Mundu Ta Gasta Mas ku 2 Bion Dòler na Defensa Militar—Kiko Beibel Ta Bisa?

E kantidat di plaka ku mundu den su totalidat ta gasta na defensa militar a kibra tur rèkòrt. Na aña 2022, e suma a surpasá 2.24 bion dòler merikano. Esaki ta debí prinsipalmente na e invashon di Rusia na Ukrania. Stockholm International Peace Research Institute (SIPRI) a saka un rapòrt na aprel 2023 ku ta mustra ku durante aña 2022:

• E kantidat di plaka ku Europa ta gasta na defensa militar “a subi ku 13 porshento durante e aña ei. Esei tabata e oumento anual di mas grandi ku Europa tabatin durante e periodo despues di e guera friu.”

• “Rusia . . . a oumentá e kantidat di plaka ku nan ta gasta na defensa militar ku mas o ménos 9,2 porshento. Esei a pone ku nan a bai for di e di sinku lugá pa di tres lugá na mundu pa loke ta trata e paisnan ku ta gasta mas plaka na defensa militar.”

• Merka ta keda e pais ku ta gasta mas plaka na defensa militar. Loke nan ta saka ta “ekivalente na 39 porshento di loke mundu en total ta saka na defensa militar.”

Dr. Nan Tian, un di e outornan di e rapòrt di SIPRI a bisa: “E oumento kontinuo den invershon militar ku nos ta mira durante e añanan resien ta un indikashon ku nos ta bibando den un mundu ku ta birando mas i mas insigur.”

Beibel a profetisá ku den nos tempu lo tin mas i mas tenshon entre e potensianan mundial. Beibel ta revelá tambe e úniko speransa pa pas.

Beibel a bisa adelantá ku lo tin mas konflikto militar

• Beibel ta yama e tempu ku nos ta biba aden “e tempu den kua e fin lo yega.”—Dánièl 8:19.

• E buki Dánièl a profetisá ku durante e tempu ei vários potensia mundial lo ta den “konflikto” ku otro. E potensianan mundial akí lo batayá ku otro pa haña mas poder. E bringamentu ei lo trese kuné ku e paisnan lo gasta hopi ‘tesoro,’ òf rekurso finansiero.—Dánièl 11:40, 42, 43.

Pa haña sa mas tokante e profesia bíbliko interesante akí, wak e vidio Kumplimentu di Profesia—Daniel Kapítulo 11.

Kon berdadero pas lo ser realisá

• Beibel ta bisa ku Dios lo remplasá tur e gobièrnunan humano. Dios lo “lanta un reino ku nunka lo ser destruí. E reino akí lo no kai bou di dominio di niun otro pueblo. E reino akí lo destruí i pone un fin na tur e reinonan ei, i e reino akí so lo keda pa semper.”—Dánièl 2:44.

• Pronto Yehovaa Dios lo hasi loke niun hende no por hasi: sòru pa berdadero pas, pas ku lo dura pa semper. Kon Dios lo hasi esei? Su Reino, òf gobièrnu selestial, lo destruí tur arma i kaba ku tur violensia.—Salmo 46:8, 9.

Pa haña sa kiko mas e Reino di Dios lo logra, lesa e artíkulo: “Bou di e Reino di Dios Lo ‘Tin Abundansia di Pas.’”