Dikon Nos Mester Usa e Nòmber di Dios?

E artíkulo akí ta trata algun pregunta ku kisas bo tin i ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Dikon Dios tin un nòmber pa su mes?

Hende gusta pa bo yama nan na nan nòmber i no “mener,” “yònkuman,” “señora” òf “yùfrou.” Nòmber ta yuda distinguí un persona for di otro. Ta bèrdat ku Beibel ta usa sierto títulonan pa referí na Dios, manera por ehèmpel “Señor Dios,” “Dios Todopoderoso” i “Kreador.” (Génesis 15:2; 17:1; Eklesiástes 12:1) No opstante, Dios a duna su mes un nòmber pa asina nos por tin un amistat íntimo kuné. I e nòmber ei ta Yehova.—Lesa Éksodo 3:14, 15.a

E nòmber Yehova ta aparesé kasi 7.000 biaha den e manuskritonan hebreo di antigwedat. Ma hopi traduktor di Beibel a remplasá e nòmber di Dios pa títulonan, manera “Dios” òf “Señor.” Pero e echo ku Dios su nòmber ta aparesé hopi biaha den Beibel ta mustra ku Dios ke pa hende sa su nòmber.—Lesa Isaías 12:4.

2. Dikon ta importante pa konosé e nòmber di Dios?

Segun Beibel, konosé e nòmber di Dios ta enserá mas ku djis sa kiko e nòmber ta. E ta enserá tambe tin un bon relashon ku Dios. E nòmber Yehova ta nifiká: “E Ta Kousa pa Bira.” Esaki ta un garantia ku Yehova lo hasi loke sea ta nesesario pa kumpli ku su propósito. Pues, konosé Dios su nòmber ta enserá ku bo tin pleno konfiansa ku Dios lo kumpli ku su promesanan. (Salmo 9:10) Anto fe ta motivá hende ku konosé Dios i ku ta usa su nòmber pa konfia den dje i pone su adorashon na promé lugá den nan bida. I Yehova Dios, na su turno, lo protehá hende asina.—Lesa Salmo 91:14.

3. Dikon Dios ke pa hende konosé su nòmber?

Dios ke pa hende konosé su nòmber pasobra esei ta benefisiá nan. Nan por bira su amigu i por tin e speransa di biba pa semper. P’esei no ta nada straño ku Dios ke pa nos hasi su nòmber konosí.—Lesa Huan 17:3; Romanonan 10:13, 14.

Hesus a hasi Dios su nòmber konosí. Kon? El a siña hende ki klase di Dios Yehova ta, kiko ta su mandamentunan i su promesanan. Awe, Hesus su disipelnan ta sigui hasi Dios su nòmber konosí na hende di tur nashon. Nan ta hasi esei komo un pueblo uní ‘ku ta karga Dios su nòmber.’—Lesa Echonan 15:14; Huan 17:26.

4. Kon Dios lo glorifiká su nòmber?

Yehova Dios lo glorifiká su nòmber pasobra su nòmber a ser difamá. Por ehèmpel, algun hende ta bisa ku no ta Dios a krea tur loke tin bida i ta p’esei nos no mester obedes’é. Otronan ta bisa ku Dios no ta interesá den hende i ku ta é ta responsabel pa e sufrimentu ku tin na mundu. Pero hende lo sigui difamá e nòmber di Dios pa semper? Nò! Pronto, Dios lo destruí tur esnan ku ta desonrá su nòmber.—Lesa Salmo 83:17, 18.

Yehova lo glorifiká su nòmber ora su Reino pone un fin na tur gobernashon humano i trese pas i siguridat pa humanidat. (Daniel 2:44) Sí, pronto tur hende lo sa ku Yehova ta e Dios berdadero.—Lesa Ezekiel 36:23; Mateo 6:9.

Awor, kiko abo mester hasi? Hala serka Dios. Kon bo por hasi esei? Bo mester studia su Palabra i asosiá ku personanan ku ta stim’é. Ora Yehova glorifiká su nòmber, lo e kòrda ken ta su sirbidónan fiel i rekompensá nan.—Malakías 3:16.

Pa mas informashon, wak kapítulo 1 di e buki akí, Kiko Beibel Ta Siña Realmente?, publiká pa Testigunan di Yehova.

[Nota]

[Plachi na página 10]

E nòmber di Dios den un manuskrito hebreo di antigwedat