deskripshon di keda den sabana ta kuadra ku e wer friu i di hopi áwaseru ku tin na Bètlehèm den desèmber? Nò, e no ta kuadra. Pues anto, e sirkunstansianan rònt di e nasementu di Hesus ta indiká ku e no a nase na desèmber.a

E Palabra di Dios ta konta nos presis ki dia Hesus a muri, pero e ta duna masha tiki indikashon direkto pa loke ta ki dia el a nase. Esaki ta laga nos kòrda riba e palabranan di Rei Salomon: “Un bon nòmber ta mihó ku un bon ungwento, i e dia di un hende su morto ta mihó ku e dia di su nasementu.” (Eklesiastés 7:1) No ta un sorpresa anto ku Beibel ta duna hopi detaye tokante Hesus su ministerio i morto pero tiki detaye tokante e dia di su nasementu.