A Tetragrammaton, el ileakl el ngklel a Dios el Jehovah, el llechukl el tekoi er a Hebru, el donguiu er ngii lomuchel er a kadikm el mo er a katur
A Klou el Omelisiich el Mengai er a Kot el Kekerei el Llechukl el Tekoi er a Hebru
Kid, ngsebechel mo ulterekokl a rengud el kmo a rokui el telbilel a Dios a di mo tmaut? A Jesus a uaisei el kmal mle ulterekokl a rengul, me a osisecheklel a millisiich a klaumerang er tirke el ulerrenges er ngii. Ka molatk er a okesiu el ledillii er sel Cheldecheduch el Ngar er a Rois el llechukl er a Mateus 5:18 el kmo: “Ak meral dmu er kemiu el kmo a klteketel el le ngar ngii a eanged ma beluulchad e ng diak a di telkib er a ikel tekoi er a Llach el mo mesuld el dimerkmo bo letaut a rokui el tekoi.”
Me a kot el kekerei el llechukl el tekoi er a Hebru a י (yod), el ngii a kot el llechukl er a Tetragrammaton, el ileakl el ngklel a Dios el Jehovah.a Me a lmuut el tang, tirke el chellimosk er a llach me a Refarisee a ulemes er tia el tekoi me aike el mla meluches el Llechul a Dios el “kmal di kekerei el llechukl” engdi ngkmal meklou a ultutelel.
A Jesus a dilu el kmo, a klteketel el le ngar er ngii a eanged me a beluulechad e ngdiak a di telkib er aike el tekoi er a Llach el mo mesuld el dimerkmo bo letaut a rokui el tekoi. Me nguaisei, engdi a Bades a oterekokl a rengud el kmo tia el eanged me a chutem a di melemolem el mo cherechar. (Psalm 78:69) Me tia el mesisiich el tekoi a meketeklii el kmo, ngmo lmuut er a kot el kekerei el tekoi er a Llach me ngdi mo tmaut.
Me a Jehovah el Dios, ngkerekikl el kirel a mekekerei el tekoi? Ochoi, ngkmal kerekikl. Ka molatk er tiang: A rechad er a Israel er a irechar a mluchelechel el kmo, ngdiak el kirir el mengam a chiuesel a sib er a Baskua. (Exodus 12:46) E tiang a ua lekekerei el tekoi. Te mle medengelii a uchul me ngdiak el kirir el mengam a ngii di el chiuis? Nglocha dimlak. A Jehovah el Dios a mle medengei el kmo tia el tekoi a ulaoch el kirel a kmo, a Mesias a kmal diak a ta el bo lemecham a chiuesel sel lemad el kltekotel er a teluo el kerrekar.—Psalm 34:20; Johanes 19:31-33, 36.
Me a tekingel a Jesus, ngosisecheklid er a ngerang? Ngoterekeklii a rengud el kmo a rokui el telbilel a Jehovah el Dios a mo tmaut, el mo lmuut er aike el kot el mekekerei el tekoi. Me ngmera el uchul a klou el omelisiich tia el kot el kekerei el tekoi er a Hebru!
a Me a kot el kekerei el llechukl el tekoi er a Grik el iota a dirrek el di osisiu er sel tekoi er a Hebru el י (yod). Me a Llach er a Moses a milluches el uluusbech a tekoi er a Hebru e millemolem el ousbech aika el tekoi. Me a Jesus er sera longedecheduch e nglocha milsaod el kirel a babier el llechukl el tekoi er a Hebru.