Kiko Dios Ta Pensa di Union Entre Tur Religion?

SINEMBARGO, hende ku ta promové union entre tur religion tin un punto di bista kompletamente diferente. E fundadó di e organisashon Interfaith Youth Core, Eboo Patel, a puntra: “Bisa mi kua religion no ta haña ku kompashon ta algu importante . . . , no ta interesá den kuida medio ambiente . . . , no ta interesá den mustra hospitalidat.”

Ta bèrdat ku hopi religion, inkluso budista, katóliko, protestant, hindú i mòslem, a yega di uni forsa pa kombatí pobresa, lucha pa derechonan humano i pa prohibí uso di mina (eksplosivo derá bou di tera) òf pa hala atenshon na problemanan di medio ambiente. Hopi religion ta bini huntu pa buska manera pa komprondé otro mihó i pa kompartí nan ideanan ku otro. Nan ta selebrá nan union mediante seremonia ku bela, festival, músika, orashon i otro aktividatnan.

E religionnan por solushoná nan konfliktonan si nan uni ku otro? Esaki ta e manera ku Dios ke hasi e mundu un mihó lugá pa biba?

UNION—A KOSTO DI KIKO?

Un di e organisashonnan di mas grandi ku ta promové union entre tur religion ta gaba ku e ta aktivo den 76 pais i ku su miembronan ta representá mas ku 200 religion. Su meta ta “pa promové kooperashon duradero i riba un base diario entre tur e religionnan.” Pero no ta fásil pa logra esei. Por ehèmpel, segun e fundadónan di e organisashon, nan mester a formulá nan statutonan di tal manera pa e no ofendé e tantísimo religionnan ku a firm’é. Dikon? Un motibu ta ku no ta nan tur tabata di akuerdo pa menshoná Dios den e dokumento. P’esei, nan a evitá di referí na Dios sea direktamente òf indirektamente.

Si nan ta laga Dios keda afó, anto ta kiko ta e diferensia entre un organisashon di union entre tur religion i un organisashon karitativo? Ta p’esei e organisashon ei ta bisa ku e no ta un entidat religioso, sino un organisashon ku ta promové kooperashon.

TA SUFISIENTE PA RELIGION DJIS PROMOVÉ BON KALIDAT DEN HENDE?

E Dalai Lama, kende ta bon konosí pa su esfuersonan den promové union entre tur religion, a bisa: “Tur religion básikamente tin e mesun mensahe: mustra amor, kompashon i pordoná.” Tambe el a bisa: “E kos importante ta ku e kualidatnan akí mester forma parti di nos bida di tur dia.”

Sí, ta sumamente importante pa mustra amor, kompashon i pa pordoná otro. Hesus a duna un siñansa universal ora el a bisa: “Tur loke boso ke pa hende hasi ku boso, boso tambe mester hasi ku nan.” (Mateo 7:12) Pero e echo ku un religion ta djis promové bon kualidat den hende ta hasié esun berdadero?

Den tempu di apòstel Pablo, tabatin hopi hende ku tabata bisa ku nan ta sirbi Dios. Pero Pablo a bisa tokante nan: “Mi ta duna testimonio ku nan tin zelo pa sirbi Dios, ma no segun konosementu eksakto.” Kiko tabata e problema? Pablo a sigui bisa: “Pasobra komo ku nan no sa a base di kiko Dios ta konsiderá un hende hustu, nan ta trata di demostrá na nan manera ku nan ta hustu.” (Romanonan 10:2, 3) Komo ku nan no tabata sa eksaktamente kiko Dios tabata ke pa nan hasi, nan zelo—i fe—tabata enbano.—Mateo 7:21-23.

LOKE BEIBEL TA BISA TOKANTE UNION ENTRE TUR RELIGION

Hesus a bisa: “Felis ta esnan pasífiko.” (Mateo 5:9) Hesus a animá hende pa no usa violensia i a prediká un mensahe di pas na hende di un variedat di religion. I e mes tambe a praktiká loke el a prediká. (Mateo 26:52) Esnan ku a aseptá su mensahe a bira parti di un hermandat ku ta uní den un laso inkebrantabel di amor. (Kolosensenan 3:14) Pero Hesus su meta tabata simplemente pa promové union entre hende di diferente religion pa asina nan por biba na pas ku otro? Hesus a uni ku otro hende den nan aktividatnan religioso?

E lidernan religioso di e sekta di e fariseonan i di e saduseonan a persiguí Hesus kruelmente i asta a buska manera pa mat’é. Kon el a reakshoná? Hesus a bisa su disipelnan: “Laga nan. Ta guia siegu nan ta.” (Mateo 15:14) Pues, Hesus no a promové union religioso ku e tipo di hendenan ei.

Poko tempu despues, un kongregashon kristian a keda establesí na Korintio (Gresia). E stat ei tabata bon konosí pa su gran variedat di religion i kultura. Kon e kristiannan di e stat ei mester a komportá nan mes den un ambiente asina? Apòstel Pablo a mustra klaramente ku nan no mester a djòin otro hende den nan adorashon. El a bisa: “Pasobra ki relashon hustisia tin ku maldat? Òf kiko lus tin en komun ku skuridat? Ademas, ki armonia tin entre Kristu i Belial [òf, Satanas]?” Despues el a konsehá nan: “P’esei, sali for di meimei di nan, i separá boso.”—2 Korintionan 6:14, 15, 17.

Pues, ta bisto ku Beibel no ta apoyá union entre religion. Pero kisas bo ta puntra bo mes, ‘ta kon anto hende por logra berdadero union?’

KON PA LOGRA BERDADERO UNION?

Mas o ménos 15 nashon a uni huntu pa traha e International Space Station, un maravia di teknologia ku ta drei rònt di planeta Tera. Bo ta kere ku e nashonnan ei lo a logra esei si nan no tabata di akuerdo ku otro enkuanto ki diseño òf mapa pa usa?

Básikamente, bo por kompará esei ku e situashon di organisashonnan den nos tempu ku ke logra union entre tur religion. Aunke nan ta boga pa kooperashon i rèspèt, tòg nan no ta di akuerdo ku otro enkuanto, na moda di papia, ki mapa pa usa komo base pa edifiká nan fe. Komo resultado, nan ta mas dividí ku nunka den asuntu di doktrina i moralidat.

Beibel ta kontené Dios su normanan, ku ta manera e instrukshonnan ku tin riba un mapa. Si nos laga e normanan ei guia nos, nos lo tin un mihó bida. Hende ku ta apliká loke Beibel ta bisa ta vense prehuisio rasial i religioso i ta siña traha huntu den pas i armonia. Dios a profetisá esei na e siguiente manera: “Lo mi duna e pueblonan lepnan purifiká, pa nan tur por invoká e nòmber di SEÑOR, pa sirbié den ún akuerdo.” (Sofonías 3:9) Na e idioma original “lepnan purifiká” ta referí na un idioma puru, esta, Dios su normanan elevá di adorashon. Ta e idioma puru akí ta loke ta uni hende.—Isaías 2:2-4.

Testigunan di Yehova ta invitá bo kordialmente pa bin bishitá nan na un Salòn di Reino serka di bo kas pa bo mes mira e pas i armonia remarkabel ku ta reina entre nan.—Salmo 133:1.