Ngar er Ngii a Klechelid el Rredemelel a Klaumerang er Kid?

A lsekum a ta er a klechelid a mla tomellii a rengum, e nglocha mo meringel er kau a oumerang a ngii di el klechelid. Engdi bo modengei el kmo ngar er ngii a klechelid el sebechem el oumerang er ngii. A Jesus er a lengar er a chutem, e ngmilengudel er a reblak a rengrir el chad el uleltirakl er ngii e ulsisecheklterir el mo kiei el oltirakl a llechul a Dios. A remera el oltirakl er a Kristus, el tir a kerekikl el oltirakl a omellach er a Rekristiano, a sebeched el metik er tir er chelechang. Ngsebeched el metik er tir er ker?

A Estelle, el dulsaod er ngii er a uchei a kmo: “Ak mlo omuchel el mesuub er a Biblia er sera kusuub el obengterir a Resioning er a Jehovah. Ak di mle mereched el mo medengelii a belkul a Johanes 8:​32 el kmo: ‘Kom mo medengelii a klemerang, ma klemerang a ngubetemiu el mo diak msibai.’”

A Ray, el dirrek el dulsaod er ngii er a uchei a kmo: “Ngoeak a omesubek el obengterir a Resioning er a Jehovah, e ak silubii el kmo a Dios a diak el uchul a ringel er a klechad. Ngmlo sebechek el mesa el kmo alta Dios a ngar er ngii a ungil el uchul e ngomechei a chelebirukel er chelechang, engdi ngtibir el kmo ngdi kmedung e ngmo okngemedii.”

Alta ngmeringel er kid a meruul a melemalt el tekoi sel sekum a ruumesingd el chad a diak el loltirakl a tekoi er a kldung, engdi ngsebeched el meruul el uaisei. A rebetok el chad a sorir el mo medengelii a Biblia e oltaut a tekoi el losuub. Sei a uchul me a Resioning er a Jehovah a mesuub a Biblia el obengterir a rebetok el miliol el meliuekl er a beluulechad el diak locheraol. A bek el sandei, e te betok a mesuub el kmo ngerang mera el lolisechakl a Biblia. Tiang a uchul e te olekeed er tir er Ngike el Ulemeob, e mla metik a deurreng er a klengar er tir.a

Sel omluut el mengedecheduch er a Resioning er a Jehovah, e moker er tir er a uchul me te oumerang er a klechelid er tir. Morriter a osisecheklir me bo modengei el kmo te kiei el oltirakl a omellach er a Rekristiano me a lechub e ngdiak. E a uriul e di lekau el melilt el kmo ngar er ngii a klechelid el sebechem el oumerang er ngii me a lechub e ngdiak.