Kon Bida A Kuminsá Riba Tera?

Beibel ta bisa tokante Dios: “Ta abo a krea tur kos.” (Revelashon 4:11) Bo ta kere esei? Algun hende ta bisa ku no ta eksistí un Kreador. Si esei ta bèrdat, e ora ei nos ta na bida djis pa kasualidat. Pero si ta Yehova Dios a krea bida, bo no ta kere ku bida lo tin un propósito?a Awor, laga nos wak kiko Beibel ta bisa tokante kon bida a kuminsá i ki bon motibu nos tin pa kere loke Beibel ta bisa.

1. Kon universo a bini na eksistensia?

Beibel ta bisa: “Na kuminsamentu, Dios a krea shelu i tera.” (Génesis 1:1) Mayoria di sientífiko ta di akuerdo ku nos universo tabatin un komienso. Kon Dios a krea universo? Dios a usa su forsa aktivo, esta, spiritu santu, pa krea tur kos ku tin den universo, inkluso galaksia, strea i planeta.—Génesis 1:2.

2. Dikon Dios a krea tera?

Yehova “no a krea tera pòrnada. Mas bien, el a form’é pa e ser habitá.” (Isaías 45:18) El a krea tera pa e ta un dushi hogar pa hende. Ademas, el a duna nan tur loke nan tin mester pa biba pa semper. (Lesa Isaías 40:28 i 42:5.) E sientífikonan ta bisa ku nos planeta ta úniko. Nan no a deskubrí niun otro planeta ku tin tur loke hende mester pa nan por biba.

3. Kiko ta hasi hende diferente for di bestia?

Despues ku Yehova a traha tera, el a krea bida riba dje. Promé, el a krea mata i bestia. Despues “Dios a krea hende segun su imágen.” (Lesa Génesis 1:27.) Kiko ta hasi hende úniko? Komo ku Dios a krea nos den su imágen, nos por desplegá su kualidatnan manera amor i hustisia. Ademas, el a krea hende ku e kapasidat pa por siña idioma i pa disfrutá di arte i di dushi músika. Anto diferente for di bestia, hende por sera un amistat ku nan Kreador.

KIKO MAS NOS POR SIÑA?

Laga nos wak ki prueba tin ku ta Dios a diseñá tur loke tin den naturalesa, i wak ki bon motibu nos tin pa kere loke Beibel ta bisa tokante kreashon. Laga nos wak tambe kiko e bon kualidatnan ku nos tin ta siña nos tokante Dios.

4. Dios a diseñá tur loke tin den naturalesa

Hende ta haña rekonosementu pa diseño ku nan a kopia for di naturalesa. Pero, ken tin ku haña rekonosementu pa e diseñonan ku nos ta mira den naturalesa? Pasa e VIDIO. Despues, analisá e siguiente pregunta:

VIDIO: Kere den Dios (2:43)

• Kiko ta algun diseño ku hende a kopia for di naturalesa?

Ta hende a diseñá i traha tur kas. Pero ken a diseñá i krea tur loke nos ta mira den naturalesa? Lesa Hebreonan 3:4. Awor, analisá e siguiente preguntanan:

• Ki diseño den naturalesa ta impreshoná bo?

• Bo ta haña ta lógiko pa pensa ku tin un persona ku a diseñá universo i tur loke tin den dje? Dikon bo ta pensa asina?

Bo tabata sa?

Bo por haña artíkulo i vidio tokante e tópiko akí riba jw.org bou di e seri titulá “Un Persona A Diseñ’é?” i bou di e sekshon “Punto di Bista Tokante e Orígen di Bida.”

“Naturalmente, ta hende a traha tur kas, ma esun ku a traha tur kos ta Dios”

5. Nos tin bon motibu pa kere loke Beibel ta bisa tokante kreashon

VIDIO: Nos Universo A Ser Kreá?—Fragmento (3:51)

• Beibel ta siña ku Dios a krea nos planeta i bida riba dje den seis dia di 24 ora?

• Bo ta haña ku e relato di Beibel tokante kreashon ta lógiko? Dikon bo ta pensa esei?

Lesa Génesis 1:1. Despues, analisá e siguiente pregunta:

• E sientífikonan ta bisa ku universo tabatin un komienso. Kon loke e sientífikonan ta bisa ta kuadra ku loke bo a kaba di lesa den Beibel?

Tin hende ta puntra nan mes si Dios a usa evolushon pa krea bida, esta, ku el a krea un simpel sèl i a laga esaki kambia i bira diferente sorto di bida. Lesa Génesis 1:21, 25, 27. Despues, analisá e siguiente preguntanan:

• Beibel ta siña ku Dios a usa evolushon pa forma bestia i hende? Òf el a krea tur “sorto” di bida?b

6. Hende ta un kreashon masha spesial di Dios

Yehova a krea tantu hende komo bestia. Sinembargo, hende ta diferente for di bestia. Beibel ta bisa ku Dios a krea nos den su imágen. Lesa Génesis 1:26. Awor, analisá e siguiente pregunta:

• Komo ku nos por desplegá kualidat manera amor i kompashon, ki tipo di persona bo ta kere Dios ta?

RESÚMEN

Yehova a krea universo i tur ser bibu.

Repaso

• Segun Beibel, kon nos universo a bini na eksistensia?

• Akaso Dios a krea un simpel sèl i a laga tur sorto di bida evolushoná for di e sèl ei, òf el a krea tur sorto di bida?

• Den ki sentido hende ta úniko?

MAS INFORMASHON INTERESANTE

Wak ehèmpel di algun kos den naturalesa ku ta mustra ku tin un Kreador.

“Kiko Nos Ta Siña for di Naturalesa?” (Spièrta! di sèptèmber 2006)

Wak kon un tata ta splika su yu hòmber chikitu e relato di kreashon ku tin den Beibel.

“Yehova . . . A Krea Tur Kos” (2:37)

Wak si e teoria di evolushon ta kuadra ku loke Beibel ta bisa.

“Dios A Usa Evolushon pa Krea Diferente Sorto di Bida?” (artíkulo riba jw.org)

Wak si fosil òf wesu antiguo i eksperimento ku algun sientífiko a hasi ta mustra ku bida a ser kreá òf si bida a originá pa kasualidat.

Sinku Pregunta Importante Tokante Orígen di Bida (foyeto, na spañó)