A Ker El Mla Er A Remenguiu

Ngera me a omelebal a mle uchul a ultekengir a recherrouel a Jesus?

Tiang a mle ta er aike el betok el mondai er a recherrouel a Jesus el kmo, ngii me a redisaiplo er ngii a dimlak loruul er ngii. A Llechul a Moses a milsaod a tekoi el rullii a chad me ngmo diak el klikiid. Aikang a uldimukl er a chad el smecher el ngar er ngii a merael er ngii, me a chebedes, me a lechub e te rutechii a ulekoad el charm me a lechub e ngchad. Engdi Llach a milseterir a ulekrael el kmo, ngmekera chad e lmuut el mo klikiid. E tiang a mileketmokl el okiu a omelenget, me a omelechong, me a dirrek el omeliim el bedengir.​—Levitikus 11-15 el bliongel; Ulecherangel 19 el bliongel.

A rechad er a Judea el okedongall el rabbi a dilechel a llecherir. A ta er a babier a mesaod el kmo, te dilechel a betok el mekekerei el llach, e a lsekum e ngdiak el motirakl e a rechad a mo diak el klikiid. Me a chad el mla mo diak el klikiid a dirrek el sebechel el rulleterir a rebebil, me a dirrek el klalo el ngar er bita er tir me ngdirrek el mo diak el klikiid. Ngdirrek el llecherir a rabbi a uluuchais el kmo te mekerang a rechad e lmuut el mo klikiid.

A recherrouel a Jesus a uleker er ngii el kmo: “Ngera ma rubengkem a diak loltirakl a ikal llechud er a rechuodel el mei, e di mengang el diak le klikiid a chimorir?” (Markus 7:5) Tirka el Farisi a dimlak el losaod el kirel a ungil el omengetmeklel a bedenged el okiu a omelebal er a uchei er a lomengur. A re Farisi a rirellii a llach el kmo, a uchei er a lomengur a chad e ngkirel el melebal a ralm er a uchei el oltirakl er a uldedelid el tekoi er a rechuodel. Me tia el osisiu el babier a dilechel el kmo, a rabbi “a dirrek el ulterekeklii el kmo, ngera el olchesobel a lousbech er ngii el olechubel er a ralm, me a ua ngera el ralm a lousbech, me a dirrek el keskelel a chim a kirel el mochubel a ralm er ngii.”

Me ngera mle uldesuel a Jesus el kirel aika el betok el llach el lurruul a rechad? Ngdilu er a remengeteklel a klechelid er a rechad er a Judea el kmo: “Ng kmal meral tekoi a ulochel a Isaia el kiriu el kmo, kemiu a cheblad. Ngdi ua ikel lulluches el kmo: ‘A Dios a dilu el kmo, tirkal chad a di mengull er ngak el olab a tekoi, e a rengrir a kmal cheroid er ngak [el Jehovah]. Ng diak a ultutelel a longull er ngak, ele tolisechakl a llecherir a re chad el ua ia le llechuk!’ Kom mla chemoit a llechul a Dios e olengesenges a osisecheklir a re chad.”​—Markus 7:6-8.