Reksi, ngdiak di el Cheldecheduch
“Ng mle blak a renguk el mesuub ngii el tekoi el rokui er a uchelel el mei.”—LUKAS 1:3.
NGERA ME A BIBLIA A NGODECH ER A ROKUI EL BABIER? A cheldecheduch el chelid a mesaod a mengasireng el tekoi el diak a ulterekokl el omesodel el kmo aika el tekoi a dilubech er ker er oingerang me a ngklir a rechad. Engdi a Biblia a kuk ngar er ngii a kmal betok el omesodel a uchul me ngkmal ulterekokl a rengud el kmo: ‘A cherrengelel a tekingel a di klemerang.’—Psalm 119:160.
EL UA TIANG: A Biblia a ouchais el kmo: “A king el Nebukadnesar . . . a ngiluu a Jehoiakin el blebaol el mor a Babilon.” E a uriul “er a bo le king er a Babilonia Ebilmerodak, e ng mlo ungil a tekingel el mor a Jehoiakin el king er a Juda me ng ngilbetii er a kelebus.” Me a lmuut el tang, “a Ebilmerodak a . . . mle bek el sils el lomsa [Jehoiakin a] ududel el kirel a ikel lousbech.”—2 King 24:10, 15; 25:27-30.
A TEKOI EL BLA LEBETIK A RECHAD: A rechad el milengiis a chutem er a miltemall el beluu er a Babilon a mla metik a bebil el babier el milluches er sel taem er a longedereder a Nebukadnesar II. Ngii el babier a llechukl a ngklir a re mle kelebus me a rebebil el mle uduudel el kirel aike el lousbech. A “Yaukin [Jehoiakin], el king er a beluu er a Yahud (Juda)” me a rechad er a blil a dirrek el mle llechukl a ngklir er ngii el babier. E ngike el ongingil el king el Ebilmerodak, ngmera el mle chad er a irechar? Te miltik er a bekai er bita er a mats er a Susa el blotk er a tekoi el kmo: “Blil a king el Amil-Marduk [Ebilmerodak], el King er a Babilon, el ngelekel a Nebukadnesar el King er a Babilon.”
NGERA ULDESUEM? Ngar er ngii a lmuut el ta er a babier er a klechelid el ulterekokl el melemalt a tekoi er a reksi el ngar er a chelsel? Me a lechub e ngdi ta el Biblia a uaisei?
[Blurb el ngar er a 5 el llel]
“A Biblia a ulterekokl e bleketakl a omesodel sel losaod a taem me a basio el kirel a tekoi el dilubech, el diak el ua ngii di el babier er a irechar.”—A SCIENTIFIC INVESTIGATION OF THE OLD TESTAMENT, BY ROBERT D. WILSON
[Siasing el ngar er a 5 el llel]
A BABIER ER A IRECHAR EL LLECHUKL A NGKLEL A KING EL JEHOIAKIN ER A JUDA
[Credit Line]
© bpk, Berlin/Vorderasiatisches Museum, SMB/Olaf M. Tessmer/Art Resource, NY